Te Muamua Nofoaiga Tupu
10 I te taimi tenā, a tino Filisitia ne taua atu ki tino Isalaelu. Kae ko tāgata Isalaelu ne ‵tele kea‵tea mai tino Filisitia, kae tokouke a tino ne ‵mate i te Mauga o Kilipoa.+ 2 Ne fakapili‵pili atu faeloa a tino Filisitia ki a Saulo mo ana tama tāgata, kae ne tamate ne tino Filisitia a Ionatana, Apinatapu mo Malekisua,+ ko tama tāgata a Saulo. 3 Ne gasolo aka eiloa o malosi te taua ki a Saulo, kae ne maua a ia ne tino sana matasana kae ne pakia a ia i matasana a tino sana.+ 4 Tenā ne fai atu ei a Saulo ki tena tino ave meatau: “Tapale tau pelu o ‵suki au ki ei, ko te mea ke se o‵mai a tāgata seki pilitome konei o fai fakamasei+ au.” Kae ko tena tino ave meatau e se manako ke fai ne ia te mea tenā me ne mataku malosi a ia. Tenā ne puke ei ne Saulo te pelu kae fakasiga ki luga i ei.+ 5 I te laveaga ne tena tino ave meatau i a Saulo ko mate, ne fakasiga foki a ia ki luga i tena pelu mate ei a ia. 6 Tenā ne ‵mate tasi ei a Saulo mo ana tama tāgata e tokotolu mo tino katoa i tena kāiga.+ 7 I te taimi ne lavea ei ne tino Isalaelu katoa i te vanu me ko ‵tele kea‵tea a tino katoa kae ko Saulo mo ana tama tāgata ko ‵mate, ne kamata o tiaki ne latou a olotou fakai kae ‵tele kea‵tea; tenā ne o‵mai ei a tino Filisitia o ‵nofo i ei.
8 I te suā aso, ne olo a tino Filisitia o puke a mea a tāgata kolā ne ‵mate i te taua, ne maua ne latou a Saulo mo ana tama tāgata e ‵mate i luga i te Mauga o Kilipoa.+ 9 Ne tapale ne latou ana gatu kae ‵kati kea‵tea tena ulu kae tapale tena gatu tau, kae fakailoa atu ki te fenua kātoa o tino Filisitia ke fakasalalau te tala tenā ki olotou tupua+ mo olotou tino. 10 Tenā ne tuku ei ne latou tena gatu tau i loto i te fale* o te lotou atua kae fakatautau tena gatiulupoko i te fale o Takono.+
11 I te ‵logoga o tino Iapese+ katoa i Kileata i mea katoa ne fai ne tino Filisitia ki a Saulo,+ 12 ne ‵tu aka a tāgata ‵toa katoa o sau te foitino o Saulo mo foitino o ana tama tāgata. Ne avatu ne latou ki Iapese kae tanu olotou ivi i lalo o te lakau lasi i Iapese,+ kae ne fakaliki‵liki latou i aso e fitu.
13 Ne mate a Saulo ona ko tena sē fakamaoni ki a Ieova me ne seki fakalogo a ia ki te fakatonuga a Ieova,+ kae ne fesokotaki atu foki ki se tino e fesokotaki mo agaga+ 14 i lō te fesokotaki atu ki a Ieova. Tenā ne tamate ei ne Ia tou tagata kae tuku atu te pulega fakatupu ki a Tavita te tama tagata a Iese.+