Eseta

8 I te aso tenā, ne tuku atu ei ne te Tupu ko Asuelu a mea katoa a Hamanu,+ te fili o tino Iutaia,+ ki te Tupu Fafine ko Eseta; kae ne fanatu a Moletekai ki mua o te tupu me ko oti ne fakaasi ne Eseta te auala e kāiga ei a ia mo tou tagata.+ 2 Tenā ne tapale ei ne te tupu a tena mama fakamailoga+ telā ne ‵fao ne ia mai i a Hamanu kae tuku atu ki a Moletekai. Kae ne fai ne Eseta a Moletekai ke pule i mea katoa a Hamanu.+

3 E se gata i ei, ne toe faipati atu a Eseta ki te tupu. Ne totuli ifo tou fafine ki lalo kae tagi kae fakamolemole atu ki a ia ke taofi aka a te mea masei ne fai ne Hamanu te tino Akako mo tena togafiti ne fai ki tino Iutaia.+ 4 Ne sisi aka te tokotoko aulo o te tupu ki a Eseta,+ tenā ne tu aka ei a Eseta i mua o te tupu. 5 Ne fai atu tou fafine: “Kafai e fiafia ki ei te tupu kae talia ne ia au, kae kafai e ‵lei ki te tupu kae fiafia a ia ki a au, ke tusi la se fakatonuga ke fakaseaoga i ei a tusi a te tagata faitogafiti ko Hamanu+ te tama tagata a Hametata te tino Akako,+ telā ne tusi ne ia ke ‵ta fakapalele a tino Iutaia i kogā fenua katoa o te tupu. 6 E mafai pefea o kilo atu au ki te puapuaga telā ka oko ki oku tino, kae e mafai pefea o kilo atu au ki te fakaseaiga o oku kāiga?”

7 Ne fai atu te Tupu ko Asuelu ki te Tupu Fafine ko Eseta mo Moletekai te tino Iutaia: “Kiloke! Ko oti ne tuku ne au a mea katoa a Hamanu ki a Eseta+ kae ko oti ne fakatautau a ia i te pou+ ona ko tena togafiti ke fakaseai atu a tino Iutaia. 8 Ko mafai nei ne koe o tusi i te igoa o te tupu so se mea telā e ‵lei ki a koe mō tino Iutaia kae fakamailoga ki te mama fakamailoga a te tupu, me i so se fakatonuga telā e tusi i te igoa o te tupu kae fakamailoga ki te mama fakamailoga a te tupu e se mafai o fakaseaogagina.”+

9 Ne ‵kami mai a failautusi a te tupu i te taimi tenā i te tolu o masina, telā ko te masina o Sivani,* i te po 23, kae tusi ne latou ki lalo a fakatonuga katoa a Moletekai ki tino Iutaia, e pelā foki ki tino pule,+ kovana mo pelenise o kogā fenua+ mai Initia ke oko ki Aitiope, e 127 kogā fenua, i tusitusiga a kogā fenua takitasi mo olotou ‵gana kae ki tino Iutaia i te lotou tusitusiga mo te lotou ‵gana.

10 Ne tusi ne ia i te igoa o te Tupu ko Asuelu kae fakamailoga ki te mama fakamailoga+ a te tupu kae avatu a tusi konā e auala i avefekau kolā e ‵tele i solofanua; e ‵tele latou i solofanua ma‵kini kolā ne tausi faka‵lei mo fai a galuega a te tupu. 11 I tusi konei ne tuku atu ne te tupu a te saolotoga ki tino Iutaia i fakai kese‵kese katoa ke maopoopo fakatasi latou o puipui olotou ola kae ke ‵ta fakapalele, tamate, kae fakaseai atu so se kautau io me se kogā fenua e taumafai o taua atu ki a latou, e aofia i ei a fāfine mo tama‵liki, kae ke puke olotou kope.+ 12 E ‵tau o tupu te mea tenei i te aso e tasi i kogā fenua katoa o te Tupu ko Asuelu, i te po 13 o te 12 o masina, telā ko te masina o Atala.*+ 13 A te tusi tenā e fai pelā me se tulafono i kogā fenua katoa. E ‵tau o fakasalalau atu ki tino katoa, ko te mea ke toka a tino Iutaia i te aso tenā o taua atu ki olotou fili.+ 14 A avefekau kolā e ‵tele i solofanua kolā e fakaaoga mo fai a galuega a te tupu ne olo fakavave atu ona ko te fakatonuga a te tupu. Ne fai foki a te tulafono tenā i Susana*+ te taoa malosi.*

15 Ne fano ki tua a Moletekai mai te tupu kae pei ki gatu fakatupu lanu moana kae ‵kena, mo tena kalauna aulo, mo tena gatu ‵loa ne fai ki vulu lanu violeta.+ Kae ne paka‵laga mo te fia‵fia a tino i te fakai o Susana.* 16 Ki tino Iutaia ne maua ne latou se fakatapūga* mo te fiafia mo se tulaga maluga kae fakaaloalogina. 17 Kae i kogā fenua katoa mo fakai katoa, i so se koga e oko ki ei te fakatonuga mo te tulafono a te tupu, ne fia‵fia faeloa a tino Iutaia kae ‵lifu, ne fai ‵kaiga kae fia‵fia. E tokouke a tino o te fenua ne fai atu i a latou ne tino Iutaia,+ me ko ma‵taku latou i tino Iutaia.