Iopu
20 Ne tali atu penei a Sofala+ te tino Naama:
2 “E fakamalosi aka au ne te sē toka o toku mafaufau ke tali atu
Ona ko mea e manavase au ki ei.
3 Ko oti ne lagona ne au a pati polopoloki kolā e fakamasei mai ki a au;
Kae e fakamalosi mai toku malamalama ke tali atu au.
4 Se mea mautinoa me e ‵tau o iloa ne koe te mea tenei,
Me ne fai eiloa penā talu mai te taimi ne tuku ei te tagata* ki te lalolagi,+
5 Me i te ‵tagi fiafia o te tino masei e toetoe fua
6 E tiga eiloa e fanaka tena maluga ki te lagi
Kae oko atu tena ulu ki kaumana,
7 Ka mate a ia ki te se-gata-mai e pelā eiloa mo ana fekau;
A tino kolā ne lavea sāle ne latou a ia ka fai aka, ‘Tefea a ia?’
8 Ka eva kea‵tea a ia e pelā me se moemiti, kae ka se maua ne latou a ia;
Ka afuli kea‵tea a ia e pelā me se fakaasiga i te po.
9 A te mata telā ne kilo sāle atu ki a ia ka se toe fai penā,
Kae ka se toe lavea foki a ia ne te koga ne nofo a ia i ei.+
10 Ana tama tāgata ka ‵sala ki te taliaga a tino ma‵tiva,
Kae ko ana lima eiloa ka toe fakafoki mai ne ia tena maumea.+
11 E ‵fonu ana ivi i te malosi e pelā mo te taimi ne talavou ei,
Kae ko te mea tenā* ka takato fakatasi mo ia ki lalo i te ‵pefu.
12 Kafai a te mea masei e magalo ki tena gutu,
Kafai e ‵funa ne ia mai lalo i tena alelo,
13 Kafai e kaikai malie ne ia kae e se folo
Kae taofi eiloa i loto i tena gutu,
14 Ana meakai ka ‵kona i loto i a ia;
Ka fai pelā mo te poisini* o te gata i loto i a ia.
15 Ko oti ne folo ne ia a te maumea, kae ka luaki mai ne ia;
Ka faka‵ma ne te Atua a te mea tenā mai loto i tena tinae.
16 A mea poisini o gata ka ‵miti ne ia;
Ka mate a ia i nifo* o te gata poisini.
17 Ka se lavea eiloa ne ia a tamā vaitafe,
Te ‵tafe malosi mai o hani mo pata.
18 Ka toe fakafoki ne ia ana mea e aunoa mo te fakaaoga ne ia;*
Ka se fakaaoga ne ia ana maumea mai i ana mea ne fakatau atu.+
19 Me ko oti ne tuki palapala kae tuku tiaki ne ia a tino ma‵tiva;
Ne puke ne ia se fale telā ne seki faite ne ia.
20 Kae ka se lagona ne ia te filemu i loto i a ia;
A tena maumea ka se fesoasoani atu ke sao a ia.
21 E seai se mea e ‵toe mai ke kai ne ia;
Tenā te pogai ka se tumau ei a tena manuia.
22 Kafai ko oko eiloa a ia i te maumea, ka pule atu ki a ia a te manavase;
Ka oko atu ki a ia a te malosi kātoa o te puapuaga.
23 I te taimi e faka‵fonu ei ne ia tena tinae,
Ka uga mai ne te Atua* a tena kaitaua telā e ‵ka pelā me se afi ki luga i a ia,
Ke ‵to e pelā me se vaiua ki loto i ana gakau.
24 Kafai e tele a ia kea‵tea mai meatau fiti,
Ka tu a ia i matasana mai i se kausana kopa.
25 Ka ‵futi ne ia se matasana mai tena tua,
Se meatau malapulapu mai tena au,
Kae oko atu ki a ia te mataku.+
26 A te pouli tagataga e faka‵tali mai ki ana koloa;
Ka ‵ka a ia i se afi telā e seki fue ne se tino;
A te puapuaga e faka‵tali mai ki so se tino telā ne sao i tena faleie.
27 Ka fakaasi mai ne te lagi a tena mea ‵se;
A te lalolagi ka tu aka o ‵teke atu ki a ia.
28 Ka ‵tafe kea‵tea a tena fale i se lofiaga;
Ka fai e pelā me se tafeaga lasi eiloa i te aso o te kaitaua o te Atua.
29 Tenei te tusaga o te tagata masei mai te Atua,
Ko te tofi ne tuku mai ne te Atua ki a ia.”