Esekielu

12 Ne toe oko mai te fekau a Ieova ki a au, ana muna: 2 “Te tama a te tagata, a koe e nofo i se kāiga ‵teke. E isi ne olotou mata o ‵kilo, kae e se lavea ne latou, mo olotou taliga o faka‵logo, kae e se lagona ne latou,+ me i a latou se kāiga ‵teke.+ 3 Kae e pelā mo koe, e te tama a te tagata, fakatoka ou kope e pelā me se tino ka ave fakapagota. Tenā ko fano ei koe i te ao, i te taimi e kilo‵kilo mai ei latou, e pelā me se tino ko ave fakapagota. Fano mai tou fale ki se isi koga i te taimi e kilo‵kilo mai ei latou, faitalia me i a latou se kāiga ‵teke. 4 Puke mai ou kope ki tua e pelā me ko ave fakapagota i te ao kae ke kilo‵kilo mai latou, kae i te afiafi i te taimi e kilo‵kilo mai ei latou, e ‵tau o fano koe e pelā me se tino ko ave fakapagota.+

5 “I te taimi e kilo‵kilo mai ei latou, fakapū se pūga i te ‵pui, kae sau ki tua ou kope i loto i ei.+ 6 I te taimi e kilo‵kilo mai ei latou, tuku ou kope ki ou tuauma kae amo a mea konā ki tua i te pouliga. Pulou ou mata ko te mea ke se lavea ne koe te laukele, me ko fai ne au koe e pelā me se fakailoga ki te kāiga o Isalaelu.”+

7 Ne fai eiloa ne au te mea ne fakatonu mai ki a au. I te ao ne aumai ne au oku kope e pelā me ko ave fakapagota au, kae i te afiafi ne fakapū ne au se pūga i te ‵pui ki oku lima. Kae i te taimi ko pouli ei, ne puke ne au oku kope, amo ki oku tuauma i mua eiloa o latou.

8 I te tafataeao ne toe oko mai te fekau a Ieova ki a au, ana muna: 9 “Te tama a te tagata, e a, e seki fesili atu a te kāiga o Isalaelu, te kāiga ‵teke ki a koe, ‘Ne a au mea e fai?’ 10 Fai atu ki a latou, ‘Konei a pati a te Aliki Sili ko Ieova ne fai mai: “A te folafolaga tenei e fakasino atu ki te takitaki+ i Ielusalema mo kāiga katoa o Isalaelu i loto i te fakai.”’

11 “Fai atu, ‘Au ko te fakailoga mō koutou.+ A te mea ko oti ne fai ne au, ko te mea eiloa tenā ka fai ki a latou. Ka ave kea‵tea latou, ka ave fakapagota.+ 12 A te takitaki i a latou ka amo ana kope i tena tuauma kae fano i te pouliga. Ka fakapū ne ia se pūga i te ‵pui kae amo ana kope i loto i ei o fano ki tua.+ Ka pulou ne ia ana mata ko te mea ke se lavea ne ia te laukele.’ 13 Ka ‵pei ne au taku tili i luga i a ia, kae ka ‵poa a ia i loto i taku tili.+ Tenā ko aumai ei ne au a ia ki Papelonia, ki te fenua o tino Kaletaia, kae ka se lavea ne ia; kae ka mate a ia i konā.+ 14 Kae ko tino katoa i ana tafa, ana tino fesoasoani mo ana kautau, ka fakasalalau atu ne au ki feitu katoa;+ kae ka tapale ne au se pelu ke afuli ei latou.+ 15 Kae ka iloa ei ne latou i a au ko Ieova māfai ko fakasalalau ne au latou ki nisi atufenua, kae vaevae atu latou ki nisi fenua. 16 Kae ka faka‵toe ne au a nisi i a latou mai te pelu, te oge, mo te famai, ko te mea ke mafai o fakailoa atu ne latou olotou faifaiga fakatakalia‵lia ki nisi atufenua e olo latou ki ei; kae ka iloa ei ne latou i a au ko Ieova.”

17 Kae ne toe oko mai te fekau a Ieova ki a au, ana muna: 18 “Te tama a te tagata, e ‵tau mo koe o kai au meakai mo te polepole kae inu ki vai mo te fanoanoa mo te manavase.+ 19 Fai atu ki tino o te fenua, ‘Konei a pati a te Aliki Sili ko Ieova ne fai ki tino e ‵nofo i Ielusalema i te fenua o Isalaelu: “Ka ‵kai olotou meakai mo te manava‵se kae inu olotou vai mo te ma‵taku, me i te lotou fenua ka fakamasei katoatoa+ ona ko amioga fakasaua a tino kolā e ‵nofo i ei.+ 20 A fakai kolā e ‵nofo i ei a tino ka fakamaseigina, kae ko te laukele ka fai pelā me se laukele sē aoga;+ kae ka iloa ei ne koutou i a au ko Ieova.”’”+

21 Kae ne toe oko mai te fekau a Ieova ki a au, ana muna: 22 “Te tama a te tagata, se a te faigamuna telā e fai i loto i Isalaelu penei, ‘E ‵teka atu a aso, kae ko fakaasiga katoa e iku atu ki te seai’?+ 23 Tela la, fai atu ki a latou, ‘Konei a pati a te Aliki Sili ko Ieova ne fai mai: “Ka fakagata ne au a te tugapati tenei, kae ka se toe fakaaoga eiloa ne latou e pelā me se faigamuna i Isalaelu.”’ Kae fai atu ki a latou, ‘Ko pili mai a aso,+ kae ka fakataunu ei a fakaasiga katoa.’ 24 Me ka se toe ai eiloa ne fakaasiga sē ‵tonu io me ne mea fakataulaitu fakaloiloi i loto i te kāiga o Isalaelu.+ 25 ‘“Me i a au, Ieova, ka faipati. So se pati e faipati ne au ka fakataunu eiloa e aunoa mo te fakatalave.+ I otou aso,+ e te kāiga ‵teke, ka fai ne au te pati kae fakataunu foki ne au,” ko te folafolaga a te Aliki Sili ko Ieova.’”

26 Ne toe oko mai te fekau a Ieova ki a au, ana muna: 27 “Te tama a te tagata, konei a pati a tino Isalaelu e fai, ‘A te fakaasiga ne lavea ne ia se mea mō se taimi leva mai i te taimi nei, kae ko ‵valo mai a ia e uiga ki aso mai mua kolā e seki taitai o oko mai.’+ 28 Tela la, fai atu ki a latou, ‘Konei a pati a te Aliki Sili ko Ieova ne fai mai: “‘So se pati e fai ne au ka taunu, ka se fakatalave eiloa,’ ko te folafolaga a te Aliki Sili ko Ieova.”’”