Hosea
5 “Faka‵logo mai ki te mea tenei, koutou e faitaulaga,+
‵Saga tonu mai, e te kāiga o Isalaelu,
Faka‵logo mai, e te kāiga o te tupu,
Me i a koutou e aofia i te fakamasinoga;
Me i a koutou se matasele ki Mesepa
Kae se tili telā ne ‵fola i luga o Tapola.+
2 A latou katoa kolā ko ‵to kea‵tea* ko ‵goto malosi ki lalo* i te tatino,
Kae ko tuku atu ne au te fakailoaga* ki a latou katoa.
3 E iloa ne au a Efalaima,
Kae ko Isalaelu e se ‵muni mai i a au.
Me nei la, e Efalaima, ko oti ne fai ne koe a amioga fakatauavaga fakatasi mo tino kese‵kese;*
Ko oti ne fakalailai ne Isalaelu a ia eiloa.+
4 Ko se talia ke toe ‵foki mai latou ki te lotou Atua ona ko olotou faifaiga,
Me e isi se agaga o faifaiga talitāgata* i a latou;+
Kae e se amanaia latou ki a Ieova.
5 A te fakamatamata o Isalaelu ko fai pelā me se molimau ‵teke ki a ia;+
A Isalaelu mo Efalaima ko oti ne pa‵kū i te lotou mea ‵se,
Kae ne pa‵kū fakatasi latou mo Iuta.+
6 Ne olo atu latou o ‵sala a Ieova fakatasi mo olotou lafu mamoe mo lafu manu,
Kae ne seki mafai o maua ne latou a ia.
Ko oti ne fano kea‵tea a ia mai i a latou.+
7 Ko oti ne fakatogafiti ne latou a Ieova,+
Me ko oti ne fai latou mo tamana o tama fakaa‵tea.
I loto i se masina ka fakaseai atu latou mo olotou vaega.*
8 Ili aka se pu+ i Kipea, se pu fakatagitagi i Lama!+
Kalaga atu te kalaga o te taua i Petavene+—e olo atu matou i otou tua, e Peniamina!
9 Efalaima, ka fai koe e pelā me se mea fakamataku i te aso o te fakasalaga.+
Ko oti ne fakailoa atu ne au a te mea telā ka tupu ki matakāiga o Isalaelu.
10 A pelenise o Iuta ko pelā mo latou kolā e fakagasue se tuakoi.+
Ka ‵ligi ne au toku kaitaua ki luga i a latou e pelā me ne vai.
11 A Efalaima ko puapuaga, ko mafatia ona ko te fakamasinoga,
Me ne fakaiku aka ne ia ke tautali atu i tua o tena fili.+
12 Tela la, ne fai au e pelā me se anufe ki Efalaima
Kae pelā me se mea pala ki te kāiga o Iuta.
13 I te laveaga ne Efalaima tena masaki, mo te laveaga ne Iuta tena pakiaga,
Ne fano a Efalaima ki Asulia+ kae uga atu se avefekau ki te tupu sili.
Kae ne seki mafai ne ia o faka‵lei koutou,
Kae e se mafai o faka‵lei aka ne ia te otou pakiaga.
14 Me ka fai au e pelā me se tamā leona ki Efalaima,
Kae pelā me se leona mafi ki te kāiga o Iuta.
Ka saesae likiliki ne au kae fano kea‵tea;+
Ka ave kea‵tea ne au latou, kae seai se tino ka faka‵sao ne ia latou.+
15 Au ka fano kea‵tea kae ka toe foki mai ki toku koga ke oko ki te taimi ko oko atu ei ki a latou a ikuga o olotou mea ‵se,
Kae ka ‵sala mai latou ki taku taliaga.+
Kafai ko puapuaga latou, ka ‵sala mai latou ki a au.”+