Hosea
7 “I te taimi e faka‵lei ei ne au a Isalaelu,
Ka fakaasi faka‵sau atu foki i ei a te mea ‵se a Efalaima,+
Mo amioga ma‵sei a Samalia.+
Me ne fai ne latou a faifaiga ‵loi;+
A tino kai‵soa ne olo o kai‵soa kae ko potukau o tino ‵fao mea e taua i tua.+
2 Kae e se fai ifo latou i olotou loto eiloa me ka masaua ne au olotou amioga ma‵sei.+
Nei la, ko fakatamilo latou ne olotou faifaiga matagā;
Ko ‵tu eiloa a mea konā i oku mua.
3 E fai ne latou te tupu ke fiafia e auala i olotou amioga ma‵sei,
Mo pelenise e auala i olotou loi.
4 A latou katoa ne tino mulilua,
E ‵ka pelā me se ogaumu e faka‵ka ne se tino tao falaoa,
Telā e taofi ne ia te tafuga o te afi ma oti ne lomi ne ia tena palugā falaoa ke oko ki te taimi e ‵fete ei.
5 I te aso fiafia o te motou tupu, ne ma‵saki a pelenise
—Ne kaitāua malosi latou ona ko te uaina.+
Ko oti ne fakaoko atu ne ia tena lima ki tino fakatauemu.
6 Me ne fakapili‵pili atu latou mo olotou loto e ‵ka eiloa e pelā me se ogaumu.
A te tino tao falaoa e moe i te po kātoa;
I te tafataeao a te ogaumu e ula eiloa e pelā me se afi ‵ka ulaula.
7 A latou katoa e ‵vela e pelā me se ogaumu,
Kae e fakaseai ne latou olotou pule.
8 E ‵kau fakatasi a Efalaima mo atufenua.+
A Efalaima e pelā me se keke pukupuku telā e seki ‵fuli eiloa.
9 A tena malosi ko oti ne ave ki tino fakaa‵tea,+ kae e se iloa ne ia.
Kae ko ana laulu sinā ko fai ei ke ‵kena tena ulu, kae e se iloa ne ia.
10 A te fakamatamata o Isalaelu ko molimau o ‵teke ki a ia,+
Kae ne seki ‵fuli atu eiloa latou ki a Ieova te lotou Atua,+
Io me ne ‵sala atu latou ki a ia faitalia a mea katoa konei.
11 A Efalaima e pelā me se lupe valea, e se lava te faka‵tau.+
Ne ka‵laga latou ki Aikupito,+ ne olo atu latou ki Asulia.+
12 I so se koga e olo latou i ei, ka ‵fola ne au taku tili mai luga o latou.
Ka tuku ifo ne au latou e pelā mo manu eva o te lagi.
Ka polopoloki ne au latou e ‵tusa mo fakailoaga ne tuku atu ki te lotou fakapotopotoga.+
13 Ka‵lofa eiloa i a latou, me ko ‵tele kea‵tea mai i a au!
Ko oko ki a latou te fakamaseiga, me ne soli ne latou aku tulafono!
Au ne toka o faka‵sao latou, kae ko latou ne fai‵pati ki mea ‵loi o ‵teke mai ki a au.+
14 Ne seki ka‵laga mai latou ki a au mai i olotou loto mō se fesoasoani,+
Faitalia me ne ‵tagi fanoa‵noa faeloa latou i olotou moega.
E katikati ne latou a latou eiloa ona ko olotou saito mo uaina ‵fou;
Ne fulitua mai latou ki a au.
15 E tiga eiloa ne polopoloki ne au latou kae fakamalosi olotou lima,
E ‵teke mai latou ki a au, kae faitogafiti ma‵sei.
16 Ne ‵fuli olotou auala, kae e se ki se mea tai maluga atu;
E se fakatuagagina latou e pelā eiloa me se kausana pikopiko.+
Ka pa‵kū olotou pelenise e auala i te pelu ona ko olotou pati ‵teke.
Ona ko te mea tenei ka fai latou e pelā me se mea fakatauemu i te fenua o Aikupito.”+