Iona

1 Ne oko mai te fekau a Ieova ki a Iona*+ te tama tagata a Amitai, ana muna: 2 “Tu ki luga, fano ki Nineva+ te fakai lasi, kae folafola atu tena fakamasinoga, me ko saga atu au ki olotou amioga ma‵sei.”

3 Kae ko Iona ne tu aka kae tele kea‵tea mai i a Ieova o fano ki Talasisi. Ne fanaifo a ia ki Iopa kae maua ne ia se vaka e fano ki Talasisi. Tenā ne ‵togi ei tena pasese kae sopo ki luga o olo fakatasi mo latou ki Talasisi, ke ‵mao kea‵tea mai i a Ieova.

4 Tenā ne fai ei ne Ieova ke agi se matagi malosi i te tai, kae ne poko se afā lasi i te tai kae ko te vaka ko pili eiloa o kasa. 5 Ne ma‵taku malosi a kauvaka, tenā ne kamata ei o ka‵laga atu a tino taki tokotasi ki olotou atua mō se fesoasoani. Kae ne kamata o laku ne latou ki lalo i te tai a mea o te vaka ko te mea ke fakamāmā ei te vaka.+ Kae ko Iona ne fanaifo ki te koga tafa ki lalo o te vaka, ne takato i ei kae tō tena moe. 6 Ne fanatu te kapeni o te vaka kae fai atu ki a ia: “Kaia e moe ei koe? Tu ki luga, kalaga atu ki tou atua! E se taumate ka fakaasi mai ne te Atua tonu a tena alofa ki a tatou, kae ka se ‵mate tatou.”+

7 Tenā ne fai aka ei latou te suā tino ki te suā tino: “O‵mai ke fai ne tatou se vili+ ke iloa aka me ko oi e ‵tau o ‵losi atu ki ei te fakalavelave tenei.” Tenā ne fai ei ne latou te vili, kae ne tu atu te vili ki a Iona.+ 8 Ne fai atu latou ki a ia: “Fakamolemole fai mai ki a matou, ko oi e ‵tau o ‵losi atu ki ei te fakalavelave tenei ko oko mai ki a tatou? Se a tau galuega, kae ko koe ne vau mai i fea? Ko oi tou fenua, kae ko koe se tino mai i fea?”

9 Ne tali atu a ia: “Au se tino Epelu, kae ko au e mataku* ki a Ieova te Atua o te lagi, ko te Atua telā ne faite ne ia te tai mo te laukele malō.”

10 Ona ko te mea tenei ne ma‵taku malosi a tāgata, kae fesili atu latou ki a ia: “Se a te mea ne fai ne koe?” (Ko iloa ne tāgata konei me i a ia e tele kea‵tea mai i a Ieova, me ko oti ne fai atu ne ia ki a latou.) 11 Ne fai atu latou ki a ia: “Ne a mea e ‵tau o fai ne matou ki a koe ke malū ei te tai?” Me i te tai ko gasolo aka eiloa o sou malosi. 12 Ne tali atu a ia: “Sau aka au kae ‵pei atu ki te tai, kae ka malū te tai; me e iloa ne au me ko au te pogai ko poko ei te afā lasi tenei ki a koutou.” 13 Kae ne taumafai malosi a tāgata o alo te vaka ki uta i te laukele malō, kae e se mafai ne latou me ne gasolo aka eiloa o sou malosi te tai.

14 Tenā ne ka‵laga atu ei latou ki a Ieova kae fai atu: “Aa, nei la, e Ieova, fakamolemole sa fakaseai atu matou ona ko te tagata tenei! Sa ‵losi mai ki a matou a toto o tino kolā e seai ne olotou ‵se, me ne fai ne koe te mea e manako koe ki ei, e Ieova.” 15 Tenā ne sau aka ei ne latou a Iona kae ‵pei atu ki te tai; kae ne gata i ei te sou o te tai. 16 Ne ma‵taku malosi a tāgata konei i a Ieova,+ kae ne ofo atu ne latou se taulaga ki a Ieova kae tauto atu me ka tavini latou ki a ia.

17 Ne uga mai ne Ieova se ika lasi ke folo ne ia a Iona, tenā ne nofo ei a Iona i loto i te tinae o te ika i ao e tolu mo po e tolu.+