Se a te Papatisoga?

Te tali mai te Tusi Tapu

A te papatisoga e fakasino atu ki se tino e ufi ki lalo i te vai kae toe fanaka mai i ei.a E uke a tala i te Tusi Tapu e uiga ki papatisoga kolā ne fai. (Galuega 2:41) E aofia i ei ko te papatisoga o Iesu, telā ne ufi ki lalo i te Vaitafe ko te Iolitana kae toe fanaka mai ei. (Mataio 3:13, 16) I tausaga fakamuli ifo, ne papatiso se tagata Aitiope “i se vai” telā e pili ki te auala ne faimalaga ei a ia.—Galuega 8:36-40.

Ne akoako mai a Iesu me i te papatisoga se mea e ˋtau o fai ne ana soko. (Mataio 28:19, 20) Ne fakamautinoa mai ne te apositolo ko Petelu a te akoakoga tenā.—1 Petelu 3:21.

I te mataupu tenei

• Se a te uiga o te papatisoga?

• Ne a pati a te Tusi Tapu e uiga ki te papatisoga o pepe?

• Se a te uiga o te papatiso i te igoa o te Tamana, te Tama, mo te agaga tapu?

• E mata, se agasala māfai ko toe papatiso se tino?

• Nisi papatisoga kolā e fakamau i te Tusi Tapu

• Manatu ˋse e uiga ki te papatisoga o Kelisiano

Se a te uiga o te papatisoga?

A te papatisoga se fakaasiga io me se fakailoaga ki tino e tokouke me i te tino telā ka papatiso ko oti ne salamō ki ana agasala, kae ko oti foki ne fai tena tautoga ki te Atua me ka fai ne ia tena loto. E aofia i ei te fakalogo ki te Atua mo Iesu i tena olaga kātoa. A latou kolā e papatiso ko kamata o saˋsale atu i te auala ki te ola se-gata-mai.

A te ufi katoatoa o se tino ki lalo i te vai, se fakailoga ˋlei ke iloa i ei a te ˋfuliga ko oti ne fai ne se tino ki tena olaga. E pefea la? E fakatusa ne te Tusi Tapu a te papatisoga ki te ˋtanuga o se tino telā ko mate. (Loma 6:4; Kolose 2:12) A te ufi katoatoa o se tino ki lalo i te vai, ko fakaasi mai ne te tino me ko mate a ia ki tena olaga mua. Kafai ko fanaka a ia mai te vai, ko fai pelā me ko kamata tena olaga fou e pelā me se Kelisiano tukugina atu.

Ne a pati a te Tusi Tapu e uiga ki te papatisoga o pepe?

E seai se akoakoga i te Tusi Tapu e uiga ki te papatisoga o pepe.b E se akoako mai foki i ei me e ˋtau o papatiso a pepe.

A te papatisoga o pepe e se fetaui mo te Tusi Tapu. E akoako mai i te Tusi Tapu me e isi ne mea kolā e ˋtau o fai ne se tino telā e manako o papatiso. E pelā me se fakaakoakoga, e ˋtau o malamalama a ia i akoakoga fakavae i te Muna a te Atua kae ola e ˋtusa mo akoakoga konā. E ˋtau ko oti ne salamō a ia ki ana agasala kae tuku atu tena ola ki te Atua, e auala i se ˋtalo. (Galuega 2:38, 41; 8:12) E se mafai ne se pepe o fai a mea konei.

Se a te uiga o te papatiso i te igoa o te Tamana, te Tama, mo te agaga tapu?

Ne fakatonu atu a Iesu ki ana soko ke “fai a tino . . .  mo fai a soko, kae papatiso atu latou i te igoa o te Tamana mo te Tama mo te agaga tapu, akoako atu latou ke fakaˋlogo ki mea katoa ne fakatonu atu ne au ki a koutou.” (Mataio 28:19, 20) A te tugapati “i te igoa o” e fakauiga ki te amanaia ne te tino telā ka papatiso a te tulaga mo te pule a te Tamana mo tena Tama, e pelā foki mo te galuega a te agaga tapu o te Atua. E pelā me se fakaakoakoga: Ne fai atu a te apositolo ko Petelu ki se tagata telā ne ˋpili mai i tena fanauga: “I te igoa o Iesu Keliso te Nasaleta, tu ki luga kae sasale!” (Galuega 3:6) E manino ˋlei me ne amanaia a Petelu ki te pule a Keliso, kae ne mafai ei o fakaˋlei fakavavega ne ia te tino masaki.

• “Te Tamana” e fakasino ki a Ieovac te Atua. Ona ko ia ko te Mafuaga, te Tino ne tuku mai ne ia te ola, mo te Atua Malosi Katoatoa, tela la, ko Ieova eiloa te pule katoatoa i mea katoa.—Kenese 17:1; Fakaasiga 4:11.

• “Te Tama” e fakasino ki a Iesu Keliso, telā ne tuku mai tena ola mō tatou. (Loma 6:23) E se mafai o maua ne tatou a te fakaolataga vaganā ke amanaia kae fakatāua ne tatou te tiute tāua o Iesu i te fuafuaga a te Atua mō tino.—Ioane 14:6; 20:31; Galuega 4:8-12.

• “Te agaga tapu” e fakasino ki te malosi galue o te Atua, io me ko tena ˋmana.d Ne fakaaoga ne te Atua a tena agaga tapu ke faite a mea, ke tuku mai te ola, ke fakaoko atu a fekau ki ana pelofeta mo nisi tino, kae ke fakamalosi latou ke fai tena loto. (Kenese 1:2; Iopu 33:4; Loma 15:18, 19) Ne fakaaoga foki ne te Atua te agaga tapu ke fakaosofia a tino tusi te Tusi Tapu ke fakamau ana mafaufauga ki lalo.—2 Petelu 1:21.

E mata, se agasala māfai ko toe papatiso se tino?

E tokouke a tino ko oti ne fakaiku aka ke ˋfuli olotou lotu. Kae e a, māfai ko oti ne papatiso latou i olotou lotu mua? E mata, ka agasala latou māfai ko toe papatiso? E fai mai nisi tino me se agasala, kae fakavae te lotou kilokiloga ki te Efeso 4:5, telā e fai penei: “E tasi te Aliki, e tasi te fakatuanaki, e tasi te papatisoga.” Kae e se fakauiga te tusi faitau tenei me e se mafai o toe papatiso se tino. E iloa pefea ne tatou?

Nisi fuaiupu. E fakaasi mai i nisi fuaiupu i tafa o te Efeso 4:5 me ne fakaˋmafa ne te apositolo ko Paulo me ˋtau mo Kelisiano ˋtonu o ˋkau fakatasi i te lotou talitonuga mo te fakatuanaki. (Efeso 4:1-3, 16) E mafai fua o maua te vaegā ˋkau fakatasi tenā māfai e tauˋtali latou i te Aliki e tokotasi ko Iesu Keliso; e ˋpau te lotou fakatuanaki, io me ko te lotou malamalama i mea e akoako mai i te Tusi Tapu; kae fakaˋlogo ki mea e fakaasi mai i te Tusi Tapu kolā e ˋtau o fai ne se tino ka papatiso.

Ne fakamalosi atu a te apositolo ko Paulo ki nisi tino kolā ko oti ne papatiso, ke toe papatiso. Ne fai penā me ne papatiso muamua latou kae e se malamalama katoatoa i akoakoga faka-Kelisiano.—Galuega 19:1-5.

Te fakavae tonu mō te papatisoga. Ko te mea ke talia ne te Atua te ˋtou papatisoga, e ˋtau eiloa o fakavae ki te iloaga tonu i te Tusi Tapu. (1 Timoteo 2:3, 4) Kafai e fakavae te papatisoga o se tino ki akoakoga fakalotu kolā e ˋteke ki te Tusi Tapu, ka se talia eiloa ne te Atua a te papatisoga tenā. (Ioane 4:23, 24) Faitalia me ne manako tonu te tino tenā ke papatiso a ia, kae ne seki gasuesue a ia e ˋtusa mo te “iloaga tonu.” (Loma 10:2) Ko te mea ke maua ne ia te taliaga a te Atua, e ˋtau o tauloto a ia ki te munatonu i te Tusi Tapu, fakagalue ana mea ne tauloto, tuku atu tena ola ki te Atua, kae toe papatiso. E ˋtusa mo tulaga konei, e se agasala a ia māfai e toe papatiso. A te tonuga loa, tenā eiloa te mea tonu e ˋtau o fai.

Nisi papatisoga kolā e fakamau i te Tusi Tapu

E taku mai i te Tusi Tapu a nisi papatisoga kolā e ˋkese olotou uiga mai te papatisoga telā e ufi katoatoa i ei a soko o Keliso ki lalo i te vai. Mafaufau ki nai fakaakoakoga.

Papatisoga ne fai ne Ioane te Papatiso.e Ne papatiso ne Ioane a tino Iutaia mo tino ne ˋfuli ki te lotu Iutaia, ke fakaasi atu i ei te lotou salaˋmo ki olotou agasala ne fai, kolā ne soli i ei ne latou te Tulafono a Mose—ko te Tulafono ne tuku ne te Atua ki tino Isalaelu e auala i a Mose. A te papatisoga a Ioane ne fakatoka i ei a tino ke amanaia kae ke talia ne latou te Mesia, telā ko Iesu te Nasaleta.—Luka 1:13-17; 3:2, 3; Galuega 19:4.

Papatisoga o Iesu. A te papatisoga o Iesu ne Ioane te Papatiso e ˋkese mai nisi papatisoga. A Iesu se tagata ˋlei katoatoa kae seki agasala eiloa. (1 Petelu 2:21, 22) Tela la, a tena papatisoga e se manakogina ke salamō a ia ki ana agasala io me “fakamolemole atu ki te Atua ke maua se loto lagona ˋlei.” (1 Petelu 3:21) I lō te fai penā, ne fakaasi mai i ei me ko tuku atu ne ia a ia ki te Atua ke fai Tena loto e pelā me ko te Mesia, io me ko te Keliso. Ne aofia i ei a te tukumaiga o tena ola mō tatou.—Epelu 10:7-10.

Papatisoga ki te agaga tapu. Ne faiˋpati katoa a Ioane te Papatiso mo Iesu Keliso e uiga ki te papatisoga ki te agaga tapu. (Mataio 3:11; Luka 3:16; Galuega 1:1-5) E ˋkese a te papatisoga tenā mo te papatisoga i te igoa o te agaga tapu. (Mataio 28:19) Kaia e ˋkese ei?

Se aofaki foliki fua o soko o Iesu e papatiso ki te agaga tapu. A tino konei ne fakaeke ki te agaga tapu me ne filifiligina latou ke tavini fakatasi mo Keliso i te lagi, e pelā me ne faitaulaga mo ne tupu ke pule mai ki te lalolagi.f (1 Petelu 1:3, 4; Fakaasiga 5:9, 10) Ka pule mai latou ki te fia miliona o soko o Iesu kolā e fakamoeˋmoe ke ola ki te se-gata-mai i te lalolagi Palataiso.—Mataio 5:5; Luka 23:43.

Papatisoga ke ˋkau fakatasi mo Keliso Iesu mo tena mate. A latou kolā ne papatiso ki te agaga tapu e ‘papatiso foki ke ˋkau fakatasi mo Keliso Iesu.’ (Loma 6:3) Tela la, a te papatisoga tenei e fai fua ki soko fakaekegina o Iesu, kolā ka pule fakatasi mo ia i te lagi. Mai te papatisoga o latou ke ˋkau fakatasi mo Iesu, ko fai ei latou mo vaega o tena fakapotopotoga telā ne fakaekegina. Ko Iesu te Ulu o te fakapotopotoga tenā, kae ko ana soko fakaekegina e fakasino atu ki te foitino.—1 Kolinito 12:12, 13, 27; Kolose 1:18.

A Kelisiano fakaekegina “ne papatiso foki ki tena mate [o Iesu].” (Loma 6:3, 4) E fakaakoako latou ki a Iesu mai te ola i se olaga fakalogo ki te Atua mo te iloa me ka se maua ne latou te fakamoemoega ke ola ki te se-gata-mai i te lalolagi. E mafai o taunu katoatoa te lotou papatisoga fakatusa māfai ko ˋmate latou kae toe fakaˋtu aka ki te ola i te lagi e pelā me ne tino faka-te-agaga.—Loma 6:5; 1 Kolinito 15:42-44.

Papatisoga ki te afi. Ne fai atu a Ioane te Papatiso ki ana tino fakalogoˋlogo: “Ko ia tenā [Iesu] ka papatiso ne ia koutou ki te agaga tapu mo te afi. Ko puke nei tena sevolo i tena lima kae ka fakaˋma pakipaki ne ia tena fola e fakaˋma ei a saito kae ka fakaputu ne ia ana saito ki loto i te fale saito, kae ˋsunu ne ia a kaiga ki te afi telā e se mafai o mate.” (Mataio 3:11, 12) Ke masaua me isi se ˋkese o te papatisoga ki te afi mo te papatisoga ki te agaga tapu. Se a te uiga o te fakatusaga a Ioane tenei?

A saito e fakaata mai i ei a latou kolā ka fakaˋlogo ki a Iesu. Ko latou konei e mafai o papatiso ki te agaga tapu. A kaiga e fakaata mai i ei a latou kolā ka se fakaˋlogo ki a Iesu. Ko latou konā ka papatiso ki te afi, telā e fakaata mai ei te lotou fakaseaiga ki te se-gata-mai.—Mataio 3:7-12; Luka 3:16, 17.