E Mata, e Ola Tonu te Atua
Te tali mai te Tusi Tapu
Ao, e tuku mai i te Tusi Tapu a fakamaoniga mautinoa me e ola tonu te Atua. E fakamalosi mai i ei ke ati aka te ‵tou fakatuanaki ki te Atua, ke mo a ma sōna tali‵tonu ki fakamatalaga a lotu, kae ke fakaaoga te “malosi o [‵tou] mafaufau” mo te “‵loto o te malamalama.” (Loma 12:1; 1 Ioane 5:20) Ke mafaufau ki pogai konei mai te Tusi Tapu:
E ‵tau o isi se Mafuaga o se iunivesi telā ne fakatoka faka‵lei kae e maua foki i ei te ola. E fai mai te Tusi Tapu: “Se mea tonu i fale katoa ne faite ne se tino, kae ko te tino telā ne faite ne ia a mea katoa ko te Atua.” (Epelu 3:4) E tiga loa te faigofie o te manatu tenei, kae ne tāua ‵ki eiloa ki tino e tokouke kolā ne a‵koga faka‵lei.a
E ma‵nako a tino katoa ke malamalama i te aoga mo te pogai o te olaga, se manakoga telā e faigata o fakamalie māfai ko oti ne fakama‵lie ‵tou manakoga faka-te-foitino. E taku ne te Tusi Tapu a te mea tenei ki ‵tou “manakoga faka-te-agaga,” e aofia i ei a te manakoga ke iloa kae tapuaki atu ki te Atua. (Mataio 5:3; Fakaasiga 4:11) E se fakamaoni mai fua ne te manakoga faka-te-agaga tenei me e ola tonu te Atua, kae fakaasi mai foki i ei me i a ia ko te Mafuaga alofa telā e manako ke fakamalie ne tatou a te manakoga tenā.—Mataio 4:4.
A fakamatalaga liki‵liki o valoaga i te Tusi Tapu kolā ne tusi i se fia senitenali ko ‵teka ne taunu faka‵lei katoa e ‵tusa mo mea kolā ne ‵valo mai. A te fakataunuga o fakamatalaga liki‵liki konā e fakamaoni faka‵lei mai i ei me ne aumai a valoaga konā mai se tino faka-te-agaga.—2 Petelu 1:21.
Ne uke fakafia atu a mea fakasaienitisi ne iloa ne tino tusitala o te Tusi Tapu i lō mea ne malamalama i ei a tino kolā ne ola fakatasi mo latou. E pelā mo aso mua ne tali‵tonu a tino e tokouke me e na te lalolagi i luga i te tua o se manu, e pelā mo te elefane, puaka o te vao, io me se pulumakau. E ‵kese mai i ei, e fai mai te Tusi Tapu me i te Atua ne fai ne ia ke “seai se mea e fakatautau i ei te lalolagi.” (Iopu 26:7) E tai penā foki a te ‵fuliga o te Isaia 40:22, i te ‵gana mua, telā e fakamatala mai i ei me e pukupuku a te lalolagi. Ne mafau‵fau a tino e tokouke me i te pogai ne lasi ei a te malamalama o tino tusitala o te Tusi Tapu i vaegā mea penei ona ko te mea ne maua ne latou olotou fakamatalaga mai te Atua.
E tali ne te Tusi Tapu a fesili faiga‵ta e uke, ko vaegā fesili kolā e mafai o fai ei te tino ke se talitonu ki te Atua māfai e seai se tali fakamalie loto ki ei. E pelā mo fesili konei: Kafai e alofa kae malosi katoatoa a te Atua, kaia e uke i ei a logo‵maega mo mea ma‵sei i te lalolagi? Kaia e masani ei o uke a fakamalosiga sē ‵lei e maua mai lotu i lō fakamalosiga ‵lei?—Tito 1:16.
a E pelā mo Allan Sandage, se saienitisi e tokotasi telā ko oti ne mate, ne fai mai ana pati e uiga ki te iunivesi: “E se talia ne au te manatu me ne māfua mai a te tulaga tokagamalie tenei mai se tulaga ‵numi valevale. E ‵tau eiloa o isi ne fakatokaga ‵lei ko oti ne fai. E tiga eiloa e se iloa ne au te Atua, tenā fua te fakamatalaga e iloa ei te pogai o mea ne faite.”