Fesili Mai Tino Fai‵tau

Ko oi a Koka mai Makoka telā ne taku mai i te tusi o Esekielu?

I tausaga ko ‵teka atu nei, ne fakamatala sāle i ‵tou tusi i a Koka mai Makoka ko te igoa telā ne tuku atu ki a Satani te Tiapolo mai tua o te taimi ne tuli ifo ei mai i te lagi. Ne fakavae loa te fakamatalaga tenei ki te tusi o Fakaasiga telā e fai mai i ei me i a Satani te Tiapolo e takitaki ne ia te osoatuga ki tino o te Atua i te lalolagi kātoa. (Faka. 12:1-17) Tenā ne fakaiku aka i ei i a Koka se igoa fakavaloaga o Satani.

Kae ne ‵sae aka a nisi fesili tāua mai i te fakamatalaga tenā. Kaia? Mafaufau ki te mea nei: I te taimi ne fakasino atu ki te taimi e takavale ei a Koka, ne fai mai a Ieova e uiga ki a Koka penei: “A Koka mo tena kautau mo malo kolā e ‵kau mo ia ka ‵mate i luga i mauga o Isalaelu, kae ka tuku atu ne au olotou foitino ke kai ne manu eva mo manu vao katoa.” (Eseki. 39:4) Ne toe fai mai a Ieova: “Kafai ko taunu a mea katoa konā, ko tuku atu ei ne au ki a Koka se laukele tanu tino ‵mate mō ia . . . A Koka mo tena kautau ka tanu i konā.” (Eseki. 39:11) Kae e mafai pefea se tino faka-te-agaga o tuku atu ke kai ne “manu eva mo manu vao katoa”? E mafai foki pefea o tuku atu se koga i te lalolagi nei mo “tanu” a Satani? E fakamatala faka‵lei mai i te Tusi Tapu i a Satani ka ‵sai i loto i te 1,000 tausaga, kae e se kai io me tanu i se koga.—Faka. 20:1, 2.

Ko oti ne iloa ne tatou i te fakaotiga o te 1000 tausaga, ka ‵tala mai a Satani i te lua ‵poko, kae “ka fanatu eiloa a ia o takitaki ‵se a fenua i feitu e fa o te lalolagi, ko Koka mo Makoka, ke fakamaopoopo mai latou mō te taua.” (Faka. 20:8) Kae ka mafai la pefea ne Satani o takitaki ‵se a Koka māfai a ia foki ko Koka? Tela la, e se fakasino atu a “Koka” ki a Satani i te valoaga a Esekielu io me ko te tusi o Fakaasiga.

Kae ko oi la Koka mai Makoka? Ke tali aka te fesili tenā, e ‵tau o suke‵suke faka‵lei tatou ki te Tusi Tapu ke mafai o iloa aka me ko oi ka taua atu ki tino o te Atua. E se faipati fua te Tusi Tapu ki te osoatuga o Koka mai Makoka, kae faipati foki loa ki te osoatuga mai i te “tupu o matū” penā foki loa mo “tupu o te lalolagi.” (Eseki. 38:2, 10-13; Tani. 11:40, 44, 45, NW; Faka. 17:14; 19:19) E mata, e fakauiga a tusi siki konei ki osoatuga kese‵kese? Ailoga loa. E seai se fakalotolotolua me e tasi loa te osoatuga tenei e faipati ki ei te Tusi Tapu kae e kese‵kese fua a igoa. Kaia ne oko mai ei tatou ki te fakamatalaga tenei? Me fakaasi mai i tusi siki katoa konei me ka aofia katoa a malo o te lalolagi i te ‵toe osoatuga tenei, telā ka kamata ki ei te taua i Amaketo.—Faka. 16:14, 16.

Kafai e faka‵pau ne tatou a fakamatalaga katoa mai i te Tusi Tapu e uiga ki te ‵toe osoatuga tenei ki tino o te Atua, e lavea faka‵lei atu i ei me i te igoa ko Koka mai Makoka, e se fakasino atu ki a Satani, kae ki potukau o malo fakapolitiki mai fenua kese‵kese. E mata, ka takitakigina a potukau fakapolitiki konei ne te “tupu o matu”? E se mafai o fai atu tatou penā mo te mautinoa. Kae fetaui ‵lei eiloa te manatu tenei mo pati a Ieova e uiga ki a Koka: “Mai i tou fenua i matu, o ‵taki tau kautau lasi kae ma‵losi kolā ne sotia mai i malo e uke, a latou katoa konā e sopo i solofanua.”—Eseki. 38:6, 15.

Ne fai mai foki a te pelofeta ko Tanielu telā ne ola i taimi o Esekielu, e uiga ki te tupu o matū: “Ka oko mai a tala mai te saegala mo matū, kae ka mataku a ia, taua atu eiloa a ia, ‵ta valevale eiloa a tino e tokouke. Ka faka‵tu aka ne ia ana faleie ‵lasi i te va o te tai mo mauga, te koga e tu ei te Faletapu. Kae ka mate eiloa a ia, ka seai se tino e fesoasoani ki a ia.” (Tani. 11:44, 45) E ‵pau eiloa te mea tenei mo te mea telā e faipati ki ei te tusi o Esekielu e uiga ki mea ka fai ne Koka.—Eseki. 38:8-12, 16.

Se a te suā mea ka iku mai i te osoatuga fakaoti tenei? E fai mai a Tanielu: “I te taimi tenā, kae ka sae mai [i Amaketo] a te agelu sili [talu mai i te 1914] ko Mikaele [Iesu Keliso] telā e tausi ne ia tou fenua. Tenā, kae ka oko mai te taimi o fakalavelave [te fakalavelave lasi], ko te ‵toe taimi masei eiloa talu mai te taimi ne kamata ei o māfua mai a malo. Kafai e oko mai a te taimi tenā, a tino katoa o tou malo kolā e tusi olotou igoa i te tusi a te Atua ka ‵sao.” (Tani. 12:1) A mea katoa konei ka fai ne te sui o te Atua ko Iesu telā e fakamatala mai foki i te Fakaasiga 19:11-21.

Kae ko oi la e fakasino ki ei a “Koka mo Makoka” i te Fakaasiga 20:8? I te taimi e fai ei te ‵toe tofotofoga i te fakaotiga o te 1000 tausaga, a latou kolā ka ‵teke atu ki a Ieova i te taimi tenā, e fakaasi mai eiloa ne latou te kilokiloga tatino e pelā mo ‘Koka mai Makoka,’ ko malo kolā ne oso atu ki tino o te Atua i te fakaotiga o te fakalavelave lasi. Kae ‵pau eiloa te ikuga e maua ne potukau katoa konā—ko te mate ki te se-gata-mai! (Faka. 19:20, 21; 20:9) Tela la, e fetaui tonu loa te manatu i tino ‵teke i te fakaotiga o te Meleniuma e fakaigoa ki a “Koka mo Makoka.”

E pelā me ne tino loto finafinau i te sukesuke ki te Muna a te Atua, e faka‵tali eiloa tatou mo te olioli ke iloa aka me ko oi ka fai pelā me ko te “tupu o matū” i se taimi pili mai mua nei. Kae faitalia me ko oi ka fai ne ia te takitakiga i potukau o malo fakapolitiki mai fenua kese‵kese konei, e lua a mea e ‵tau o mautinoa i a tatou: (1) A Koka mai Makoka mo ana kautau katoa ka fakatakavale kae ka fakaseai atu; kae ko te (2) a te ‵tou Tupu telā ko pule mai, ko Iesu Keliso, ka faka‵sao ne ia a tino o te Atua kae fakatoka latou ke ulu atu ki loto i te lalolagi fou telā e maua ei te filemu mo te tokagamalie.—Faka. 7:14-17.