Mataupu e 79

Ne Galo se Fenua, Kae e se ko Mea Katoa

NE FATOĀ oti atu te sautalaga a Iesu mo latou kolā ne maopoopo i tua o te fale o te Falesaio, kae ne fai atu a nisi tino ki a ia “e uiga mō tino Kalilaia kolā ne tamate ne [te kovana Loma ko Ponitio] Pilato, i te taimi ne fai ei olotou taulaga ki te Atua.” Kāti a tino Kalilaia konā ko latou kolā ne tamate i te taimi ne ‵teke atu ei te fia afe o tino Iutaia me ne fakaaogā ne Pilato a tupe mai te faletapu ke faite ei ne ia se auala ke aumai ei a vai ki loto i Ielusalema. Kāti ne fakauiga ne tino kolā ne fai atu ne latou te tala tenā ki a Iesu me ne logo‵mae a tino konā ona ko olotou amioga ma‵sei.

Kae ne faka‵tonu aka ne Iesu olotou mafaufauga, i tena fesili tenei: “E leake eiloa koutou i tino Kalilaia konei e sili atu i te agasala i lō nisi tino Kalilaia, i te mea ne tamate latou penei? Ikai!” ne tali atu a Iesu. Kae ne fakaaogā ne ia te tala tenā ke fai atu ki te kau Iutaia ke fakaeteete, penei: “Kafai e se sala‵mo koutou ki otou agasala, ka ‵mate katoa koutou e pelā mo latou.”

Kae ne toe taku atu foki ne Iesu a te suā fakalavelave telā ne tupu i te fenua tenā, kae kāti ne tupu foki te mea tenā i te faitega o te alāvai. Tenei tena fesili: “Kae pefea te tinogafulu mo te tokovalu i Siloama, kolā ne ‵mate me ne ‵taogina ne te olo ne fati ki luga i a latou? E leake eiloa koutou i te mea nei se fakamaoniga i a latou ne tino e ma‵sei atu i tino katoa kolā ne ‵nofo i loto i Ielusalema?” Ikai, e pelā mo muna a Iesu ne seki ‵mate a tino konā ona ko olotou amioga ma‵sei. Kae e ‵tupu sāle a vaegā mea fakafanoa‵noa penā ona ko ‘taimi mo mea kolā e ‵tupu fakafuasei.’ Kae ne toe fakaaogā foki ne Iesu a te avanoaga tenā ke fakailoa atu penei ki a latou: “Kafai e se sala‵mo koutou ki otou agasala, ka ‵mate katoa koutou e pelā mo latou.”

Kae ne ‵soko atu ki ei te tala fakatusa ‵lei a Iesu, ana muna: “E isi se tagata ne toki te mati i tena togāvine. Ne fanatu o tau fuaga kae e seai sena mea ne maua. Telā, muna atu ei a ia ki tena tino galue i te fatoaga, ‘Kiloke, ko tolu tausaga toku vau sāle ki konei, o tau fuaga i te mati tenei, kae seki maua eiloa ne au se fuaga. Tua ki lalo! Me e tu tauanoa fua i te laukele.’ Kae ko te tino galue i te fatoaga ne tali atu penei, ‘Te Aliki, tuku ake mua i te tausaga tenei e tasi; ka keli fakapukupuku ne au se lua, kae ka faka‵fonu ki kaiao mō fakaola. Kafai la ko fua mai i te tausaga ma vau, ko seai la se gali pelā; kae kafai e seai, ko te taimi tenā ko tua ei ne koe ki lalo.’”

Ne sili atu i te tolu tausaga ne fakamāumāu ne Iesu i te taumafaiga ke fakamalosi ne ia te fakatuanaki i te fenua ko Isalaelu. Kae ne mafai fua o lau aka ne ia ne nai selau o ana soko pelā me ne fua o tena galuega. I konā loa, i te fa o tausaga o tena galuega talai, ne tai momea aka ei ana taumafaiga ki ei, kae i se auala fakatusa ne keli se lua kae ne faka‵fonu ki kaiao i tafa o “te mati” telā ne fakauiga ki te kau Iutaia, mai tena talaiga mo te loto finafinau i Iutaia mo Pelea. Kae e seai lele eiloa se aogā! Ne ita fiti‵fiti te fenua ma sala‵mo kae ne ‵tau ei o ‵ta fakapalele latou. Kae se ‵toega fua o te fenua ne gasue‵sue i ei.

Mai tua malie ifo i ei, kae ne akoako atu a Iesu i te sunako i te Sapati. Ne matea atu ne ia i konā a te fafine telā ne mākau i tausaga e 18, ona ko te fakalavelave atu o se temoni ki a ia. Ona ko tena alofa, ne fai atu penei a Iesu ki a ia: “Te fafine, ko saoloto nei koe mai tou vāivāiga.” Ne ‵kapa atu ona lima ki a ia, kae i konā foki eiloa ne mafola ‵lei ei tena foitino kae ne kamata o ‵viki atu a ia ki te Atua.

Kae ne ita malosi te pule o te sunako. Ana pati, “E ono aso e ‵tau mo tatou o ga‵lue i ei: tela la, o‵mai i aso konā, ke fai ei otou masaki ke ‵lei, kae sa o‵mai i te Sapati.” Ne iloa ‵lei ne te pule tenā me e isi se malosi o Iesu ke faka‵lei ne ia a masaki, kae ne taku fakamasei ne ia a tino me ne olo atu ke faka‵lei olotou masaki i te Sapati!

“A koutou ne tino ‵loi!” ne tali atu a Iesu, “a koutou takitokotasi e masani sāle o ‵tala otou pulumakau io me ko otou asini mai otou fale kae ave o fāinu i te Sapati. Kae ko te fafine tenei, ne tupu mai i te gafa o Apelaamo, kae ne saisai ne Satani i tausaga e sefulu valu; e a, e se ‵tau a ia o ‵tala mai i ona saisaiga i te Sapati?”

I te lagonaga o pati konā ne ma‵vale ei a tino kolā ne ‵teke atu ki a Iesu. Kae ne fia‵fia eiloa te vaitino ki mea fakaofoofogia kolā ne matea atu ne latou ko fai ne Iesu. Kae i konā loa ne toe taku atu ei ne Iesu se avā tala fakatusa fakavaloaga e uiga ki te Malo o te Atua, ko tala fakatusa kolā ko oti ne taku atu ne ia mai te pōti i te Namo o Kalilaia i te tausaga mai mua atu i ei. Luka 13:1-21; Failauga 9:11; Mataio 13:31-33.

▪ Ne a mea fakafanoa‵noa ne taku mai i konei, kae se a te akoakoga aogā telā ne fakaaogā ne Iesu mai tala konā?

▪ Se a te uiga o te mati telā ne seki fua, penā foki loa mo taumafaiga kolā ne fai ke fua te lakau tenā?

▪ Ne fakaasi atu pefea ne te ofisa pule me e iloa ne ia me e mafai ne Iesu o faka­‵lei a masaki, kae ne fakaasi atu pefea ne Iesu me i te tagata tenā se tino loi?