Mataupu e 123

“Kilo Mai! Tenei te Tagata!”

ME NE ofo Pilato i faifaiga a Iesu kae ne iloa ‵lei ne ia me e se ‵se a ia, ne taumafai eiloa a ia o fakasaoloto a Iesu i se isi auala. Ne fai atu a ia penei ki te vaitino: “Kae e pelā mo te tū a koutou, e ‵tau mo au o ‵tala atu ki a koutou se pagota ke saoloto i te taimi o te Paseka.”

Ne taofi fakapagota foki a Palapa, se tino tatino takutakua, telā ne fesili atu a Pilato penei: “Ko oi te tino e loto ki ei koutou ke fakasaoloto atu ne au ki a koutou: ko Palapa io me ko Iesu te Keliso?”

Me ne fakaosofia te vaitino i pati a faitaulaga pule, ne fai atu ei latou ke fakasaoloto Palapa kae ke tamate a Iesu. Ne seki mapu eiloa a taumafaiga a Pilato, kae ne toe fesili atu a ia penei: “Ko oi te tino i a laua nei e ma‵nako ki ei koutou ke fakasaoloto atu?”

Ne ka‵laga atu latou penei: “Ko Palapa.”

Ne ofo i ei a Pilato kae ne fesili atu penei: “Kae se a nei taku mea ka fai ki a Iesu te Keliso?”

Ne paka‵laga malosi atu latou i se leo e tasi te lotou tali: “Fakasataulogina!” “Fakasataulo! Fakasataulo a ia!”

Me ne iloa ne Pilato me ne fai atu latou ke tamate se tagata e seki ‵se, ne toe fakamolemole atu a ia penei: “Se a te mea masei ne fai ne ia? E se maua ne au sena ‵se e ‵tau ei o mate; tela la, ka kini ne au a ia, ko ‵tala atu ei.”

Faitalia ana taumafaiga, ne paka‵laga faeloa a te vaitino kaitaūa kolā ne fakaosoosogina ne olotou takitaki lotu, penei: “Fakasataulogina.” Me ne fakama‵losi aka latou ne olotou faitaulaga ke kaitaūa valevale, ne ma‵nako malosi te vaitino ke fakasala a ia ki te mate. Kae mafaufau ki ei, e lima fua aso mai mua atu i ei, kāti ko nisi tino i a latou konā ne aofia i tino kolā ne talia ne latou a Iesu ki loto i Ielusalema e pelā me ko te lotou Tupu. Kae koi fai a mea katoa konā, kāti ne ‵nofo ‵mu kae ne ‵muni foki ana soko, māfai ko ‵nofo atu latou i konā.

Ne maina Pilato me e se aogā ana taumafaiga, kae ne fai pelā me e gasolo aka eiloa o paka‵laga valevale a tino. Telā ne puke a ia ki ne vai, ne ‵fano ana lima i mua o te vaitino, ana muna: “Au e ‵mā i te toto o te tagata tenei: faitalia eiloa koutou.” I konā loa, ne tali atu ei te vaitino penei: “Ke nofo i luga i a matou mo omotou fanau tena toto.”

Tela la, e tusa loa mo te lotou tonu​—⁠kae ne sili atu te manakoga ke fakama‵lie aka te vaitino i lō te faiga ne ia o te mea telā e iloa ne ia me e tonu​—⁠ne ‵tala atu ne Pilato a Palapa ki a latou. Ne ave ne ia a Iesu, ne fai atu ke ave keatea ana gatu kae ne kini a ia. E se ko te ‵kini e pelā mo te masani. Ne fakamatala mai ne te mekesini ko te Journal of the American Medical Association a te faiga masani a te kau Loma ko te ‵kini:

“A te mea telā ne fakaaogā i ei ko te kaukini toetoe (ko te flagrum io me ko te flagellum) telā ne ‵sai fakatasi i ei a pakili o manu kolā e kese‵kese olotou ‵loa, kae ne ‵sai ki ei a tamā polo fiti io me ko potu ivi makai‵kai o mamoe. . . . Kafai ko ‵kini malosi ne sotia Loma a te tua o te tino telā ne ‵tau o fakasala, ne ‵poko ‵ki a maseleselega ne fai ne polo fiti konā, ne masele‵sele valevale a koga ‵poko i lalo i te pakili ona ko fusi pakili manu mo ivi konā o mamoe. Kae kafai ko tumau loa te ‵kiniga tenā, ko ‵pasa valevale i ei te foitino kae ‵sali valevale mai a toto.”

Ko oti atu te ‵kiniga fakasauā tenā, kae ne ave a Iesu ki te palesi o te kovana, kae ne fakamaopoopo mai i ei a te kau sotia kātoa. I konā loa, ne fakasaunoa malosi atu a te kau sotia ki a ia mai te avatuga o se foualiki makaikai ki luga i tena ulu kae ne faī ki lalo. Ne tuku atu ne latou se tokotoko i tena lima fakaatamai, kae ne fakapei ne latou a ia ki se gatu violeta, ko vaegā gatu kolā e ‵pei sāle ki ei a tupu. Telā ne fakatauemu atu latou ki a ia penei: “Ke manuia te Tupu o tino Iutaia!” Kae ne puapuaki atu latou ki a ia kae ne laupāpā ana mata. Ne ave keatea ne latou te tokotoko mai tena lima, kae ne fakaaogā ne latou ke ‵kini ki ei tena ulu kae ne ‵tuki mālō i ei te “foualiki” fakalumaluma tenā kae ne pakia malosi ei tena ulu i mea makai‵kai konā.

A te mata ‵malu mo te malosi o Iesu i te fepakiga mo amioga sōnafai valevale konā, ne fai ei ke ofo malosi a Pilato, telā ne toe taumafai foki a ia ke fakasao a Iesu. “Kiloke, ko aumai ne au a ia ki tua ki a koutou, ko te mea ke iloa ne koutou me e seai eiloa se mea ne maua ne au e ala ei o fakasala a ia,” ko tena fakamatalaga ki te vaitino. Kāti ne manatu aka tou tagata me ka a‵lofa atu latou ki a Iesu māfai ko matea atu ne latou ana foliga fakaalofa. A koi tu atu a Iesu i mua o te vaitino sē a‵lofa konā, ne pei ki te foualiki makaikai mo te gatu lanu violeta, mo ana mata ko sali mai i ei a toto kae ko matea atu i ei tena logo‵mae, ne kalaga atu eiloa a Pilato penei: “Kilo mai! Tenei te tagata!”

Faitalia me ko pakia kae ‵pasa valevale tena foitino, ne tu atu i konā te ‵toe tagata ‵kese i tala mua katoa, e tonu, ko te ‵toe ­tagata sili i tāgata katoa ne ola mai! E tonu, ne fakaasi atu ne Iesu a te mata ‵malu mo te tokagamalie telā e fakaasi mai i ei tena sili telā ne ‵tau foki o amanaia ki ei a Pilato, me e pelā me ne fakaasi mai i ana pati konā a tena āva mo tena alofa. Ioane 18:39–19:5; Mataio 27:15-17, 20-30; Maleko 15:6-19; Luka 23:18-25.

▪ Se a te faiga a Pilato ne taumafai ei a ia o fakasaoloto a Iesu?

▪ Ne taumafai pefea a Pilato ke mo a ma ‵losi atu te mea tenā ki a ia?

▪ Ne a mea ne aofia i te ‵kiniga tenā?

▪ Ne fakatauemu atu pefea ki a Iesu i te taimi ko oti ei ne ‵kini a ia?

▪ Se a te suā taumafaiga ne fai ne Pilato ke fakasaoloto ne ia a Iesu?