Mataupu e 124

Ne Tuku Atu a Ia Kae ne ‵Taki Atu Keatea

I TE taimi ne taumafai ei a Pilato o fakasaoloto Iesu, ona ko tena alofa ki a ia me ne faki Iesu i fakasauāga, ne momea aka i ei te kaitaūa o faitaulaga pule. Ko oti ne fatuaki olotou loto ke mo a ma talia se mea ke fakalavelave mai ki te lotou aofaga matagā. Tela la, ne toe kamata foki o paka‵laga atu latou penei: “Fakasataulo a ia! Fakasataulo a ia!”

“Ave la ne koutou a ia o fakasataulo,” ko te tali a Pilato. (E se pelā mo olotou pati ko oti ne fai atu, e isi se malosi o te kau ­Iutaia ke tamate ne latou a tino solitulafono ki olotou tulafono fakalotu kolā e tai ‵mafa.) I konā loa, kāti ko te fakalima o taimi, ne toe taku atu ei ne Pilato me e seai se agasala a Iesu, ana muna: “Kae e seai se mea ne maua ne au, e ala ei o fakasala a ia.”

Me ne matea atu ne te kau Iutaia me ne seki ma‵goi olotou ‵losiga e uiga ki mea fakapolitiki, ne toe taumafai o avaka ne latou te losiga muamua e uiga ki mea fakalotu, ko te pati masei ki te Atua, telā ne fakaaogā ne latou i ne nāi itula mai mua atu i ei i te fakamasinoga o Iesu i mua o te Sanetulini. Olotou pati: “E isi se motou tulafono, telā e fai mai, me e ‵tau eiloa a ia o mate, me ne fai mai a ia i a ia ko te Tama a te Atua.”

A te losiga tenā se mea fou ki a Pilato, kae ne fai ei a ia ke manavase malosi. Ko iloa ne ia me i a Iesu e se se tagata e pelā mo te masani, e pelā mo te mea ne fakaasi mai i te moemiti a tena avaga mo te mautakitaki foki o uiga o Iesu. Kae ko “te Tama a te Atua”? Ne iloa ne Pilato me i a Iesu se tino mai Kalilaia. Kae e a, e mata ko oti ne ola muamua a ia? Ne toe ave ne ia Iesu ki loto i tena palesi, kae ne fesili atu a Pilato penei: “A koe se tino ā?”

Ne nofo mu Iesu. Ko oti ne taku atu ne ia me i a ia se tupu kae ko tena Malo e se se vaega o te lalolagi nei. E se toe aogā se isi fakamatalaga aka. Kae ne fai pelā me ne mavale Pilato me ne ita a Iesu ma tali atu ki a ia. Telā ne fanaka ei tena kaitaua kae ne fai atu a ia penei ki a Iesu: “A koe e se faipati mai? E se iloa ne koe me e i a aku te pule o fakasaoloto koe, mo te pule foki o fakasataulo koe?”

“E maua fua tau pule ki a au, i te mea i tau pule ne aumai mai luga,” ko te tali fakaaloalo a Iesu. Ne fakauiga eiloa a ia ki te taliaga ne te Atua o tino pule ke pule ki faifaiga i te lalolagi nei. Ne toe fai atu a Iesu penei: “Tela la, a te tino ne ‵moli mai ne ia au ki a koe, e tafasili atu te masei o tena agasala.” A te tonuga loa, e sili atu te matagā o te agasala a te faitaulaga pule ko Kaiafa mo ana takaga, penā foki loa mo Iuta i lō Pilato i te faiga sē ‵lei tenā ki a Iesu.

Ne tai momea aka te āva o Pilato ki a Iesu kae ne mataku foki a ia mana māfua mai Iesu mai te Atua, telā ne toe taumafai foki a Pilato o fakasaoloto ne ia a Iesu. Kae ne toe ‵teke atu foki te kau Iutaia ki a Pilato. Ne toe taku atu ne latou te ‵losiga e uiga ki mea fakapolitiki, kae ne fakamatakutaku lēmū atu latou penei: “Kafai e fakasaoloto ne koe te tagata tenā, a koe e se se taugasoa o Kai­sala; so se tino e fia fai a ia mo tupu, a ia se fili o Kaisala.”

Faitalia te fakamataku o te fakauigaga tenā, kae ne toe aumai foki ne Pilato a Iesu ki tua. “Tenei te otou tupu,” ko ana pati ne toe fai atu.

“Ave a ia keatea! Fakasataulo a ia!”

“Ka fakasataulo ne au te otou Tupu?” ko te fesili ne fai atu ne Pilato i te ‵fiu.

Ne fi‵ta malosi te kau Iutaia i te pulega a te kau Loma. A te tonuga loa, ne takalia‵lia malosi latou ki te pulega a te kau Loma! Kae e tiga eiloa te feitu tenā, ne fakaloiloi atu te kau faitaulaga pule penei: “E seai se motou tupu, ko Kaisala fua!”

Ona ko te manavase ki tena tofi fakapolitiki mo tena tulaga ‵lei, ne talia eiloa ne Pilato a pati a te kau Iutaia kolā ne fai ‵soko atu ki a ia. Ne tuku atu ne ia a Iesu. Ne tapale keatea ne te kau sotia a te gatu violeta mai i a Iesu kae ne toe fakapei ki luga i a ia ana gatu mua. Ne ‵taki atu a Iesu ke fakasataulo, kae ne faimālō a ia ke amo eiloa ne ia tena sataulo.

A te taimi tenā ko te kogāloto o te taeao i te Aso Lima, te po 14 o Nisani; kāti ko tai oko atu foki ki te fakatutonu. Ne seki moe Iesu talu mai te tafataeao o te Aso Fa, kae ne fe‵paki ‵soko a ia mo logo‵maega. E maina tatou i ei, me ne seki leva kae ne palele atu tena malosi ona ko te ‵mafa o te sataulo. Tela la, ne fakatonu atu ki se tino ne fanatu i te auala tenā, ko Simona mai Kulene i Afelika, ke amo ne ia te sataulo mō Iesu. I te lotou oloatuga, ne tau‵tali atu foki a tino e tokouke, e aofia i ei a fāfine, kolā ne fakatau‵tagi kae ne fanoa‵noa ki a Iesu.

Ne fuli atu a Iesu ki fāfine konā, ana muna: “Tamāfine o ­Ielusalema! Sa ‵tagi mai ki a au, kae ‵tagi ki a koutou mo otou ­fanau. I te mea e oko mai aso, e fai mai ei tino penei, ‘Amutia fāfine kolā e se afu mo fāfine e seki fa‵nau, mo ū e seki ūgina.’ . . . Me kafai e fai a mea konei ki te lakau mata, kae se a te mea e fai ki te lakau pakupaku?”

Ne fakatusa ne Iesu te fenua ko Iutaia ki se lakau mata, telā koi ola malie aka me koi nofo mai a Iesu kae koi isi foki se ‵toega o tino kolā e tali‵tonu ki a ia. Kae kafai ko ave keatea a tino konā mai te fenua, ka ‵toe mai fua i ei te lakau telā e mate i te feitu faka-te-agaga, e tonu se fenua pelā me se fakapotopotoga telā ko pakupaku. Oi, ka pefea foki te ‵tagi fanoanoa māfai ko oko mai a ­kautau Loma, kolā e fai pelā me ne tino fakaoko sala a te Atua, kae ka fakamasei ne latou te fenua ko Iutaia! Ioane 19:6-17; 18:31; Luka 23:24-31; Mataio 27:31, 32; Maleko 15:20, 21.

▪ Se a te losiga ne fai ne takitaki lotu ki a Iesu i te taimi ne seki ma‵goi ei olotou ‵losiga e uiga ki mea fakapolitiki?

▪ Kaia ne momea aka ei te manavase o Pilato?

▪ Ko oi a tino kolā e sili atu te matagā o olotou agasala e uiga ki mea kolā ne ‵tupu ki a Iesu?

▪ Oti aka loa, ne fai pefea ne te kau faitaulaga a Pilato ke tuku atu ne ia a Iesu ke fakasala ki te mate?

▪ Ne a muna a Iesu ki fāfine kolā ne ‵tagi ki a ia, kae se a te uiga o ana pati e uiga ki te “lakau mata” mo te “lakau pakupaku”?