Mataupu e 126
“Tenei Eiloa te Tama a te Atua”
NE SEKI leva te tautauga a Iesu i luga i te sataulo, kae i te fakatutonu, se mea fakaatea ne tupu, ne pouli te la i itula e tolu. E se ko te fakapouliga masani o te la ne te masina, me e ‵tupu fua a vaegā mea penā i te masina sae kae ko sulu nei te masina i te taimi o te Paseka. Kae e ‵tupu fua te fakapouliga o te la ne te masina i ne nāi minute. Tela la, ne mafua mai te pouliga tenā i te Atua! Kāti ko faka‵noga aka i ei a pati a tino kolā ne fakatauemu atu ki a Iesu, kae kāti ko taofi katoa foki i ei olotou pati konā.
Kafai ne tupu te mea fakaofoofogia tenā a koi tuai o ‵liko atu te pagota e tokotasi ki tena takaga kae ne fakamolemole atu foki ki a Iesu ke masaua a ia, kāti ne fesoasoani atu te mea tenā ki tena salamō. I te taimi o te pouliga tenā kāti ne fakapilipili atu ki te sataulo a te mātua o Iesu, tena taina ko Salome, Malia te Makatala, mo Malia te mātua o Iakopo Foliki. Ne ‵nofo fakatasi foki mo latou a te apositolo pele a Iesu, ko Ioane.
E pefea te logo‵mae o te loto o te mātua o Iesu e pelā me ne ‘suki ne se pelu,’ i tena kiloatuga ki te tama telā ne tausi ne ia ko tautau mai kae ko logo‵mae malosi! Kae ne seki mafaufau a Iesu ki tena logo‵mae, kae ko te tausiga o tena mātua. E tiga eiloa ne faigata ‵ki ki a ia, ne kilo atu a ia ki a Ioane kae ne fai atu penei ki tena mātua: “Te fafine, kiloke, tenei tau tama.” Oti aka loa, ne kilo atu a ia ki a Malia, kae ne fai atu penei ki a Ioane: “Kiloke, tenā tou mātua.”
Telā ne fai atu penā a Iesu ki tena apositolo pele ke tausi ne ia tena mātua, me kāti ko oti ne mate atu te avaga o tena mātua i te taimi tenā. Ne fai ne ia penā me koi tuai o fakatuanaki a nisi tama‵liki tāgata a Malia ki a ia. Tela la, ne fai ne ia se fakaakoakoga ‵lei e se gata fua i te fakatoka faka‵lei ne ia te tausiga o tena mātua i mea faka-te-foitino, kae penā foki loa mo mea faka-te-agaga.
Kāti ko te tolu i te fakaafiafi, kae ne fai atu a Iesu penei: “Au ko fia inu.” Ne lagona ne Iesu me ne fai pelā me ne ave keatea ne tena Tamana te puipuiga mai i a ia ko te mea ke tofotofo katoatoa i ei tena fakamaoni. Telā ne pakalaga atu ei a ia i se leo lasi: “Toku Atua, toku Atua, kaia ko tiaki mai ei au ne koe?” I te ‵logoga o pati konā, ne fai atu penei a nisi tino kolā ne ‵tu ‵pili mai: “Faka‵logo ake, ko kalaga atu a ia ki a Elia.” Ne tele fakavave atu se tino e tokotasi mai i a latou, ne fakasiu ne ia se omomi ki te vinika, ne fakalave ki te kaula o te hisopo, kae ne tuku atu ki a ia ke inu ki ei. Kae ne fai atu penei a nisi tino: “Faka‵tali, ke onoono aka tatou me e vau a Elia o ave ifo a ia ki lalo mai te sataulo me ikai!”
I te mauaga ne Iesu o te vinika, ne kalaga atu ei a ia penei: “Ko oti!” Ao, ko oti ne fakapalele ne ia a mea katoa ne uga mai ei ne tena Tamana ke fai ne ia i te lalolagi nei. Oti aka loa, ne fai atu a ia penei: “Toku Tamana, ko tuku atu ne au toku agaga ki ou lima.” I konā loa, ne tuku atu ne Iesu te malosi o tena ola ki te Atua me e talitonu eiloa a ia me ka toe fakafoki mai ne te Atua a te malosi tenā ki a ia. Ne fakagaugau ifo ei tena ulu kae ne mate a ia.
I te taimi ne pusi atu ei te mānava o Iesu, ne poko mai ei se mafuie lasi, telā ne ma‵pa mai i ei a kaupapa. Ona ko te malosi o te mafuie tenā ne ma‵suke a tānuga i tua o Ielusalema kae ne ‵pei ki tua a foitino o tino ‵mate i ei. A tino kolā ne solo atu i konā ne matea atu ne latou a foitino konā o tino ‵mate kae ne ulu atu latou ki te fakai kae ne fakamatala atu te tala tenā.
E se gata fua i konā, kae i te taimi ne mate ei a Iesu, ne masaelua te ‵pui laugatu telā e vae ei te Potu Tapu mai te Potu Tafasili i te Tapu i te faletapu o te Atua, e kamata i luga kae ī ki lalo. Kāti te ‵pui laugatu gali tenā fakatasi mo ata e uke i ei ne fai pelā me e 60 futu tena maluga, kae ne ‵mafa ‵ki eiloa! A te vavega fakapoi tenā ne seki fakaasi atu fua i ei te kaitaua o te Atua ki tino kolā ne tamate ne latou Tena Tama kae ne fakaasi mai foki i ei me e mafai o ‵tala mai te auala ki te Potu Tafasili i te Tapu, ko te lagi, ona ko te mate o Iesu.
Ia, i te taimi ne lagona ei ne tino a te mafuie kae ne matea atu ne latou a mea kolā e ‵tupu, ne gasolo eiloa o ma‵taku malosi latou. Ne ‵viki atu ki te Atua te takitaki kautau telā ne pule ki te faiga tenā o te fakasalaga. “A te tagata tenei, ko te Tama eiloa a te Atua,” ko ana muna. Kāti ne nofo atu tou tagata i te taimi ne faipati ei ki te faiga o Iesu mo fai te Tama a te Atua i te faiga o tena fakamasinoga i mua o Pilato. Kae i konā loa, ne talitonu tou tagata me i a Iesu ko te Tama a te Atua, e tonu, ko ia ko te ‵toe tagata sili i tino katoa kolā ne ola.
Ne ofo malosi foki a nisi tino i mea fakavavega konā, kae ne toe ‵foki atu latou ki olotou fale, kae ne ‵tuki olotou fatafata e pelā me se fakailoga o te lasi o te lotou fanoanoa mo te lotou māsiasi. Ne ‵kilo atu a nisi soko fāfine o Iesu i se koga e tai ‵mao, kae ne fakaosofia malosi olotou loto i mea fakaofoofogia konā. Ne nofo atu foki i konā a te apositolo ko Ioane. Mataio 27:45-56; Maleko 15:33-41; Luka 23:44-49; 2:34, 35; Ioane 19:25-30.
▪ Kaia e se mafai ei o fai atu pelā me ne pouli te la i itula e tolu ona ko te fakapouliga masani o te la ne te masina?
▪ Ko pili o mate a ia, kae se a te fakaakoakoga telā ne tuku mai ne Iesu mō tino kolā e isi ne olotou mātua ma‵tua?
▪ Ne a faigāmuna e fa ne fai ne Iesu a koi tuai o mate a ia?
▪ Ne a mea ne ‵tupu i te mafuie tenā, kae se a te mea ne fakauiga ki ei me ne masaelua te ‵pui laugatu i te faletapu?
▪ Ne a mea ne fai ne te takitaki kautau telā ne pule ki te faiga o te fakasalaga ona ko vavega konā?