E Ola te Muna a Ieova

Manatu Tāua Mai te Tusi ko Iopu

NE NOFO atu te tagata mua ko Iopu i te fenua ko Usa, telā ko Alapi i aso nei. Ne ‵nofo atu foki a tino Isalaelu e tokouke i Aikupito i te taimi tenā. E tiga eiloa e se se tino Isalaelu tou tagata, kae ne tapuaki atu eiloa a Iopu ki a Ieova te Atua. E fai mai te Tusi Tapu e uiga ki a ia: “E seai se tino i te lalolagi e ‵pau mo ia i te ‵lei mo te fakatuanaki. E tapuaki a ia ki a au, kae ko ia eiloa ko fakaeteete i a ia ma agasala mai ki a au [te Atua].” (Iopu 1:⁠8) Ne ola eiloa tou tagata i te vā o tavini ‵tu ‵kese e tokolua a Ieova​​—⁠ko te tama tagata a Iakopo ko Iosefa mo te pelofeta ko Mose.

A Mose, telā ne fai pelā me ne tusi ne ia te tusi ko Iopu, kāti ne iloa ne ia a mea e uiga ki a Iopu i te 40 tausaga ne nofo atu ei a ia i Mitiana, telā e pili ki te fenua ko Usa. Kāti ne lagona ne Mose a mea e uke ki te vaega fakaoti o te olaga o Iopu i te taimi ko pili atu ei te kau Isalaelu ki Usa, telā ko tai palele atu foki ei te lotou malaga i te koga lavaki mō se 40 tausaga.a Ko se faka‵tau eiloa i te gali o te tusiga o te tala o Iopu telā ne ‵kilo atu ei ki ei e pelā me ko te ‵toe tala tafasili i te gali. E sili atu i ei, e tali mai i ei a vaegā fesili pelā mo mea konei: Kaia e logo‵mae ei a tino ‵lei? Kaia e talia ei ne Ieova ke ‵tupu a mea ma‵sei? E mata, e mafai o fakatumau ne tino se ‵lei katoatoa te lotou fakamaoni ki te Atua? E pelā me se vaega o te Muna fakaosofia a te Atua, e ola kae ‵mana te fekau i te tusi o Iopu ke oko mai eiloa ki aso nei.​​—⁠Epelu 4:​12.

“FAKAMALAIA AKA A TE ASO NE FANAU EI AU”

(Iopu 1:1–​3:​26)

I te aso e tasi, ne fakafesili aka ne Satani te fakamaoni o Iopu ki te Atua. Ne talia ne Ieova a pati ‵toa konā kae ne talia ei ne ia ke fakaoko atu ne Satani a fakalavelave ‵lasi ki a Iopu. Kae ne ita fitifiti a Iopu ma ‘muna masei atu ki te Atua.’​​—⁠Iopu 2:⁠9.

Ne olo atu a taugasoa e tokotolu o Iopu “o fakamafanafana” tou tagata. (Iopu 2:​11) Ne ‵nofo atu ou tāgata fakatasi mo ia e aunoa mo te fai‵pati atu ke oko eiloa ki te taimi ne seki toe mafai ei ne Iopu o nofo filemu, ana muna: “Fakamalaia aka a te aso ne fanau ei au.” (Iopu 3:⁠3) Ana muna eiloa ke fai a ia pelā “me se pepe ne fanau mai e se gasue,” io me ne mate atu a koi nofo i te moegātama o tena mātua.​​—⁠Iopu 3:​11, 16.

Tali ki Fesili Faka-te-Tusi Tapu:

1:​4, NW​​—⁠E mata, ne fakamanatu ne tama‵liki a Iopu a aso fanau? Ikai, ne seki fakamanatu ne latou. E ‵kese a pati i te ‵gana mua mō te “aso” mo te “aso fanau” kae e ‵kese foki lā uiga. (Kenese 40:20) I te Iopu 1:​4, a te pati “aso” e fakaaogā i konei, telā e fakauiga ki te taimi e fanaka ei te la ki te taimi e to ei te mata o la. E masani o fai ne tama‵liki tāgata e tokofitu a Iopu se tamā ‵kaiga i aso e fitu mō te kāiga kātoa fakatasi i te tausaga. Ne fakasolosolo latou i te faiga o te mea nei, telā e fai ne tama‵liki tāgata taki tokotasi se ‵kaiga i tena fale i te “aso ne filifili ne ia.”

1:6; 2:1​​—⁠Ko oi ne talia ke olo atu ki mua o Ieova? E aofia i tino kolā ne ‵tu atu i mua o Ieova ko tena Tama fagasele eiloa e tokotasi, ko te Muna; ko agelu fakamaoni; mo ‘agelu fakalogoga‵ta a te Atua,’ e aofia i ei a Satani te Tiapolo. (Ioane 1:​1, 18) Ne seki ‵tuli keatea i te taimi tenā a Satani mo ana temoni mai te lagi ke oko eiloa ki te taimi mai tua malie ifo ne fakatu aka ei te Malo o te Atua i te 1914. (Fakaasiga 12:​1-​12) Mai te taliaga ne ia ke olo atu latou ki ana mua, ne avaka ei ne Ieova i mua o tino faka-te-agaga katoa a pati ‵toa a Satani mo te kinauga telā ne fakasae aka ne ia.

1:7; 2:2​​—⁠E mata, ne faipati ‵tonu atu eiloa a Ieova ki a Satani? E se uke a fakamatalaga e tuku mai ne te Tusi Tapu e uiga ki te auala e fesokotaki atu ei a Ieova ki ana tama faka-te-agaga. Kae ne maua ne Mikaio se fakaasiga telā ne lavea atu ei ne ia se agelu e fesokotaki ‵tonu atu eiloa ki a Ieova. (1 Tupu 22:​14, 19-​23) Telā la, e foliga mai pelā me ne faipati atu eiloa a Ieova ki a Satani e aunoa mo se sokoga.

1:​21, NW​​—⁠Se a te auala ne mafai ei o toe foki atu a Iopu ki te ‘moegatama o tena mātua’? Ona ko te mea ne faite ne Ieova te Atua te tagata “mai te laukele,” a te tugāpati ko te “mātua” e fakaaogā i konei i se auala fakatusa ki te lalolagi.​​—⁠Kenese 2:⁠7.

2:9​​—⁠Ne a vaegā mafaufauga ne mafai o oko atu ki te avaga o Iopu i te taimi ne fai atu ei tou fafine ki tena avaga ke na muna masei atu ki te Atua kae ke mate? Ne logo‵mae malosi te avaga o Iopu e pelā eiloa mo tena avaga. Kāti ne logo‵mae tou fafine ke lavea atu te masiasi o tena avaga telā ne malosi ‵lei ona ko te masaki fakatakalialia ne oko atu ki a ia. Ne ‵galo atu ana tama‵liki fagasele. Kāti ne puapuagātia malosi eiloa tou fafine i mea katoa konei telā ne galo atu ei i a ia te ‵toe mea tāua​​—⁠ko te lā fesokotakiga mo te Atua.

Akoakoga mō Tatou:

1:​8-​11; 2:​3-5. E pelā mo te mea e fakaasi mai i te tala o Iopu, e manakogina eiloa i te tumau i te fakamaoni, a lagonaga ‵tonu i tafa o faifaiga mo pati ‵lei, i te tavini atu ki a Ieova.

1:​21, 22. Mai te tumau i te fakamaoni ki a Ieova i taimi ‵lei mo taimi sē ‵lei, e mafai ei o fakatalitonu atu ne tatou me i a Satani se tino loi.​​—⁠Faataoto 27:⁠11.

2:​9, 10. E pelā mo Iopu, kafai e se fakatāua ne ‵tou kāiga ‵tou fakamoemoega faka-te-agaga io me e fakamalosi mai ke gutugutulua tatou io me ke fakavāivāi ‵tou fakatuanaki, e ‵tau eiloa mo tatou o ‵mautakitaki i te fakatuanaki.

2:​13. E seai eiloa ne pati fakamafanafana e mafai o tuku atu ne taugasoa o Iopu e uiga ki te Atua mo ana fuafuaga me e se lava te lotou iloaga faka-te-agaga.

“AU E MAKEKE EILOA I A AU E SE ‵SE”

(Iopu 4:1–​31:⁠40)

A te manatu fakavae telā ne taku atu ne taugasoa e tokotolu o Iopu i olotou fai‵patiga me ne fai ne Iopu se mea masei telā ko maua ei ne ia se vaegā fakasalaga ‵mafa penā mai te Atua. Ne faipati muamua a Elifasa kae ‵soko atu a Pilitati, telā ne fakaaogā eiloa ne ia a pati faka‵mae loto. Ne sili atu foki te fakatauemu atu o Sofala.

E seki talia ne Iopu a fakamatalaga ‵se mai i ana taugasoa. Ona ko te sē malamalama i te pogai ne talia ei ne te Atua ke logo‵mae a ia, ne kamata o manavase malosi tou tagata ki te puipuiga o tena ata. Kae koi alofa eiloa Iopu ki te Atua me ne fai atu a ia: “Au e makeke eiloa i a au e se ‵se ke oko eiloa ki te aso e mate ei au.”​​—⁠Iopu 27:⁠5.

Tali ki Fesili Faka-te-Tusi Tapu:

7:1; 14:14​​—⁠Se a te uiga o te “galue fi‵ta” io me ko “taimi o fakalavelave”? Ne tu poloki eiloa a puapuagā o Iopu telā ne mafaufau ei a ia me i te olaga se mea faigatā kae fakafi‵ta. (Iopu 10:​17, te fakamatalaga fakaopoopo, NW) Ona ko te taimi e fakamāumau ne se tino i Seoli​​—⁠mai te taimi e mate ei ke oko ki te toetuga​​—⁠se vaitaimi tumau, ne fakatusa ei ne Iopu ki se taimi tumau o fakalavelave.

7:​9, 10; 10:21; 16:22​​—⁠E mata, e fakaasi mai ne fakamatalaga konei me ne seki talitonu a Iopu ki te toetuga? Konei la a fakamatalaga e uiga ki te olaga o Iopu mai tua malie ifo o te taimi tenā. Se a te mea ne fakauiga a ia ki ei? E tasi te pogai, me kafai e mate a ia, ka se toe lavea a ia ne ana taugasoa. Mai te lotou kilokiloga, ka se toe foki atu a ia ki tena fale io me toe ‵saga atu a tino ki a ia ke oko ki te taimi tonu o te Atua. Kāti ne fakauiga foki a Iopu me e seai se tino e mafai o vau ki tua i a ia eiloa mai Seoli. Kae ko te talitonu o Iopu ki te toetuga i aso mai mua e lavea ‵lei atu i ana pati i te Iopu 14:​13-​15.

10:​10, NW​​—⁠Ne “ligi atu” pefea ne Ieova ‘a Iopu e pelā me se susu kae ‵fuli tou tagata e pelā me se ‵tisi’? A te mea tenā se fakamatalaga fakauiga ki te auala ne fakafua aka ei a Iopu i te moegātama o tena mātua.

19:​20, NW​​—⁠Se a te mea ne fakauiga ki ei a Iopu i te tugāpati tenei “Au ne sao atu fakatasi mo te pakili o oku nifo”? Mai i te fai atu me ne sao atu a ia mo te pakili o se mea telā e seai sena pakili, kāti ne fai atu a Iopu me ne sao atu eiloa a ia e aunoa mo se mea.

Akoakoga mō Tatou:

4:​7, 8; 8:​5, 6; 11:​13-​15. E se ‵tau eiloa o fakaiku aka ne tatou me ko māfatia se tino i ikuga o ana mea ne fai kae e se maua ne ia te taliaga a te Atua.

4:​18, 19; 22:​2, 3. E ‵tau o fakavae ‵tou pati fakatonutonu ki te Muna a te Atua, kae e se ko ‵tou manatu totino.​​—⁠2 Timoteo 3:​16.

10:⁠1. Ne ‵segi a Iopu ona ko te kaitaua, telā ne seki mafaufau ei a ia ki nisi pogai e logo‵mae ei a ia. E se ‵tau lele eiloa o kaitaua tatou māfai ko logo‵mae tatou, maise eiloa me ko malamalama ‵lei tatou i kinauga kolā e aofia i ei.

14:​7, 13-​15; 19:25; 33:24. I so se taimi e tofotofo ei tatou ne Satani, e mafai o fesoasoani mai te fakamoemoega o te toetuga ki a tatou.

16:5; 19:⁠2. E ‵tau o fakamalosi atu ‵tou pati ki nisi tino, kae e se ‵tau o fakaitaita atu ki a latou.​​—⁠Faataoto 18:⁠21.

22:​5-7. A pati fakatonutonu kolā e fakavae ki ‵losiga kolā e seai ne fakamaoniga ‵tonu ki ei, e seai eiloa se aogā kae fakalotovāivāi atu.

27:2; 30:​20, 21. A te tumau i te fakamaoni e se manakogina i ei a te ‵lei katoatoa. Ne ‵se ‵ki eiloa Iopu i te taku fakamaseiga ne ia o te Atua.

27:⁠5. Ko Iopu fua e mafai o ave keatea ne ia tena fakamaoni me e fakalagolago eiloa te fakamaoni o se tino ki tena alofa ki te Atua. Telā la, e ‵tau o fakamalosi aka ne tatou ‵tou a‵lofa ki a Ieova.

28:​1-​28. E iloa ne tino te koga e maua ei te maumea o te lalolagi. Kafai e ‵sala atu ki ei, ko tena atamai telā e mafai ei o fanatu ei a ia ki auala i lalo ifo o te laukele kolā e seai se manu telā e kilo ‵mao e mafai o lavea ne ia. E maua eiloa te poto o te Atua mai te mataku ki a Ieova.

29:​12-​15. E ‵tau eiloa o fakaasi atu ne tatou mo te fiafia a te alofa tumau ki tino kolā e ma‵nako ki ei.

31:​1, 9-​28. Ne tuku mai eiloa ne Iopu se fakaakoakoga mō tatou me ne ‵kalo keatea a ia mai i te fakatāgata, te mulilua, mo faifaiga sē ‵lei kae sē a‵lofa, te fia maumea, mo te ifo ki tupua.

“AU KO SALAMO  MO TOKU LOTO KĀTOA”

(Iopu 32:1–​42:⁠17)

Ne fakalogologo atu eiloa mo te kufaki a Eliu, te ‵toe tino foliki eiloa i a latou, ki te sautalaga tenā. Nei la, ko kamata o faipati atu tou tagata mo te loto toa. Ne fakatonutonu atu ne ia a Iopu mo ana taugasoa fakamafanafana ‵loi.

I te taimi eiloa ne oti atu ei te faipatiga a Eliu, ne faipati atu a Ieova mai i se afā. E seai eiloa se fakamatalaga ne fai atu ne ia e uiga ki logo‵maega o Iopu. Kae mai i te ‵sili atu o fesili tāua, ne fai ei ne te Atua Malosi Katoatoa ke iloa ne Iopu Tena ‵mana sē fuafuagina mo te lasi o tena poto. Ne taku ‵tonu atu a Iopu me ne faipati atu fua a ia e aunoa mo te malamalama, ana muna: “Au ko oko eiloa i te mā i aku pati katoa kolā ko oti ne fai. Au ko salamo mo toku loto kātoa.” (Iopu 42:⁠6) I te taimi ne oti atu ei a te tofotofoga o Iopu, ne taui atu ki tena fakamaoni.

Tali ki Fesili Faka-te-Tusi Tapu:

32:​1-3​​—⁠Ko te taimi fea ne oko atu ei a Eliu? Ona ko te mea ne lagona ne Eliu a pati katoa, kāti ne tai tu ‵mao atu a ia i se koga telā ne lagona ne ia a pati katoa i se taimi mai mua o te faipatiga a Iopu ke oko ki te taimi ne gata atu ei te fai‵patiga o ana taugasoa tokotolu mai tua o aso e fitu.​​—⁠Iopu 3:​1, 2.

34:​7, NW​​—⁠Ne inu pefea a Iopu ki “pati fakatauemu e pelā me ne vai”? I te taimi ne fanoanoa malosi ei a ia, ne fakalogologo atu a Iopu ki pati fakatauemu o ana taugasoa e tokotolu e pelā me e fakasino tonu atu eiloa ki a ia, faitalia eiloa me ne fai‵pati ‵teke atu latou ki te Atua. (Iopu 42:⁠7) Telā la, ne fakalogologo atu eiloa a ia ki pati fakatauemu e pelā me se tino telā e inu mo te fiafia ki vai.

Akoakoga mō Tatou:

32:​8, 9. E se maua fua te poto e ‵tusa mo te matua o se tino. E manakogina i ei te malamalama i te Muna a te Atua mo te takitakiga o tena agaga.

34:​36, NW. E fakatalitonu atu eiloa te ‵tou fakamaoni māfai ko ‘tofotofogina katoatoa’ tatou i nisi auala.

35:⁠2. Ne fakalogologo faka‵lei atu eiloa a Eliu kae ne iloa ‵lei eiloa ne ia a te fakalavelave tonu a koi tuai o faipati a ia. (Iopu 10:7; 16:7; 34:⁠5) A koi tuai o tuku atu a pati fakatonutonu, e ‵tau eiloa mo toeaina Kelisiano o fakalogo‵logo faka‵lei, ke maua a fakamatalaga ‵tonu, kae ke malamalama faka‵lei i mea kolā e aofia i ei.​​—⁠Faataoto 18:⁠13.

37:14; 38:1–​39:30. A te mafaufau ‵loto ki galuega fakaofoofogia a Ieova​​—⁠te fakaasiga o tena ‵mana mo tena poto​​—⁠e fai ei ke loto mau‵lalo tatou kae fesoasoani mai foki ke lavea atu ne tatou me i te fakamalugāga o tena pulega sili e sili atu i te tāua i lō so se isi mea telā e ma‵nako tatou ki ei.​​—⁠Mataio 6:​9, 10.

40:​1-4, NW. Kafai e kamata o fāmeo tatou ki te Atua Malosi Katoatoa, e ‵tau mo tatou o ‘‵pono ‵tou gutu ki ‵tou lima.’

40:⁠15–​41:34. Ko tafaga la te malosi telā e maua ne te Pemota (ko te hippopotamus) mo te Leviatana (ko te kolokolotaila)! Ke tumau i te taviniga ki te Atua, e ‵tau o maua foki ne tatou te malosi mai te Tino telā ne faite ne ia a manu fe‵kai ma‵losi konei, kae e mafai o tuku mai ne ia te malosi ki a tatou.​​—⁠Filipi 4:​13.

42:​1-6. A te fakalogologo atu ki pati a Ieova mo fakamasauaga o fakaasiga o tena ‵mana ne fesoasoani atu ki a Iopu ke ‘matea ne ia te Atua,’ io me ke maina ‵lei i te munatonu e uiga ki a ia. (Iopu 19:26) Ne ‵fuli ei ana mafaufauga. Kafai e maua ne tatou a pati fakatonutonu mai te Tusi Tapu, e ‵tau mo tatou o talia katoatoa ‵tou mea ‵se kae fai a ‵fuliga ‵tau.

Ke Fakaakoako Atu Tatou ki “te Kufaki o Iopu”

E fakaasi manino mai ne te tusi o Iopu me e se māfua mai i te Atua a logo‵maega o tino, kae e māfua mai i a Satani. A te taliaga ne te Atua o amioga ma‵sei i te lalolagi, e tuku mai i ei se avanoaga ke avatu ne tatou se tali ki te feitu e ‵kau atu tatou ki ei i te kinauga e uiga ki te pulega sili a Ieova mo ‵tou fakamaoni.

E pelā mo Iopu, ka tofotofogina a latou katoa kolā e a‵lofa ki a Ieova. E fakamalosi aka te ‵tou loto talitonu ne te tala o Iopu me e mafai foki o tumau tatou i te fakamaoni. E fakamasaua mai i ei ki a tatou me ka se tumau ki te se-gata-mai ‵tou fakalavelave. E fai mai te Iakopo 5:​11: “Ko oti ne lagona ne koutou te kufaki o Iopu, ka ko iloa foki ne koutou i te Aliki [ko Ieova] ne fesoasoani atu ki a ia i te fakaotiga.” Ne taui atu ne Ieova a Iopu mō tena tumau i te fakamaoni. (Iopu 42:​10-​17) Ko tafaga la te gali o te fakamoemoega mō aso mai mua nei​​—⁠ko te ola se-gata-mai i te lalolagi Palataiso! E pelā mo Iopu, ke na fakaiku aka nei ke tumau tatou i te ‵tou fakamaoni.​​—⁠Epelu 11:⁠6.

[Fakamatalaga mai lalo]

[Ata i te itulau e 32]

Ne a mea e mafai o tauloto ne tatou mai te “kufaki o Iopu”?