“Ko Oti ne Lagona ne Koutou te Kufaki o Iopu”
“Ko oti ne lagona ne koutou te kufaki o Iopu, ka ko iloa foki ne koutou i te Aliki ne fesoasoani atu ki a ia i te fakaotiga. Me i te Aliki e ‵fonu i te alofa ‵nau mo te alofa fesoasoani io me fakamagalo.”—IAKOPO 5:11.
1, 2. Ne a tofotofoga ne fe‵paki mo se tauavaga mai Polani?
KO OTI ne fai a Harald Abt mo fai se Molimau a Ieova e tokotasi mō se fia masina i te taimi ne pukemālō ei ne te kautau a Hitila a Danzig (ko Gdańsk i aso nei) i te feitu ki matū o Polani. Ne kamata i ei o faigata, e tonu, ne fakamataku te mea tenā ki Kelisiano ‵tonu i konā. Ne taumafai a pulisimani ‵funa fakasauā ko te Gestapo o faimālō a Harald ke saina ne ia se pepa telā e fakaasi atu ei me ko tiakina ne ia tena talitonuga, kae ne ita fitifiti tou tagata. Mai tua o se fia vaiaso i te falepuipui, ne ave ei a Harald ki te falepuipui fakasauā ko Sachsenhausen, telā ne ta fakamasei faeloa a ia i ei. Ne fakasino atu se ofisa ki te chimney o te fale telā e ‵sunu sāle i ei a foitino o tino ‵mate kae fai atu ki a Harald, “Ka fanaka eiloa koe i te koga tenā ki a Ieova tou Atua i se 14 o aso mai mua nei māfai e tumau eiloa koe i tou talitonuga.”
2 I te taimi ne puke ei a Harald o ‵loka, a ko tena avaga ko Elsa, koi faū eiloa ne ia te lā pepe fafine telā ko sefulu fua ana masina. Kae ne seki sao foki a Elsa mai i pulisimani fakasauā konei. Ne seki leva kae ave keatea tena pepe mai i a ia, ‵pei ei a ia ki te isi falepuipui fakamataku i Auschwitz. Kae ne ola eiloa a ia i te fia o tausaga e pelā foki mo Harald. E mafai o faitau koe ki te auala ne kufaki ei laua i The Watchtower i a Apelila 15, 1980. Ne tusi mai a Harald: “E ‵tusa mo te 14 tausaga o toku olaga ne fakamāumāu i loto i falepuipui fakama‵taku ona ko toku fakatuanaki ki te Atua. Ne fai mai se fesili ki a au, penei: ‘E mata, ne fai tau avaga mo fai se fesoasoani ki a koe ke kufaki i mea katoa konei?’ Ao! Ne iloa ne au mai te kamataga eiloa me ka se mafai o gutugutulua a ia i tena fakatuanaki, kae ne fesoasoani mai te mea tenei ke fakatumau ne ia au. Ne iloa ne au me ka ‵lei atu ki a ia ke mate au i te fakamaoni i lō toku saoloto ona ko te gutugutulua. . . . Ne kufaki eiloa a Elsa i mea faiga‵ta e uke kolā ne fepaki mo ia i tausaga ne nofo ei a ia i falepuipui fakama‵taku i Siamani.”
3, 4. (a) I a ai a fakaakoakoga e mafai o fakamalosi mai ke tumau a Kelisiano i te kufaki? (e) Kaia e fakamalosi mai ei te Tusi Tapu ke iloilo ne tatou te tala o Iopu?
3 E se se mea faigofie ke logo‵mae i mea matagā, e pelā mo te mea e fakamaoni mai ne Molimau e tokouke. Ona ko te pogai tenei, e polopoloki mai te Tusi Tapu ki Kelisiano katoa: “Ke masaua ne koutou a pelofeta kolā ne fai‵pati i te igoa o te Aliki. Ke fai latou mo fakaakoakoga o te loto kufaki i puapuagā.” (Iakopo 5:10) E tokouke a tavini a te Atua ne fakasauāgina e aunoa mo se pogai i te fia senitenali ko ‵teka. E fakamalosi mai a “akoakoga ‵lei a tino tali‵tonu io me ko molimau” konei ke tumau tatou i te tele mo te kufaki i te fakatautelega faka-Kelisiano.—Epelu 11:32-38; 12:1.
4 E tuku mai ne Iopu se fakaakoakoga tafasili i te ‵lei o te kufaki i te Tusi Tapu. “E taku ne tatou latou me e fia‵fia, i te mea e loto kufaki latou,” ne tusi mai a Iakopo. “Ko oti ne lagona ne koutou te kufaki o Iopu, ka ko iloa foki ne koutou i te Aliki ne fesoasoani atu ki a ia i te fakaotiga. Me i te Aliki e ‵fonu i te alofa ‵nau mo te alofa fesoasoani io me fakamagalo.” (Iakopo 5:11) E tuku mai i te tala o Iopu se ata o te taui telā ka maua ne tino fakamaoni kolā ka fakamanuia ne Ieova. Kae e sili atu i ei, e fakaasi mai i ei a muna‵tonu kolā ka aogā ki a tatou i taimi o fakalavelave. E fesoasoani mai te tusi ko Iopu ke tali aka ne tatou a fesili konei: Kafai ko tofotofogina, kaia e ‵tau ei o malamalama tatou i kinauga tāua kolā e aofia i ei? Ne a uiga mo kilokiloga e fesoasoani mai ke tumau tatou i te kufaki? E mafai pefea o fakamalosi atu tatou ki taina Kelisiano kolā e logo‵mae i olotou fakalavelave?
Ke Malamalama i te Ata Saukātoa
5. Se a te ‵toe kinauga tāua e ‵tau o masaua māfai ko fe‵paki tatou mo tofotofoga mo fakaosoosoga?
5 Ko te mea ke paleni ‵lei tatou i te feitu faka-te-agaga i taimi o fakalavelave, e ‵tau o malamalama ‵lei tatou i mea e aofia i kinauga katoa. Me kafai e se fai penā, ka mafai o fakalavelave mai a ‵tou fakalavelave totino ki ‵tou kilokiloga faka-te-agaga. A te kinauga e uiga ki te fakamaoni ki te Atua ko te ‵toe mea tāua. E isi se fakamolemole ne fai mai ne Ieova telā e ‵tau o lagona ‵tonu ki ‵tou loto taki tokotasi: “Ke poto koe, e taku tama, ke fakafiafia ne koe toku loto, ko te mea ke mafai o tuku atu ne au se tali ki a ia telā e fakaitaita mai ki a au.” (Faataoto 27:11, NW) Ma‵faga o tauliaga gali tenā! Faitalia a ‵tou vāivāiga mo ‵tou tulaga sē ‵lei katoatoa, e mafai eiloa o fai ne tatou te ‵tou Atua ke fiafia. E fai eiloa tatou penā māfai e fai ne te ‵tou a‵lofa mō Ieova ke kufaki ei tatou i tofotofoga mo fakaosoosoga. A te alofa faka-Kelisiano tonu e kufaki ne ia a mea katoa. E se mafai o gata io me takavale te alofa tenā.—1 Kolinito 13:7, 8.
6. Ne fakaitaita atu pefea a Satani ki a Ieova, kae se a te tulaga ne oko ki ei?
6 E fakaasi faka‵lei mai i te tusi ko Iopu me ko Satani telā e fakaitaita ne ia a Ieova. E fakaasi mai foki i ei a uiga matagā o te fili sē lavea tenei mo tena manakoga ke fakamasei ne ia ‵tou va fealofani mo te Atua. E pelā mo te mea e fakaasi mai i te tala o Iopu, e ‵losi atu faeloa a Satani me e maua ne tavini a Ieova katoa se lagonaga kaimanako kae taumafai o fakamaoni atu me e mafai o galo te lotou a‵lofa ki te Atua. Ko leva ne fakaitaita atu a ia ki te Atua i se fia afe tausaga. I te taimi ne ‵pei ifo ei Satani keatea mo te lagi, ne fakamatala mai i se leo mai te lagi a ia e pelā me ko “te tino telā ne ‵moli ne ia o‵tou taina” kae fai mai foki me e fai ne ia a ‵losiga penā “i mua o te Atua . . . i te ao mo te po.” (Fakaasiga 12:10) Mai te ‵tou kufaki mo te fakamaoni e fakaasi atu ei ne tatou a te ‵se o ana ‵losiga.
7. Se a te ‵toe auala ‵lei ke ‵teke atu ei ki ‵tou vāivāiga faka-te-foitino?
7 E ‵tau o masaua ne tatou me e fakaaogā ne te Tiapolo so se fakalavelave telā e fepaki mo tatou ko te mea ke faka‵mao ne ia tatou keatea mai i a Ieova. Ko taimi fea ne tofotofo ei ne ia a Iesu? Ko te taimi eiloa telā ne fiakai ei a Iesu mai tua o te fia o aso ne fakalikiliki ei a ia. (Luka 4:1-3) Ne mafai ne Iesu o ‵teke atu a tofotofoga a te Tiapolo ona ko tena malosi faka-te-agaga. Ko tafaga la te tāua ke ‵teke atu ki so se vāivāiga faka-te-foitino—telā kāti e māfua mai i se masaki io me ko te olaga matua—mai te fakaaogāga o ‵tou malosi faka-te-agaga! “E tiga eiloa i te gasolosolo malie o vāi‵vāi omotou foitino,” e se ‵fiu eiloa tatou ona “ko te motou malosi faka te Agaga e fakafou faeloa i aso takitasi.”—2 Kolinito 4:16.
8. (a) E mafai pefea o fakavāivāi mai a lagonaga sē aogā? (e) Se a te kilokiloga telā ne maua ne Iesu?
8 E se gata i ei, e mafai o fakamasei ne lagonaga sē aogā a tatou i te feitu faka-te-agaga. Kāti ka mafaufau se tino penei, ‘Kaia e talia ei ne Ieova te mea tenei?’ ‘E mafai pefea o fai ne se taina se mea penei ki a au?’ ko te fesili a se tino telā ne fai atu ki ei se faifaiga sē ‵lei. E mafai o fai ne vaegā lagonaga penā ke sē lavea ne tatou a kinauga tāua kae ‵saga atu fua ki ‵tou fakanofonofoga totino. E foliga mai me e sili atu te fakamaseiga ne fai ne taugasoa ma‵sei e tokotolu o Iopu ki ana lagonaga i lō te logo‵mae o tena foitino mai tena masaki. (Iopu 16:20; 19:2) E penā foki te fakaasiga a te apositolo ko Paulo me i te kaitaua i se taimi leva e mafai o ‘tuku atu i ei se avanoa mō te Tiapolo.’ (Efeso 4:26, 27) I lō te fanoanoa io me ko te kaitaua ki se tino io me ko te mafaufau malosi ki se faifaiga se fakamaoni, e ‵lei atu ke fakaakoako a Kelisiano ki a Iesu i te ‘tuku katoatoa atu o latou ki te Famasino amiotonu,’ ko Ieova te Atua. (1 Petelu 2:21-23) A te mauaga o te ‘mafaufau’ o Iesu e mafai o fai pelā me se puipuiga tāua mai taua a Satani.—1 Petelu 4:1.
9. Se a te fakamaoniga e tuku mai ne te Atua ki a tatou e uiga ki fakalavelave kolā e ‵tau o fa‵ki i ei io me ko tofotofoga kolā e fe‵paki mo tatou?
9 Kae e sili i mea katoa, e se ‵tau o ‵kilo atu tatou ki ‵tou fakalavelave e pelā me ne fakamaoniga o te se fiafia o te Atua ki a tatou. Ne fakalogo‵mae atu eiloa ki a Iopu a tena se malamalama i te taimi ne ta ei a ia ne ana tino fakamafanafana ‵loi ki olotou pati. (Iopu 19:21, 22) E fakatalitonu mai ki a tatou a pati konei mai te Tusi Tapu: “I te Atua e se mafai o fakaosoosogina ne te masei, kae se fakaosooso foki ne ia tino ki te masei.” (Iakopo 1:13) E ‵kese mai i ei, e tauto mai a Ieova me ka fesoasoani mai a ia ki a tatou ke mafai o fa‵ki i so se fakalavelave telā e fepaki mo tatou, kae tuku mai ne ia se auala ke ‵sao ei mai i so se tofotofoga e oko mai ki a tatou. (Salamo 55:22; 1 Kolinito 10:13) Mai te fakapilipili atu ki te Atua i taimi o fakalavelave, e mafai o iloa tonu ne tatou o fakatulaga a mea katoa kae ‵teke atu mo te manuia ki te Tiapolo.—Iakopo 4:7, 8.
Auala Fesoasoani ke Kufaki i ei
10, 11. (a) Ne a mea ne fesoasoani atu ki a Iopu ke tumau i te kufaki? (e) Ne fesoasoani atu pefea ki a Iopu a te mauaga o se loto lagona ‵lei?
10 Faitalia te tulaga masei ne oko ki ei a Iopu—e aofia i ei ko pati sē ‵lei mai tino kolā ne fai pelā me ne ana tino “fakamafanafana” mo tena ‵numi i te pogai tonu o ana fakalavelave—ne tumau eiloa a Iopu i te fakamaoni. Ne a mea e tauloto ne tatou mai tena kufaki? E aunoa mo te fakalotolotolua, a te pogai tāua ne manuia ei a ia ko tena fakamaoni ki a Ieova. ‘Ne mataku a ia ki te Atua kae fakaeteete i a ia ma agasala.’ (Iopu 1:1) Tenā eiloa te olaga kātoa o Iopu. Ne ita a Iopu ma fulitua atu ki a Ieova, ke oko ki te taimi ne seki malamalama ei i te pogai ne ‵fuli fakavave ei a mea e uiga ki a ia. Ne talitonu a Iopu me ‵tau o tavini atu a ia ki te Atua i taimi ‵lei mo taimi sē ‵lei.—Iopu 1:21; 2:10.
11 Ne fakamafanafana atu foki ki a Iopu a tena loto lagona ‵lei. I te taimi telā ne foliga mai me ka mate atu a ia, ne fakamafanafana atu eiloa ki a ia a te iloaga me ne fai ne ia te ‵toe mea e mafai o fai ke fesoasoani atu ei ki nisi tino, ne puke ‵mau a ia ki fakatakitakiga amio‵tonu a Ieova, kae ‵kalo keatea mai so se vaega o tapuakiga ‵se.—Iopu 31:4-11, 26-28.
12. Ne saga atu pefea a Iopu ki te fesoasoani ne maua ne ia mai i a Eliu?
12 Se mea tonu eiloa me ne manakogina ne Iopu se fesoasoani ke fakatonutonu aka ei tena kilokiloga i nisi feitu. Kae ne talia ne ia mo te loto maulalo a te fesoasoani tenā—se isi kī tāua ki te manuia o tena kufaki. Ne fakalogologo a Iopu mo te āva ki pati polopoloki aogā a Eliu, kae ne talia ne ia a mea kolā ne faka‵tonu ne Ieova. “Au ne faipati ki mea e se malamalama ei au,” ne fai tonu mai a ia. “Au ko oko eiloa i te mā i aku pati katoa kolā ko oti ne fai. Au ko salamō mo toku loto kātoa.” (Iopu 42:3, 6) Faitalia te masaki telā koi pokotia a ia i ei, ne fiafia eiloa a Iopu me ne fai ne te fakamafuliga o tena mafaufau ke fakapilipili atu a ia ki te Atua. “Te Aliki, e iloa ne au me e . . . mafai foki ne koe o fai a mea katoa,” ko pati a Iopu. (Iopu 42:2) Mai i fakamatalaga a Ieova e uiga ki te lasi o tena ‵malu, ne malamalama ei a Iopu i tena tulaga tonu māfai e fakatusa ki te Māfuaga.
13. Ne aogā pefea ki a Iopu a te fakaasiatuga o te alofa fakamagalo?
13 I te fakaotiga, ne tuku mai ne Iopu se fakaakoakoga tafasili i te ‵lei o te alofa fakamagalo. Ne logo‵mae malosi a Iopu i ana tino fakamafanafana fakaloi‵loi, kae i te taimi ne fakamolemole atu ei a Ieova ke ‵talo mō latou, ne fai eiloa ne ia te mea tenā. Mai tua ifo i ei, ne faka‵lei ei ne Ieova te masaki o Iopu. (Iopu 42:8, 10) E manino ‵lei me e se mafai o fesoasoani mai a te loto masei ke maua ne tatou te kufaki, kae e mafai o fai penā māfai e isi se alofa mo te alofa fakamagalo. Kafai e fakapuli i a tatou a mea kolā e ita tatou ki ei, ka maua ne tatou i ei se fakamalosiga i te feitu faka-te-agaga, kae tenā eiloa te auala e fakamanuia ne Ieova.—Maleko 11:25.
Tino Fakatonu‵tonu Āpo Kolā e Fesoasoani Mai ke Kufaki Tatou
14, 15. (a) Ne a uiga e mafai o fakaaogā ne se tino fakatonutonu ke faka‵lei aka ei a nisi tino? (e) Fakamatala mai te pogai ne manuia ei a Eliu i te fesoasoani atu ki a Iopu.
14 A te suā akoakoga e tauloto ne tatou mai te tala o Iopu ko te tāua o tino fakatonutonu āpo. A vaegā tino penā e fai pelā me ne ‘taina kolā e fesoasoani mai i taimi o fakalavelave.’ (Faataoto 17:17) Kae e pelā mo te mea e fakaasi mai i te tala o Iopu, e mafai o fakalogo‵mae mai a nisi tino fakatonutonu i lō te fakamafanafana mai. A te tino fakatonutonu ‵lei e ‵tau o fakaasi mai ne ia te loto malamalama, te āva mo te atafai, e pelā mo Eliu. Kāti e manakogina ke fakamafulifuli aka ne toeaina mo nisi Kelisiano ma‵tua a mafaufauga o taina kolā ko taotaomaki ne fakalavelave, kae i te faiga o te mea tenā, e maua ne vaegā tino fakatonutonu penā a mea aogā e uke mai te tusi ko Iopu.—Kalatia 6:1; Epelu 12:12, 13.
15 E uke ‵ki a akoakoga tāua e maua ne tatou mai te auala ne fai ei ne Eliu te mea tenā. Ne fakalogologo a ia mo te kufaki i se taimi leva ki manatu sē ‵tonu o taugasoa o Iopu. (Iopu 32:11; Faataoto 18:13) Ne fakaaogā ne Eliu a te igoa o Iopu kae ne fakamolemole atu ki ei e pelā me sena taugasoa. (Iopu 33:1) E ‵kese mo tino fakamafanafana fakaloi‵loi konā, ne seki kilo atu a Eliu i a ia e maluga atu i a Iopu. “A taua ne faite katoa mai i te ‵pefu,” ko ana pati. Ne seki manako a ia ke toe fakaopoopo atu ne logo‵maega ki a Iopu mai te faiga o pati e seai ne aogā. (Iopu 33:6, 7; Faataoto 12:18) I lō te fakamasei atu ki faifaiga mua a Iopu, ne fakamālō atu a Eliu mō tena amiotonu. (Iopu 33:32) Kae e sili atu i ei, ne maua ne Eliu te kilokiloga a te Atua, kae ne fesoasoani atu a ia ke matea ne Iopu te manatu me e se mafai o fai ne Ieova se mea ‵se. (Iopu 34:10-12) Ne fakamalosi atu a ia ki a Iopu ke fakatalitali ki a Ieova, i lō te taumafai o fakaasi atu tena amiotonu. (Iopu 35:2; 37:14, 23) E aogā eiloa ki toeaina Kelisiano mo nisi tino a akoakoga konei.
16. Ne fai pefea a tino fakamafanafana fakaloi‵loi a Iopu e pelā me ne mea faigaluega a Satani?
16 Ne ‵kese ‵ki eiloa te ‵lei o pati fakatonutonu a Eliu mo pati faka‵mae loto a Elifasa, Pilitati mo Sofala. “E seki faipati ne koutou te mea tonu e uiga ki a au,” ko pati a Ieova ki a latou. (Iopu 42:7) E tiga eiloa ne fai mai latou me ne fia tuku atu fua ne latou a pati ‵lei, ne fai eiloa latou mo fai ne tino faigaluega a Satani i lō te fai pelā me ne taugasoa fakamaoni. Ne ‵losi atu latou tokotolu konei mai te kamataga me ne māfua a fakalavelave o Iopu mai i a ia eiloa. (Iopu 4:7, 8; 8:6; 20:22, 29) E ‵tusa mo pati a Elifasa, e se talitonu a te Atua ki ana tavini, kae e se fia saga mai foki a Ia me ko tatou e amio‵tonu io me ikai. (Iopu 15:15; 22:2, 3) Ne ‵losi atu foki a Elifasa e uiga ki mea ‵se kolā ne seki fai aka eiloa ne Iopu. (Iopu 22:5, 9) E ‵kese mai i ei, ne fesoasoani eiloa a Eliu ki a Iopu i te feitu faka-te-agaga, telā ko te mea tāua telā e ‵tau o kausaki ki ei se tino fakatonutonu alofa.
17. Ne a mea e ‵tau o masaua māfai ko fe‵paki tatou mo tofotofoga?
17 E isi se isi akoakoga e uiga ki te kufaki e maua ne tatou mai te tusi ko Iopu. E kilokilo mai eiloa a te ‵tou Atua alofa ki ‵tou tulaga kae e loto fiafia kae mafai foki ne ia o fesoasoani mai ki a tatou i auala kese‵kese. Ko oti ne fai‵tau muamua tatou ki te tala o Elsa Abt. Ke mafaufau ki tena fakaikuga: “Mai mua o puke au o ave o ‵loka a ko oti ne faitau ne au se tusi a se tuagane telā ne fai mai me kafai ko oko ki toe tofotofoga faiga‵ta, e fai ne te agaga o Ieova ke maua ne koe te tokagamalie. Ne mafaufau au me kāti ne fakalasilasi fua ne ia tena tala. Kae i te taimi ne fepaki ei au mo tofotofoga, ne iloa ei ne au te ‵tonu o ana pati. Tenā eiloa te mea ne tupu. Se mea faigata ke mafaufau ki ei, māfai e seki tupu ki a koe te mea tenā. Kae ne tupu eiloa te mea tenā ki a au. E fesoasoani mai eiloa a Ieova.” Ne seki faipati a Elsa ki mea kolā ne mafai io me ne fai eiloa ne Ieova i te fia meleniuma ko ‵teka i aso o Iopu. Ne faipati eiloa a ia e uiga ki ‵tou taimi nei. E tonu, “e fesoasoani mai eiloa a Ieova”!
E Fiafia te Tino Telā e Loto Kufaki
18. Ne a mea aogā ne maua ne Iopu mai tena kufaki?
18 Kāti ne nāi tino fua i a tatou e ‵pau te faigata o olotou fakalavelave mo Iopu. Kae faitalia so se tofotofoga e oko mai ki a tatou i te olaga tenei, e maua eiloa ne tatou a pogai tāua ke tumau i te fakamaoni, e pelā mo Iopu. A te tonuga loa, ona ko te kufaki ne fakamanuiagina i ei te olaga o Iopu. Ne fakakatoatoa a ia ne tena kufaki. (Iakopo 1:2-4) Ne fakamalosi aka i ei tena fesokotakiga mo te Atua. “Ne iloa ne au a koe i tala a tino, kae nei ko lavea eiloa ne au a koe ki oku mata,” ko pati a Iopu. (Iopu 42:5) Ne fakamaoni aka i ei i a Satani se tino loi me ne seki mafai o fakamasei ne ia te fakamaoni o Iopu. I te fia selau tausaga mai tua ifo, ne fakasino atu faeloa a Ieova ki tena tavini ko Iopu e pelā me se fakaakoakoga o te amiotonu. (Esekielu 14:14) E fakamalosi mai foki a tena fakamaoni mo tena kufaki ki tino o te Atua i aso nei.
19. Kaia e mafaufau ei koe me e aogā te kufaki?
19 I te taimi ne tusi atu ei a Iakopo ki Kelisiano i te senitenali muamua e uiga ki te kufaki, ne fakasino atu a ia ki te lotomalie telā e māfua mai i te kufaki. Kae ne fakaaogā ne ia te fakaakoakoga a Iopu ke fakamasaua atu ei i a Ieova e fakamanuia malosi ne ia ana tavini fakamaoni. (Iakopo 5:11) E fai‵tau tatou i te Iopu 42:12: “Ne fakamanuia ne te Aliki te vaega fakaoti o te olaga o Iopu, e silia atu i te fakamanuiaga muamua.” Ne tuku atu ne te Atua ki a Iopu fakalua taimi ana mea kolā ne ‵galo, kae ne ola a ia i se olaga loa kae fakafiafia. (Iopu 42:16, 17) E penā foki tatou, ka fakaseai atu foki so se logo‵maega telā e kufaki ne tatou i te olaga tenei kae ka sē toe masaua eiloa i loto i te lalolagi fou a te Atua. (Isaia 65:17; Fakaasiga 21:4) Ko oti ne lagona ne tatou a te kufaki o Iopu, kae e fakamalosi mai ki a tatou fakatasi mo te fesoasoani o Ieova ke tau‵tali tatou ki te fakaakoakoga a Iopu. E folafola mai te Tusi Tapu, penei: “Amutia a te tino telā e kufaki i taimi o tofotofoga, me kafai e manumalo a ia i te tofotofoga, ka maua ne ia te foualiki o te ola telā ne poloaki mai ei te Atua ki tino kolā e a‵lofa ki a ia.”—Iakopo 1:12.
Ka Tali Mai Koe Pefea?
• E mafai pefea o fai ne tatou te loto o Ieova ke fiafia?
• Kaia e se ‵tau ei o fakaiku aka ne tatou me i ‵tou fakalavelave se fakamaoniga o te sē fiafia mai o te Atua?
• Ne a mea ne fesoasoani atu ki a Iopu ke kufaki?
• E mafai pefea o fakaakoako atu tatou ki a Eliu i te fakamalosiatuga o taina tali‵tonu?