Ke Fakaaoga a Tamā Pepa ke Fakasalalau Atu ei te Tala ‵Lei

1. Ne fakaaoga pefea ne tino o te Atua a tamā pepa?

¹ Ko oti eiloa ne fakaaoga ne tino o Ieova a tamā pepa faka-te-Tusi Tapu ke fakasalalau atu ei te tala ‵lei. I te 1880, ne kamata o ‵lomi ne S. T. Lasalo mo ana taugasoa a Bible Students’ Tracts, kae ne fakatoka eiloa a mea konei mō tino fai‵tau o te Faleleoleo Maluga ke tufatufa atu ki tino. Ne tāua ‵ki eiloa a tamā pepa kae tenā eiloa te pogai ne fakaaoga ei ne S. T. Lasalo a te pati “tract” ke aofia i te igoa o te Zion’s Watch Tower Tract Society, telā ko fakaigoa nei ki te Watch Tower Bible and Tract Society of Pennsylvania, i te taimi ne talia ei ke fakatu te fakapotopotoga sē fai pisinisi ke fakalauefa atu ei a manakoga o te Malo. I te 1918, e sili atu i te 300 miliona o tamā pepa ne tufatufa atu ne Tino A‵koga o te Tusi Tapu. Koi fai eiloa a tamā pepa mo fai se mea faigaluega magoi.

2. Kaia e ma‵goi ei a tamā pepa?

² Te Pogai e Ma‵goi ei a Tamā Pepa: E ‵lanu valevale a tamā pepa kae e atafia vave ne mata o tino. A te fekau toetoe i ei e se faka‵tau eiloa i te gali kae aoga foki. E gali ki tino i fale kolā kāti e se fia‵fia o fai‵tau ki se mekesini io me se tusi. E faigofie o ofo atu a tamā pepa, ke oko foki eiloa ki tino talai ‵fou mo tama‵liki. E se gata i ei, a tamā pepa e fo‵liki fua kae e faigofie ke tauave ne tatou.

3. Ke fakamatala atu se tala totino io me se tala i ‵tou tusi telā e fakaasi atu ei a te tāua o tamā pepa.

³ Ne tauloto a tino e tokouke i te taimi muamua e uiga ki te munatonu e auala i se tamā pepa. E pelā me se fafine i Haiti ne lavea ne ia se tamā pepa e tasi a tatou i te auala. Ne puke aka ne ia ki luga, faitau ki ei kae fai atu, penei: “Tenei eiloa te munatonu.” Fakamuli ifo, ne fanatu a ia ki te Kingdom Hall, ne kamata o sukesuke ki te Tusi Tapu, kae papatiso foki​​—ona ko te ‵mana o te Muna a te Atua i se tamā pepa.

4. Se a te ‵tou fakamoemoega i te taimi e ofo atu ei ne tatou a tamā pepa mō te masina?

⁴ Mai Fale ki Fale: Ona ko te mea e fai a tamā pepa mo fai se mea faigaluega magoi i te tukuatuga o se molimau, e kamata mai i a Novema ka aofia eiloa i tusi kolā ka ofo atu mō te masina i nisi taimi. E se ‵tau fua o tufa atu ne tatou a tamā pepa ki tino kae ke kamata foki ki ei a sau‵talaga. Kafai e fetaui mo se tino fiafia i te asiga muamua io me ko te ‵toe asiga, e mafai o fakaasi atu ne tatou a te faiga o te akoga faka-te-Tusi Tapu mai te fakaaogaga o te tusi ko te Akoakoga Mai te Tusi Tapu io me se isi tusi. E mafai pefea o ofo atu ne tatou a tamā pepa i te galuega mai fale ki fale? E kese‵kese a tamā pepa katoa, tela la, e ‵tau o fakamasani faka‵lei tatou ki tamā pepa kolā e ofo atu ne tatou.

5. E mafai pefea o ofo atu ne tatou a tamā pepa i te galuega mai fale ki fale?

⁵ E ‵tau o fakafetaui aka ‵tou pati fakatomua ki te koga talai mo te tamā pepa e fakaaoga ne tatou. E mafai o kamata ne tatou a te sau‵talaga mai i te tuku atu o te tamā pepa ki te tino i te fale. E mafai eiloa o fakamalosi aka tena fiafia ona ko te matagali o te ‵kava. Io me e mafai o fakaasi atu ne tatou a nai tamā pepa kae tuku te avanoaga ki te tino i te fale ke filifili aka a te mea e fiafia a ia ki ei. Kafai e ga‵lue i koga kolā e se fia ‵tala mai ne tino olotou mataloa, e mafai o puke ne tatou se tamā pepa i se auala telā e mafai o lavea ne te tino i te fale a te ‵kava, io me fesili atu me e mafai o tuku atu ne koe se mea mai lalo i te mataloa ona ko te fia iloa ne koe tena kilokiloga e uiga ki ei. Kafai te matua o te tamā pepa se fesili, e mafai o fakamolemole atu tatou ki a ia ke fakaasi mai tena kilokiloga ki ei. Io me e mafai o fakasae aka ne tatou se fesili telā ka fakamalosi aka ei tena fiafia kae fakatumau foki i ei se sau‵talaga. Ko mafai ei o faitau atu ne tatou se manatu e tasi mai i te tamā pepa fakatasi mo te tino i te fale, kae mānava malie aka māfai ko oti ne faitau atu a fesili, ko ‵kami atu ei te tino i te fale ke fakaasi mai ana manatu. E mafai o faitau atu a tusi fai‵tau fakavae mai te Tusi Tapu. Mai tua o te onoono atu ki nisi manatu, e mafai o fakagata te sau‵talaga kae fai a fakatokaga mautinoa ke toe ‵foki atu. Kafai e masani o tuku atu ne te fakapotopotoga a tusi i fale kolā e seai ne tino i ei, e mafai o tuku atu ne tatou se tamā pepa i se koga e se matea ne tino māfai e seai se tino i te fale.

6. E mafai pefea o fakaaoga a tamā pepa i te taimi e talai atu ei i auala?

⁶ Te Talai Atu i Auala: Kai fakaaoga aka eiloa ne koe a tamā pepa i taimi e talai atu ei i auala? E isi ne tino e fakavave kae e se fia ‵tu ke sau‵tala mo tatou. Kāti e tai faigata foki eiloa ke iloa ne tatou te lasi o te lotou fia‵fia. I lō te tuku atu o mekesini ‵fou e aunoa mo te iloa atu me ka fai‵tau latou ki ei io me ikai, kaia e se tuku atu ei ne koe se tamā pepa? Ona ko te gali o te ‵kava mo te toetoe o te fekau i ei, e mafai o fakamalosi aka ne te fia logo a te tino ke faitau ki te tamā pepa i nai minute fua. E tonu, kafai e se fakavave latou, e mafai o sau‵tala tatou mo latou ki nai fakamatalaga i te tamā pepa ne tuku atu ki a latou.

7. Ke fakamatala mai a tala ki te auala ke fakaaoga a tamā pepa i te taimi e talai atu ei i nisi taimi.

⁷ Te Talai Atu i so se Taimi: E faigofie ke fakaaoga a tamā pepa māfai ko talai atu i so se taimi. E tauave sāle ne se taina e tokotasi a nai tamā pepa i so se taimi e tiakina ei ne ia te fale. Kafai e fetaui a ia mo se tino, e pelā mo se tino galue i te sitoa, e ofo atu fua ne ia se mea ke faitau ki ei, ko tuku atu ei ne ia se tamā pepa. I te taimi ne olo atu ei se tauavaga ki New York City o mata‵mata i ei, ne iloa ne lāua me ka fetaui latou mo tino mai fenua kese‵kese. Tela la, ne ave ne lāua a te tamā tusi ko te Nations mo nai tamā pepa i ‵gana kese‵kese. Kae kafai e lagona ne lāua se tino e faipati i se ‵gana fakaatea telā e ‵togi atu ana mea i te feitu auala io me e sagasaga i lā tafa i te malae tafao io me se fale ‵kai, e tuku atu ne lāua se tamā pepa i tena ‵gana eiloa.

8. Se a te auala e fai ei a tamā pepa e pelā me ne fuaga?

⁸ “‵Toki Ou Lakau”: E mafai o fai a tamā pepa e pelā mo fuaga. E mafai o ‵toki ne se tino ‵tokilakau a fuaga mai te laku valevale atu ona ko te mea e se iloa ne ia a fuaga kolā ka ola kae ‵fua mai. E fai mai te Failauga 11:6: “Ke ‵toki ou lakau i te taeao pelā foki i te afiafi. E se mafai o iloa ne koe me e ola ‵lei katoa io me ka ola ‵lei nisi kae se ola ‵lei nisi.” Tela la, ke na tumau tatou i te ‘fakasalalau valevale atu o te poto’ e auala i mea faigaluega ma‵goi.​—Faata. 15:7.

[Ko manatu tāua e 3]

Ona ko te mea e fai a tamā pepa mo fai se mea faigaluega magoi i te tukuatuga o se molimau, e kamata mai i a Novema ka aofia eiloa i tusi kolā ka ofo atu mō te masina i nisi taimi