Akoakoga Aoga Mai Se ‵Talo Ne Fakatoka Faka‵lei

1. Se a te maopoopoga o tino o te Atua ka mafau‵fau tatou ki ei, kae ne a fesili ne ‵sae mai i ei?

“‵TU MAI ki luga o ‵viki atu ki te Aliki [Ieova] te otou Atua; ‵Viki atu ki a ia ki te se gata mai, se gata mai eiloa!” Mai pati fakama‵losi konā, ne maopoopo a tino o te Atua o ‵kau fakatasi i te ‵toe ‵talo loa eiloa i te Tusi Tapu. (Nee. 9:4, 5) Ne fai te maopoopoga i Ielusalema i te 24 aso o te fitu o masina faka-Iutaia ko Tishri (Setema/Oketopa), i te 455 T.L.M. A koi mafau‵fau tatou ki mea ‵tupu kolā e iku atu ki te aso fakapito tenā, fesili ifo ki a koe eiloa: ‘Ne a uiga masani ‵lei e ‵lago atu ki te iku manuia o te faigāmea? Ne a nisi akoakoga e mafai o tauloto ne au mai te ‵talo tenei ne fakatoka faka‵lei?’​—Sala. 141:2.

SE MASINA FAKAPITO

2. Se a te fakaakoakoga ‵lei ne fai ne te kau Isalaelu mō tatou i te maopoopoga a latou i te otiga ne toe faite a ‵pui o Ielusalema?

² I te masina mai mua o te maopoopoga mai luga, a ‵pui o Ielusalema ko oti eiloa ne toe faite ne te kau Iutaia. (Nee. 6:15) Ne fakaoti ne tino o te Atua a te galuega i loto fua i se 52 aso, kae ko kamata latou o ‵saga faka‵lei atu ki olotou manakoga faka-te-agaga. Tela la, i te aso muamua o te masina fou, ko Tishri (Setema/Oketopa), ne maopoopo fakatasi latou o fakalogo‵logo ki a Esela, fakatasi mo nisi tino Levi, e faitau kae fakamatala a te Tulafono a te Atua i se leo maluga. Ne ‵tu a kāiga katoa, e aofia i ei “ko tagata, fafine mo tamaliki kolā ko ma‵tua ko mafai o malamalama. . . . mai te tafataeao ke oko eiloa ki te tutonu.” Mafāga o fakaakoakoga ‵lei mō tatou i aso nei kolā e ‵kau ki fakatasiga i Kingdom Halls! E ui i ei, e mata, e isi ne taimi a tou mafaufau e fanofano valevale fua kae ko kamata koe o mafaufau ki nisi mea kolā e se tāua malosi? Kafai e penā loa, ke toe mafaufau ki te fakaakoakoga a tino Isalaelu mua kolā ne seki fakalogo‵logo fua kae ne faka‵goto foki ki olotou loto a mea ne lagona ne latou tenā ne kamata ei latou o ‵tagi ona ko te fakata‵mala o latou o faka‵logo ki te Tulafono a te Atua e pelā me se fenua.​—Nee. 8:1-9.

3. Se a te fakatonuga ne faka‵logo ki ei te kau Isalaelu?

³ A te mea tenei e se ko te taimi ke fakaasi ei olotou agasala i mua o tino. Se aso fia‵fia, se taimi fakafiafia i te tapuakiga ki a Ieova. (Nume. 29:1) Tenā ne fai atu ei a Neemia ki tino: “‵Foki nei ki otou fa‵kai o fai otou ‵kaiga. Tufatufa atu otou meakai mo uaina ki tino e se lava olotou mea. A te aso nei se aso e ‵malu ki te ‵tou Aliki [Ieova], tela la, sa fanoa‵noa. A te fiafia telā ka aumai ne te Aliki [Ieova] ki a koutou, ka fai ne ia koutou ke ma‵losi.” Ne faka‵logo eiloa a tino kae ne “fia‵fia” malosi i te aso tenā.​—Nee. 8:10-12.

4. Se a te mea ne fai ne ulu o kāiga Isalaelu, kae se a te mea ne iloa ne latou me se vaega tāua o te ‵Kaiga o Fale Fakamalumalu?

⁴ I te suā aso, ne maopoopo a ulu o kāiga o onoono ki te auala e mafai ei ne te fenua o tau‵tali fakapili‵pili i te Tulafono a te Atua. I te sukesukega a latou ki Tusitusiga Tapu, ne iloa aka ne latou i ei me ne ‵tau o aofia i te fitu o masina a te ‵Kaiga o Fale Fakamalumalu fakatasi mo tena maopoopoga ‵malu i te fakaotiga mai te 15 ki te 22 aso o Tishri (Setema/Oketopa), tenā ne kamata ei latou o fai olotou fakatokaga. Ne iku atu a te mea tenā ki te fai mo toe ‵Kaiga o Fale Fakamalumalu manuia talu mai i aso o Iosua kae “ko oko eiloa i te fia‵fia” o tino i ei. A te vaega tāua o te ‵kaiga tenei ko te faitauga o te Tulafono a te Atua i mua o tino katoa “mai te aso muamua o te ‵kaiga fiafia ke oko eiloa ki te ‵toe aso.”​—Nee. 8:13-18.

SE ASO E FAKAASI EI AGASALA

5. Se a te mea ne fai ne tino o te Atua mai mua malie o sui latou ne te kau Levi i te ‵talo ki a Ieova?

⁵ E lua aso mai tua ifo, ko te taimi tonu ke fakaasi ei ne tino Isalaelu a te fakata‵mala o latou o tausi ki te Tulafono a te Atua. A te aso tenei e sē se aso ke ‵kai fia‵fia i ei. Tela la, ne fakaliki‵liki a tino o te Atua kae ‵pei ki gatu lautaga ke fakaasi ei te lotou fanoa‵noa. E nofo ki se tolu itula i te taeao ne toe faitau ei te Tulafono a te Atua ki tino. I te afiafi, “ne fakatoese ei latou ona ko olotou agasala kae tapuaki atu ki te Aliki [Ieova] te lotou Atua.” Mai konā, ne sui ne te kau Levi a tino mai te fai atu o te lotou ‵talo telā ne fakatoka faka‵lei. ​—Nee. 9:1-4.

6. Se a te mea ne fesoasoani atu ki te kau Levi i te faiatuga o se ‵talo aoga, kae se a te akoakoga e tauloto ne tatou mai i ei?

⁶ E seai se fakalotolotolua me ko te fai‵tau ‵soko o latou ki te Tulafono a te Atua ne fesoasoani atu ki te kau Levi ke fakatoka a te ‵talo aoga ‵ki tenei. E fakasino fakapito eiloa a fuaiupu muamua e sefulu ki galuega mo uiga o Ieova. Kae ko te ‵toega o vaega o te ‵talo, ne faka‵mafa mai faeloa i ei a te ‘lasi o te alofa’ o te Atua kae fakamatala manino mai i ei me e se ‵tau o maua ne te kau Isalaelu ne faifaiga atafai penā. (Nee. 9:19, 27, 28, 31) Ka aoga foki ‵tou ‵talo e fai atu ki a Ieova māfai e mafau‵fau ‵loto tatou ki te Muna a te Atua i aso katoa pelā mo te kau Levi, kae talia ke faipati mai a Ieova ki a tatou a koi tuai o ‵talo atu tatou ki a ia.​—Sala. 1:1, 2.

7. Se a te mea ne fakamolemole atu te kau Levi ki te Atua, kae se a te akoakoga e tauloto ne tatou mai te mea tenei?

⁷ E aofia i te ‵talo a te fakamolemole faigofie fua e tasi. E maua a te mea tenā i vaega ki tua o te fuaiupu e 32, telā e faitau penei: “Te Atua te motou Atua, a koe e tafasili i te maluga! A koe e ‵mana kae fakamataku! A koe e fakamaoni faeloa o tausi au feagaiga. Mai i te taimi ne fakafi‵ta ei matou ne tupu o Asulia, ke oko mai eiloa ki aso nei, ko oko eiloa i omotou puapuaga.” Tela la, ne fai ne te kau Levi se fakaakoakoga ‵lei mō tatou ke tavae kae fakafetai muamua ki a Ieova a koi tuai o fai atu ‵tou fakamolemole totino i ‵tou ‵talo kolā e fai atu.

TE TAVAE ATU KI TE IGOA ‵MALU O TE ATUA

8, 9. (a) Se a te auala loto maulalo ne kamata ei ne te kau Levi te lotou ‵talo? (e) Ne a kautau faka-te-lagi e lua e fakasino atu ki ei te kau Levi?

⁸ E ui eiloa ne fakatoka faka‵lei olotou ‵talo, ne loto mau‵lalo te kau Levi kae ma‵natu aka me e se mafai o fakaasi katoatoa atu i olotou pati a tavaega kolā e ‵tau o maua ne Ieova. Tela la, e kamata te ‵talo ki te fakamolemole loto maulalo tenei e uiga ki tino o Atua: “A tino katoa ke ‵viki atu ki tena igoa ‵malu, tiga eiloa e seai se vikiga faka-te-lalolagi e katoatoa i te ‵lei.”​—Nee. 9:5.

⁹ Koi faka‵soko eiloa te ‵talo: “Te Aliki [Ieova], ko koe fua tokotasi ko te Aliki, ne faite ne koe a te lagi mo fetu o te vanimonimo. Ne faite ne koe a te fenua mo te tai mo mea katoa i ei; ne tuku mai foki ne koe a te ola ki mea katoa. A te kau o te lagi e ifo kae tapuaki atu ki a koe.” (Nee. 9:6) Ao, ne faite ne Ieova te Atua a te iunivesi kātoa, e aofia i ei a fakaputugā fetu e se mafai o lau. E fakaofoofogia foki a te faitega ne ia a mea katoa i ‵tou paneta fakatasi mo te mafai o fakaolaola a vaegā mea ola kese‵kese ke tumau eiloa o ‵fua mai i olotou vaega. Ne molimau ne agelu tapu a te Atua, ko “te kau o te lagi,” a mea katoa konei. (1 Tupu 22:19; Iopu 38:4, 7) E se gata i ei, ne fai ne agelu mo te loto maulalo a te loto o te Atua mai te tavini atu ki tino agasala “kolā ka maua ne latou te fakaolataga.” (Epe. 1:14) Mafāga o fakaakoakoga fakaofoofogia ne fai ne agelu mō tatou i te ‵tou tavini fakatasi atu ki a Ieova e pelā me se kautau ne akoako faka‵lei!​—1 Koli. 14:33, 40.

10. Se a te mea e tauloto ne tatou mai i faifaiga a te Atua ki a Apelaamo?

¹⁰ E ‵soko atu ki ei, ne ‵saga te kau Levi ki faifaiga a te Atua ki a Apelamo, telā ko 99 ana tausaga kae seki ai eiloa sena tamaliki mo tena avaga sē fanau ko Salai. Tenā te taimi ne ‵fuli ei ne Ieova a tena igoa ki a Apelaamo, tena uiga, “tupuga o malo e uke.” (Kene.  17:1-6, 15, 16) Ne tauto atu foki te Atua ki a Apelaamo i ana fanau ka ‵nofo i te fenua o Kanana. E puli sāle i tino a mea e tauto latou ki ei; kae e se penā a Ieova. E fai mai penei te ‵talo a te kau Levi: “Ko koe te Aliki [Ieova] te Atua ne filifili ne koe a Apelamo kae ne taki ne koe a ia mai i Ulo i Papelonia; kae ne ‵fuli ne koe tena igoa ki a Apelaamo. Ne iloa aka ne koe me i a ia se tagata e fakamaoni atu ki a koe. Tenā ne fai ei ne koe tau feagaiga mo ia. Ne tauto koe ki a ia ke tuku atu mō ia a te fenua o tino Kanana, . . . ke fai mo fenua e ‵nofo ei a tino o tena gafa. Ne tausi eiloa ne koe tau feagaiga, me i a koe e fakamaoni.” (Nee. 9:7, 8) Ke fakaakoako foki tatou ki ‵tou Atua amiotonu kae taumafai faeloa o tausi ki ‵tou pati e fai.​—Mata. 5:37.

TE FAKAASIATUGA O MEA A IEOVA NE FAI

11, 12. Fakamatala mai te uiga o te igoa o Ieova mo te auala ne fakaasi mai ei i ana faifaiga ki fanau a Apelaamo.

¹¹ A te uiga o te igoa ko Ieova “Ka Fai Eiloa ne au so se Mea e ‵Tau o Fai,” e fakauiga i ei i te Atua tenā e galue faeloa o fakataunu a mea kolā e tauto a ia ki ei. Ne fakaasi faka‵lei mai a te mea tenā i faifaiga a te Atua ki fanau a Apelaamo i te taimi ne ‵nofo pologa ei latou ki te kau Aikupito. I te taimi tenā, ne foliga mai me e se mafai o fakasaoloto a te fenua kātoa kae olo o ‵nofo i te Fenua o te Folafolaga. E ui i ei, ne gasuesue faeloa te Atua o fakataunu a tena tautoga e fakatalitonu mai i ei me e ‵tau eiloa o maua ne ia te igoa sili ko Ieova.

¹² E fai mai penei te ‵talo ne tusi ne Neemia e uiga ki a Ieova: “Ne lavea ne koe a te puapuaga o omotou tupuga i Aikupito; ne lagona ne koe te ka‵laga a latou mō se fesoasoani i te ‵Tai ‵Kula. Ne fai ne koe a mea fakaofoofogia ki te tupu mo ana ofisa mo tino o te fenua o Aikupito, me e iloa ne koe me e fakafi‵ta ne latou ou tino. I te taimi tenā, ne kamata ei o takutakua tou igoa, tenei eiloa e oko mai ki aso nei. I loto i te ‵tai, ne fakatoka i ei ne koe se auala mo sa‵sale tou fenua, kae ne ‵taki atu ne koe a latou i loto i ei i luga i te laukele malō. A latou kolā ne o‵mai o afuli ou tino ne ma‵lemu i te moana ‵poko, e pelā me se fatu e apulu i te ‵tai sou.” Kae ne faka‵soko eiloa a te ‵talo e uiga ki nisi mea ne fai ne Ieova mō ana tino: “Ne puke ne latou a te fenua o Kanana . . . Ne ‵fao mālō ne ou tino a fa‵kai e fai olotou olo mo laukele ola, mo fale e ‵fonu i koloa, mo vaikeli ko oti ne keli, mo lakau ko olive, mo lakau fai fuaga, mo toga-vine. Ne ‵kai latou i mea e ma‵nako latou ki ei, tenā ne ga‵solo ei latou o ‵puta; ne fakaaoga mo te fiafia ne latou a mea katoa ne tuku atu ne koe ki a latou.”​—Nee. 9:9-11, 24, 25.

13. Ne tausi atu pefea a Ieova ki manakoga faka-te-agaga o te kau Isalaelu, kae ne ‵saga atu pefea a tino ki ei?

¹³ E uke foki a nisi mea ne fai ne te Atua ke fakataunu a tena fuafuaga. Pelā me se fakaakoakoga, i te taimi eiloa ne tiakina ei ne te kau Isalaelu a Aikupito, ne tausi atu a Ieova ki olotou manakoga faka-te-agaga. Ne fai atu te kau Levi i te lotou ‵talo ki te Atua: “I te Mauga o Sinai ne fanaifo ei koe mai te lagi; ne faipati koe ki ou tino kae ne tuku atu ne koe ki a latou a tulafono lei mo akoakoga gali.” (Nee. 9:13) Ne taumafai a Ieova o akoako ana tino ko te mea ke mafai o tauave ne latou a tena igoa tapu e pelā me ne tino kolā ka ‵nofo i te Fenua o te Folafolaga, kae ne tiakina ne latou a mea ‵lei kolā ne tauloto ne latou.​—Faitau te Neemia 9:16-18.

E MANAKOGINA A POLOPOLOKIGA

14, 15. (a) Ne fakaasi atu pefea ne Ieova a te alofa fakamagalo ki ana tino agasala? (e) Se a te mea e tauloto ne tatou mai i faifaiga a te Atua ki tena fenua filifilia?

¹⁴ E fakasino atu te ‵talo a te kau Levi ki agasala e lua ne fai ne te kau Isalaelu mai tua malie eiloa o te lotou tautoga ne fai ke tausi latou ki te Tulafono a te Atua i te Mauga o Sinai. Ona ko mea konei, ko ‵tau eiloa o tiaki latou ke ‵mate. Kae e tavae atu eiloa te ‵talo ki a Ieova, penei: “E seki tiakina atu ne koe a latou i te vao, me i tou alofa e lasi. . . . I te fasefulu tausaga o latou i te vao ne tuku atu faeloa ne koe a mea e ma‵nako latou ki ei; a olotou gatu e se mafai o ma‵sei, mo olotou vae e seki ‵pala aka eiloa.” (Nee. 9:19, 21) E tuku mai foki ne Ieova a mea katoa e manakogina ne tatou ke tavini atu ki a ia mo te fakamaoni i aso nei. Ke mo a eiloa e fai tatou pelā mo te fia afe o tino Isalaelu kolā ne ‵mate i te koga lavaki ona ko te sē faka‵logo mo te sē lava o te lotou fakatuanaki. A mea konā “ne tusi ki lalo mo fai se fakailoaga ke fakaeteete tatou kolā ko ‵nofo i te taimi o te gataga o te olaga tenei.”​—1 Koli. 10:1-11.

¹⁵ Se mea fakafanoanoa i tino Isalaelu kolā ne ulu atu ki te Fenua o te Folafolaga, ko kamata o tapuaki atu ki atua ‵tatino o te kau Kanana. Tenā ne talia ei ne Ieova ke fakasauā ne atufenua i olotou tafa a tena fenua filifilia. I te taimi ne sala‵mo ei latou, ne fakamagalo latou ne Ieova kae faka‵sao mai i olotou fili. Ne tupu “faeloa” a te mea tenei. (Faitau te Neemia 9:26-28, 31.) Ne fai tonu atu te kau Levi: “I tausaga taki tasi, e fai faeloa koe ki ei ke sa ‵kalo keatea mai au tulafono. Ne uga ne koe au pelofeta ke fai‵pati ki a latou, ka ko ou tino e ‵tuli olotou taliga, tenā ne tuku ei ne koe latou ke fakatakavale ne nisi tino.”​—Nee. 9:30.

16, 17. (a) I te ‵toe ‵fokimaiga mai te ‵nofo pologa, ne ‵kese pefea te tulaga o te kau Isalaelu mai i olotou tupuga kolā ne ‵nofo muamua i te Fenua o te Folafolaga? (e) Se a te mea ne taku tonu atu ne te kau Isalaelu, kae se a te mea ne tauto latou ke fai?

¹⁶ Mai tua o te lotou ‵fokimaiga mai te ‵nofo pologa, ne toe ‵foki a tino Isalaelu ki te tulaga sē faka‵logo. Kae se a te mea e ‵kese i ei? Ne tumau eiloa te kau Levi o ‵talo atu: “Kae nei, a matou ko fai mo pologa i te fenua tenei ne tuku mai ne koe mo matou, te fenua laukele ola tenei e maua ei omotou mea‵kai. A te mea e fua mai ne te laukele e ave ki tupu kolā ne tuku ne koe ke pule i a matou, me i a matou ne agasala . . . ko oko eiloa i te motou puapuaga.”—Nee. 9:36, 37.

¹⁷ E mata, ne ma‵natu aka te kau Levi i te Atua ne seki fai ne ia te mea tonu i te taliaga o te fakalavelave tenei? Ikai! Ne taku tonu atu ne latou: “Se mea ‵tau te fakasala ne koe o matou; a koe ne tumau tou fakamaoni, e ui eiloa i a matou ko oti ne agasala.” (Nee. 9:33) Tela la, ne fakaoti eiloa te ‵talo sē fapito tenei ki se tautoga me ka faka‵logo eiloa te fenua ki te Tulafono a te Atua. (Faitau te Neemia 9:38; 10:29) I te fakaotiga, ne saina te lotou tusi e tusi ei te lotou tautoga ne takitaki Iutaia e toko 84.​—Nee. 10:1-27.

18, 19. (a) Se a te mea e manakogina ne tatou ko te mea ke ‵sao atu tatou ki loto i te lalolagi fou a te Atua? (e) Se a te mea e se ‵tau o fakagata te ‵tou ‵talo atu e uiga ki ei, kae kaia?

¹⁸ E ma‵nako tatou ki polopolokiga mai i a Ieova ko te mea ke mafai o ‵sao atu tatou ki loto i tena lalolagi fou kae amiotonu. “Ko oi la te tama telā e se polopoloki ne tena tamana?” ko te fesili a te apositolo ko Paulo. (Epe. 12:7) A te tumau o tatou i te fakamaoni i tena taviniga kae talia ke faka‵ma tatou ne tena agaga e fakaasi atu i ei me e talia ne tatou a tena takitakiga i ‵tou olaga. Kae kafai e fai ne tatou se agasala matagā, e tali‵tonu tatou me ka fakamagalo tatou ne Ieova māfai e sala‵mo tonu tatou kae talia mo te loto maulalo ana polopolokiga.

¹⁹ Ko pili fua o fai ne Ieova se igoa e sili atu mō ia i lō te mea telā ne fai ne ia i te faka‵saoga o te kau Isalaelu mai i Aikupito. (Eseki. 38:23) E pelā mo te mautinoa o te ulu atu o ana tino mua ki te Fenua o te Folafolaga, e penā foki a Kelisiano katoa kolā e tumau e pelā me ne tino tapuaki fakamaoni o Ieova ka maua ne latou te ola i te lalolagi fou kae amiotonu a te Atua. (2 Pe. 3:13) Fakatasi mo mea fakaofoofogia kolā e ta‵kato mai i ‵tou mua, ke sē gata eiloa te ‵talo atu o tatou ke faka‵malu a te igoa sili o te Atua. Ka faipati te suā mataupu ki te suā ‵talo telā e ‵tau o gasue‵sue tatou e ‵tusa mo mea i ei ko te mea ke maua ne tatou a fakamanuiaga a te Atua i te taimi nei ke oko eiloa ki te se-gata-mai.