Te Faka‵leiga o Fakalavelave i Mea Tau Pisinisi

Ne faipati mai te apositolo ko Paulo i te 1 Kolinito 6:1-8, e uiga ki te avega o taina tali‵tonu ne nisi taina ki fono fakamasino. Ne fakaasi mai tena fanoanoa e uiga ki te ave o nisi Kelisiano i Kolinito “ke fakamasino ne te famasino sē Kelisiano.” (Fuaiupu 1) Ne taku mai ne Paulo a pogai tāua e se ‵tau ei o ave a Kelisiano ne nisi Kelisiano ki fono fakamasino a te malo kae ke faka‵lei aka olotou kinauga i loto i te fakapotopotoga. Ke mafau‵fau tatou ki nisi pogai ne tuku mai ei a pati fakatonutonu konei, ko mafau‵fau ei tatou ki nāi mea kolā e se aofia i pati fakatonutonu konei.

Kafai e isi se mea fakapisinisi e kinau ei tatou mo se taina talitonu, e ‵tau o ‵sala muamua atu tatou ki te auala o Ieova ke faka‵lei aka ei a mea konā, e se ko ‵tou auala. (Faataoto 14:12) E pelā mo te fakaasiga a Iesu, te ‵toe mea ‵lei ko te faka‵lei fakavave aka o se tamā fakalavelave a koi tuai o fai mo fai se kinauga lasi. (Mataio 5:23-26) Kae e fakafanoanoa me ko tō silia a kinauga e fai ne nisi Kelisiano ke oko ki te ave ne latou olotou tagi ki fono fakamasino a te malo. I te fakatau ave ne koutou a koutou eiloa ki te fono, e fai mai a Paulo, “e fakaasi mai ei i a koutou e se ne Kelisiano ko katoatoa.” Kaia? A te pogai tāua e tasi me e mafai o fakamasei atu a fakamasinoga penā ki te fakapotopotoga mo te igoa o te Atua telā e tapuaki tatou ki ei. Tela la, e ‵tau o mafaufau ‵mafa tatou ki te fesili tenei a Paulo: “E a, e masei foki manafai e kaisoagina otou mea?”​—Fuaiupu e 7.

Ne fai mai foki a Paulo me ko oti ne tuku atu ne te Atua ki te fakapotopotoga se fakatokaga ‵lei mō te faka‵leiga o kinauga. A toeaina ne tagata Kelisiano kolā e maua ne latou te poto ona ko te lotou iloa i muna‵tonu mai te Tusi Tapu, kae e fai mai a Paulo me e mafai o fakamasino ne latou a “kinauga i va o Kelisiano” i “mea o te lalolagi nei.” (Fuaiupu e 3-5) Ne fakaasi mai ne Iesu a mea e tolu e ‵tau o fai ke faka‵lei aka ei a agasala ‵lasi e pelā mo te fatufatu mo te kaisoa: muamua la, taumafai ke faka‵lei aka te mea tenā i te va o te tokolua kolā ne aofia i ei; a te lua, kafai e se aoga te mea muamua, ave se molimau e tokotasi io me tokolua; a ko te tolu, kafai e se aoga foki te mea tenā, avatu la te mea tenā ki te fakapotopotoga telā e sui ne toeaina.​—Mataio 18:15-17.

E tonu, a toeaina Kelisiano e se ne loia io me ne tino fai pisinisi kae e se manakogina ke fai latou penā. E se fai ne latou ne tulafono mō te faka‵leiga o kinauga fakapisinisi i va o taina. I lō te fai penā, e fesoasoani atu latou ki tino e tokolua kolā e aofia i ei ke fakaaoga te Tusi Tapu kae taumafai ke maua se faka‵leiga filemu. E mafai o fesokotaki atu latou ki te ovasia o te fenua io me ko te ofisa lagolago o Molimau a Ieova i kinauga kolā ko tō faiga‵ta. E tiga te feitu tenā, e isi ne mea kolā e se aofia i pati fakatonutonu a Paulo. Ne a nisi mea konā?

I nisi taimi, a te tagi telā e ave ki te fono se mea eiloa telā e ‵tau o fai ke maua ei te filemu e aunoa mo te kaimanako. E pelā mo mea konei, ko te fono fakamasino fua e tuku mai ne ia te taliaga e uiga ki te ‵talaga o te avaga, te tausiga o se tamaliki, tupe tausi, tupe mai te insurance, tupe mai te pagike māfai ko ‵pono, mo te malosi e uiga ki togi a tino. E isi foki ne taimi e ‵tau ei o tagi se taina ke puipui ei a ia mai se tagi telā e fai ki a ia.a

Kafai e fai a tagi penā e aunoa mo te faiga o kinauga, kāti e se pokotia i ei te agaga o pati fakatonutonu kolā ne fai mai ne Paulo.b E tiga te feitu tenā, a te mea muamua ki te Kelisiano ko te fakamalugaga o te igoa o Ieova mo te mauaga o te filemu mo te fealofani i te fakapotopotoga. A te ‵toe fakailoga tāua telā e iloa ei a soko o Keliso ko te alofa, a ko “te alofa e se ‵sala ana mea i a ia eiloa.”​—1 Kolinito 13:4, 5; Ioane 13:34, 35.