Te Tavini a Ieova​—‘Ne Pakia Ona ko ‵Tou Agasala’

“Ne pakia a ia ona ko omotou agasala; ne ‵kini ona ko amioga ma‵sei a matou ne fai. . . . Ko ola matou ona ko ‵kini ne oko ki a ia.”​—ISAIA 53:5.

1. Ne a mea e ‵tau o masaua ne tatou māfai ko fai te Fakamanatuga, kae se a te valoaga e fesoasoani mai ki a tatou ke fai penā?

E ‵KAU atu tatou ki te Fakamanatuga ke fakamanatu ei te mate o Keliso kae ke masaua foki ne tatou a pogai katoa o tena mate mo mea kolā ka fakataunu i tena toetu. E fakamasaua mai foki i ei a te fakamalugaga o te pulega sili a Ieova, te fakamalugaga o tena igoa, mo te fakataunuga o tena fuafuaga, e aofia i ei te faka‵saoga o tino. Kāti e seai se isi valoaga i te Tusi Tapu i tafa o te Isaia 53:​3-12, e fakamatala faka‵lei mai i ei a te taulaga a Keliso mo mea ne fakataunu ne ia. Ne ‵valo mai ne Isaia a logo‵maega o te tavini kae tuku mai foki i ei a fakamatalaga likiliki e uiga ki te mate o Keliso mo fakamanuiaga kolā ka iku mai i tena mate mō taina fakaekegina mo ana ‘nisi mamoe.’​—Ioane 10:16.

2. Se a te mea e fakamaoni mai ne te valoaga a Isaia, kae e pokotia pefea tatou i ei?

² I te fitu o senitenali mai mua o fanau mai a Iesu, ne fakaosofia ne Ieova a Isaia ke ‵valo mai ne ia me ka fakamaoni eiloa tena Tavini Filifilia faitalia a toe tofotofoga faiga‵ta. E fakamaoni mai i te valoaga tenei a te talitonu katoatoa o Ieova ki te fakamaoni o tena Tama. Kafai e iloilo aka ne tatou te valoaga tenei, ka maua ne tatou i ei te loto fakafetai kae fakamalosi aka foki ei ‵tou fakatuanaki.

Ne “Takalialia” ki ei Kae Fai Pelā “Me se Mea Seai”

3. Kaia ne ‵tau ei o talia ne tino Iutaia a Iesu, kae ne a olotou mea ne fai ki a ia?

³ Faitau te Isaia 53:3.a Ke mafaufau ki te uiga o te mea tenei ki te Tama e tokotasi a te Atua, ke tiakina ne ia a te fiafia ke tavini atu i tafa o tena Tamana kae ke vau ki te lalolagi o tuku atu tena ola ke faka‵sao ei a tino mai te agasala mo te mate! (Filipi 2:​5-8) A te pogai tonu o tena taulaga ke fakamagalo ei a agasala kolā ne fakaata mai ne taulaga manu i te Tulafono a Mose. (Epelu 10:​1-4) E mata, ne seki ‵tau o talia kae fakaaloalogina a ia, maise loa te kau Iutaia kolā ne ‵nofo fakatalitali ki te oko mai o te Mesia? (Ioane 6:14) I lō te fai penā, ne “takalia‵lia” a tino Iutaia ki te Keliso, kae ne fai fua pelā “me se mea seai,” e ‵tusa mo te valoaga a Isaia. Ne tusi mai te apositolo ko Ioane: “Ne vau ki tena fenua tonu, kae ne se talia ne ona tino.” (Ioane 1:​11) Ne fai atu te apositolo ko Petelu ki tino Iutaia: “Te Atua foki o o‵tou tupuga . . . ne tuku atu ne ia a te ‵malu ki tena Tavini ko Iesu, telā ne tuku atu ne koutou ki pule kae toe ‵teke foki ne koutou a ia i mua o Pilato, i te otiga ne fai atu a Pilato ke fakasaoloto a ia. E se gata foki i konā, ne ‵teke foki ne koutou te Tama Tapu kae Amiotonu.”​—Galuega 3:​13, 14.

4. Ne masani pefea a Iesu mo masaki?

⁴ Ne ‵valo mai foki a Isaia me e ‵tau o ‘masani a Iesu mo masaki.’ I te faiga o tena galuega, ne fi‵ta a Iesu i nisi taimi, kae e seai se fakaasiga ne fai mai me ne masaki a ia. (Ioane 4:6) Kae ne masani a ia mo masaki o tino kolā ne talai atu a ia ki ei. Ne alofa a ia ki a latou kae faka‵lei ne ia a tino e tokouke. (Maleko 1:​32-​34) Tela la, ne fakataunu ei ne Iesu a te valoaga: “Ne kufaki eiloa ne ia a te puapuaga telā ne ‵tau o puapuaga i ei matou, mo te ‵mae ‵telā ne ‵tau eiloa o ‵mae i ei matou.”​—Isaia 53:4a; Mataio 8:​16, 17.

“Se Fakasalaga Mai i te Atua”

5. Ne ‵kilo atu pefea a tino Iutaia e tokouke ki te mate o Iesu, kae kaia ne logo‵mae malosi ei a ia ona ko te mea tenei?

⁵ Faitau te Isaia 53:​4e. Ne seki maina a tino e tokouke i aso o Iesu i te pogai ne logo‵mae kae mate ei a ia. Ne tali‵tonu latou me ko fakasala a ia ne te Atua, e pelā me poko a ia ne se masaki fakatakalialia. (Mataio 27:​38-​44) Ne ‵losi atu a tino Iutaia me ne pati masei a Iesu ki te Atua. (Maleko 14:​61-​64; Ioane 10:33) E tonu, a Iesu e se se tino agasala io me se tino gutu pati masei ki te Atua. Kae ona ko te lasi o tena alofa ki tena Tamana, e se taumate ne logo‵mae malosi a ia e pelā me ko te Tavini a Ieova ona ko ‵losiga ‵se kolā ne fai atu me ka tamate a ia ona ko te pati masei ki te Atua. Kae ui i ei, ne loto fiafia a ia o fakalogo o fai te loto o Ieova.​—Mataio 26:39.

6, 7. Se a te auala ne ‘fakapuapuaga’ ei ne Ieova a tena Tavini fakamaoni, kae kaia ne “loto” ei a Ieova ki te mea tenā?

⁶ E malamalama tatou i te pogai ne ‵valo mai ei a Isaia me ka mafau‵fau a nisi tino kae ‵kilo atu ki a Keliso e pelā me ‘fakasala ne te Atua’ kae e mafai o ‵poi tatou me ne fai mai te valoaga tenā, penei: “Ko toku loto eiloa ke puapuaga a ia.” (Isaia 53:10) Ona ko te mea ne fai mai foki a Ieova: “Tenei taku tavini, . . . telā ne filifili ne au, kae e fiafia foki au ki a ia,” ne mafai pefea o ‘loto a Ieova ke puapuaga a ia’? (Isaia 42:1) Kaia e mafai ei o fai atu me ne fiafia a Ieova ki te mea tenei?

⁷ Ke malamalama i te vaega tenei o te valoaga, e ‵tau o masaua ne tatou me i te ‵teke atu ki te pulega sili a Ieova, ne fai ne Satani ke fakalotolotolua a tavini katoa a te Atua i te lagi mo te lalolagi ki te lotou fakamaoni. (Iopu 1:​9-​11; 2:​3-5) E auala i tena tumau i te fakamaoni ke oko ki tena mate, ne tuku mai ne Iesu se tali ‵lei katoatoa ki te ‵tekeatuga a Satani. Tela la, e tiga eiloa ne talia ne Ieova ke tamate a Keliso ne ana fili, e seai se fakalotolotolua me ne logo‵mae foki a Ieova i te kilo atu ki tena Tavini filifilia ko tamate. Kae ne fiafia malosi eiloa a Ieova i te kilo atu ki te fakamaoni katoatoa o tena Tama. (Faataoto 27:11) E se gata i ei, a te iloa atu a te aoga o te mate o tena Tama ki tino sala‵mo tonu ka fai i ei ke fiafia malosi a te loto o Ieova.​—Luka 15:7.

“Ne Pakia a ia Ona ko Omotou Agasala”

8, 9. (a) Se a te auala ne ‘pakia ei a Iesu ona ko ‵tou agasala’? (e) Ne fakapa‵tonu aka pefea ne Petelu a te mea tenei?

⁸ Faitau te Isaia 53:​6. E pelā me ne mamoe ‵galo, e takase‵se foki a tino agasala o ‵sala se auala ke faka‵sao ei latou mai masaki mo te mate telā ne faka‵solo mai ne Atamu. (1 Petelu 2:​25) Ona ko te tulaga sē ‵lei katoatoa, e seai eiloa se tamaliki a Atamu e mafai o toe ‵togi mai ne ia te mea telā ne galo i a Atamu. (Salamo 49:7) Kae ona ko te lasi o tena alofa, “Ne tuku atu ne [Ieova] te fakasalaga ki a ia,” tena Tama pele kae ko tena Tavini filifilia, “ko te fakasalaga telā ne ‵tau o pakū ki luga i a tatou.” Mai te talia ne ia ke ‘pakia a ia ona ko ‵tou agasala’ kae ‘‵kini ona ko amioga ma‵sei a tatou,’ ne tauave ne Keliso a ‵tou agasala i luga i te sataulo kae mate mō tatou.

⁹ Ne tusi mai te apositolo ko Petelu: “Tenei te pogai ne kalagagina ei koutou ne te Atua; i te mea i a Keliso ne puapuagatia mo koutou, kae tuku atu foki ne ia ki a koutou te fakaakoakoga, ke tau‵tali ei koutou i ona kalafaga. Ko Keliso eiloa ne tauave ne ia o‵tou agasala i tona foitino i luga i te sataulo, ko te mea ke olo keatea tatou mai te agasala, kae ke ola mo te amiotonu.” Kae i te sikimaiga ne ia a pati i te valoaga a Isaia, ne fakaopoopo mai a Petelu: “Ko ona pa‵kiaga foki ko faka‵leigina ei koutou.” (1 Petelu 2:​21, 24; Isaia 53:5) Ne ‵tala mai ne te mea tenei te auala mō tino agasala ke mafai o faka‵lei mo te Atua, e ‵tusa loa mo nisi pati a Petelu: “Me i a Keliso ne mate mo koutou; ne mate fakatasi mō agasala katoa a tino, ko te tagata amiotonu mō tino masei, ko te mea ke takitaki ei koutou ki te Atua.”​—1 Petelu 3:18.

“E Pelā me se Mamoe Telā ka Ave o Ta”

10. (a) Ne a fakamatalaga ne fai mai ne Ioane te Papatiso e uiga ki a Iesu? (e) Kaia ne fetaui ‵lei ei a pati a Ioane?

¹⁰ Faitau te Isaia 53:​7, 8. I te taimi ne lavea ei ne Ioane a Iesu ko vau, ne fai atu a ia: “Kiloke, telā te Tamā Mamoe a te Atua ka ave ne ia keatea agasala a te lalolagi.” (Ioane 1:29) I te faipati atu e uiga ki a Iesu e pelā me se Mamoe, kāti ne masaua ne Ioane a pati a Isaia: “E pelā me se mamoe telā ka ave o ta.” (Isaia 53:7) Ne ‵valo mai a Isaia: “Ne tuku atu tena ola mo te loto malie kae ne mate.” (Isaia 53:12) Se mea fakaofoofogia me i te po eiloa telā ne fai ei ne Iesu te Fakamanatuga o tena mate, ne tuku atu ne ia se ipu uaina ki ana apositolo fakamaoni e toko 11 kae fai atu: “Me ko toku toto tenei o te feagaiga, telā ne maligi mō te tokoukega e fakamagalo ei agasala.”​—Mataio 26:28.

11, 12. (a)Se a te mea e fakaasi mai i te loto fiafia o Isaako ke ofo atu a ia pelā me se taulaga, e uiga ki te taulaga a Keliso? (e) Se a te mea e masaua ne tatou e uiga ki te Apelaamo Sili, ko Ieova, māfai ko fakamanatu te Fakamanatuga?

¹¹ E pelā mo te toeaina ko Isaako, ne loto fiafia a Iesu o tuku atu tena ola e pelā me se taulaga i te fatafaitaulaga a Ieova telā ko te faiga o tena loto. (Kenese 22:​1, 2, 9-​13; Epelu 10:​5-​10) E tiga eiloa ne lotomalie a Isaako ke ofo atu a ia pelā me se taulaga, ko Apelaamo eiloa telā ne taumafai o ofo atu ne ia te taulaga tenā. (Epelu 11:17) I se auala tai ‵pau, ne talia ne Iesu mo te loto fiafia ke mate a ia, kae ko Ieova eiloa te Pogai o te fakatokaga tenā o te togiola. A te taulaga a tena Tama se fakaasiga o te ‵poko o te alofa o te Atua mō tino.

¹² Ne fai mai a Iesu: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.” (Ioane 3:16) Ne tusi mai te apositolo ko Paulo: “Ka ko te Atua ne fakaasi mai ne ia ki a tatou a tona alofa, i te taimi koi fai ei tatou mo tino agasala; me ne mate a Iesu mō tatou!” (Loma 5:8) Tela la, mai te fakaaloalo atu ki a Keliso e auala i te fakamanatuga o tena mate, e se ‵tau eiloa o puli i a tatou me i te tino ne fakatoka ne ia te taulaga tenā ko te Apelaamo Sili, ko Ieova. E fakamanatu eiloa ne tatou te Fakamanatuga ke avatu ei ana vikiga.

E Aumai ne te Tavini “se Tulaga Amiotonu” ki Tino

13, 14. Ne aumai pefea ne te Tavini a Ieova “se tulaga amiotonu” ki tino e tokouke?

¹³ Faitau te Isaia 53:​11, 12. E uiga ki tena Tavini filifilia, ne fai mai a Ieova: “A taku tavini fakamaoni, telā e fiafia au ki ei, ka [“aumai ne ia se tulaga amiotonu ki,” NW] tino katoa.” I se auala pefea? E maua ne tatou te tali i te fakaotiga o te fuaiupu e 12. “Ne sui ne ia [te Tavini] a tino agasala.” A tino katoa kolā ne ‵tupu mai i a Atamu ne fa‵nau mai mo te “agasala,” kae ne maua ne latou “te taui o te agasala,” telā ko te mate. (Loma 5:​12; 6:​23) E mafai eiloa o faka‵lei aka te va o Ieova mo tino agasala. E gali ‵ki te fakamatalaga i te Isaia mataupu e 53 e uiga ki te auala “ne sui” io me ne fai ei a Iesu pelā me se sokoga o tino agasala: “A matou ko fakasaogina i fakasalaga ne mae ei a ia, ko ola matou ona ko kini ne oko ki a ia.”​—Isaia 53:5.

¹⁴ Mai te talia ne ia o ‵tou agasala kae mate mō tatou, ne aumai ei ne Keliso “se tulaga amiotonu” ki tino e tokouke. Ne tusi mai a Paulo: “Me ko loto te Atua ke nofo i loto i a Keliso a ona uiga katoatoa. Ne faka‵lei ne te Atua a te lalolagi katoa ki a ia e alatu i tena Tama telā ne mate i luga i te sataulo. I te faiga tenei, ne fai ei ne te Atua te filemu i tona va mo mea katoa i te lagi mo te lalolagi.”​—Kolose 1:​19, 20.

15. (a) Ko oi e fakasino atu ki ei a “mea . . . i te lagi” kolā ne faipati a Paulo ki ei? (e) Ko oi a tino kolā e ‵tau o fakaaoga ne latou a mea fakatusa o te Fakamanatuga, kae kaia?

¹⁵ A “mea . . . i te lagi” kolā ka maua ne latou se va ‵lei mo Ieova e auala i te toto maligi o Keliso, ko Kelisiano fakaekegina, kolā ne kalagagina ke pule fakatasi mo Keliso mai te lagi. A Kelisiano kolā “ne kalagagina foki ne te Atua” e “takuamiotonugina” mō te ola. (Epelu 3:1; Loma 5:​1, 18) Ko fai i ei ne Ieova latou e pelā me ko ana tama puke faka-te-agaga. E molimau te agaga tapu ki te lotou ‘‵kau fakatasi mo Keliso,’ kae ka taku latou ne tupu mo faitaulaga i tena Malo faka-te-lagi. (Loma 8:​15-17; Fakaasiga 5:​9, 10) E fai latou pelā me se vaega o te Isalaelu faka-te-agaga, ko te “Isalaelu a te Atua,” kae ka aofia latou i te “feagaiga fou.” (Ielemia 31:​31-​34; Kalatia 6:​16) Ona ko te lotou aofia i te feagaiga fou, ko mafai ei o fakaaogā ne latou a mea fakatusa o te Fakamanatuga, e aofia i ei te inu ki te ipu uaina ‵kula, telā ne fai mai a Iesu penei: “Ko te ipu tenei o te feagaiga fou i toku toto, ko fakamaligi mō koutou.”​—Luka 22:20.

16. Ne a ‘mea i te lalolagi,’ kae se a te auala e maua ei ne latou se tulaga amiotonu i mua o Ieova?

¹⁶ A ‘mea i te lalolagi’ ko nisi mamoe a Keliso, kolā e fakamoemoe ke ola i te lalolagi ki te se-gata-mai. Ka maua foki ne latou konei se tulaga amiotonu e auala i te Tavini a Ieova. Ona ko te lotou fakatuanaki ki te taulaga togiola a Keliso kae “ne ‵ta olotou gatu, kae ne faka‵kena foki ne latou ki te toto o te Tamā Mamoe,” e taku ne Ieova latou e pelā me ne tino amio‵tonu, kae e se ne tama faka-te-agaga, kae ne taugasoa, kolā ka maua ne latou te tauliaga gali ke ‵sao atu i te ‘fakalavelave lasi.’ (Fakaasiga 7:​9, 10, 14; Iakopo 2:​23) E se aofia latou i te feagaiga fou, tela la, e se maua foki ne latou te fakamoemoega ke ola i te lagi, e se fakaaoga foki ne nisi mamoe konei a mea fakatusa o te Fakamanatuga kae ‵kau atu eiloa ki ei e pelā me ne tino maimoa.

Avatu te Fakafetai ki a Ieova mo Tena Tavini Filifilia!

17. E fesoasoani mai pefea te iloiloga ki te valoaga a Isaia telā e fakavae ki te Tavini ke fakatoka ei ‵tou mafaufau mō te Fakamanatuga?

¹⁷ A te iloiloga ki valoaga a Isaia kolā e fakavae ki te Tavini se auala ‵lei ke fakatoka ei ‵tou mafaufau ki te Fakamanatuga o te mate o Keliso. Ne fai i ei ke “tumau te ‵tou ‵kilo atu ki a Iesu, telā e fakavae ki ei te ‵tou fakatuanaki.” (Epelu 12:2) Ko oti ne tauloto tatou me i te Tama a te Atua e se uiga ‵teke. E ‵kese mo Satani, e fiafia ke akoako a ia ne Ieova, kae kilo atu ki ei e pelā me ko te Aliki Sili o te lagi mo te lalolagi. Ko oti ne lavea ne tatou me i te faiga o te galuega a Iesu i te lalolagi, ne fakaasi atu ne ia te alofa ki tino kolā ne talai a ia ki ei, mai te faka‵lei ne ia a tino e tokouke i te feitu faka-te-foitino mo te feitu faka-te-agaga. Ne fakaasi atu ne ia ana mea ka fai e pelā me ko te Tupu Faka-Mesia i te lalolagi fou ko te taimi telā ka “fakatumau [ei] ne ia a te fai mea tonu i te lalolagi.” (Isaia 42:4) A te loto finafinau telā ne fakaasi ne ia i te talaiatuga o te Malo, e pelā me ko “mainaga ki malo,” se fakamasauaga ki ana soko ke talai te tala ‵lei mo te loto finafinau i te lalolagi kātoa.​—Isaia 42:6.

18. Kaia e fai ei ne te valoaga a Isaia ke fia‵fia tatou ki a Ieova e pelā foki mo tena Tavini fakamaoni?

¹⁸ E fakalauefa aka foki ne te valoaga a Isaia a te ‵tou malamalama i te taulaga sili telā ne fakatoka ne Ieova i te taimi ne uga mai ei ne ia tena Tama ki te lalolagi ke logo‵mae kae mate mō tatou. Ne fiafia a Ieova, e se ki te logo‵mae o tena Tama, kae ki te kilo atu ki te katoatoa o te fakamaoni o Iesu ke oko eiloa ki tena mate. E ‵tau o fia‵fia fakatasi tatou mo Ieova, māfai ko iloa ne tatou a mea katoa ne fai ne Iesu ke fakamaoni atu ei te loi o Satani kae ke faka‵malu i ei te igoa o Ieova, telā e iku atu ki te fakamalugaga o te ‵tonu o Tena pulega sili. E se gata i ei, ne amo ne Keliso ‵tou agasala kae mate mō tatou. I te auala tenā, ne mafai ei ne te lafu foliki telā ko ana taina fakaekegina e pelā foki mo nisi mamoe o maua ne latou se tulaga amiotonu i mua o Ieova. I te taimi e maopoopo ei tatou mō te Fakamanatuga, ke na faka‵fonu ‵tou loto i te loto fakafetai ki a Ieova mo tena Tavini fakamaoni.

Fakamatalaga mai lalo

Ke Toe Onoono ki ei

• Se a te auala ne ‘loto fiafia’ ei a Ieova ke ‘‵kini’ tena Tama?

• Se a te auala ne ‘pakia ei a Iesu ona ko ‵tou agasala’?

• Ne aumai pefea ne te Tavini se “tulaga amiotonu” ki tino e tokouke?

• Ne fai pefea ne sukesukega ki valoaga e uiga ki te Tavini ke fakatoka ei tou mafaufau mo loto ki te Fakamanatuga?

[Ata i te itulau e 26]

‘Ne takalia‵lia ki a ia kae ne fai pelā me se mea seai’

[Ata i te itulau e 28]

“Ne tuku atu tena ola mo te loto malie kae ne mate.”

[Ata i te itulau e 29]

E ‵kau atu a ‘nisi mamoe’ ki te Fakamanatuga e pelā me ne tino maimoa