Te Tāua o Akoakoga Mai te Atua

“Ko taku foki ne au a mea katoa ne mea sē aoga, ona ko te mea e isi se mea e sili atu tona aoga, telā ko toku iloa ‵lei o Keliso Iesu.”​—FILI. 3:8.

1, 2. Se a te filifiliga ne fai ne nisi Kelisiano, kae kaia?

TALU mai tena folikiga, ne tu ‵kese eiloa a Lopati i te akoga. I te taimi ko valu ei ana tausaga, ne āsi atu sena faiakoga ki te fale kae fai atu ki ei me e mafai o fai ne ia so se mea. Ne fakamoemoe tou fafine me ka fai a tou tagata fakamuli mo fai se tokita. Ona ko ana taumafaiga i te akoga, ne mafai ne ia o fanatu ki so se iunivesiti maluga eiloa i tena fenua. Kae ne filifili aka ne Lopati ke fakaseke ne ia te mea telā e ‵kilo atu ki ei a tino e tokouke e pelā me se avanoaga eiloa e tasi i te olaga, ko te mea ke kausaki atu ki tena fakamoemoega ke tavini atu e pelā me se paenia tumau.

² E pelā mo Lopati, e tokouke a Kelisiano​—talavou mo tino ma‵tua​—e maua ne latou a avanoaga ke ga‵solo atu ki mua i te feitu faka-te-agaga i te olaga tenei. E filifili ne nisi tino ke se fakaaoga faka‵lei a avanoaga konei, ko te mea ke kausaki atu latou ki fakamoemoega faka-te-agaga. (1 Kolinito 7:​29-31) Se a te mea e fakamalosi atu ki Kelisiano e pelā mo Lopati ke fakaaoga faka‵lei olotou olaga i te faiga o te galuega talai? I tafa o te lotou a‵lofa ki a Ieova, telā ko te ‵toe pogai tāua, e loto fakafetai foki latou ki akoakoga tāua mai te Atua kolā e maua ne latou. E mata, kai mafaufau fakamuli koe ki mea ne mafai o ‵tupu ki tou olaga moi fai e seki tauloto ne koe te munatonu? A te mafau‵fau ki nisi fakamanuiaga ‵gali e maua ne tatou ona ko akoakoga a Ieova ka fesoasoani mai ke tumau te ‵tou fia‵fia ki te tala ‵lei kae loto finafinau i te talai atu ki nisi tino.

Se Tauliaga ke Akoako Tatou ne te Atua

3. Kaia e mafai ei o tali‵tonu tatou me e lotomalie a Ieova o akoako a tino sē ‵lei katoatoa?

³ Ona ko tena aga‵lei, e lotomalie a Ieova o akoako a tino sē ‵lei katoatoa. I ana pati e uiga ki Kelisiano fakaekegina, e fai mai te Isaia 54:​13, penei: “Ko au eiloa ka akoako ne au ou tino, kae tuku atu ki a latou te maumea mo te filemu.” E aoga foki a te fakatakitakiga tenā ki ‘nisi mamoe’ a Keliso. (Ioane 10:16) E manino eiloa te mea tenei mai i se valoaga telā ko fakataunu i ‵tou aso nei. Ne lavea ne Isaia i se fakaasiga a tino mai fenua katoa kolā e ua‵lolo atu ki te tapuakiga tonu. E fakamatala mai ne ia latou i ana pati: “Tatou ka olo ake ki te mauga o te Aliki [ko Ieova], ki te Faletapu o te Atua o Isalaelu. Ka akoako mai ne ia tatou ki mea e manako a ia ke fai ne tatou; ka sa‵sale tatou i auala me ne filifili ne ia.” (Isaia 2:​1-3) Ma‵faga o tauliaga ke akoako tatou ne te Atua!

4. Se a te mea e manako a Ieova ki ei mai i tino kolā e akoako ne ia?

⁴ E mafai pefea o maua ne tatou a mea aoga mai i akoakoga a te Atua? A te ‵toe mea tāua e manakogina, ko te akoakogofie o te tino. Ne tusi mai te faisalamo ko Tavita: “A te Aliki e amiotonu kae ‵lei. . . . kae akoako foki ne ia a latou ki tena ‵kanoloto.” (Salamo 25:​8, 9) Kae ne fai mai a Iesu: “Toku Tamana, te Aliki o te lagi mo te lalolagi! Au e fakafetai atu ki a koe, i te mea ko fakaasi ne koe ki tino seki akoakogina, a mea kolā ne ‵funa ne koe mai tino ‵poto mo tino kolā ne a‵koga.” (Luka 10:21) E mata, ka se fia fakapilipili atu koe ki se Atua telā e “tuku atu te alofa tauanoa ki tino loto maulalo”?​—1 Petelu 5:5.

5. Se a te mea ne mafai ei o maua ne tatou te poto o te Atua?

⁵ E pelā me ne tavini a Ieova, e mata, ne iloa ne tatou te munatonu ona ko ‵tou atamai io me ko ‵tou poto eiloa? Ikai. A te ‵tonuga loa, e se mafai o maua ne tatou te poto o te Atua mai ‵tou taumafaiga totino. Ne fai mai a Iesu: “E se mafai ne se tino o vau ki a au, seiloga ne māfua tona vau mai te Tamana telā ne uga mai ne ia au.” (Ioane 6:44) E auala i te galuega talai mo te agaga tapu, e takitaki ne Ieova ana mamoe, kolā e fai pelā me ne “koloa tāua” ki a ia. (Hakai 2:7) E mata, e se loto fiafia koe ke fai pelā mo tino kolā e takitaki atu ne Ieova ki tena Tama?​—Faitau te Ielemia 9:​23, 24.

Te ‵Mana ke ‵Fuli ei a Olaga

6. Se a te ikuga fakafiafia ka maua ne tino kolā e maua ne latou te ‘poto o te Atua’?

⁶ Mai te fakaaogaga o tugapati ‵gali, ne fakamatala mai i te valoaga a Isaia a te ‵fuliga o uiga o tino i ‵tou taimi nei. A tino fakasaua i taimi mua ko fai pelā me ne tino faka‵tupu filemu. (Faitau te Isaia 11:​6-9.) A latou kolā ne fai fili mo nisi tino ona ko te kese‵kese o fenua, matakāiga, mo nisi tuu mo aganuu ko kamata o ‵nofo fakatasi mo te fealofani. I se auala fakatusa, ne “tuki ne latou olotou pelu ke fai mo mea fakamalū laukele.” (Isaia 2:4) Se a te pogai mō ‵fuliga fakaofoofogia konei? Ko maua ne tino ‘te poto o te Atua’ kae ko oti foki ne fakagalue ne latou i olotou olaga. E tiga eiloa e se ‵lei katoatoa a tavini a te Atua, e aofia latou i se kautaina tonu i te lalolagi kātoa. A te fia‵fia o tino i te lalolagi kātoa ki te tala ‵lei mo fuataga ‵lei kolā e ‵fua mai i ei e fakamaoni atu ei te tāua o akoakoga mai i te Atua.​—Mataio 11:9.

7, 8. (a) Ne a nisi “kinauga sē ‵tonu” e mafai ne akoakoga mai te Atua o fesoasoani atu ke saoloto a tino mai i ei? (e) I auala fea e avatu ei ne tatou a vikiga ki a Ieova mai i akoakoga mai te Atua?

⁷ Ne faka‵pau ne te apositolo ko Paulo a te galuega talai a tavini a te Atua ki te taua faka-te-agaga. Ne tusi mai a ia: “A meatau kolā e fakaaoga ne tatou i te ‵tou taua, e sē ne meatau o te lalolagi, ka ko meatau ma‵losi a te Atua e tamate ei ona fili. E fakamasei ne matou a kinauga sē ‵tonu. E ofa katoa ne matou aofaga fakamata‵mata kolā e fakafetaui ki te poto o te Atua.” (2 Kolinito 10:​4, 5) Ne a nisi “kinauga sē ‵tonu” ne fakasaoloto ei ne akoakoga a te Atua a tino? E aofia i mea konā ko te amoga ‵mafa e uiga ki akoakoga ‵se, manatu va‵lea, mo poto o tino. (Kolose 2:8) E fesoasoani atu a akoakoga a te Atua ke tiaki ne tino olotou faifaiga ma‵sei kae ati aka ne latou a uiga fakaatua. (1 Kolinito 6:​9-11) E momea aka ei te ‵lei o olaga faka-te-kāiga. Kae e tuku atu ne ia se fakamoemoega tonu ki tino kolā e seai ne olotou fakamoemoega. Tenei eiloa te vaegā akoakoga e manakogina i aso nei.

⁸ A te fakamaoni ko te uiga e tasi telā e fesoasoani atu a Ieova ke ati aka ne tino, e pelā mo mea e fakaasi mai i tala konei. (Epelu 13:18) Ne talia ne se fafine i Initia se akoga faka-te-Tusi Tapu kae fakamuli loa ne fetaui ‵lei a ia ke fai pelā me se tino talai seki papatiso. I te aso e tasi ne foki atu a ia ki te fale mai te galuega fakatutu Kingdom Hall, ne maua ne ia se malele aulo telā e nofo ki se valu selau tālā (Amelika) te ‵togi i tafa o te koga e ‵tu ei a pasi. E tiga eiloa e mativa a ia, ne tuku atu ne ia te mea tenā ki te ofisa pulisimani ke ‵sala atu ki te tino i o ia te malele. Ne ofo malosi a te pulisimani tenei. Fakamuli ifo, ne fesili atu te suā pulisimani, “Kaia ne filifili aka ei koe ke fakafoki mai te malele?” Ne fai atu a ia, “Ne ‵fuli au ne akoakoga i te Tusi Tapu, nei la, au se tino fakamaoni.” Ne ofo tou tagata kae fai atu ki te toeaina Kelisiano telā ne olo atu fakatasi mo te fafine ki te ofisa: “E silia atu i te 38 miliona o tino i te koga tenei. Kafai e mafai ne koe o fesoasoani atu ki tino e toko sefulu ke fai pelā mo te fafine tenei, ka uke ‵ki eiloa a mea aoga e maua mai i ei.” Kafai e mafau‵fau tatou ki te fia miliona o olaga o tino kolā ko oti ne ‵fuli ne akoakoga mai te Atua, e mata, e se ‵tau o uke a pogai ke ‵viki atu ei tatou ki a Ieova?

9. E mafai pefea o fai ne tino a ‵fuliga tāua i olotou olaga?

⁹ A te malosi o te Muna a te Atua ke ‵fuli ei a tino, fakatasi mo te fesoasoani e tuku mai ne Ieova e auala i tena agaga tapu, e fai ei ke mafai ne tino o fai a ‵fuliga tāua ki olotou olaga. (Loma 12:2; Kalatia 5:​22, 23) E fai mai te Kolose 3:10: “Ka ko oti ne fakapei ki luga i a koutou a te natula fou, telā ko oti ne fakafou i te poto i foliga o ia telā ne faite ne ia a mea katoa.” A te fekau telā e maua i te Muna a te Atua ko te Tusi Tapu, e isi sena ‵mana ke fakaasi atu ei a mafaufauga ‵loto o te tino, kae e mafai o ‵fuli ne ia a mafaufauga mo lagonaga o te tino e uiga ki mea. (Faitau te Epelu 4:​12.) Mai i te mauaga o te poto tonu e uiga ki te Tusi Tapu kae fakafetaui aka tena olaga ki tulaga amio‵tonu o Ieova, ka mafai eiloa o fai se tino mo taugasoa o te Atua, fakatasi mo te fakamoemoega ke ola ki te se-gata-mai.

Fakatokaga mō Aso Mai Mua

10. (a) Kaia e fai ei me ko Ieova fua tokotasi e mafai o fakatoka ne ia tatou mō aso mai mua? (e) Ne a ‵fuliga tāua ka pokotia ei te lalolagi kātoa?

¹⁰ Ko Ieova fua tokotasi e mafai o fesoasoani mai ke fakatoka tatou mō aso mai mua me e iloa ne ia a mea ka ‵tupu. E fakaiku aka ne ia a te vaegā olaga ka ola ei a tino i aso mai mua. (Isaia 46:​9, 10) E fakaasi mai i valoaga i te Tusi Tapu me i “te aso fakamataku o te Aliki ko pili” mai. (Sefanaia 1:14) E uiga ki te aso tenā, ka fakamaoni mai ei te ‵tonu o pati i te Faataoto 11:4: “E seai se fesoasoani e maua ne koe mai i te koloa i te taimi ka tamate ei koe, ka ko te fai mea tonu e mafai ne ia o fakasao tou ola.” Kafai ko oko mai te taimi ke fakaoko atu te fakamasinoga a Ieova ki te lalolagi a Satani, a te ‵toe mea tāua ko te mauaga ne tatou o te taliaga a te Atua. Ka se aoga eiloa a tupe. E tonu, e fai mai te Esekielu 7:19: “Ka ‵pei keatea olotou aulo mo siliva i auala e pelā me ne kaiga.” Ka fesoasoani mai te mea tenei ke fai nei ne tatou se fakaikuga poto.

11. Se a te auala e tasi e fesoasoani mai ei a akoakoga mai te Atua ke toka tatou mō aso mai mua?

¹¹ E tasi te auala tu ‵kese e fai ei ne akoakoga mai te Atua ke fakatoka tatou mō te oko mai o te aso o Ieova ko te fesoasoani mai ke fai a mea kolā e ‵tau o fakamuamua. Ne tusi atu te apositolo ko Paulo ki a Timoteo: “Fakatonu ki tino kolā e mauko‵loa i mea o te olaga nei ke se fakamata‵mata, ka ke se tuku atu foki olotou fakamoemoega ki mea e gata i lalo nei te lotou aoga, ka ke tuku atu olotou fakamoemoega ki te Atua.” E tiga eiloa e se uke ‵tou tupe, e maua eiloa ne tatou a mea aoga mai te fakatakitakiga tenei mai te Atua. Ne a mea e aofia i ei? I lō te fakatupu aka o koloa faka-te-lalolagi, e ‵tau o taumafai tatou o fai te “‵lei” kae “ke mauko‵loa foki [tatou] i galuega ‵lei.” Mai i te fakamuamua o mea faka-te-agaga i ‵tou olaga, ko ‘fakatupu ne tatou a koloa kolā ka fai mo ‵tou fakavae ‵mautakitaki mō aso fakamuli.’ (1 Timoteo 6:​17-19) E fakaata mai ne te vaegā alofa sē fakapito penā a faka‵tauga ‵lei, e pelā mo pati a Iesu, “se a te aoga ki te tino manafai e maua ne ia te lalolagi kātoa, kae tela la e maumau fua i ei a tona ola?” (Mataio 16:​26, 27) Ona ko te pili mai o te aso o Ieova, e ‵tau o mafau‵fau ifo tatou penei: ‘Tefea te koga e fakaputu ei aku koloa? E mata, e tavini atu au mō te Atua io me mō koloa?’​—Mataio 6:​19, 20, 24.

12. Kaia e se ‵tau o loto vāi‵vai tatou māfai e fakatauemu mai a nisi tino ki te ‵tou galuega talai?

¹² A ko te ‵toe mea tāua i tafa o “galuega ‵lei” telā ne faka‵mafa mai i te Muna a te Atua mō Kelisiano ko te galuega fakaola tino ko te talaiatuga o te Malo mo te faiga o soko. (Mataio 24:14; 28:​19, 20) E pelā mo te mea ne tupu i te senitenali muamua, e ‵kilo fakatauemu mai a nisi tino ki te ‵tou galuega talai. (Faitau te 1 Kolinito 1:​18-21.) Kae e se ‵fuli ne te mea tenā a te tāua o te ‵tou fekau, kae e se fakafoliki ifo foki ne ia te tāua o te tuku atu ki tino katoa a te avanoaga ke fakatuanaki a koi maua se avanoaga. (Loma 10:​13, 14) I te taimi e fesoasoani atu ei tatou ki nisi tino ke maua a mea aoga mai i akoakoga a te Atua, ka maua eiloa ne tatou a fakamanuiaga e uke.

Fakamanuiaga mō te Fakaasiatuga o te Alofa sē Fakapito

13. Ne fakaasi atu pefea ne te apositolo ko Paulo a te alofa sē fakapito mō te tala ‵lei?

¹³ A koi tuai o fai pelā me se Kelisiano, ne akoakogina te apositolo ko Paulo ke manuia i te fakanofonofoga o mea faka-Iutaia. I te taimi ko tai kātoa ei tena 13 tausaga, ne fanatu a ia mai tena fa‵kai ko Taso ki Ielusalema o akoga i te akoga a Kamalielu. (Galuega 22:3) Fakamuli ifo, ne kamata o tu ‵kese a Paulo mai i ana taugasoa, kae moi ne tumau a ia i te auala tenā, e mafai o takutakua a ia i Iutaia. (Kalatia 1:​13, 14) I te taimi ne talia ei ne ia te tala ‵lei kae fai te galuega talai, ne tiakina ne ia a mea katoa konā. E mata, ne salamo a ia i tena fakaikuga ne fai? Ikai. A te ‵tonuga loa, ne tusi mai a ia: “Ko taku foki ne au a mea katoa ne mea sē aoga, ona ko te mea e isi se mea e sili atu tona aoga, telā ko toku iloa ‵lei o Keliso Iesu telā ko toku Aliki. Ko tiaki ne au a mea katoa ona ko ia, ko taku ne au a mea katoa konā ne kaiga ko se atafaia i te elo.”​—Filipi 3:8.

14, 15. Ne a fakamanuiaga e maua ne tatou e pelā me ne tino ‘e ga‵lue fakatasi mo te Atua’?

¹⁴ E pelā mo Paulo, e fakaasi atu foki ne Kelisiano i aso nei a te alofa sē fakapito mō te tala ‵lei. (Maleko 10:​29, 30) E mata, e isi se mea gali e galo i a tatou ona ko te tala ‵lei? Ne ‵pau eiloa a lagonaga o Robert telā ne taku mai i te kamataga o te mataupu mo nisi tino e tokouke i ana pati: “Ne seki salamo eiloa au i taku fakaikuga. E maua ne au te fiafia mo te lotomalie i te galuega talai, kae ko maua ne au te avanoaga ke ‘tofotofo kae matea atu me i a Ieova e ‵lei.’ I so se taimi e fakaaoga ne au a kope faka-te-foitino ko te mea ke kausaki atu ki fakamoemoega faka-te-agaga, e tuku mai faeloa ne Ieova a fakamanuiaga e uke atu i mea ne tuku atu ne au. E foliga mai me e seki fakaasi atu eiloa ne au a te alofa sē fakapito. E maua eiloa ne au a fakamanuiaga!”​—Salamo 34:8; Faataoto 10:22.

¹⁵ Kafai ko oti ne aofia koe i te galuega ko te talai mo te akoako atu i taimi nei mō se vaitaimi tai mata leva, e mautinoa eiloa me ne maua ne koe a avanoaga ke tofotofo aka kae lavea atu foki te ‵lei o Ieova. E mata, e isi ne taimi ne lagona ei ne koe te fesoasoani o tena agaga tapu i te taimi e talai ei ne koe te tala ‵lei? E mata, kai lavea ne koe te ‵saga mai o nisi tino mo te fia‵fia ona ko te mea ne ‵tala ne Ieova olotou loto ke ‵saga tonu mai ki te fekau? (Galuega 16:14) E mata, ne fesoasoani atu a Ieova ke manumalo koe i fakalavelave, kāti mai te ‵tala ne ia te auala ke fakalauefa atu ne koe tau galuega talai? E mata, ne ‵lago atu a ia ki a koe i taimi faiga‵ta ko te mea ke tumau koe i te tavini atu ki a ia māfai ko vāivāi koe? (Filipi 4:13) Kafai e maua ne tatou te feasoasoani o Ieova i te taimi e fai ei te ‵tou galuega talai, ka fai a ia e pelā me se tino tonu ki a tatou kae ka ‵pili atu foki tatou ki a ia. (Isaia 41:10) E mata, e sē se fakamanuiaga ke fai e pelā me se tino ‘e ga‵lue fakatasi mo te Atua’ i te galuega lasi tenei e uiga ki akoakoga a te Atua?​—1 Kolinito 3:9.

16. E pefea ou lagonaga ki taumafaiga mo te alofa sē fakapito ne fakaasi atu ne koe ona ko akoakoga mai te Atua?

¹⁶ E tokouke a tino e fakamoe‵moe ke fai se mea telā e tumau tena tāua i olotou olaga. E lavea ne tatou me se mea vave eiloa o puli atu a mea aoga kolā e fakatāua ne te lalolagi i aso nei. Kae ko te galuega telā e fai ne Ieova i aso nei ke fakamaluga aka ei tena igoa ka fai e pelā me se vaega tumau i tala fakasolopito o tino o Ieova. Ka masaua faeloa a galuega konei ki te se-gata-mai. (Faataoto 10:7; Epelu 6:10) Ke na fakatāua ne tatou te ‵tou tauliaga e uiga ki te akoako atu o nisi tino e uiga ki a Ieova, e pelā me se galuega telā e se mafai lele eiloa o puli atu.

Ka Tali Mai Pefea ne Koe?

• Se a te mea e manako a Ieova ki ei mai i tino kolā e akoako ne ia?

• E mafai pefea ne akoakoga mai te Atua o faka‵lei aka a olaga o tino?

• I auala fea ne fakamanuia ei tatou ne Ieova ona ko te fesoasoani atu ki nisi tino ke maua a mea aoga mai i akoakoga a te Atua?

[Ata i te itulau e 26]

E aofia a tino kolā e akoako ne Ieova i se kautaina tonu i te lalolagi kātoa

[Ata i te itulau e 27]

E mata, e sē se fakamanuiaga ke fai pelā me se tino ‘e ga‵lue fakatasi mo te Atua’?