E Mata, e Sa‵sale Fakatasi Koulua mo te Atua?

“Ola io me sasale mo te loto maulalo i mua o te ‵tou Atua.”​—⁠MIKA 6:⁠8.

1, 2. E mafai pefea o ‵pau a lagonaga o Ieova ki a tatou mo te mātua telā e fakaakoako ne ia tena tamaliki ke iloa o sasale?

E TAUMAFAI malosi se pepe, telā koi fakaakoako o sasale ke oko atu ki lima o tena mātua kae saele atu i ne nāi kalafaga i te taimi muamua eiloa. Kāti e se tāua malosi te mea tenā, kae se lasaga tāua ‵ki eiloa ki te mātua mo te tamana me ka uke ‵ki a mea e ‵kilo atu a laua ki ei mō aso mai mua. E olioli faeloa a mātua ki te taimi telā ka sa‵sale fakatasi ei laua mo te lā tamaliki, i masina mo tausaga mai mua. E fakamoe‵moe foki laua ke puipui kae takitaki ne laua te lā tamaliki i auala kese‵kese i aso mai mua.

² E penā foki eiloa a lagonaga o Ieova te Atua e uiga ki ana tama‵liki i te lalolagi nei. Ne fai mai a ia e uiga ki ana tino Isalaelu io me ko Efalaima: “Ne akoako ne au a Isalaelu ke iloa ne ia o sasale. Ne avake ne au a toku fenua ki oku lima . . . Ne sai mai ne au latou ki a au mo te alofa.” (Hosea 11:​3, 4) E fakamatala mai ne Ieova a ia i konei e pelā me se tamana alofa telā e akoako ne ia mo te kufaki a tena tamaliki ke iloa o sasale, kae fafa ne Ia māfai ko siga. E loto fiafia a Ieova, te toe Tamana ‵lei, o akoako tatou ke iloa o sa‵sale. E fiafia foki a ia o ‵kau fakatasi mo tatou i taimi e ga‵solo atu ei tatou ki mua. E pelā mo te tusi siki fakavae o te mataupu tenei, e fakaasi mai i ei me e mafai o sa‵sale fakatasi tatou mo te Atua! (Mika 6:⁠8) Kae se a te uiga o te sa‵sale fakatasi mo te Atua? Kaia e ‵tau ei o fai tatou penā? E mafai pefea o tupu te mea tenā? Ne a fakamanuiaga ka maua mai te sa‵sale fakatasi mo te Atua? Ke mafau‵fau tatou ki fesili takitasi e fa konei.

Se a te Uiga o te Sa‵sale Fakatasi mo te Atua?

3, 4. (a) Se a te mea e gali ei te tugāpati ko te sa‵sale fakatasi mo te Atua? (e) Se a te uiga o te sa‵sale fakatasi mo te Atua?

³ E tonu, e se mafai lele eiloa o sa‵sale se tino ne faite ki ‵kano mo toto mo Ieova, telā se agaga. (Esoto 33:20; Ioane 4:24) Telā la, kafai e faipati te Tusi Tapu e uiga ki tino e sa‵sale mo te Atua, e faipati loa i ei i se auala fakatusa. E fakaasi mai i ei se fakamatalaga fakagali‵gali o kupu, telā e se fakasino atu fua ki ne nāi atufenua mo itukāiga, kae aogā foki eiloa i vaitaimi katoa. Me e seai se koga io me se vaitaimi telā ne ola ei a tino ne seki malamalama i te uiga o te sasale fakatasi mo se isi tino? E mata, e se fakaasi mai i kupu ‵gali konei a te alofa mo te ‵pili o te fesokotakiga? E tuku mai ne vaegā lagonaga penā ke malamalama tatou i te uiga o te sa‵sale mo te Atua. Ke onoono aka tatou ki mea ‵tonu kolā ne ‵tupu.

⁴ Ke masaua a tāgata fakamaoni ko Enoka mo Noa. Kaia e fakamatala mai i ei me ne sa‵sale fakatasi laua mo te Atua? (Kenese 5:24; 6:⁠9) E fakauiga sāle i te Tusi Tapu a te tugāpati “ke sa‵sale” ki te tautali atu i te faiga o se mea. Ne filifili aka ne Enoka mo Noa a te olaga telā e fetaui ‵lei mo te loto o Ieova te Atua. E ‵kese mai mo tino i lā tafa, ne ‵kilo atu laua ki a Ieova mō se fakatakitakiga kae faka‵logo foki ki tena takitakiga. Ne tali‵tonu katoatoa laua ki a ia. E mata, e fakauiga i ei me ne fai ne Ieova a fakaikuga mō laua? Ikai. Ko oti ne tuku ne Ieova ki tino a te saolotoga ke fai olotou filifiliga, kae manako a ia ke fakaaogā ne tatou te meaalofa tenā fakatasi mo te “malosi o ‵tou mafaufau.” (Loma 12:⁠1, NW) Kae i te faiga o ‵tou fakaikuga, e talia ne tatou mo te loto maulalo a te malosi o ‵tou mafaufau ke takitaki tatou ne te mafaufau o Ieova telā e katoatoa tena ‵lei. (Faataoto 3:​5, 6; Isaia 55:​8, 9) Telā la, i te taimi e sa‵sale atu ei tatou i te olaga tenei, e faima‵laga atu eiloa tatou fakatasi mo Ieova.

5. Kaia ne faipati ei a Iesu e uiga ki te fakaopoopoga o se aga e tasi ki te ola o se tino?

⁵ E fakatusa sāle ne te Tusi Tapu a te olaga ki se malaga io me ki te sasale. I nisi taimi, e faigofie o malamalama tatou i te fakatusa tenā, kae i nisi taimi e tai faigatā eiloa. E pelā me se fakaakoakoga, ne fai mai a Iesu: “Ko oi se tino i a koutou e mafai ne ia i tona manavase o toe fakasili a tona ola ki se aga e tasi?” (Mataio 6:27) Kāti e tai ‵numi koe i pati konā. Kaia ne faipati ei a Iesu ke fakaopoopo atu se “aga e tasi,” telā e fua ki ei te loa o se mea, ki te “ola” o se tino, telā e fua aka ki te taimi?a Ne fakatusa ne Iesu a te ola o se tino i konei ki se malaga. Telā la, ne akoako mai a ia me e se mafai o fakaopoopo ne te manavase se kalafaga e tasi fua ki te malaga a tou ola. E mata, e ‵tau o fakaiku aka ne tatou, me e seai se mea e mafai o fai ne tatou e uiga ki te loa o te malaga e sa‵sale ei tatou? Ikai! Ko aumai ei ne te mea tenā a tatou ki te lua o fesili, Kaia e ‵tau ei o sa‵sale fakatasi tatou mo te Atua?

Kaia e ‵Tau ei o Sa‵sale Tatou mo te Atua?

6, 7. Se a te mea telā e ma‵nako malosi ki ei a tino se ‵lei katoatoa, kae kaia e ‵lei ei ke ‵sala atu ki a Ieova ke tuku mai ne ia te mea tenā?

⁶ A te pogai e tasi e ‵tau ei o sa‵sale tatou mo Ieova te Atua e fakamatala mai i te Ielemia 10:23: “Te Aliki, e iloa ne au me e seai se tino e pule i tena ikuga; e seai se tino e pule i tena ola.” Telā la, e seai eiloa se tino i a tatou e mafai io me e isi sena saolotoga ke takitaki ne ia tena olaga i a ia eiloa. E ma‵nako malosi eiloa tatou ki se fakatakitakiga. A tino kolā e fia ola i olotou auala eiloa, kae ‵tu tokotasi mai te Atua, e fai foki ne latou te mea ‵se telā ne fai ne Atamu mo Eva. Ne fakaaogā ne te tauavaga muamua a te aiā ke filifili ne laua te mea ‵lei mo te mea sē ‵lei. (Kenese 3:​1-6) E se io tatou te aiā tenā.

⁷ E mata, e se manako koe ki se fakatakitakiga i te auala e faimalaga ei koe i te olaga? E isi faeloa ne fakaikuga, ‵lasi io me fo‵liki, e ‵tau o fai ne tatou i aso takitasi. E isi ne fakaikuga e faiga‵ta kae mafai o pokotia i ei a ‵tou olaga i aso mai mua​—⁠e pelā foki loa mo ‵tou kāiga pele. Kae mafaufau la, me e isi se tino telā e matua kae poto atu i a tatou e loto fiafia o tuku mai a fakatakitakiga mo te alofa i te faiga o ‵tou fakaikuga! Se mea fakafanoanoa me e tau‵tali atu eiloa a te tokoukega o tino i aso nei ki olotou faka‵tauga kae e takitaki ne latou a latou eiloa. E se fia ‵saga atu latou ki te mea tonu telā e fakaasi mai i te Faataoto 28:26: “Se mea valea o tautali i ou mafaufauga. Tautali i akoakoga a tino e poto atu i a koe, kae ka saogalemu tou olaga.” E manako a Ieova ke se pokotia tatou i fakalavelave kolā e iku mai i te talitonu ki te loto fakamataku o te tagata. (Ielemia 17:⁠9) E manako a ia ke sa‵sale tatou i te poto, ke tali‵tonu tatou ki a ia e pelā me ko te Tino poto telā e takitaki kae akoako ne ia tatou. Kafai e fai tatou penā, ka saogalemū, fia‵fia kae fakalotomalie foki a ‵tou olaga.

8. Se a te koga e takitaki tatou ki ei ne te agasala mo te tulaga se ‵lei katoatoa, kae se a te mea e manako a Ieova ki ei mō tatou?

⁸ A te suā pogai e ‵tau ei o sa‵sale tatou mo te Atua e aofia i ei a te loa o te auala telā e fia sa‵sale ei tatou. E fakaasi mai i te Tusi Tapu se mea tonu fakafanoanoa. E tonu, e sa‵sale atu a tino se ‵lei katoatoa katoa ki te koga e tasi. Ke fakamatala mai a tofotofoga kolā e ‵sae aka i te taimi ko ma‵tua ei, e fai mai te Failauga 12:5 penei: “Ka olo atu matou ki te koga malolo o matou, kae ka ‵tagi fanoanoa a tino i auala.” Se a te “koga malolo” tenei? Ko te tanuga, ko te koga telā e olo tatou ki ei ona ko te agasala mo te tulaga se ‵lei katoatoa. (Loma 6:23) Kae, e uke atu a mea e manako a Ieova ki ei mō tatou, i lō te sa‵sale atu fua i se taimi toetoe mai te taimi e fanau ei ke oko ki loto i te tanuga. (Iopu 14:⁠1) Kae e mafai o sa‵sale tatou i se leva telā e ma‵nako tatou ki ei​—⁠ki te se-gata-mai, māfai fua e sa‵sale fakatasi tatou mo te Atua. E mata, e se tenā loa te mea e manako koe ki ei? Telā la, e maina ‵lei me e ‵tau eiloa o sa‵sale fakatasi koulua mo tou Tamana.

E Sa‵sale Pefea Tatou mo te Atua?

9. Kaia e fai ei a Ieova i nisi taimi pelā me e ‵muni mai i ana tino, kae se a te fakatalitonuga e maua ne tatou i te Isaia 30:20?

⁹ E ‵tau o mafaufau faka‵lei tatou ki te tolu o fesili ka sau‵tala tatou ki ei. Tenei la te fesili, E sa‵sale pefea tatou mo te Atua? E maua ne tatou te tali i te Isaia 30:​20, 21: “Ka ko ia [te otou Faiakoga Sili] e fakatasi atu eiloa o akoako koutou, kae ka se fi‵ta foki koutou o sala ki a ia. Kafai ko ‵se te auala o koutou ki te feitu fakaatamai io me ko te feitu fakamaui, kae ka lagona ne koutou tena leo i otou tua e fai penei, “Tenei te auala. Tautali i ei.” I fuaiupu fakamalosi loto konei, e fakamasaua atu ei a Ieova ki ana tino i te fuaiupu e 20, me kafai e ‵teke atu latou ki a ia, ka ‵muni a ia mai i a latou. (Isaia 1:15; 59:⁠2) Kae e fakaasi mai i konei i a Ieova e pelā me tu atu i mua o ana tino fakamaoni, kae e se ‵muni. Kāti e mafai o fakaataata ne tatou se faiakoga telā e tu atu i mua o ana tamaliki a‵koga o fakaasi atu te mea e manako a ia ke iloa ne latou.

10. Se a te uiga o te ‘lagona o te leo o te Faiakoga Sili mai ou tua’?

¹⁰ E ‵kese foki te mea e lavea ne tatou i te fuaiupu e 21. E fakaasi mai i ei i a Ieova e pelā me sasale i tua o ana tino, o fakatonutonu atu te auala e ‵tau sa‵sale i ei. E fai mai a tāgata ‵poto i te Tusi Tapu me kāti e fakavae a te tugāpati tenei ki te auala e tautali atu ei se tausi mamoe i ana mamoe, kae kalaga atu ke takitaki atu ei ke mo a ma olo atu latou i se auala ‵se. E aogā pefea te mea tenei ki a tatou? Kafai e suke‵suke tatou ki te Muna a te Atua ke maua mai i ei a fakatakitakiga, e fai‵tau eiloa tatou ki pati kolā ne tusi i te fia afe tausaga ko ‵teka. E fai pelā me e lagona ne tatou mai ‵tou tua a pati kolā ko leva ne tusi ki lalo. Kae e ‵pau eiloa tena aogā i aso nei e pelā eiloa mo tena aogā i te aso ne tusi i ei. E mafai o takitaki tatou ne fakatakitakiga i te Tusi Tapu i te faiga o ‵tou fakaikuga i aso takitasi, kae e mafai foki o fesoasoani mai ke fakatoka ei a te auala ka sa‵sale tatou i ei i tausaga mai mua nei. (Salamo 119:105) Kafai e ‵sala atu tatou mo te fakamaoni ki fakatakitakiga konā kae fakagalue ne tatou, ko fai ei a Ieova mo fai te ‵tou Takitaki. Ko sa‵sale fakatasi eiloa tatou mo Ieova.

11. E ‵tusa mo te Ielemia 6:​16, se a te tugāpati fakamalosi loto ne fakaasi atu ne Ieova mō ana tino, kae ne ‵saga atu pefea latou ki ei?

¹¹ E mata, e talia eiloa ne tatou a te Muna a te Atua ke takitaki ‵tonu ne ia tatou? Se mea tāua ‵ki ke sagasaga faka‵lei i se taimi kae fai se iloiloga fakamaoni ki a tatou eiloa. Ke mafaufau ki se fuaiupu telā ka fesoasoani mai ke fai ei tatou penā: “Muna a te Aliki ki tino o tena fenua, ‘Tu i maga ala kae onoono. Fesili ki tino me ko fea a auala taumua, kae maise te auala tafasili i te lei. Sasale i te auala tenā kae ka ola koutou i se olaga filemu.’ ” (Ielemia 6:16) Kāti e fakamasaua mai ne pati konei ki a tatou e uiga ki se tino faimalaga telā e tu i se maga auala o ‵sala atu ki te auala tonu. Ne ‵tau foki o fai ne tino o Ieova kolā ne ‵teke atu ki a ia i Isalaelu a te mea tenā i te feitu faka-te-agaga. Ne ‵tau o ‵sala latou ki “auala taumua.” A te “auala tafasili i te ‵lei” tenā ko te auala telā ne sa‵sale atu ei olotou tupuga fakamaoni, ko te auala telā ne tiakina ne te lotou fenua ona ko te lotou va‵lea. Se mea fakafanoanoa me ne ‵teke atu a Isalaelu mo te loto ‵fika ki te fakamasauaga alofa tenei mai i a Ieova. E faka‵soko mai te fuaiupu tenā, penei: “Kae fai mai latou penei, ‘Ikai, a matou e se sasale i ei.’ ” I aso nei, e ‵kese loa te auala e ‵saga atu ei a tino o te Atua ki vaegā fakatakitakiga penā.

12, 13. (a) Ne ‵saga atu pefea a soko fakaekegina o Keliso ki te fakatakitakiga i te Ielemia 6:16? (e) E mafai pefea o iloilo faeloa ne tatou te auala e sa‵sale ei tatou i aso nei?

¹² Talu mai te fakaotiga o te 19 senitenali, ne fakaaogā ei ne soko fakaekegina o Keliso a te fakatakitakiga i te Ielemia 6:16 ki a latou. E pelā me se potukau, ko oti eiloa ne fai ne latou te takitakiga i te ‵foki atu ki “auala taumua” mo te loto kātoa. E ‵kese mo lotu Kelisiano ‵loi, ko oti eiloa ne tau‵tali atu latou mo te fakamaoni ki “faifaiga o muna ‵lei” kolā ne fakavae ne Iesu Keliso kae ‵lago atu ki ei ana soko fakamaoni i te senitenali muamua T.A. (2 Timoteo 1:13) Ke oko mai ki aso nei, e fakatau fesoasoani a te ‵toega i a latou eiloa e pelā foki mo olotou taugasoa ko ‘nisi mamoe’ ko te mea ke tumau latou i te olaga ‵lei kae fakafiafia telā ko oti ne tiakina ne lotu Kelisiano ‵se.​—⁠Ioane 10:16.

¹³ Mai te tukumaiga o meakai faka-te-agaga i te taimi tonu, ko oti ne fesoasoani atu a te tavini fakamaoni ki te fia miliona o tino ke maua te “auala taumua” kae ke sa‵sale fakatasi latou mo te Atua. (Mataio 24:​45-47) E mata, e aofia koe i te fia miliona konā? Kafai e penā loa, ne a mea e mafai o fai ne koe ke mo a e tapeapea koe fakaatea, o sasale i te auala e manako koe ki ei? Se mea poto ke iloilo aka faeloa te auala e sasale ei koe i te olaga. Kafai e fakamaoni koe o faitau ki te Tusi Tapu fakatasi mo tusi faka-te-Tusi Tapu kae kau atu faeloa ki polokalame o akoakoga kolā e fakatoka ne te kau fakaekegina i aso nei, ko tena uiga ko akoakogina koe ke sa‵sale fakatasi koulua mo te Atua. Kae kafai ko fakagalue ne koe mo te loto maulalo a fakatakitakiga kolā e tuku mai, ko tena uiga ko sa‵sale fakatasi eiloa koulua mo te Atua i te “auala taumua.”

Ke Sasale e Pelā Eiloa me e Lavea ne Koe “te Atua Telā e se Mafai o Matea”

14. Kafai a Ieova se tino tonu eiloa ki a tatou, e fakaasi atu pefea te mea tenā i ‵tou fakaikuga kolā e fai?

¹⁴ Ko te mea ke mafai o sa‵sale fakatasi tatou mo Ieova, e ‵tau o fai a ia e pelā me se tino tonu eiloa ki a tatou. Ke masaua me ne fakatalitonu atu a Ieova ki ana tino fakamaoni i Isalaelu i aso mua me e se ‵muni a ia mai i a latou. E penā foki i aso nei, e fakaasi mai ne Ieova a ia ki ana tino i aso nei e pelā me ko te lotou Faiakoga Sili. E mata, e fai penā a Ieova ki a koe, e pelā eiloa me tu mai a ia i ou mua o akoako koe? Tenā eiloa te vaegā fakatuanaki e ‵tau o maua ne tatou māfai e fia sa‵sale fakatasi tatou mo te Atua. Ne maua ne Mose te vaegā fakatuanaki tenā, me ne “tumau foki tona talitonu me ko matea eiloa ne ia te Atua telā e se mafai o matea.” (Epelu 11:27) Kafai a Ieova se tino tonu eiloa ki a tatou, ka amanaia foki tatou ki ana lagonaga māfai ko fai ‵tou fakaikuga. E pelā me se fakaakoakoga, ka se mafai eiloa o fai ne tatou se amioga matagā kae oti ko ‵funa ei ne tatou ‵tou agasala mai toeaina Kelisiano io me ko tino o ‵tou kāiga. I lō te fai penā, e taumafai eiloa tatou o sa‵sale fakatasi mo te Atua faitalia me seai se tino e lavea tonu ne ia tatou. E pelā mo te tupu ko Tavita i aso mua, ke na fai ‵tou fakaikuga: “Ka ola au i se olaga ‵ma i loto i toku fale.”​—⁠Salamo 101:⁠2.

15. E fesoasoani mai pefea a te ‵tou ‵kau fakatasi mo ‵tou taina mo tuagane Kelisiano ke fai ei a Ieova e pelā me se tino tonu ki a tatou?

¹⁵ E iloa ne Ieova i a tatou ne tino se ‵lei katoatoa kae kāti e faigatā i nisi taimi ke tali‵tonu tatou ki mea kolā e se mafai o matea ne tatou. (Salamo 103:14) E uke ‵ki a mea e fai ne ia ke mafai o manumalo tatou i te vāivāiga tenā. E pelā me se fakaakoakoga, ko oti ne fakamaopoopo ne ia a “tino mō tena igoa” mai fenua katoa o te lalolagi. (Galuega 15:​14, NW) I te taimi e tavini fakatasi atu ei tatou, e fakatau fakamalosi aka ei ne tatou a tatou eiloa. Kafai e lagona ne tatou a tala e uiga ki se taina io me se tuagane faka-te-agaga telā ne manumalo i sena vāivāiga io me se tofotofoga faigatā, e fai i ei ke fai a te Atua e pelā me se tinā tino tonu ki a tatou.​—⁠1 Petelu 5:⁠9.

16. E fesoasoani mai pefea a ‵tou sukesukega e uiga ki a Iesu ke sa‵sale fakatasi tatou mo te Atua?

¹⁶ Kae e sili i mea katoa, ko oti ne tuku mai ne Ieova se fakaakoakoga sili e auala i tena Tama. Ne fai mai a Iesu: “Ko au te auala, te munatonu mo te ola. E seai se tino e fanatu ki te Tamana manafai e se alatu mai i a au.” (Ioane 14:⁠6) A te sukesuke ‵loto e uiga ki te olaga o Iesu i te lalolagi se auala tāua e tasi ke fai ei a Ieova e pelā me se tino tonu ki a tatou. A pati mo mea katoa kolā ne fai ne Iesu se fakaasiga ‵lei katoatoa tenā o uiga mo faifaiga a tena Tamana faka-te-lagi. (Ioane 14:⁠9) I te faiga o ‵tou fakaikuga, e ‵tau o mafaufau faka‵lei tatou ki te auala e saga atu ei a Iesu ki ei. Kafai e fakaasi atu i ‵tou fakaikuga me ne mafaufau kae ‵talo foki tatou e uiga ki ei, ko tena uiga ko sa‵sale eiloa tatou i kalafaga o Keliso. (1 Petelu 2:21) Telā la, ko sa‵sale fakatasi eiloa tatou mo te Atua.

Ne a Fakamanuiaga ka Maua Mai i ei?

17. Kafai e sa‵sale tatou i auala o Ieova, se a te “filemu” telā ka maua ne tatou?

¹⁷ Ke sa‵sale fakatasi mo Ieova te Atua ko te ola i se olaga e ‵fonu i fakamanuiaga. Ke masaua te folafolaga a Ieova ne fai ki ana tino māfai e ‵sala atu latou ki te “auala tafasili i te ‵lei.” Ne fai mai a ia: “Sasale i te auala tenā kae ka ola koutou i se olaga filemu.” (Ielemia 6:16) Se a te uiga o te olaga “filemu”? E mata, e fakauiga ki se olaga faigofie telā e ‵fonu i fakafiafiaga mo kope tāua? Ikai. E tuku mai ne Ieova se mea telā e sili fakafia atu i te ‵lei, se mea telā e faigatā o maua ne te ‵toe tino maumea eiloa. Ke maua se olaga faigofie ko te mauaga o se filemu i te loto i a koe, te fiafia mo te lotomalie i te feitu faka-te-agaga. A te mauaga o se olaga faigofie penā e fakaasi mai i ei tou talitonu me ko oti ne filifili ne koe te ‵toe auala ‵lei i te olaga. A te filemu o te mafaufau tenā se fakamanuiaga telā e mauagatā i te lalolagi o fakalavelave tenei!

18. Se a te fakamanuiaga e manako Ieova ke tuku atu ki a koe, kae se a te fakaikuga e fai ne koe?

¹⁸ E tonu, a te ola i a ia eiloa se fakamanuiaga lasi ‵ki. Ke oko ki te ola i se olaga toetoe e ‵lei atu i lō te se ola eiloa. Kae, e seki manako eiloa a Ieova ke ola koe i se taimi toetoe mai te taimi koi malielie ei koe e pelā me se talavou ke oko ki logo‵maega o te olaga matua. Ikai, e manako Ieova ke maua ne koe a te ‵toe fakamanuiaga sili eiloa. E manako a ia ke sa‵sale fakatasi koulua ki te se-gata-mai! E fakaasi faka‵lei mai te mea tenā i te Mika 4:5: “A malo katoa e tapuaki kae faka‵logo ki olotou atua, ka ko matou e tapuaki kae faka‵logo ki te Aliki te motou Atua ki te se gata mai.” E mata, ka puke ‵mautakitaki koe ki te fakamanuiaga tenā? E mata, ka ola koe i te olaga telā e taku ne Ieova ko te “ola tonu”? (1 Timoteo 6:19) Telā la, ke fai nei tau fakaikuga ke sa‵sale fakatasi koulua mo Ieova i te aso nei, te aso taeao mo aso takitasi mai tua ifo i ei ke oko atu eiloa ki te se-gata-mai!

[Fakamatalaga mai lalo]

Ka Tali Mai Koe Pefea?

• Se a te uiga o te sa‵sale fakatasi mo te Atua?

• Kaia e ‵tau ei o sa‵sale fakatasi koulua mo te Atua?

• Se a te mea ka fesoasoani atu ki a koe ke sa‵sale fakatasi koulua mo te Atua?

• Ne a fakamanuiaga ka maua ne tino kolā e sa‵sale fakatasi mo te Atua?

Ka Tali Mai Koe Pefea?

• Se a te uiga o te sa‵sale fakatasi mo te Atua?

• Kaia e ‵tau ei o sa‵sale fakatasi koulua mo te Atua?

• Se a te mea ka fesoasoani atu ki a koe ke sa‵sale fakatasi koulua mo te Atua?

• Ne a fakamanuiaga ka maua ne tino kolā e sa‵sale fakatasi mo te Atua?

[Ata i te itulau e 29]

E auala i te Tusi Tapu, e lagona ne tatou te leo o Ieova i ‵tou tua e fai mai penei, “Tenei te auala”

[Ata i te itulau e 31]

E maua ne tatou a meakai faka-te-agaga i te taimi tonu e auala i fakatasiga