Ke Fakamaoni Atu Tou Fai Mo Fai Se Soko Tonu O Keliso

“A te lakau ‵lei e fua mai ei fuaga ‵lei, ka ko te lakau masei, e fua mai ei a fuaga ma‵sei.”​—MATAIO 7:⁠17.

1, 2. E tu ‵kese pefea a soko ‵tonu o Keliso mai i soko ‵loi, maise eiloa i te taimi tenei o te gataga?

NE FAI mai a Iesu me i tino kolā e tavini fakaloiloi atu ki a ia ka faka‵kese mai i ana soko ‵tonu e auala i olotou fuataga​—ko olotou akoakoga mo amioga. (Mataio 7:15-17, 20) A te ‵tonuga loa, e fakamalosigina a tino ke fai a mea kolā e tuku atu ne latou ki olotou mafaufau mo olotou loto. (Mataio 15:18, 19) A tino kolā e fagai ki mea ‵se e fua mai ne latou a “fuaga ma‵sei,” kae ko tino kolā e akoakogina ki muna‵tonu faka-te-agaga e fua mai ne latou a “fuaga ‵lei.”

² E lua a vaegā fuaga kolā e lavea faka‵lei atu i te taimi tenei o te gataga. (Faitau te Tanielu 12:3, 10.) E maua ne Kelisiano ‵se se kilokiloga ‵fuli fakakotua e uiga ki te Atua kae e masani o tapuaki fakaloiloi atu latou ki te Atua, kae ko tino kolā e maua ne latou a te mainaga faka-te-agaga e tapuaki atu latou ki te Atua “i te agaga mo te fakamaoni.” (Ioane 4:24; 2 Timoteo 3:1-5) E taumafai latou ke fakaasi atu a uiga e pelā mo Keliso. Kae e a tatou taki tokotasi? I te taimi e sukesuke ei koe ki fakailoga e lima o te Lotu Kelisiano, ke fesili ifo ki a koe eiloa: ‘E mata, e fetaui ‵lei eiloa aku amioga mo akoakoga mo te Muna a te Atua? E mata, e fakagaligali ne au te munatonu i mata o tino kolā e ‵sala ki ei?’

Ke Ola e ‵Tusa mo te Muna a te Atua

3. Se a te mea e fakafiafia atu ki a Ieova, kae se a te mea e fakauiga ki ei a te mea tenei mō Kelisiano ‵tonu?

³ Ne fai mai a Iesu: “E se ‵sao ki te Malo o te lagi a latou katoa kolā e fai mai ki a au, ‘Te Aliki, te Aliki,’ na ko ia fua telā e fai ne ia te loto o toku Tamana telā i te lagi.” (Mataio 7:21) E tonu, e se ko te fai atu fua me i a koe se Kelisiano telā e fakafiafia atu ki a Ieova kae ko te faiga o mea kolā e ‵tau o fai ne se Kelisiano. Mō soko ‵tonu o Keliso, e aofia eiloa te mea tenā i olotou olaga kātoa, e aofia i ei te lotou kilokiloga ki tupe, galuega ‵togi, fakafiafiaga, tuu mo fakamanatuga a te lalolagi, mo fakaipoipoga mo nisi fesokotakiga mo tino. Kae ko Kelisiano ‵Se, e fakaakoako atu ki mafaufauga mo auala o te lalolagi, kolā ko gasolo aka eiloa o se fetaui mo te loto o te Atua i aso fakaoti konei.​—Salamo 92:7.

4, 5. E mafai pefea o fakagalue aka ne tatou i ‵tou olaga a pati a Ieova i te Malaki 3:18?

⁴ E ‵tusa mo te mea tenā, ne tusi mai a te pelofeta ko Malaki: “Ka toe kilo‵kilo a mata o oku tino ki te mea ka tupu ki tino amio‵tonu mo te mea ka tupu ki tino ma‵sei; pelā foki ki te tino e tavini mai ki a au mo te tino e se fia tavini mai ki a au.” (Malaki 3:18) I te taimi e mafaufau ei koe ki pati konā, fesili ifo ki a koe eiloa: ‘E mata, e ‵pau au mo tino o te lalolagi, io me e tu ‵kese au mai i a latou? E mata, e taumafai faeloa au ke fakafiafia atu ki oku taugasoa, faitalia me i te akoga io me ko koga ga‵lue, io me e tumau au i te puke ‵mau ki akoakoga fakavae i te Tusi Tapu, ke oko foki eiloa ki te faipati ‵tonu atu māfai e ‵lei?’ (Faitau te 1 Petelu 3:16.) E tonu, e se ma‵nako tatou o fai e pelā me ne tino fia amio‵tonu, kae e ‵tau o ‵tu ‵kese tatou mai i tino kolā e se a‵lofa kae e se tavini atu foki ki a Ieova.

⁵ Kafai e iloa ne koe me e isi ne mea e manakogina ke ‵fuli i au amioga, kaia e se ‵talo atu ei koe e uiga ki te mea tenā kae ‵sala atu ki te malosi faka-te-agaga e auala i te tumau i te sukesuke ki te Tusi Tapu, ‵talo, mo te kau atu ki fakatasiga? Ko te momea aka o te fakagalue ne koe o te Muna a te Atua i tou olaga, ko te momea aka foki o “fuaga ‵lei” e fua mai ne koe, e aofia i ei a te “‵viki faeloa . . . ki tona igoa [o te Atua] i o‵tou leo.”​—Epelu 13:15.

Ke Folafola Atu te Malo o te Atua

6, 7. E ‵tusa mo te fekau o te Malo, se a te ‵kesega telā e mafai o lavea atu i te va o Kelisiano ‵tonu mo Kelisiano ‵se?

⁶ Ne fai mai a Iesu: “E ‵tau mo au o takutaku atu te Tala ‵Lei o te Malo o te Atua ki nisi fa‵kai, me tenā eiloa te mea ne uga mai ei au ne te Atua, ke vau o fai.” (Luka 4:43) Kaia ne fai ei ne Iesu a te Malo o te Atua mo fai te matua tāua o tena galuega? Ne iloa ne ia e pelā me ko te Tupu o te Malo tenā, fakatasi mo ana taina fakaekegina ki te agaga kolā ka toe‵tu aka, me ka fakagata atu ne latou a te māfuaga o fakalavelave o tino​—ko te agasala mo te Tiapolo. (Loma 5:12; Fakaasiga 20:10) Tela la, ne fakatonu atu a ia ki ana soko ke folafola atu te Malo tenā ke oko eiloa ki te gataga o te olaga masei tenei. (Mataio 24:14) A tino kolā e fai mai i a latou ne soko o Keliso e se fai ne latou te galuega tenei​—a te ‵tonuga loa, e se mafai ne latou o fai. Kaia? Ona ko pogai e tolu konei: Muamua la, e se mafai ne latou o talai me e se malamalama latou. A te lua, ko te tokoukega o latou e se lava te lotou loto maulalo mo te loto toa ke fakafesagai atu ki fakatauemuga mo ‵tekemaiga kolā e mafai o ‵tupu mai i te fakaasiatuga o te fekau o te Malo ki olotou tuakoi. (Mataio 24:9; 1 Petelu 2:23) A ko te tolu, e se maua ne Kelisiano ‵se a te agaga o te Atua.​—Ioane 14:16, 17.

⁷ I te suā feitu la, e malama‵lama a soko ‵tonu o Keliso i mea e uiga ki te Malo o te Atua mo mea kolā ka fakataunu mai i ei. E se gata i ei, e fakamuamua ne latou a manakoga o te Malo tenā i olotou olaga, e folafola atu ne latou i te lalolagi kātoa, fakatasi mo te fesoasoani o te agaga o Ieova. (Sakalia 4:6) E mata, e kau atu faeloa koe ki te galuega tenei? E mata, e taumafai koe ke momea aka tou ‵lei e pelā me se tino talai o te Malo, kāti mai i te momea aka o ou taimi i te faiga o te galuega io me ko te momea aka o te magoi o au mea e fai i ei? Ne taumafai a nisi tino ke momea aka te ‵lei o te lotou galuega mai i te fakaaogaga faka‵lei o te Tusi Tapu. “Me i te muna a te Atua e ola kae galue mo te ‵mana,” ne tusi mai a te apositolo ko Paulo, telā ne masani o faitau kae fakasakosako atu mai i te Tusi Tapu.​—Epelu 4:12; Galuega 17:2, 3.

8, 9. (a) Ne a tala e fakaasi mai i ei a te tāua o te fakaaogaga o te Tusi Tapu i te ‵tou galuega talai? (e) E mafai pefea o momea aka te ‵tou apo i te fakaaogaga o te Muna a te Atua?

⁸ I te taimi ne fanatu ei i te galuega talai mai fale ki fale, ne faitau atu ne se taina a te Tanielu 2:44 ki se tagata Katolika kae fakamatala atu a te auala ka aumai ei ne te Malo o te Atua a te filemu mo te tokagamalie tonu. Ne tali atu a te tagata: “Ko oko eiloa i toku fiafia i te ‵suke mai ne koe o te Tusi Tapu kae fakaasi mai ki a au a pati i te tusi siki tenā i lō te fakamatala mai fua ki a au.” I te taimi ne faitau atu ei ne se taina se tusi siki ki se fafine lotu Greek Orthodox, ne ‵sili atu ne tou fafine a nai fesili ‵lei. I te tala foki tenei, ne tali atu ne te taina, fakatasi mo tena avaga, a fesili mai i te Tusi Tapu. Fakamuli ifo, ne fai atu te fafine: “E iloa ne koe te pogai e loto fiafia ei au o sau‵tala mo koulua? Me ne o‵mai koulua ki toku fale mo te Tusi Tapu, kae ne faitau mai foki ne koulua.”

⁹ E tonu, e tāua ‵tou tusi kae e ‵tau foki o ofo atu ne tatou i te galuega talai. Kae ko te ‵tou mea faigaluega fakavae ko te Tusi Tapu. Tela la, kafai e seki masani koe o fakaaoga faeloa te Tusi Tapu i tau galuega talai, kaia e se taumafai ei koe ke fai penā? Kāti e mafai o filifili aka ne koe a nai tusi siki tāua kolā e fakamatala mai i ei a mea e uiga ki te Malo o te Atua mo te auala ka faka‵lei aka ei a nisi fakalavelave kolā e manava‵se ki ei a tino i ou tafa. Ka oti ko fakatoka ke faitau atu ne koe i te taimi e talai atu ei koe mai fale ki fale.

Ke Fakamatamata Koe o Tauave te Igoa o te Atua

10, 11. E pelā mo te fakaaogaga o te igoa o te Atua, se a te ‵kesega i te va o Iesu mo tino e tokouke kolā ne tau‵tali fakaloiloi atu i a ia?

¹⁰ “‘A koutou ko aku molimau,’ ko muna a Ieova, ‘kae ko au ko te Atua.’” (Isaia 43:12, Tusi Paia, Samoa) A te Molimau sili a Ieova, ko Iesu Keliso, ne kilo atu ki te tauave ne ia o te igoa o te Atua mo te fakailoa atu e pelā me se tulaga fakaaloalogina. (Faitau te Esoto 3:15; Ioane 17:6; Epelu 2:12.) A te ‵tonuga loa, ona ko te mea ne folafola atu ne Iesu a te igoa o tena Tamana, telā ne taku ei a ia ko “te molimau fakamaoni.”​—Fakaasiga 1:5; Mataio 6:9.

¹¹ E ‵kese mai i ei, a tino e tokouke kolā e fai mai me e sui ne latou a te Atua mo tena Tama ko oti ne fakaasi atu ne latou a uiga kolā e fakamasiasi ei te igoa o te Atua, ke oko foki eiloa ki te tapale kea‵tea ne latou mai i olotou ‵fuliga o te Tusi Tapu. Mai i te mafaufau ki se uiga tai ‵pau penā, ne fai atu ne se faifeau Katolika se fakatonuga fakamuli nei me “i te igoa o te Atua telā ne tusi mai penei tetragrammaton YHWH ko se ‵tau nei o fakaaoga io me e faka‵leo aka” i taimi o tapuakiga.a Ko oko eiloa i te sē ‵tau o vaegā mafaufauga penā!

12. Ne momea aka pefea a te iloa ‵lei o tavini a Ieova mo te ‵pili o te lotou fesokotakiga mo Ieova i te tausaga ko te 1931?

¹² I te fakaakoako atu ki a Keliso mo te potukau o “tino tali‵tonu [io me ko molimau]” kolā ne ola mai mua atu i a ia, e fakaaoga eiloa mo te fakamata‵mata ne Kelisiano ‵tonu a te igoa o te Atua. (Epelu 12:1) A te ‵tonuga loa, i te tausaga ko te 1931, ne momea aka ei a te lauiloa o tavini a te Atua fakatasi mo Ieova mai i te taliaga ne latou o te igoa ko Molimau a Ieova. (Faitau te Isaia 43:10-12.) Tela la, i se auala e tāua atu, ne fai eiloa a soko ‵tonu o Keliso mo fai ne tino “kolā e fakaigoa ki toku igoa [o te Atua].”​—Galuega 15:14, 17.

13. E mafai pefea o ola tatou e ‵tusa mo te igoa o te ‵tou Atua?

¹³ E mafai pefea o ola tatou e ‵tusa mo te tu ‵kese o ‵tou igoa? E tasi te mea, e ‵tau o molimau atu tatou mo te fakamaoni e uiga ki te Atua. Ne tusi mai a Paulo: “Ko tino katoa kolā e ka‵laga atu ki te igoa o te Aliki, ka fakaolagina latou. Kae ka pefea o ka‵laga atu a tino ki a ia, manafai e seki tali‵tonu latou ki a ia? Kae ka pefea foki o tali‵tonu latou ki a ia, manafai e seki faka‵logo eiloa latou ki a ia? Kae ka pefea foki la o lagona ne latou manafai e seai se failauga [io me “se tino talai,” Tusi Paia, Samoa]? Kae ka mafai pefea ne tino o folafola atu, seiloga ko uga atu latou?” (Loma 10:13-15) E ‵tau foki o fakaasi faka‵sau atu ne tatou mo te atamai a akoakoga ‵se fakalotu kolā e taku fakamasei ei te ‵tou Mafuaga, e pelā mo te akoakoga o te afi i seoli, telā e fai i ei me e maua ne te Atua alofa a uiga ma‵sei o te Tiapolo.​—Ielemia 7:31; 1 Ioane 4:8; fakatusa ki te Maleko 9:17-27.

14. I te iloaga ne latou a te igoa totino o te Atua, ne ‵saga atu pefea a nisi tino ki ei?

¹⁴ E mata, e fakamatamata koe o tauave te igoa o tou Tamana faka-te-lagi? E mata, e fesoasoani atu koe ki nisi tino ke iloa ne latou te igoa ‵malu tenā? E isi se fafine i Paris, i Falani, ne lagona ne ia me ne iloa ne Molimau a Ieova a te igoa o te Atua, telā ne fesili atu ei a ia ki te suā Molimau ne fetaui mo ia ke fakaasi atu ki a ia te igoa tenā i tena Tusi Tapu. I te taimi ne faitau ei ne ia a te Salamo 83:18, ne fakaofoofogia eiloa a mea ne iku mai i ei. Ne kamata o sukesuke a ia ki te Tusi Tapu kae ko fai nei a ia mo fai se tuagane fakamaoni telā e tavini atu i te suā fenua. I te taimi ne faitau ei se fafine Katolika i Ausetalia ki te igoa o te Atua i te Tusi Tapu mō te taimi muamua, ne tagi tou fafine. Ko oti nei ne galue tou fafine e pelā me se paenia tumau i tausaga e uke. Fakamuli fua nei, i te taimi ne fakaasi atu ei ne Molimau i Jamaica ki se fafine a te igoa o te Atua i tena Tusi Tapu eiloa, kae ne ‵sali ifo a loimata o te fiafia. Tela la, ke na fakamata‵mata tatou o tauave a te igoa o te Atua, i te fakaakoako atu ki a Iesu, mai i te fakaasi atu o te igoa tāua tenā ki tino katoa.

‘Sa A‵lofa ki te Lalolagi’

15, 16. E pefea te kilokiloga a Kelisiano ‵tonu ki te lalolagi, kae ne a fesili e ‵tau o ‵sili ifo ne tatou?

¹⁵ “Sa tuku otou loto ki te lalolagi io me ko so se mea faka te lalolagi. Kafai e a‵lofa koutou ki te lalolagi, ko tona uiga e se a‵lofa koutou ki te Tamana telā e i loto i a koutou.” (1 Ioane 2:15) A te lalolagi mo tena agaga e ‵teke atu ki a Ieova mo tena agaga tapu. Tela la, a soko ‵tonu o Keliso e se ‵kalo keatea fua latou mai i te fai mo fai ne vaega o te lalolagi. Ne ‵teke atu latou ki te lalolagi, i te iloa atu me ne tusi mai a te soko ko Iakopo, me “i te tino e fai mo taugasoa o te lalolagi, ko te fili tenā o te Atua.”​—Iakopo 4:4.

¹⁶ E mafai o faigata a te fakalogo ki pati a Iakopo i se lalolagi telā e maua i ei a tofotofoga e uke. (2 Timoteo 4:10) Tela la, ne ‵talo atu a Iesu mō ana soko: “Au e se ‵talo atu ke ave ne koe latou keatea mai te lalolagi, ka ko au e ‵talo atu ke tausi latou ne koe mai te Tino Masei. E se ne tino o te lalolagi latou, e penei foki mo au e sē se tino o te lalolagi.” (Ioane 17:15, 16) Fesili ifo ki a koe eiloa: ‘E mata, e taumafai au ke se fai mo fai se vaega o te lalolagi? E mata, e iloa ne nisi tino toku tulaga i aso fakamanatu mo tuu kolā e se fetaui mo te Tusi Tapu, e pelā foki mo mea kolā e se māfua mai i mea fapaupau kae e lavea faka‵lei atu i ei te agaga o te lalolagi?’​—2 Kolinito 6:17; 1 Petelu 4:3, 4.

17. Ne a mea e mafai o fakamalosi atu ki tino loto fakamaoni ke ‵kau atu ki a Ieova?

¹⁷ Ke fakamautinoa aka me ka se fia‵fia a tino o te lalolagi ki ‵tou tulaga faka-te-Tusi Tapu, kae ka fai ei a tino loto fakamaoni ke fia iloa ne latou te pogai e fai ei tatou penā. A te ‵tonuga loa, kafai ko lavea atu ne tino penā me e fakavae ‵mautakitaki eiloa ‵tou fakatuanaki ki te Tusi Tapu kae e aofia foki i ei ‵tou olaga kātoa, e mafai o ‵saga mai latou mai i te fai atu ki te kau fakaekegina: “Matou e ma‵nako o ‵kau mo koe, me ne lagona ne matou me i te Atua e fakatasi mo koe.”​—Sakalia 8:23.

Ke Fakaasi Atu te Alofa Tonu Faka-Kelisiano

18. Ne a mea e aofia i te fakaasiatuga o te alofa ki a Ieova mo ‵tou tuakoi?

¹⁸ Ne fai mai a Iesu: “E ‵tau mo koe o alofa ki [a Ieova] tou Atua mo tou loto kātoa, mo tou agaga kātoa, mo tou mafaufau kātoa” kae “e ‵tau mo koe o alofa ki tou tuakoi e pelā eiloa mo koe ki a koe.” (Mataio 22:37, 38) A te alofa tenā (ko te a·gaʹpe i te ‵gana Eleni) se alofa telā e mafaufau ki tiute, akoakoga fakavae, mo mea ‵lei, kae e masani o aofia i ei a lagonaga ma‵losi. E mafai o atafai kae ‵loto foki. (1 Petelu 1:22) E ‵kese ‵mao eiloa mai i te uiga ko te kaimanako, me e fakaasi atu te mea tenei i pati mo faifaiga sē kaima‵nako.​—Faitau te 1 Kolinito 13:4-7.

19, 20. Ke taku mai a nisi tala kolā e fakaasi mai i ei a te malosi o te alofa faka-Kelisiano.

¹⁹ Ona ko te alofa se fuataga o te agaga tapu o te Atua, e fai ei a Kelisiano ‵tonu ke fai ne latou a mea kolā e se mafai ne nisi tino o fai, e pelā mo te manumalo i fakalavelave kolā e māfua mai i te fakailoga tino, i tuu mo aganuu, mo mea fakapolitiki. (Faitau te Ioane 13:34, 35; Kalatia 5:22) E otia malosi a loto o tino kolā e fai pelā me ne mamoe i te taimi e matea atu ei ne latou a te vaegā alofa tenā. E pelā mo te taimi ne kau atu ei se tamataene Iutaia i Isalaelu mō te taimi muamua ki te fakatasiga faka-Kelisiano, ne ofo malosi tou tagata ke lavea atu a taina Iutaia mo taina Alapi e tapuaki fakatasi atu ki a Ieova. Ne iku atu i ei ki tena kau atu faeloa ki fakatasiga kae talia foki ne ia ke fai sena akoga faka-te-Tusi Tapu. E mata, e fakaasi atu ne koe a te vaegā alofa tonu penā ki ou taina? E mata, e masani foki koe o fakatalofa atu ki tino ‵fou i te Kingdom Hall, faitalia olotou fenua, ‵lanu, io me ko tulaga o te olaga?

²⁰ E pelā me ne Kelisiano ‵tonu, e taumafai tatou ke fakaasi atu te alofa ki tino katoa. I El Salvador, ne fai ne se talavou talai se akoga faka-te-Tusi Tapu mo se fafine Katolika telā ko 87 ana tausaga kae malosi ‵ki i tena lotu. I te aso e tasi, ne kamata o masaki malosi tou fafine kae ne faulu ki te fa‵kaimasaki. I te taimi ne foki atu ei tou fafine ki te fale, ne āsi atu a Molimau kae ne fakamautinoa aka ne latou me e lava ana meakai. Ne fai eiloa penei mō se masina. E seai eiloa se tino mai i te lotu a te fafine tenei ne āsi atu ki a ia. Se a te ikuga? Ne fakama‵sei ne ia ana fakatusa, ne lisaina mai i tena lotu, kae toe kamata tena akoga faka-te-Tusi Tapu. E tonu, e isi eiloa se malosi o te alofa faka-Kelisiano! E mafai o fakaoko atu a te munatonu ki te loto o te tino i auala e uke kolā e se mafai ne te talai atu o fai.

21. E mafai pefea o fai ne tatou ‵tou olaga i aso mai mua ke tokagamalie?

²¹ E se leva nei, ka fai atu ei a Iesu ki tino kolā e tavini fakaloiloi atu ki a ia: “E se iloa ne au koutou; olo keatea mai i a au, tino amio ma‵sei!” (Mataio 7:23) Tela la, ke na fakamalosi aka ne tatou a fuataga kolā e fakaaloalo atu ki te Tamana mo te Tama. Ne fai mai a Iesu: “So se tino e fakalogo ki aku muna kae fai ne ia, e fakatusa ne au ki se tino poto telā ne faite tena fale i luga i te kaupapa.” (Mataio 7:24) E tonu, kafai e fakamaoni atu me fai tatou mo soko ‵tonu o Keliso, ka talia tatou ne te Atua, kae ka tokagamalie foki ‵tou olaga i aso mai mua, e pelā eiloa me e ‵tuki ki luga i se fatu!

[Fakamatalaga fakaopoopo]

E Masaua ne Koe?

• E ‵kese pefea a soko ‵tonu o Keliso mai i soko ‵loi?

• Ke taku mai a nisi “fuaga” kolā e iloa ei a Kelisiano ‵tonu.

• I te fakamalosiakaga o fuataga faka-Kelisiano, ne a fakamoemoega e mafai o fakatoka ne koe?

[Ata i te itulau e 19]

E mata, e fakaaoga faeloa ne koe a te Tusi Tapu i tau galuega talai?

[Ata i te itulau e 21]

E mata, e iloa ne nisi tino tou tulaga i aso fakamanatu kolā e se fakavae ki te Tusi Tapu?