I TUA atu o te fatoaga o Etena, ne maua ne Atamu mo Eva a fakalavelave e uke. Ne ‵tau o ga‵lue malosi laua ke maua lā mea‵kai. I lō lakau fai fuagālakau ‵gali, ne lavea ne laua a mouku tala‵tala e uke mo lakau makai‵kai i lā tafa. Tenei eiloa te mea ne tupu i te taimi ne seki faka‵logo ei a Atamu mo Eva ki te Atua kae seki toe fai laua mo fai ne Ana taugasoa.

Kae sili atu i te masei i te mea tenā, ne kamata o ‵mate a Atamu mo Eva. Masaua, me ne fakailoa atu ne te Atua ki a laua me ka ‵mate laua māfai e ‵kai ki te fuaga mai se lakau e tasi. Ia, i te aso eiloa telā ne ‵kai ei laua ki ei, ne kamata laua o ‵mate. Ko tafaga la te va‵lea o laua ke se faka‵logo ki te Atua!

Ne fa‵nau mai a tama‵liki katoa a Atamu mo Eva i te otiga ne tuku ne te Atua olotou mātua ki tua mo te fatoaga o Etena. E fakauiga a te mea tenei me e ‵tau foki o ga‵solo aka lā tama‵liki o ma‵tua kae ‵mate.

Moi ne faka‵logo Atamu mo Eva ki a Ieova, penei e fai a te olaga e pelā me se mea fakafiafia ki a laua mo lā tama‵liki. Ne mafai ne latou katoa o ola ki te se-gata-mai i te fiafia i te lalolagi. E seai se tino e ‵tau o gasolo aka o matua, masaki kae mate.

E manako te Atua ke ola a tino ki te se-gata-mai i te fiafia, kae e folafola mai ne Ia me ka fai eiloa latou penā i se taimi mai mua. E se gata fua i te faiga o te lalolagi kātoa ke gali, kae ka ma‵losi ‵lei foki a tino katoa. Kae ko tino katoa i te lalolagi ka fai pelā me ne taugasoa ‵lei ki tino katoa penā foki loa mo te Atua.

Kae ko Eva ne seki toe fai mo fai se taugasoa o te Atua. Tela la, i te taimi ne fa‵nau mai ei ana tama‵liki, ne seki faigofie a te mea tenā ki a ia. Ne logo‵mae a ia. Ona ko tena sē fakalogo ki a Ieova ne maua ei ne tou fafine a te fanoanoa lasi, i ne?

Ne maua ne Atamu mo Eva a tamaliki tāgata mo tamaliki fāfine e tokouke. I te taimi ne fanau ei te lā tamaliki tagata muamua, ne fakaigoa ne laua a ia ki a Kaino. Ne fakaigoa te tokolua o lā tamaliki tagata ki a Apelu. Se a te mea ne tupu ki a laua? E mata, e iloa ne koe?

KILO atu nei ki a Kaino mo Apelu. Ko ma‵tua tokolua laua. Ne fai a Kaino mo fai se tino fai fatoaga. Ne ‵toki ne ia a saito mo fuagālakau mo vesiapolo.

Ne fai Apelu mo fai se tino tausi mamoe. E fiafia a ia o atafai faka‵lei ki mamoe fo‵liki. E ‵tupu aka latou ke fai pelā me ne mamoe ‵lasi. Tela la, e seki leva kae ne maua ne Apelu se aofaki lasi o mamoe ke tausi ki ei.

I te aso e tasi ne aumai ne Kaino mo Apelu se meaalofa ki te Atua. Ne aumai ne Kaino a nāi mea‵kai kolā ne ‵toki ne ia. Kae ne aumai ne Apelu te ‵toe mamoe ‵lei ne maua ne ia. Ne fiafia a Ieova ki a Apelu mo tena meaalofa. Kae ne seki fiafia a ia ki a Kaino mo tena meaalofa. E iloa ne koe me kaia?

E se fai fua penā ona ko te meaalofa a Apelu ne ‵lei atu i te meaalofa a Kaino. Ne fai penā ona ko Apelu se tagata ‵lei. E alofa a ia ki a Ieova mo tena taina. Kae ko Kaino e masei; e se alofa ki tena taina.

Tela la, ne fai atu te Atua ki a Kaino me e ‵tau mo ia o ‵fuli ana amioga. Kae ne seki fakalogo a Kaino. Ko oko eiloa i tena kaitaua me ne fiafia atu te Atua ki a Apelu. Telā ne fai atu ei a Kaino ki a Apelu, ‘Vau ke na olo atu taua ki te koga e ‵tu i ei a fatoaga.’ I konā i te taimi ne ‵nofo tokolua ei laua, ne ‵pago ne Kaino tena taina ko Apelu. Ne ‵pago malosi ne ia telā ne tamate ei ne ia. A te mea tenā se mea matagā ‵ki ke fai ne Kaino, i ne?

E tiga eiloa ne mate Apelu, koi masaua faeloa ne te Atua a ia. A Apelu se tagata ‵lei, kae e se mafai o puli i a Ieova se tino penā. Tela la, i se aso e tasi ka toe fakafoki atu ne Ieova a te ola ki a Apelu. I te taimi tenā e se toe ‵tau o mate Apelu. Ka mafai ne ia o ola i te lalolagi nei ki te se-gata-mai. Ka gali ‵ki ke fakamasani tatou mo vaegā tino pelā mo Apelu, i ne?

Kae e se fiafia te Atua ki tino pelā mo Kaino. Tela la, mai tua ifo o te tamatega ne Kaino o tena taina, ne fakasala a ia ne te Atua mai i te uga atu ke fano ki koga ‵mao mai tena kāiga. I te taimi ne fano kea‵tea ei a Kaino o ola i te suā vaega o te lalolagi, ne puke ne ia se tuagane e tokotasi o ia, kae ne fai tou fafine mo fai tena avaga.

Mai tua ifo ne kamata o maua ne Kaino mo tena avaga lā tama‵liki. Nisi tamaliki tāgata mo tamaliki fāfine a Atamu mo Eva ne a‵vaga, kae ne maua foki ne latou a tama‵liki. E seki leva kae ne tokouke a tino i te lalolagi. Ke na tauloto tatou e uiga ki nisi tino i a latou.