Tulaga o te Malo​—Ke ‵Sala Atu ki te Amiotonu o te Atua

E TĀLO atu koe ki tou tuakoi i te taimi e sasale atu ei koe. Fakamuli ifo, ne iloa ne koe me ne onoono atu faeloa a ia ki a koe mo tou kāiga. E toe tālo atu a ia kae fakatu atu tena lima ke fanatu koe. Ana muna: “E mafai o ‵sili atu ne au se fesili? Se a te mea e fai ei koutou ke tu ‵kese?” E fesili atu koe: “Se a te mea e fakauiga koe ki ei?” “Ia,” ana muna, “a koutou ne Molimau a Ieova, ne? E se fai koutou e pelā mo nisi tino. E se fai koutou e pelā mo nisi lotu​—e se fakamanatu ne koutou a aso malō‵lo, kae e se aofia foki i mea fakapolitiki mo taua. E se ‵pusi foki koutou. Kae e foliga mai me e ma‵luga ‵ki a tulaga o tou kāiga i mea tau amioga. Se a te mea e fai ei ke ‵kese koutou i auala e uke?”

E iloa ne koe me e faigofie fua te tali: E ‵nofo eiloa tatou mai lalo i te pulega a te Malo o te Atua. E pelā me ko te Tupu, e faka‵ma faeloa ne Iesu tatou. E fesoasoani mai a ia ke sa‵sale atu tatou i ana kalafaga kae ke tu ‵kese foki mai i te lalolagi masei tenei. I te vaega tenei, ka onoono tatou ki te auala e faka‵ma aka ei ne te Malo faka-Mesia a tino o te Atua i te feitu faka-te-agaga, i mea tau amioga, mo fakatokaga i te fakapotopotoga​—kolā e fai a mea katoa mō te vikiga o Ieova.