E Fia‵fia Malosi a Tino o Ieova ki te Amiotonu

1. Se a te tofotofoga ne fakafesagai atu ki ei a Iosefa, kae ne saga atu pefea a ia ki ei?

NE FAKAFESAGAI atu a te tama tagata a Iakopo ko Iosefa ki se tofotofoga faigata. “Vau ke ‵moe tāua,” ne fai atu se fafine ki a ia. A ia ko te avaga a tena matai, ko Potifala. Ne ita fitifiti a Iosefa ke talia ne ia te mea tenā. Kāti ko mafaufau se tino i aso nei, penei, ‘Kaia ne ‵teke atu ei ne Iosefa te tofotofoga tenei?’ A Potifala e galo. Kae sili atu i ei, a Iosefa se pologa i te kaukāiga tenā; e mautinoa me ka fakapuapuaga ne te fafine tenei tena olaga mo te sē talia ne ia tou fafine. Kae ne tumau eiloa a Iosefa i te ‵teke atu ki ana fakamalosiga. Kaia? Ne fai atu a ia: “E mafai pefea ne au o fai te matugā mea masei tenei ke agasala ei au i mua o te Atua?”—Kene. 39:7-12.

2. Ne iloa pefea ne Iosefa me i te mulilua se agasala ki te Atua?

² Ne iloa pefea ne Iosefa me e kilo atu tena Atua ki te mulilua e pelā me se “matugā mea masei”? A te tulafono faka-Mose telā ne aofia i ei te fakatonuga manino “E se ‵tau mo koe o mulilua,” ne fatoa tusi fua ki lalo mai tua o se lua selau tausaga. (Eso. 20:14) Faitalia te feitu tenā, ne iloa ‵lei ne Iosefa a Ieova telā ne malamalama a ia i ana lagonaga e uiga ki amioga ma‵sei. E pelā mo te iloa tonu ne Iosefa, me ne fakatoka ne Ieova te fakaipoipoga i te va o te tagata e tokotasi mo te fafine e tokotasi. Kae ne lagona foki ne ia a taimi e lua ne fesoasoani atu ei a Ieova o puipui te mātua o tena tupuna fafine ko Sala, i te taimi ne tu atu ei a ia i se tulaga fakamataku. I se auala tai ‵pau, ne puipui foki ne te Atua a te avaga a Isaako ko Lepeka. (Kene. 2:24; 12:14-20; 20:2-7; 26:6-11) E pelā eiloa mo te mafaufau faka‵lei o Iosefa ki mataupu konā, ne iloa ‵lei ne ia a te mea tonu mo te mea ‵se i te kilokiloga a te Atua. Ona ko te alofa o Iosefa ki tena Atua, ne fiafia malosi foki a ia ki tulaga amio‵tonu o Ieova, kae ne fakaiku aka ne ia ke ‵lago katoatoa atu ki ei.

3. Ne a mea ka mafau‵fau tatou ki ei i te sukesukega tenei?

³ E a, e fiafia malosi koe ki te amiotonu? E mautinoa eiloa. Kae ko tatou katoa e se ‵lei katoatoa, kae kafai e se fakaeteete tatou, e faigofie ke pokotia tatou i te kilokiloga a te Atua ki te amiotonu. (Isa. 5:20; Loma 12:2) Tela la, ka onoono tatou ki te uiga o te amiotonu mo te auala e maua ei ne tatou a mea aoga māfai e fia‵fia malosi tatou ki ei. Ka oti ko sau‵tala ei tatou ki mea e tolu e mafai o fai ne tatou ke momea aka te ‵tou fia‵fia malosi ki tulaga o Ieova.

SE A TE AMIOTONU?

4. Se a te manatu ‵se telā e maua ne tino e tokouke e uiga ki te amiotonu?

⁴ Kafai e mafau‵fau a tino ki se tino amiotonu, kāti e mafau‵fau a tino e tokouke ki se tino telā e fakamatamata, e fakamasino tino, io me e fia amiotonu. Kae e se fiafia a te Atua ki uiga katoa konā. I te taimi ne nofo ei a Iesu i te lalolagi, ne fakamasei malosi ne ia a takitaki lotu i ana aso, ona ko te fakatokaga o olotou tulaga totino e uiga ki te amiotonu. (Fai. 7:16; Luka 16:15) A te amiotonu ‵lei e se taitai o ‵pau mo te fia amiotonu.

5. E ‵tusa mo te Tusi Tapu, se a te amiotonu? Taku mai ne fakaakoakoga.

⁵ A te amiotonu se uiga gali. Ke fakamatala atu i se auala faigofie, e fakauiga ki te faiga o te mea tonu i te kilokiloga a Ieova te Atua. I te Tusi Tapu, a te pati mō te amiotonu e fakaasi mai i ei a te manatu e uiga ki te ola e ‵tusa mo tulaga ma‵luga—ko tulaga o Ieova. E pelā mo te fakatonuga a Ieova ki tino faipisinisi, e ‵tau mo latou o fakaaoga “se fua mea ‵mafa telā e sao kae tonu.” (Teu. 25:15) A te pati i te ‵gana Epelu mua telā ne ‵fuli ki te “fakamaoni” e mafai foki o ‵fuli ki te “amiotonu.” Tela la, a te Kelisiano telā e manako ke amiotonu a ia i te kilokiloga a te Atua, ka fakamaoni katoatoa a ia i ana faifaiga fakapisinisi katoa. A te tagata amiotonu e fiafia malosi foki ki te fakamasinoga tonu—e takalialia a ia ke lavea atu se tino e fai fakamasei. Kae “ke fakafiafia katoatoa atu ki a [Ieova],” a te tino telā e tonu mo tena amiotonu ka mafaufau faka‵lei ki tena kilokiloga e uiga ki ana fakaikuga.—Kol 1:10.

6. Kaia e mafai ei o maua ne tatou te loto talitonu ki tulaga o Ieova e uiga ki te mea tonu mo te mea ‵se? (Isaia 55:8, 9)

⁶ E fakaasi mai i te Tusi Tapu me i a Ieova ko te Pogai o te amiotonu. Tenā loa te pogai ne taku ei a ia ki “te koga e nofo i ei te amiotonu.” (Iele. 50:7) E pelā me ko te Mafuaga, a Ieova ko te tino e tokotasi fua telā e mafai o fakatoka faka‵lei ne ia a tulaga mō te mea tonu mo te mea ‵se. Ona ko te mea e ‵lei katoatoa a Ieova, e sili fakafia atu te ‵lei o tena kilokiloga ki te mea tonu mo te mea ‵se i lō ‵tou kilokiloga, telā e masani o fakamalosi aka ne te ‵tou tulaga sē ‵lei katoatoa mo te agasala. (Faata. 14:12; faitau te Isaia 55:8, 9.) Kae ona ko te mea ne faite tatou ki foliga o te Atua, e mafai ei ne tatou o ola e ‵tusa mo ana tulaga amio‵tonu. (Kene. 1:27) Kae e fia‵fia malosi tatou ke fai penā. E fakamalosi tatou ne te ‵tou a‵lofa ki te ‵tou Tamana ke fakaakoako ki a ia i te ‵toe mea e mafai ne tatou.—Efe. 5:1.

7. Kaia e manakogina ei ne tatou a fakatokaga o tulaga kolā e fakatalitonugina? Fakamatala mai.

⁷ E maua ne tatou a mea aoga māfai e tau‵tali atu ki tulaga o Ieova e uiga ki te mea tonu mo te mea ‵se. E mata, e lavea ne koe a te pogai? Mafaufau la māfai ko fakatoka ne pagike katoa olotou tulaga kese‵kese ki te malosi o te tupe, io me ko so se kamupane fakatūtū e fakatoka eiloa ana tulaga ki te fuaga o mea. Ka se ‵lei valevale a mea e iku mai i ei. Kae kafai e fakata‵mala a tino i te fa‵kaimasaki o tau‵tali atu ki tulaga tāua i te tausiga o tino ma‵saki, e mafai eiloa o ‵mate a nisi tino ma‵saki. E mautinoa me i fakatokaga o tulaga kolā e fakatalitonugina, e fai mo fai se puipuiga. E penā foki a tulaga o te Atua e uiga ki te mea tonu mo te mea ‵se, e puipui ei tatou.

8. Ne a fakamanuiaga ko oti ne fakatoka mō latou kolā e fia‵fia malosi ki te amiotonu?

⁸ E fakamanuia ne Ieova a latou kolā e taumafai o ola e ‵tusa mo ana tulaga. E folafola mai a ia, penei: “A tino amio‵tonu ka fai mō latou te lalolagi, kae ka ‵nofo latou i ei ki te se-gata-mai.” (Sala. 37:29) E a, e mafai o fakaataata ne koe a te fealofani, te filemu, mo te fia‵fia o tino māfai ko tau‵tali atu a tino katoa ki tulaga o Ieova? E manako a Ieova ke maua ne koe se vaegā olaga penā. E mautinoa eiloa me e maua ne tatou a pogai ‵lei ke fia‵fia malosi ki te amiotonu! E fakamalosi aka pefea ne tatou a te ‵tou fia‵fia malosi ki te uiga tenei? Ke na mafau‵fau ki mea e tolu kolā e mafai o fai ne tatou.

ATI AKA TOU ALOFA KI TULAGA O IEOVA

9. Se a te mea ka fesoasoani mai ke fia‵fia malosi tatou ki te amiotonu?

⁹ Sitepu 1: Alofa ki te tino telā ne fakatoka ne ia a tulaga konā. Ke fia‵fia malosi tatou ki te amiotonu, e ‵tau o momea aka ‵tou a‵lofa ki te tino telā ne fakatoka ne ia a tulaga e uiga ki te mea tonu mo te mea ‵se. Ko te lasi o te ‵tou a‵lofa ki a Ieova, ko te momea aka foki te fia ola o tatou e ‵tusa mo ana tulaga amio‵tonu. Ke fai se fakatusaga: Moi ne a‵lofa a Atamu mo Eva ki a Ieova, penei e se taitai o se faka‵logo lāua ki tena tulafono amiotonu.—Kene. 3:1-6, 16-19.

10. Ne momea aka pefea te iloa ‵lei ne Apelaamo a mafaufauga o Ieova?

¹⁰ E mautinoa me e se ma‵nako tatou ke fai foki te mea ‵se telā ne fai ne Atamu mo Eva. E mafai o faka‵seke tatou mo te ikuga tenā māfai e tumau tatou i te tauloto e uiga ki a Ieova, fakatāua ana uiga, kae taumafai ke malamalama i ana mafaufauga. Kafai e fai tatou penā, ka gasolo aka o malosi te ‵tou a‵lofa ki a Ieova. Mafaufau ki a Apelaamo. Ne alofa tonu a ia ki a Ieova. Ke oko foki ki taimi kolā ne faigata ke malamalama a ia i fakaikuga a Ieova, ne seki ‵teke atu a Apelaamo. I lō te fai penā, ne taumafai a ia ke momea aka te iloa ‵lei ne ia a Ieova. E pelā mo te taimi ne iloa ne ia te fakaikuga a Ieova ke fakaseai a Sotoma mo Komolo, ne manavase muamua a Apelaamo i te mea ma fakaseai atu ne “te Famasino o te lalolagi kātoa” a tino amio‵tonu fakatasi mo tino amio ma‵sei. Ne foliga atu ki a Apelaamo me ne seki ‵tau o fai penā, tela la, ne fai atu ne ia mo te loto maulalo a fesili e uke ki a Ieova. Ne tali atu eiloa a Ieova mo te kufaki ki ana fesili. I te fakaotiga loa, ne iloa ne Apelaamo me e iloilo ne Ieova a loto o tino katoa kae e se mafai o fakasala tasi ne ia a tino ‵lei mo tino ma‵sei.—Kene. 18:20-32.

11. Ne fakaasi atu pefea ne Apelaamo me ne alofa kae talitonu a ia ki a Ieova?

¹¹ Ne otia malosi a Apelaamo i te taimi ne sau‵tala ei lāua mo Ieova e uiga ki fa‵kai o Sotoma mo Komolo. E mautinoa eiloa me ne gasolo aka tena alofa mo te āva ki tena Tamana i lō aso mua. I tausaga fakamuli ifo, ne tofotofo aka a te malosi o te loto talitonu o Apelaamo ki a Ieova. Ne fai atu a Ieova ke ofo atu ne ia tena tama pele ko Isaako. Kae i te taimi nei, ko sili atu te masani ‵lei o Apelaamo mo tena Atua, tela la, ne seai ne ana fesili ne fai atu. Ne fanatu fua a Apelaamo o fai a te mea telā ne fakatonu atu ne Ieova. Kae mafaufau la ki te logo‵mae o tou tagata i te taimi ne fakatokatoka ei a ia mō te galuega tenā! Kāti ne mafaufau ‵loto a Apelaamo ki mea ne tauloto ne ia e uiga ki a Ieova. Ne iloa ne ia me ka se mafai o se amiotonu io me se alofa a Ieova. E pelā mo pati a te apositolo ko Paulo ne talitonu a Apelaamo me e mafai ne Ieova o toe fakatu aka tena tama pele ko Isaako. (Epe. 11:17-19) A te ‵tonuga loa, ko oti ne tauto atu a Ieova me ka fai a Isaako mo tamana ki se atufenua, kae i te taimi tenei e seki ai eiloa ne tama a Isaako. Ne alofa malosi a Apelaamo ki a Ieova, tela la, ne talitonu a ia me ka gasuesue tena Tamana mo te amiotonu. Ona ko te fakatuanaki, ne fakalogo a ia, faitalia te faigata ke fai penā.—Kene. 22:1-12.

12. E fakaakoako atu pefea tatou ki a Apelaamo? (Salamo 73:28)

¹² E fakaakoako pefea tatou ki a Apelaamo? E pelā mo ia, e ‵tau o tumau tatou i te tauloto ki mea e uiga ki a Ieova. Kafai e fai tatou penā, ka momea aka te ‵tou ‵pili mo te ‵tou a‵lofa ki a ia. (Faitau te Salamo 73:28.) Ka akoako a ‵tou loto lagona ke fakaata atu i ei ne tatou a mafaufauga o te Atua. (Epe. 5:14) Tela la, kafai e taumafai se tino o tofotofo tatou ke fai se mea ‵se, ka se talia ne tatou. Ka takalia‵lia tatou ki te manatu ke fai so se mea telā ka fakalogo‵mae atu ki te ‵tou Tamana, kae fakamasei ei ‵tou fesokotakiga mo ia. E mafai la pefea o fakaasi atu te ‵tou fia‵fia malosi ki te amiotonu?

13. E kausaki atu pefea tatou ki te amiotonu? (Faataoto 15:9)

¹³ Sitepu 2: Galue malosi o ati aka tou fiafia malosi ki te amiotonu i aso katoa. E mafai o ati aka ne tatou te ‵tou fia‵fia malosi ki tulaga amio‵tonu o Ieova i te auala telā e fakamalosi aka ei se taganoa—telā ko te taumafai faeloa, kae tumau i ei. Tenei eiloa te galuega e mafai ne koe o fai i aso katoa. E uiga faigofie a Ieova, kae e se fakamoemoe a ia ke fai ne tatou a mea kolā e se mafai ne tatou o fai. (Sala. 103:14) E fakatalitonu mai a ia ki a tatou me “e alofa a ia ki te tino e kausaki ki te amiotonu.” (Faitau te Faataoto 15:9.) Kafai e kausaki atu tatou ki se fakamoemoega mautinoa i te taviniga a Ieova, e tumau eiloa tatou i te taumafai ke oko atu ki ei. E penā foki loa māfai e kausaki atu tatou ki te amiotonu. Ka fesoasoani mai eiloa a Ieova mo te kufaki ki a tatou ke ga‵solo atu ki mua kae ke momea aka foki faeloa te ‵tou ‵lei.—Sala. 84:5, 7.

14. Se a “te ufi fatafata o te amiotonu,” kae kaia e manakogina ei ne tatou?

¹⁴ E fakamasaua mai faeloa a Ieova mo te alofa me i te amiotonu e sē se amoga ‵mafa. (1 Ioa. 5:3) E ‵kese mai i ei, e fai mo fai se puipuiga, se mea telā e manakogina ne tatou i aso katoa. Masaua a te gatu tau faka-te-agaga telā ne fakamatala mai ne te apositolo ko Paulo. (Efe. 6:14-18) Se a te vaega o te gatu tau telā e puipui ki ei te fatu o te sotia? Ko te “te ufi fatafata o te amiotonu,” telā e fakaata mai i ei a tulaga amio‵tonu o Ieova. E pelā mo te ufi fatafata telā e puipui ne ia te fatu o se tino, e penā foki a tulaga amio‵tonu o Ieova, e mafai o puipui ei ‵tou loto. Tela la, ke na fakamautinoa aka me e aofia i tou gatu tau a te ufi fatafata o te amiotonu!—Faata. 4:23.

15. E pei pefea koe ki te ufi fatafata o te amiotonu?

¹⁵ E pei pefea koe ki te ufi fatafata o te amiotonu? E mafai ne koe o fai penā, mai te mafaufau ki tulaga o te Atua, i filifiliga kolā e fai ne koe i aso katoa. Kafai e fakaiku aka a mea ke sau‵tala ki ei, pese ke fakalogo‵logo ki ei, fakafiafiaga ke onoono ki ei, io me ko tusi ke fai‵tau ki ei, ke fesili ifo muamua penei: ‘Se a te mea ka fagai ne au ki ei toku loto? E mata, e fetaui ‵lei a te mea tenei mo mea kolā e talia ne Ieova? Io me e fakamalosi aka i ei a amioga ma‵sei, fakasauaga, matakanokano, kaimanako—ko mea kolā e kilo atu ki ei a Ieova e pelā me ne mea sē amio‵tonu?’ (Fili. 4:8) Kafai e fetaui au fakaikuga mo te loto o Ieova, ko talia eiloa ne koe ana tulaga amio‵tonu ke puipui ei tou loto.

16-17. E fakatalitonu mai pefea ne te Isaia 48:18 me e mafai o ola tatou e ‵tusa mo tulaga o Ieova ki te se-gata-mai?

¹⁶ E mata, e manavase koe me ka tumau koe i te ola e ‵tusa mo tulaga amio‵tonu o Ieova i aso katoa io me ko tausaga katoa? Mafaufau ki se tala fakatusa ne fakaaoga ne Ieova telā e maua i te Isaia 48:18. (Faitau.) E folafola mai a Ieova me i te ‵tou amiotonu e mafai o fai “pelā mo galu o te tai.” Mafaufau me ko tu atu koe i te matafaga, kae kilokilo atu koe ki galu e ‵fati mai faeloa. I te tulaga filemu tenā, e mata, ka manavase koe me e isi se aso ka gata aka ei a te ‵fati mai o galu konā? Ikai! E iloa ne koe me ko oti ne ‵fati mai a galu i te matafaga tenā i te fia afe tausaga, kae ka tumau eiloa penā.

¹⁷ A tou amiotonu e fai eiloa e pelā mo galu o te tai! E pefea la? Kafai e fai ne koe se fakaikuga, mafaufau muamua ki te mea e manako a Ieova ke fai ne koe. Ka oti ko fai ei. Faitalia te faigata o te fakaikuga, ka fesoasoani atu faeloa a tou Tamana alofa, ke tumau faeloa koe i te ola i aso katoa e ‵tusa mo ana tulaga amio‵tonu.—Isa. 40:29-31.

18. Kaia e ‵tau o ‵kalo keatea tatou mai te fakamasinosino atu ki nisi tino e ‵tusa mo ‵tou tulaga?

¹⁸ Sitepu 3: Tuku te fakamasinoga ki a Ieova. E tiga eiloa e taumafai tatou ke ola e ‵tusa mo tulaga amio‵tonu o Ieova, e ‵tau o ‵kalo keatea tatou mai te fakamasinosino atu ki nisi tino, kae fai mo fai ne tino fia amio‵tonu. I lō te ‵kilo fatauva ki nisi tino, e pelā me e maua ne tatou a te saolotoga ke fakamasino a latou e ‵tusa mo ‵tou tulaga totino, e ‵tau o masaua ne tatou me i a Ieova ko “te Famasino o te lalolagi kātoa.” (Kene. 18:25) Ne seki tuku mai ne Ieova ki a tatou a te vaegā fakamasinoga tenā. A te ‵tonuga loa, e fakatonu mai a Iesu: “Sa fakamasino atu ko te mea ke se fakamasinogina koutou.”—Mata. 7:1.b

19. Ne fakaasi atu pefea ne Iosefa me ne talitonu a ia ki te fakamasinoga a Ieova?

¹⁹ Ke toe mafau‵fau tatou ki te fakaakoakoga a te tagata amiotonu ko Iosefa. Ne ‵kalo keatea a ia mai te fakamasino atu ki nisi tino, ke oko ki a latou kolā ne fai fakamasei ne latou a ia. Ne ta fakamasei a ia ne ana taina, ‵togi atu e pelā me se pologa, kae fai atu ki te lotou tamana me i a Iosefa ko mate. I te fia o tausaga fakamuli ifo, ne toe ‵kau fakatasi a Iosefa mo tena kāiga. I te taimi tenei, ko fai a ia mo fai se pule malosi i te fenua, ne mafai fua o fakamasino ne Iosefa ana taina i se auala masei kae taumafai o taui ma sui atu. Ne ma‵taku a taina o Iosefa i te mea ma fai ne ia te mea tenā, faitalia me ko sala‵mō tonu latou ki te lotou mea ne fai. Kae ne fakatalitonu atu a Iosefa ki a latou: “Sa ma‵taku. E a, au nei ko te Atua ke fakamasino ne au koutou?” (Kene. 37:18-20, 27, 28, 31-35; 50:15-21) Ne tuku atu eiloa ne Iosefa mo te loto maulalo a te fakamasinoga ki a Ieova.

20-21. E ‵kalo keatea pefea tatou mai te fia amiotonu?

²⁰ E pelā mo Iosefa, e tuku atu ne tatou a te faiga o te fakamasinoga ki a Ieova. E pelā mo tatou, e se ‵tau o tuku taumate ne tatou a lagonaga o ‵tou taina mo tuagane e auala i olotou faifaiga. E se iloa ne tatou a mea i loto o tino; kae “e iloilo ne Ieova ana manakoga ‵tonu.” (Faata. 16:2) E alofa a Ia ki vaegā tino katoa mai telega, tuu mo aganuu kese‵kese katoa. Kae fakamalosi mai a Ieova ki a tatou ke “‵tala [‵tou loto] ke ma‵tala ‵lei.” (2 Koli. 6:13) E taumafai tatou o fakaasi atu te alofa ki tino katoa i ‵tou kāiga faka-te-agaga kae ke se fakamasino atu ki a latou.

²¹ E fakauiga foki i ei me e se fakamasino ne tatou a tino mai tua o te fakapotopotoga. (1 Timo. 2:3, 4) E mata, ka fakamasino ne koe sou kāiga ona ko te mea e se ‵pau lua talitonuga, kae fai atu, “Ka se taitai eiloa o kau mai te tagata tenā ki te munatonu”? Ikai, a te mea tenā ko te fakamaualuga mo te fia amiotonu. Koi tuku atu eiloa ne Ieova a te avanoaga ki “tino katoa i so se koga” ke sala‵mo. (Galu. 17:30) Ke masaua faeloa me i te fia amiotonu se vaega o te sē amiotonu.

22. Kaia e fakaiku aka ei ne koe ke fiafia malosi ki te amiotonu?

²² Ke na fai eiloa te ‵tou fia‵fia malosi ki tulaga amio‵tonu o Ieova, ke fakamalosi aka ei a te fiafia mo te loto malosi o nisi tino, mai te fesoasoani atu ki a latou ke momea aka te lotou ‵pili mai ki a tatou kae penā foki ki te ‵tou Atua. Ke mo a eiloa ma fakagata te ‵tou “fia‵kai kae fiainu ki te amiotonu.” (Mata. 5:6) Ke na tali‵tonu me e lavea ne Ieova au taumafaiga katoa kae ka fiafia faeloa a ia ki tou gasolo atu ki mua i te feitu tenei. I te taimi ko oko atu ei tatou ki te ‵lotoga o faifaiga sē amio‵tonu, ke na maua ne koe se fakamafanafanaga! Ke masaua faeloa me e “alofa a Ieova ki tino amio‵tonu.”—Sala. 146:8.