Te Munatonu e Uiga ki te Malo​—Te Fakasoaatuga o Mea‵kai Faka-te-Agaga

E KILO atu eiloa koe ki te faka‵pulaga o mata o tau akoga faka-te-Tusi Tapu i taimi ko malamalama ei a ia i te uiga o te tusi faitau telā ne fatoa faitau fakatasi ne koulua. E fai malielie atu a ia: “Ko tena uiga, e akoako mai te Tusi Tapu me e mafai o ola tatou i te Palataiso ki te se-gata-mai​—i te lalolagi nei?” E fakamisikata atu tou ‵pea i te galuega talai kae fai atu, “Ia, ne a au mea ne lavea atu i te Tusi Tapu?” Ne ofo malosi te tino akoga kae lūlū tena ulu, ana muna, ‘Ko oko eiloa i toku sē talitonu me ne seki akoako mai muamua ki a au te mea tenei!” E masaua ne koe me ne fai atu foki a ia penā i nai vaiaso ko ‵teka atu i te taimi ne tauloto ei a ia mō te taimi muamua me i te igoa o te Atua ko Ieova.

Kai fetaui aka eiloa koe mo se vaegā mea penā? Ne fai eiloa penā a tino e tokouke o te Atua. E fakamasaua mai eiloa i se auala gali ‵ki ne nai mea a te meaalofa tāua telā ko oti ne tuku mai ki a tatou​—te malamalama i te munatonu! Nofo kae mafaufau aka: Ne maua pefea ne koe te meaalofa tenā? I te vaega tenei, ka iloilo aka ne tatou a te fesili tenā. A te auala telā ne maua malielie ei ne tino o te Atua a te mainaga faka-te-agaga se fakamaoniga tāua me i te Malo o te Atua se pulega tonu. Ko oti eiloa ne fakamaoni atu i te fia o senitenali me e galue malosi tena Tupu, ko Iesu Keliso i te faiga ke akoako atu te munatonu ki tino o te Atua.