MATAUPU 26

Kaia e ‵Tupu ei a Mea Ma‵sei mo Logo‵maega?

Printed Edition

A te “Kaia?” se fesili masani telā e ‵sili atu ne se tino māfai ko tupu se fakalavelave. Kae e fia‵fia eiloa tatou me e maua i te Tusi Tapu a tali ‵tonu kae manino ki te fesili tenā!

1. Ne kamata pefea ne Satani a mea ma‵sei i te lalolagi?

Ne ‵teke atu a Satani te Tiapolo ki te Atua. Ne manako a Satani ke pule atu a ia ki nisi tino, tenā ne fakamalosi ei ne ia a tino muamua ko Atamu mo Eva, ke ‵kau atu ki te ‵tekeatuga tenā. Ne fai ne Satani te mea tenei i te taimi ne pati loi ei ki a Eva. (Kenese 3:1-5) Ne fai ne ia ke mafaufau tou fafine me e isi se mea ‵lei e taofi ne Ieova mai i a ia. Ne fai atu a ia me e sili atu te fia‵fia o tino māfai e se faka‵logo latou ki te Atua. Ne fai atu ne Satani a te loi muamua ki a Eva me ka se mate tou fafine. Tenā ne taku ei ne te Tusi Tapu a Satani ki “se tino loi kae ko te tamana foki o te loi.”—Ioane 8:44.

2. Se a te mea ne filifili ne Atamu mo Eva ke fai?

Ne lasi ‵ki te kaimalie o Ieova ki a Atamu mo Eva. Ne fai atu a ia me ne mafai o ‵kai lāua ki so se lakau i te fatoaga o Etena, kae e tasi fua te lakau e tapu lāua i ei. (Kenese 2:15-17) Kae ne fakaiku aka ne lāua ke ‵kai ki te fuaga o te lakau tenā. “Ne kamata o puke ne [Eva] se fuaga kae kai ki ei.” Fakamuli ifo, “ne kamata o kai . . . ki ei” a Atamu. (Kenese 3:6) Ne seki faka‵logo katoa lāua ki te Atua. Ne ‵lei katoatoa a Atamu mo Eva, tela la, ne mafai eiloa o fai ne lāua te mea ‵lei. Kae mai te ‵teke atu mo te iloa tonu ki te Atua, ne agasala lāua kae ‵teke atu ki tena pulega. Ne fe‵paki lāua mo logo‵maega e uke ona ko te fakaikuga tenā.—Kenese 3:16-19.

3. Ne pokotia pefea tatou i te fakaikuga a Atamu mo Eva?

I te taimi ne agasala ei a Atamu mo Eva, ne maua ne lāua te tulaga sē ‵lei katoatoa, kae ne faka‵solo mai ei ne lāua a te tulaga sē ‵lei katoatoa tenā ki tino katoa ne ‵tupu mai i a lāua. Ne fai mai te Tusi Tapu e uiga ki a Atamu: “E auala i te tagata fua e tokotasi ne oko mai ei te agasala ki te lalolagi, mo te mate e auala i te agasala tenā, i te auala tenā ne maua ei ne tino katoa te mate.”—Loma 5:12.

E logo‵mae tatou ona ko pogai kese‵kese. E logo‵mae tatou i nisi taimi ona ko ‵tou fakaikuga sē ‵lei. Nisi taimi e logo‵mae tatou ona ko fakaikuga ne fai ne nisi tino. Nisi taimi e logo‵mae tatou ona ko te ‵nofo atu i se koga ‵se i te taimi ‵se.—Faitau te Failauga 9:11.

KELI MALOSI IFO

Mafaufau ki pogai e se ‵tau ei o ‵losi atu ki te Atua a mea ma‵sei mo logo‵maega i te lalolagi i aso nei mo ana lagonaga māfai ko logo‵mae tatou.

4. Te tino telā e ‵tau o ‵losi ki ei ‵tou logo‵maega

E tali‵tonu a tino e tokouke me i te Atua ko te pule o te lalolagi kātoa. E mata, e tonu te mea tenā? Pei te VITIO.

VITIO: Ko oi e Pule Tonu ki te Lalolagi? (1:24)

Faitau te Iakopo 1:13 mo te 1 Ioane 5:19, ko sau‵tala ei ki te fesili tenei:

E mata, e ‵tau o ‵losi atu ki te Atua a logo‵maega mo mea ma‵sei?

5. Mafaufau ki ikuga o te pulega a Satani

Pei te VITIO.

VITIO: Kaia ne Talia ei ne te Atua a Logo‵maega?—Se vaega i ei (3:07)

Faitau te Kenese 3:1-6, ko sau‵tala ei ki fesili konei:

Se a te loi ne fai atu ne Satani?—Onoono ki te fuaiupu 4 mo te 5.
Ne fakaasi mai pefea ne Satani me ne taofi ne Ieova se mea ‵lei mai tino?
E ‵tusa mo pati a Satani, e mata, e mafai o fia‵fia a tino māfai e fai a Ieova mo fai te lotou Pule?

Faitau te Failauga 8:9, ko sau‵tala ei ki te fesili tenei:

Ne a mea ne ‵tupu talu mai te taimi ne seki fai ei a Ieova mo Pule o te lalolagi?

Ata valevale: Ko ata e fakaasi mai ei te tulaga o te lalolagi mai te taimi ne faite ei ke oko ki te Palataiso i aso mai mua. A. Se lalolagi palataiso mo lakau lauusiusi. E. Pulega a tāgata i te fia o senitenali ne faka‵fonu ne latou te lalolagi ki lotu ‵se, mavae‵vaega, taua, kae fakalailai foki. Nisi malo ma‵losi e lavea atu i te ata ko Aikupito, Saina, Eleni, Loma, Peletania, mo Amelika. I. Tino ko ‵nofo i te lalolagi Palataiso telā ko oti ne toe fakafou aka.

Ne ‵lei katoatoa a Atamu mo Eva kae ne ola i te Palataiso. Kae ne faka‵logo lāua ki a Satani kae ‵teke ki a Ieova
Mai tua o te ‵tekeatuga tenā, ne ‵fonu te lalolagi i te agasala, logo‵maega mo te mate
Ka fakaseai ne Ieova a te agasala, logo‵maega, mo te mate. Kae ka toe ‵lei katoatoa a tino kae ola i te Palataiso

6. E saga tonu mai a Ieova ki ‵tou logo‵maega

E mata, e saga tonu mai a te Atua ki ‵tou logo‵maega? Mafaufau ki pati ne tusi ne te tupu ko Tavita mo te apositolo ko Petelu. Faitau te Salamo 31:7 mo te 1 Petelu 5:7, ko sau‵tala ei ki te fesili tenei:

E pefea ou lagonaga ke iloa atu me e lavea kae saga tonu mai a Ieova ki ‵tou logo‵maega?

7. Ka fakaseai ne te Atua a logo‵maega katoa o tino

Faitau te Isaia 65:17 mo te Fakaasiga 21:3, 4, ko sau‵tala ei ki te fesili tenei:

Kaia e fakamafanafana loto a te manatu me ka toe faka‵lei aka ne Ieova a mea ma‵sei kolā e fe‵paki mo tino?

E iloa ne koe?

I te taimi ne fai atu ei ne Satani a te loi muamua, ne fatufatu ne ia a Ieova. Ko tena uiga ne fakamasei ne ia te ata o Ieova e pelā me se Pule ‵lei kae alofa. Kafai ko fakaseai ne Ieova a logo‵maega i aso mai mua ka fakamaluga aka ei ne ia a ia eiloa. I nisi tugapati, ka fakamaoni atu ne ia me i tena pulega ko te ‵toe pulega ‵lei. A te fakamalugaga o te igoa o Ieova ko te ‵toe mataupu tāua eiloa i te iunivesi.—Mataio 6:9, 10.

MEA E FAI MAI NE NISI TINO: “A logo‵maega se vaega o te fuafuaga a te Atua mō tatou.”

Se a tau faka‵tau?

MANATU AOGA

Ko Satani te Tiapolo mo te tauavaga muamua ne māfua mai eiloa i a latou a mea ma‵sei i te lalolagi. E saga tonu mai eiloa a Ieova ki ‵tou logo‵maega, kae ko pili fua o fakaseai atu ne ia.