A te ‵toe fekau tāua i te Tusi Tapu ko te Malo o te Atua. Ka fakaaoga ne Ieova a te Malo tenā ke fakataunu ei tena fuafuaga muamua mō te lalolagi. Se a te Malo? E iloa pefea ne tatou me ko pule mai nei? Ne a mea ko oti ne fakataunu ne ia? Ne a mea ka fai ne ia i aso mai mua? Ka maua a tali ki fesili konei i te mataupu tenei mo te avā mataupu mai tua ifo.

1. Se a te Malo o te Atua, kae ko oi te Tupu i ei?

A te Malo se pulega ne fakatu aka ne Ieova te Atua. A tena Tupu, ko Iesu Keliso e pule mai i te lagi. (Mataio 4:17; Ioane 18:36) E fai mai te Tusi Tapu e uiga ki a Iesu: “Ka pule mai a ia e pelā me se tupu . . . ki te se-gata-mai.” (Luka 1:32, 33) Ka pule mai a Iesu ki tino katoa i te lalolagi e pelā me ko te Tupu i te Malo o te Atua.

2. Ko oi ka pule fakatasi mo Iesu?

Ka se pule tokotasi mai a Iesu. A tino “mai i matakāiga mo ‵gana mo tino mo fenua katoa . . . ka pule latou ki te lalolagi e pelā me ne tupu.” (Fakaasiga 5:9, 10) E tokofia a tino ka pule fakatasi mo Keliso? I te taimi ne nofo ei a Iesu i te lalolagi, e lau i miliona o Kelisiano ne fai mo fai ana soko. Kae e toko 144,000 fua a tino mai i a latou ka olo ki te lagi o pule fakatasi mo Iesu. (Faitau te Fakaasiga 14:1-4.) A nisi Kelisiano katoa i te lalolagi ka ‵nofo tumau mai lalo i te Malo tenei.​—Salamo 37:29.

3. Kaia e ‵lei atu ei a te Malo o te Atua i lō pulega a tāgata?

E tiga loa e taumafai a tino pule o fai a mea ‵lei, kae e se maua ne latou a te malosi ke fai a mea katoa e ma‵nako latou ki ei. Fakamuli ifo, ka sui latou ne nisi tino pule kolā kāti e se fia ‵saga atu ki manakoga o tino e ‵nofo mai lalo i te lotou pulega. Kae ko te Pule o te Malo o te Atua, ko Iesu, ka se mafai o sui ne se isi tino. Ko oti ne fakatu aka ne te Atua “se malo telā ka se mafai o fakaseai.” (Tanielu 2:44) Ka pule mai a Iesu ki te lalolagi kātoa kae ka se fapito a ia. A ia e alofa, e atafai, e fai mea tonu, kae ka akoako ne ia a tino ke fai foki penā ki nisi tino​—ke a‵lofa, atafai, kae fai mea ‵tonu.​—Faitau te Isaia 11:9.

4. Ka pule mai se malo malosi ki te lalolagi kātoa

E sili fakafia atu te malosi o Iesu Keliso ke pule mai i lō so se tino pule i tala mua. Faitau te Mataio 28:18, ko sau‵tala ei ki te fesili tenei:

• Kaia e ‵lei atu ei te pulega a Iesu i lō so se tino pule?

E mafuli‵fuli a malo o tāgata, kae pule atu fua latou ki se vaega foliki o te lalolagi. Kae e a te Malo o te Atua? Faitau te Tanielu 7:14, ko sau‵tala ei ki fesili konei:

• Kaia e ‵lei ei me “ka se mafai o fakaseai” atu a te Malo o te Atua?

• Kaia e ‵lei ei me ka pule mai ki te lalolagi kātoa?

5. E ‵tau o sui a pulega a tāgata

Kaia e ‵tau ei o sui ne te Malo o te Atua a malo o tāgata? Pei te VITIO, ko sau‵tala ei ki te fesili tenei.

VITIO: Se a te Malo o te Atua?​—Se vaega i ei (1:41)

• Ne a mea ne iku mai ona ko pulega a tāgata?

Faitau te Failauga 8:9, ko sau‵tala ei ki fesili konei:

• Se a tau faka‵tau, e ‵tau o sui ne te Malo o te Atua a pulega a tāgata? Kaia?

6. A tino pule i te Malo o te Atua e malamalama i a tatou

Ne ola a te ‵tou Tupu ko Iesu, e pelā me se tino, tela la, a ia e “amanaia ki ‵tou vāivāiga.” (Epelu 4:15) A te toko 144,000 tāgata mo fāfine fakamaoni kolā ka pule fakatasi mo Iesu ne filifili ne Ieova “mai i matakāiga mo ‵gana mo tino mo fenua katoa.”​—Fakaasiga 5:9.

• E mata, e fakamafanafana atu ki a koe ke iloa aka me i a Iesu mo tino kolā ka pule fakatasi mo ia e malamalama i te olaga o tatou e pelā me ne tino? Kaia?

7. E ‵lei fakafia atu a tulafono i te Malo o te Atua

E fai ne malo o tāgata a tulafono kolā e ‵tau o aoga kae puipui ei a tino o te fenua. E isi foki ne tulafono i te Malo o te Atua kolā e ‵tau o tau‵tali ki ei ana tino. Faitau te 1 Kolinito 6:9-11, ko sau‵tala ei ki fesili konei:

• Se a tau faka‵tau, ka pefea te tulaga o te lalolagi māfai a tino katoa i ei e tau‵tali ki tulafono a te Atua e uiga ki mea tau amioga?a

• Se a tau faka‵tau, e mata, se mea ‵tau ke fakamoemoe a Ieova ke tau‵tali a tino mai lalo i tena Malo ki tulafono konei? Kaia?

• Se a te mea e fakaasi mai me i tino kolā e se faka‵logo ki tulafono konei e mafai o ‵fuli?​—Onoono ki te fuaiupu 11.

MANATU AOGA

A te Malo o te Atua se pulega tonu i te lagi telā ka pule mai ki te lalolagi kātoa.

Fesili

• Ko oi a tino pule i te Malo o te Atua?

• Kaia e ‵lei atu ei a te Malo o te Atua i lō so se malo o tāgata?

• Ne a nisi mea e fakamoemoe a Ieova ke fai ne tino mai lalo i tena Malo?

NISI FAKAMATALAGA

Mafaufau ki mea ne akoako mai ne Iesu e uiga ki te koga e fakatu ei a te Malo.

“E Mata, e Nofo te Malo o te Atua i Tou Loto?” (Mataupu i te neti)

Kaia e filifili ei ne Molimau a Ieova ke fakamaoni latou ki te Malo o te Atua i lō pulega a tāgata?

Ne Tuku Katoatoa Atu ki te Malo o te Atua (1:43)

Ke sukesuke ki mea e fakamatala mai i te Tusi Tapu e uiga ki te toko 144,000 kolā ne filifili ne Ieova ke pule fakatasi mo Iesu.

“Ko oi a Tino e Olo ki te Lagi?” (Mataupu i te neti)

Se a te mea ne fakatalitonu atu ki se fafine i te falepuipui me ko te Atua fua e mafai o aumai ne ia se lalolagi ‵lei katoatoa?

“Te Auala ne Maua ei ne Au te Faka‵leiga o Faifaiga sē Fakamaoni” (Ala Mai!, Novema, 2011)

Ne kamata o pule mai te Malo o te Atua i te lagi i te tausaga ko te 1914. Tenā foki te kamataga o aso fakaoti o pulega a tāgata. E iloa pefea ne tatou? Mafaufau ki valoaga i te Tusi Tapu mo mea ‵tupu mo faifaiga a tino kolā ne lavea faka‵lei atu talu mai te 1914.

1. Ne a mea e fakaasi mai i valoaga i te Tusi Tapu?

E fakaasi mai i te tusi o Tanielu i te Tusi Tapu me i te Malo o te Atua ne kamata o pule mai i te fakaotiga o se vaitaimi e taku ko “taimi e fitu.” (Tanielu 4:16, 17) I se fia senitenali mai tua ifo, ne fakasino atu a Iesu ki te vaitaimi foki loa tenā e pelā me ko “taimi ne fuafuagina mō atufenua,” kae akoako mai ne ia me e seki palele atu a te vaitaimi tenā. (Luka 21:24) E pelā mo te mea ka onoono tatou ki ei, a taimi e fitu ne palele atu i te tausaga ko te 1914.

2. Ne a mea ‵tupu mo faifaiga a tino ne lavea faka‵lei atu talu mai te 1914?

Ne fesili atu a soko o Iesu ki a ia: “Se a foki te fakailoga o tou fakatasi mai mo te taimi o te gataga o te olaga tenei?” (Mataio 24:3) I tena tali, ne fai atu ne Iesu a mea e uke kolā ka ‵tupu māfai ko oti ne kamata o pule mai a ia i te lagi e pelā me ko te Tupu i te Malo o te Atua. E aofia i mea konei a taua, oge meakai, mo mafuie. (Faitau te Mataio 24:7.) Ne ‵valo mai foki i te Tusi Tapu me i faifaiga a tino “i aso fakaoti” ka fai pelā me ne “taimi faiga‵ta” i te olaga. (2 Timoteo 3:1-5) Ne lavea malosi atu eiloa talu mai te 1914 a mea ‵tupu i te lalolagi mo faifaiga konei a tino.

3. Kaia ne gasolo aka ei o ma‵sei atu a mea ‵tupu talu mai te taimi ne kamata ei te pulega a te Malo o te Atua?

Mai tua malie eiloa o te faiga a Iesu mo fai te Tupu i te Malo o te Atua, ne taua atu a ia i te lagi ki a Satani mo ana temoni, kae ne takavale a Satani. E fai mai te Tusi Tapu me “ne ‵pei ifo a ia ki te lalolagi, kae ne ‵pei ifo ana agelu fakatasi mo ia.” (Fakaasiga 12:9, 10, 12) Ko kaitaua malosi a Satani ona ko te iloa atu me ko pili o fakaseai a ia. Tela la, ko faka‵tupu ne ia a logo‵maega e uke i te lalolagi kātoa. E se tioa eiloa o ma‵sei ‵ki a mea ‵tupu i te lalolagi! A te Malo o te Atua ka faka‵lei ne ia a fakalavelave katoa konei.

KELI MALOSI IFO

4. E fakasino atu a valoaga i te Tusi Tapu ki te 1914

VITIO: Ne Kamata o Pule Mai te Malo o te Atua i te 1914 (5:02)

Ne fai ne te Atua ke maua ne te Tupu ko Nepukanesa i Papelonia i aso mua se moemiti fakavaloaga. A te moemiti mo tena fakamatalaga telā ne fai mai ne Tanielu e fakasino atu katoa ki te pulega a Nepukanesa mo te Malo o te Atua.​—Faitau te Tanielu 4:17.a

Faitau te Tanielu 4:20-26, ko fakaaoga ei a te tiati ke tali a fesili konei:

• (A) Se a te mea ne lavea ne Nepukanesa i tena moemiti?​—Onoono ki te fuaiupu e 20 mo te 21.

• (E) Se a te mea ka tupu ki te lakau?​—Onoono ki te fuaiupu e 23.

• (I) Se a te mea ka tupu māfai ko palele atu a “taimi e fitu”?​—Onoono ki te fuaiupu e 26.

Te Sokoga o te Moemiti e Uiga ki te Lakau mo te Malo o te Atua

TE VALOAGA (Tanielu 4:20-36)

Pulega

(A) Se lakau lasi

Ko taofi te pulega

(E) “‵Kati ki lalo te lakau,” ke oko “ki te taimi ko palele atu ei a taimi e fitu”

Ko toe faka‵soko te pulega

(I) “Ka toe maua eiloa ne koe a tou malo”

I te fakataunuga muamua o te valoaga tenei . . .

• (O) Ko oi e fakasino atu ki ei a te lakau?​—Onoono ki te fuaiupu e 22.

• (U) I te auala fea ne taofi aka ei tena pulega? ​—Faitau te Tanielu 4:29-33.

• (F) Se a te mea ne tupu ki a Nepukanesa i te taimi ne palele atu ei a “taimi e fitu”? ​—Faitau te Tanielu 4:34-36.

TE FAKATAUNUGA MUAMUA

Pulega

(O) Nepukanesa, te Tupu o Papelonia

Ko taofi te pulega

(U) Mai tua o te 606 T.L.M., ne fakavalevale a Nepukanesa kae ne seki mafai o pule a ia i tausaga ‵tonu e fitu

Ko toe faka‵soko te pulega

(F) Ko toe ‵lei te mafaufau o Nepukanesa kae ne toe kamata o pule atu

I te lua o fakataunuga o te valoaga tenei . . .

• (G) Ko oi ne fakasino atu ki ei a te lakau? ​—Faitau te 1 Nofoaiga Tupu 29:23.

• (H) I te auala fea ne taofi aka ei te lotou pulega? E iloa pefea ne tatou me koi taofi eiloa te lotou pulega i te taimi ne nofo ei a Iesu i te lalolagi?​—Faitau te Luka 21:24.

• (K) Ne faka‵soko anafea te pulega tenei kae ne pule mai i fea?

TE LUA O FAKATAUNUGA

Pulega

(G) Ko tupu o Isalaelu kolā ne sui ne latou te pulega a te Atua

Ko taofi te pulega

(H) Ko fakaseai a Ielusalema, kae ne taofi ei te laina o tupu o tino Isalaelu i tausaga e 2,520

Ko toe faka‵soko te pulega

(K) Ne kamata o pule mai a Iesu i te lagi e pelā me ko te Tupu o te Malo o te Atua

5. Ne ‵fuli te lalolagi talu mai te 1914

Pei te VITIO.

VITIO: Ne ‵Fuli te Lalolagi Talu Mai te 1914 (1:10)

Ne ‵valo mai ne Iesu a mea kolā ka lavea atu e ‵tupu i te lalolagi māfai ko fai a ia mo Tupu. Faitau te Luka 21:9-11, ko sau‵tala ei ki te fesili tenei:

• Ne a mea ‵tupu mai i mea konei ko oti ne lavea io me ne logo koe i ei?

Ne fakamatala mai ne te apositolo ko Paulo a uiga o tino i aso fakaoti o pulega a tāgata. Faitau te 2 Timoteo 3:1-5, ko sau‵tala ei ki te fesili tenei:

• E mata, e lavea ne koe a uiga penā i tino i aso nei?

6. A te pulega a te Malo o te Atua e ‵tau o fakamalosi aka ei tatou

Faitau te Mataio 24:3, 14, ko sau‵tala ei ki fesili konei:

• Se a te galuega tāua e fakaasi mai ei me ko pule mai nei a te Malo o te Atua?

• E mafai pefea o kau atu koe ki te galuega tenei?

Ko pule mai nei a te Malo o te Atua, kae ko pili mai fua a te aso telā ka pule katoatoa mai a ia ki te lalolagi. Faitau te Epelu 10:24, 25, ko sau‵tala ei ki te fesili tenei:

• Ne a mea e ‵tau o fai ne tatou taki tokotasi i te taimi e ‵kilo atu ei tatou ki te “aso tenā ko pili mai”?

MANATU AOGA

E fakamaoni mai ne valoaga i te Tusi Tapu, te fakasologa o mea ‵tupu, mo mea ‵tupu i te lalolagi me ko pule mai nei a te Malo o te Atua. E fakaasi atu te ‵tou tali‵tonu ki te mea tenei e auala i te talai atu ne tatou, mo te ‵kau atu ki fakatasiga a te fakapotopotoga.

Fesili

• Ne a mea ne ‵tupu i te taimi ne palele atu ei a taimi e fitu kolā ne ‵valo mai i te tusi o Tanielu i te Tusi Tapu?

• Se a te mea e fakatalitonu atu ki a koe me ne kamata o pule mai te Malo o te Atua i te 1914?

• E fakaasi atu pefea ne koe a tou talitonu me ko pule mai nei a te Malo?

NISI FAKAMATALAGA

Mafaufau ki pati ne fai mai ne tino tusi tala fakasolopito e uiga ki mafuli‵fuliga i te lalolagi talu mai te 1914.

“When Morals Declined Dramatically” (Awake!, April 2007)

Faitau ki te auala ne aoga ei a te valoaga i te Mataio 24:14 ki te olaga o se tagata.

“Ne Fiafia Atu Au ki te Baseball i lō so se Mea Aka!” (Te Faleleoleo Maluga Napa 3 2017)

E iloa pefea ne tatou me i te valoaga i te Tanielu mataupu e 4 e fakasino atu ki te Malo o te Atua?

“Ne Kamata Anafea o Pule Mai te Malo o te Atua? (Vaega 1)” (Te Faleleoleo Maluga, Oketopa 1, 2014)

Se a te mea e fakaasi mai ei me i “taimi e fitu” kolā e faipati ki ei te Tanielu mataupu e 4 ne palele atu i te 1914?

“Ne Kamata Anafea o Pule Mai te Malo o te Atua? (Vaega 2)” (Te Faleleoleo Maluga, Novema 1, 2014)

A te Malo o te Atua ko pule mai nei. Ko pili fua o fai ne ia a fakama‵fuliga e uke i te lalolagi. Ke mafau‵fau nei tatou ki nisi mea ‵lei e mafai o olioli koe ki ei mai lalo i te pulega a te Malo.

1. Ka toe fakafoki mai pefea ne te Malo o te Atua a te filemu mo te fai mea tonu ki te lalolagi?

A Iesu, te Tupu o te Malo o te Atua, ka fakaseai ne ia a tino amio ma‵sei mo pulega katoa i te taua i Amaketo. (Fakaasiga 16:14, 16) Tenā te taimi ka fakataunu katoatoa ei te folafolaga tenei mai te Tusi Tapu: “E se leva nei, kae ka ‵galo atu a tino amio ma‵sei.” (Salamo 37:10) E auala i te Malo, ka fai ei ne Iesu ke ‵fonu a te lalolagi kātoa i te filemu mo te fai mea tonu.​—Faitau te Isaia 11:4.

2. Ka pefea te olaga māfai ko fai te loto o te Atua i te lalolagi?

Mai lalo i te pulega a te Malo o te Atua, “a tino amio‵tonu ka fai mō latou te lalolagi, kae ka ‵nofo latou i ei ki te se-gata-mai.” (Salamo 37:29) Ke fakaataata i tou mafaufau se lalolagi telā e ‵fonu i tino amio‵tonu kae e a‵lofa a tino katoa i ei ki a Ieova mo latou foki eiloa! Ka seai se tino e masaki, kae ka ola a tino katoa ki te se-gata-mai.

3. Ne a mea ka fai ne te Malo o te Atua māfai ko oti ne fakaseai atu a tino amio ma‵sei?

Kafai ko oti ne fakaseai atu a tino amio ma‵sei, ka pule mai a Iesu e pelā me ko te Tupu i loto i se 1,000 tausaga. I te taimi tenā, ka ga‵lue fakatasi a ia mo te toko 144,000 kolā ka pule fakatasi mo ia o fesoasoani ki tino i te lalolagi ke gasolo atu ki te tulaga ‵lei katoatoa. Kafai ko palele atu te vaitaimi tenā, ka liu palataiso te lalolagi kātoa kae ‵fonu i tino fia‵fia kolā ka maua ne latou a mea aoga ona ko te lotou faka‵logo ki tulafono a Ieova. Tenā ka toe fakafoki atu ei ne Iesu a te pulega ki tena Tamana, ko Ieova. Tenei eiloa te taimi talu mai te kamataga, ka fakamaluga aka io me ka fai ei ke ‘tapu te igoa’ o Ieova. (Mataio 6:9, 10) Ka fakamaoni mai foki ei me i a Ieova se Pule ‵lei telā e saga tonu ki tino e ‵nofo mai lalo i tena pulega. Ka oti, ko fakaseai ei ne Ieova a Satani, temoni, mo so se tino telā e fakaiku aka ne ia ke ‵teke atu ki Tena pulega. (Fakaasiga 20:7-10) A tulaga ‵lei katoatoa kolā ka maua mai lalo i te Malo o te Atua ka tumau ki te se-gata-mai.

KELI MALOSI IFO

4. Ka fakaseai ne te Malo o te Atua a pulega a tāgata

“Ne pule . . . te tagata ki te suā tagata kae logo‵mae i ei.” (Failauga 8:9) E auala i tena Malo, ka faka‵lei aka ne Ieova a faifaiga sē fakamaoni konei.

Faitau te Tanielu 2:44 mo te 2 Tesalonia 1:6-8, ko sau‵tala ei ki fesili konei:

• Ne a mea ka fai ne Ieova mo tena Tama ko Iesu ki malo o tāgata mo tino e ‵lago atu ki ei?

• Mai i au mea ne tauloto e uiga ki a Ieova mo Iesu, e fakamaoni aka pefea ne koe me i te mea ka fai ne lāua se faifaiga ‵lei kae amiotonu?

5. A Iesu ko te ‵toe Tupu ‵lei

E pelā me ko te Tupu i te Malo o te Atua, e uke a mea ka fai ne Iesu mō tino kolā ka ola i te lalolagi. Pei te VITIO ke lavea ne koe me manako a Iesu o fesoasoani ki tino kae e maua ne ia te malosi mai te Atua ke fai te mea tenā.

VITIO: Ne Fakaasi Mai ne Iesu a Mea ka Fai ne te Malo (1:13)

I te taimi ne nofo ei a Iesu i te lalolagi, ne fakaasi mai ne ia se ata foliki o mea kolā ka fai ne te Malo. Ne a mea e olioli malosi koe ki ei mai fakamanuiaga konei? Faitau ki tusi fai‵tau i olotou tafa kolā e isi se lotou sokoga ki fakamanuiaga konā.

6. Ka aumai ne te Malo o te Atua se olaga gali i aso mai mua

VITIO: Se Tamā Ata o te Olaga Gali i Aso Mai Mua (4:38)

Faitau te Salamo 145:16, ko sau‵tala ei ki te fesili tenei:

• Ka pefea ou lagonaga i te iloa atu me ka “fakama‵lie ne [Ieova] a manakoga o mea ola katoa”?

MANATU AOGA

Ka fakataunu ne te Malo o te Atua a mea e manako ki ei te Atua. Ka ‵fuli ne ia te lalolagi ki se palataiso telā e ‵fonu i tino ‵lei kolā ka tapuaki atu ki a Ieova ki te se-gata-mai.

Fesili

• Ka fakamaluga aka pefea ne te Malo o te Atua a te igoa o Ieova?

• Kaia e mafai ei o tali‵tonu tatou me i te Malo o te Atua ka fakataunu ne ia a folafolaga i te Tusi Tapu?

• Ne a mea e olioli malosi koe ki ei mai i mea ka fai ne te Malo?

NISI FAKAMATALAGA

Sukesuke ke iloa ne koe te uiga o Amaketo.

“Se a te Taua o Amaketo?” (Mataupu i te neti)

Sukesuke ki mea kolā ne taku ne Iesu me ka ‵tupu i te taimi o te “fakalavelave lasi.”—Mataio 24:21

“Se a te Fakalavelave Lasi?” (Mataupu i te neti)

Onoono ki te auala e mafai ei ne kāiga o mafaufau ‵loto fakatasi ki fakamanuiaga ka maua i aso mai mua mai lalo i te Malo.

Mafaufau me ko Nofo Koe i te Palataiso (1:50)

I te tala “Ne ‵Numi Toku Mafaufau i Fesili e Uke,” ka iloa ei ne koe a te auala ne maua ne se tino ‵teke i mea fakapolitiki a faka‵leiga ne ‵sala sāle a ia ki ei.

“E ‵Fuli ne te Tusi Tapu a Olaga o Tino” (Te Faleleoleo Maluga, Ianuali 1, 2012)