Se a te Kilokiloga e ‵Tau o Maua ne Kelisiano ki Meainu Ma‵losi?

E kese‵kese a kilokiloga a tino i te lalolagi kātoa e uiga ki meainu ma‵losi. E fia‵fia a nisi tino o inu fakatasi mo taugasoa i nisi taimi. Nisi tino e fakaiku ne latou ke mo a eiloa ma inu. Kae ko nisi tino e inu loa ke oko ki te taimi ko ko‵nā ei. Se a te kilokiloga a te Tusi Tapu ki meainu ma‵losi?

1. E mata, se mea masei ke inu ki meainu ma‵losi?

E se taku fakamasei ne te Tusi Tapu a te inu ki meainu ma‵losi. E ‵kese mai i ei, i te taimi ne faipati ki mea ‵lei e uke ne tuku mai ne te Atua, e taku mai i te Tusi Tapu a “uaina kolā e fai ei te loto o te tagata ke fiafia.” (Salamo 104:14, 15) A nisi tāgata mo fāfine fakamaoni kolā e taku mai i te Tusi Tapu ne inu ki meainu ma‵losi.—1 Timoteo 5:23.

2. Ne a pati fakatonutonu e tuku mai i te Tusi Tapu mō latou kolā e filifili ke inu ki meainu ma‵losi?

E taku fakamasei ne Ieova a te inu malosi mo te konā. (Kalatia 5:21) E fai mai tena Muna: “Ke mo a ma aofia koe i a latou kolā e inu malosi ki uaina.” (Faataoto 23:20) Tela la, kafai e filifili aka tatou ke inu—ke oko foki ki taimi e inu tokotasi—e se ‵tau mo tatou o inu malosi ki te tulaga telā ko se mafai ei o mafaufau faka‵lei, pule faka‵lei atu ki ‵tou pati mo faifaiga, io me fai ei tatou ke ma‵saki. Kafai e se mafai o taofi aka ne tatou te ‵tou inu, e ‵tau o fakagata katoatoa aka te ‵tou inu ki ei.

3. E fakaasi atu pefea ne tatou a te āva ki te fakaikuga a nisi tino e uiga ki meainu ma‵losi?

E ‵tau o filifili ne tino taki tokotasi ke inu io me se inu a ia ki meainu ma‵losi. E se ‵tau o fakamasino ne tatou se tino telā ne filifili ke inu mo te faka‵tau ki meainu ma‵losi kae e se ‵tau foki o faimalo ne tatou ke inu se tino telā e se manako ki ei. (Loma 14:10) E filifili tatou ke se inu māfai e fakavāivāi atu te mea tenā ki nisi tino. (Faitau te Loma 14:21.) E se ‵sala tatou “ki [‵tou] ‵lei eiloa, kae ki te ‵lei o te suā tino.”—Faitau te 1 Kolinito 10:23, 24.

KELI MALOSI IFO

4. Ke fakaiku aka me ka inu koe io me ikai

Se a te kilokiloga a Iesu e uiga ki te inu ki meainu ma‵losi? Ke maua te tali, mafaufau ki te vavega muamua ne fai ne ia. Faitau te Ioane 2:1-11, ko sau‵tala ei ki fesili konei:

• Mai te vavega tenei, ne a ‵tou mea ne tauloto e uiga ki te kilokiloga a Iesu ki meainu ma‵losi mo tino kolā ne inu ki ei?

• Ona ko te mea ne seki taku fakamasei ne Iesu a te inu ki meainu ma‵losi, se a te kilokiloga e ‵tau o maua ne se Kelisiano māfai e filifili ne se tino ke inu a ia?

Kae e se fakauiga i ei me se mea poto ke inu faeloa se Kelisiano ki meainu ma‵losi, ona ko te mea e saoloto a ia ke fai penā. Faitau te Faataoto 22:3, ko mafaufau ei ki fakanofonofoga konei ke fai ki ei tau fakaikuga:

• Ka fakatele io me ka fakagalue ne koe se masini fai galuega.

• A koe e faitama.

• Ne fai atu se tokita ki a koe ke mo a ma inu ki meainu ma‵losi.

• E faigata ke pule faka‵lei atu koe ki tau inu.

• E se saoloto koe i te tulafono ke inu ki meainu ma‵losi.

• E ‵nofo tasi koe mo se tino telā ne filifili ne ia ke mo a ma fakaaoga a meainu ma‵losi me tenā eiloa tena vāivāiga i aso mua.

E mata, e ‵tau o fakaaoga ne koe a meainu ma‵losi i ‵kaiga o avaga io me ko nisi maopoopoga? Ke fesoasoani atu i te faiga o se fakaikuga, pei te VITIO.

VITIO: E Mata, e ‵Tau o Ofo Atu ne Au a Meainu Ma‵losi? (2:41)

Faitau te Loma 13:13 mo te 1 Kolinito 10:31, 32. Kafai ko oti ne faitau ki tusi fai‵tau konei, ke sau‵tala ki te fesili tenei:

• E fesoasoani atu pefea a te fakagalue aka o te akoakoga tenei ke fai ne koe se fakaikuga telā e fakafiafia atu ki a Ieova?

5. Ke fakaiku aka te uke o au mea ka inu

Kafai e filifili koe ke inu ki meainu ma‵losi, ke masaua te mea tenei: E tiga eiloa e se taku fakamasei ne Ieova a te fakaaogaga o meainu ma‵losi kae e taku fakamasei ne ia a te inu malosi. Kaia? Faitau te Hosea 4:11, 18, ko sau‵tala ei ki te fesili tenei:

• Ne a mea e mafai o ‵tupu māfai ko tō inu malosi se tino?

Ne a mea e mafai o fesoasoani mai ke mo a ma tō inu malosi? E ‵tau mo tatou o loto mau‵lalo kae talia ‵tou tapula. Faitau te Faataoto 11:2, ko sau‵tala ei ki te fesili tenei:

• Kaia e ‵lei ei ke fai se tapula ki te uke o au mea ka inu?

6. Ke manumalo i te fakaaoga ‵se o meainu ma‵losi

VITIO: ‘Ne ‵Fiu Au i Toku Vaegā Olaga’ (6:32)

• I te vitio, ne pokotia pefea a faifaiga a Dmitry ona ko meainu ma‵losi?

• E mata, ne mafai ne ia o ‵kati fakavave tena inu?

• Ne fakagata fakamuli pefea ne ia tena umiti ki meainu ma‵losi?

Faitau te 1 Kolinito 6:10, 11, ko sau‵tala ei ki fesili konei:

• Kaia e matagā ei a te konā?

• Se a te mea e fakaasi mai me e mafai eiloa o ‵fuli se tino telā ne fakaaoga ‵se ne ia a meainu ma‵losi?

Faitau te Mataio 5:30, ko sau‵tala ei ki te fesili tenei:

• A te ‵kati keatea o se lima, e fakatusa ki te talia o mea faiga‵ta ke fakafiafia ei a Ieova. Ne a au mea e mafai o fai māfai e faigata ke manumalo i te fakaaoga ‵se o meainu ma‵losi?a

Faitau te 1 Kolinito 15:33, ko sau‵tala ei ki te fesili tenei:

• E fakamalosi aka pefea ne ou taugasoa a te uke o au mea e inu?

MANATU AOGA

Ne tuku mai ne Ieova a meainu ma‵losi ke fakafia‵fia tatou, kae taku fakamasei ne ia a te inu malosi mo te konā.

Fesili

• Se a te kilokiloga a te Tusi Tapu ki meainu ma‵losi?

• Ne a mea fakama‵taku e mafai o ‵tupu māfai ko tō inu malosi?

• E fakaasi atu pefea ne tatou te āva ki fakaikuga e fai ne nisi tino e uiga ki te inu ki meainu ma‵losi?

NISI FAKAMATALAGA

E mafai pefea o fai ne talavou ne fakaikuga ‵lei e uiga ki meainu ma‵losi?

Mafaufau ki Ikuga Ma‵sei o te Inu (2:31)

Faitau ki mea e mafai ne koe o fai ke manumalo i te fakalavelave ko te inu.

“Te Auala ke Fakatumau ei te Kilokiloga ‵Tau ki te Kava” (Te Faleleoleo Maluga, Fepuali 1, 2010)

E mata, e ‵tau o aofia se Kelisiano i te fai atu “manuia”?

“Fesili Mai te Kau Fai‵tau” (Te Faleleoleo Maluga, Fepuali 15, 2007)

I te tala “Ne Fai Au Pelā me se Paelo e Seai Sena Takele,” faitau ki te auala ne tiaki ei ne se tagata a te inu malosi.

“E ‵Fuli ne te Tusi Tapu a Olaga o Tino” (Te Faleleoleo Maluga, Me 1, 2012)