MATAUPU 15
Ko oi a Iesu?
A Iesu se tino lauiloa e tokotasi i tala mua. E tokouke a tino e iloa fua ne latou tena igoa, kae e se uke olotou mea e iloa e uiga ki a ia, kae kese‵kese foki a manatu o tino e tokouke e uiga ki a Iesu. Ne a mea e fakaasi mai i te Tusi Tapu e uiga ki a ia?
1. Ko oi a Iesu?
A Iesu se tino faka-te-agaga malosi telā e nofo i te lagi. Ne faite a ia ne Ieova te Atua a koi tuai o faite a nisi mea katoa. Ona ko te mea tenā ne taku ei a ia ko “te uluaki o mea katoa ne faite.” (Kolose 1:15) E fakasino atu te Tusi Tapu ki a Iesu me ko te “Tama fagasele e tokotasi” a te Atua me ko Ieova tokotasi fua ne faite ne ia a Iesu. (Ioane 3:16) Ne ga‵lue fakatasi a Iesu mo tena Tamana ko Ieova mai te fesoasoani atu ki a Ia ke faite a nisi mea katoa. (Faitau te Faataoto 8:30.) Ne maua faeloa ne Iesu se fesokotakiga pili mo Ieova. Ne tavini atu a ia mo te fakamaoni e pelā me ko te tukumuna a te Atua, ko “te Muna,” telā e fakaoko mai ne ia Ana fekau mo fakatonuga.—Ioane 1:14.
2. Kaia ne vau ei a Iesu ki te lalolagi?
Kāti i se 2,000 tausaga ko ‵teka, ne fai ne Ieova se vavega kae fakaaoga ne ia tena agaga tapu ke tuku atu a te ola o Iesu mai te lagi ki loto i te moegatama o se tamafine telā e igoa ki a Malia. I te auala tenei, ne fanau mai ei a Iesu e pelā me se tino. (Faitau te Luka 1:34, 35.) Ne vau a Iesu ki te lalolagi ke fai mo fai te Mesia io me ko te Keliso telā ne folafola mai, kae ke faka‵sao foki ne ia a tino.a A valoaga katoa i te Tusi Tapu e uiga ki te Mesia ne fakataunu e auala i a ia, kae fai ei ke iloa ne tino i a Iesu ko “te Keliso, ko te Tama a te Atua ola.”—Mataio 16:16.
3. Tefea nei a Iesu?
Mai tua o tena olaga e pelā me se tino i te lalolagi, ne fakatu aka a Iesu e pelā me se tino faka-te-agaga kae toe foki atu ki te lagi. I konā “ne fakamaluga aka ei ne te Atua a ia ki se tulaga telā e maluga atu.” (Filipi 2:9) Nei la, ko maua ne Iesu se tulaga maluga ‵ki—ko te tokolua o tino maluga ki a Ieova.
KELI MALOSI IFO
Sukesuke me ko oi eiloa a Iesu kae kaia e tāua ‵ki ei ke tauloto e uiga ki a ia.
4. A Iesu e se ko te Atua Malosi Katoatoa
E tiga eiloa e akoako mai te Tusi Tapu me i a Iesu se tino faka-te-agaga malosi i te lagi, kae koi fakalogo eiloa a ia ki tena Atua mo tena Tamana, ko Ieova. Kaia e fai atu ei tatou penā? Pei te VITIO kae onoono ki mea e akoako mai i te Tusi Tapu e uiga ki te ‵kese o te tulaga o Iesu mo te Atua malosi katoatoa.
A tusi fai‵tau konei ka fesoasoani mai ke malamalama tatou i te fesokotakiga o Ieova mo Iesu. Faitau ki tusi fai‵tau takitasi, ko sau‵tala ei ki fesili konei:
Faitau te Luka 1:30-32.
Ne fakamatala mai pefea ne te agelu a te fesokotakiga o Iesu mo Ieova te Atua “Tafasili i te Maluga”?
Faitau te Mataio 3:16, 17.
I te papatisoga a Iesu, ne a pati ne fai mai ne se leo mai te lagi?
Se a tau faka‵tau, i oi a te leo tenā?
Faitau te Ioane 14:28.
Ko oi e matua kae lasi atu tena pulega? Ko te tamana io me ko te tama tagata?
Se a te mea ne fakauiga a Iesu ki ei i te faiatuga me i a Ieova ko tena Tamana?
Faitau te Ioane 12:49.
E mata, ne mafaufau a Iesu me i a lāua mo tena Tamana se tino e tokotasi? Se a tau faka‵tau?
5. Fakamaoniga me i a Iesu ko te Mesia
E maua i te Tusi Tapu a valoaga e uke kolā e fesoasoani ki tino ke iloa ne latou a te Mesia—ko te tino ne filifili ne te Atua ke faka‵sao ne ia a tino. Pei te VITIO kae onoono ki nai valoaga kolā ne fakataunu e auala i a Iesu i te vauga ki te lalolagi.
Faitau ki valoaga konei i te Tusi Tapu, ko sau‵tala ei ki fesili konei:
Faitau te Mika 5:2 ke iloa ne koe a te koga ne ‵valo mai me ka fanau i ei te Mesia.b
E mata, ne taunu te valoaga tenei i te fanauga a Iesu?—Mataio 2:1.
Faitau te Salamo 34:20 mo te Sakalia 12:10 ke iloa ne koe a mea ne ‵valo mai e uiga ki te mate o te Mesia.
E mata, ne fakataunu a valoaga konei?—Ioane 19:33-37.
Se a tau faka‵tau e mata, e isi ne mea ko leva ne fai ne Iesu ke fakataunu eiloa a valoaga konei?
Se a te mea e fakamaoni mai ne te mea tenei ki a koe e uiga ki a Iesu?
6. Mea aoga e maua ne tatou mai te tauloto e uiga ki a Iesu
E faka‵mafa mai i te Tusi Tapu a te tāua ke tauloto ne tatou a mea e uiga ki a Iesu penā foki mo tena tulaga. Faitau te Ioane 14:6 mo te 17:3, ko sau‵tala ei ki te fesili tenei:
Kaia e tāua ei ke tauloto ne tatou a mea e uiga ki a Iesu?
Ne ‵tala mai ne Iesu a te auala ke fai tatou mo taugasoa o te Atua. Ne akoako mai ne ia a te munatonu e uiga ki a Ieova, kae ko mafai foki o maua ne tatou a te ola se-gata-mai e auala i a ia
MEA E FAI MAI NE NISI TINO: “A Molimau a Ieova e se tali‵tonu ki a Iesu.”
Ka tali atu pefea koe ki ei?
MANATU AOGA
A Iesu se tino faka-te-agaga malosi. A ia ko te Tama a te Atua kae ko te Mesia foki.
Fesili
Kaia e taku ei a Iesu ki te “te uluaki o mea katoa ne faite”?
Ne a mea ne fai ne Iesu a koi tuai o vau ki te lalolagi?
E iloa pefea ne tatou me i a Iesu ko te Mesia?
NISI FAKAMATALAGA
Ke tauloto ki mea e uke atu e uiga ki te tulaga o Iesu e pelā me ko te Mesia.
“E Mata, e Fakamaoni Mai ne Valoaga e Uiga ki te Mesia me i a Iesu ko te Mesia?” (Mataupu i te neti)
Ke sukesuke aka me e mata, e akoako mai ne te Tusi Tapu i te Atua ko te tamana eiloa o Iesu e pelā mo te auala e fai ei a tino mo tamana ki tama‵liki.
“Kaia e Taku ei a Iesu me ko te Tama a te Atua?” (Mataupu i te neti)
Mafaufau ki te pogai e se fai ei a te Tolutasi mo fai se akoakoga mai te Tusi Tapu.
“E Mata, a Iesu ko te Atua?” (Te Faleleoleo Maluga, Apelila 1, 2009)
Faitau ki te auala ne ‵fuli ei a te olaga o se fafine i te otiga ne iloilo ne ia a pati i te Tusi Tapu e uiga ki a Iesu.
“Se Fafine Iutaia e Fakamatala Mai te Pogai ne Toe Iloilo Aka ne Ia Tena Lotu” (Ala Mai!, Me 2013)
a Ka fakaasi mai i te Mataupu 26 mo te 27 a pogai e manakogina ei ke faka‵sao a tino mo te auala e faka‵sao ei ne Iesu a tatou.
b Onoono ki te Fakamatalaga Fakaopoopo i te 2 e uiga ki se valoaga telā ne ‵valo mai i ei a te taimi tonu ka sae mai ei a Iesu i te lalolagi.