MATAUPU 42
Ne a Pati i te Tusi Tapu e Uiga ki te Nofo Taka mo te Avaga?
E tali‵tonu a tino i nisi fenua, me kafai e se avaga se tino, e se mafai o fiafia a ia. Kae e se ko tino a‵vaga katoa e fia‵fia, kae e se ko tino ‵nofo taka katoa foki e fanoa‵noa. A te ‵tonuga loa, e fakasino atu te Tusi Tapu ki te nofo taka mo te avaga e pelā me ne meaalofa.
1. Ne a nisi mea e aoga ei a te nofo taka?
E fai mai te Tusi Tapu: “So se tino telā e avaga e ‵lei foki, kae e sili atu te ‵lei o so se tino telā e se avaga.” (Faitau te 1 Kolinito 7:32, 33, 38.) Ne a auala e “sili atu te ‵lei” o te tino nofo taka? A Kelisiano ‵nofo taka e se manakogina ke tausi atu ki manakoga o se avaga. Tela la, e lasi atu te lotou saolotoga. E pelā mo nisi tino, e mafai o fakalauefa atu te lotou taviniga i auala e uke, e pelā mo te olo atu ki nisi fenua o talai te tala ‵lei. Kae sili atu i ei, e mafai o fakaaoga ne latou a taimi e uke ke fakapili‵pili atu ki a Ieova.
2. Kaia e aoga ei ke avaga faka‵lei i te tulafono?
A te avaga e maua i ei a mea aoga tu ‵kese, e pelā eiloa mo te nofo taka. E fai mai te Tusi Tapu me e “‵lei atu te tokolua i lō te tokotasi.” (Failauga 4:9) A te mea tenei se manatu tonu, kae maise eiloa ki Kelisiano kolā e fakagalue aka ne latou a akoakoga fakavae i te Tusi Tapu i olotou olaga avaga. A taki tauavaga kolā e avaga faka‵lei mai lalo i te tulafono, e tauto ke fakatau a‵lofa, āva, kae atafai. Ona ko te mea tenā, ko maua ne latou se lagonaga tokagamalie i lō latou kolā e ‵nofo tasi kae seki avaga faka‵lei. A te avaga e fai foki mo fai se fakavae ‵lei mō te putiakaga o se kāiga.
3. Se a te kilokiloga a Ieova ki te avaga?
I te taimi ne fai ei ne Ieova te fakaipoipoga muamua, ne fai mai a ia: “Ka tiaki ei ne te tagata tena tamana mo tena mātua kae ka ‵piki ‵mau a ia ki tena avaga.” (Kenese 2:24) E manako a Ieova ke fakatau a‵lofa te tauavaga kae ke ‵nofo fakatasi foki i te lā olaga katoa. E talia fua ne ia ke ‵tala te avaga māfai ko agasala se tokotasi o lāua i te mulilua. I te tulaga tenā, e tuku ne Ieova ki te tino telā e seki agasala a te saolotoga ke fakaiku aka me e ‵tau o ‵tala te avaga io me ikai.a (Mataio 19:9) E se talia ne Ieova ke tokouke a avaga a Kelisiano.—1 Timoteo 3:2.
KELI MALOSI IFO
Tauloto ki te auala ke maua ne koe te fiafia—kae fai a Ieova ke fiafia—faitalia me e nofo taka koe io me e avaga.
4. Fakaaoga faka‵lei te meaalofa ko te nofo taka
Ne kilo atu a Iesu ki te nofo taka e pelā me se meaalofa. (Mataio 19:11, 12) Faitau te Mataio 4:23, ko sau‵tala ei ki te fesili tenei:
Ne fakaaoga pefea ne Iesu a te meaalofa ko te nofo taka ke tavini atu ki tena Tamana kae fesoasoani atu ki nisi tino?
E mafai o fakaaoga mo te fia‵fia ne Kelisiano a te lotou ‵nofo taka e pelā mo Iesu. Pei te VITIO, ko sau‵tala ei ki te fesili tenei.
Ne a auala ‵gali e mafai o fakaaoga ei ne Kelisiano te lotou ‵nofo taka?
E iloa ne koe?
E se fakaasi mai i te Tusi Tapu a tausaga o te tino e ‵tau ei o avaga a ia. Kae e fakamalosi mai i ei ke faka‵tali te tino ki te taimi ko “‵seke a ia mo te tulaga o te talavou,” ko te taimi telā e ma‵losi ei a lagonaga fakatauavaga kae mafai ei o fai ne ia a fakaikuga sē ‵lei.—1 Kolinito 7:36.
5. Filifili faka‵lei tau avaga
A te filifiliga o tau avaga se fakaikuga tāua e tasi ka fai ne koe. Faitau te Mataio 19:4-6, 9, ko sau‵tala ei ki te fesili tenei:
Kaia e se ‵tau ei o fakaiku fakavave aka ne se Kelisiano ke avaga a ia ki se tino?
E mafai o fesoasoani atu te Tusi Tapu ke iloa ne koe a uiga kolā e ‵tau o maua i se avaga ‵lei. E sili atu i mea katoa, onoono ki se tino telā e alofa ki a Ieova.b Faitau te 1 Kolinito 7:39 mo te 2 Kolinito 6:14. Ka oti, ko sau‵tala ei ki fesili konei:
Kaia e ‵tau ei mo tatou o a‵vaga fua ki se Kelisiano?
Se a tau faka‵tau, ka pefea a lagonaga o Ieova māfai ko avaga koe ki se tino telā e se alofa ki a Ia?
Kafai e fakagalue tasi a manu e lua kolā e ‵kese, ka tigaina eiloa lāua. E penā foki a te Kelisiano telā e avaga ki se tino sē talitonu ka uke ana fakalavelave
6. Fai ke ‵pau tau kilokiloga ki te avaga e pelā mo Ieova
I Isalaelu i aso mua, ne ‵tala ne nisi tāgata olotou avaga ona ko pogai kaima‵nako. Faitau te Malaki 2:13, 14, 16, ko sau‵tala ei ki te fesili tenei:
Kaia e takalialia ei a Ieova ki se avaga ‵tala e aunoa mo se pogai ‵tau?
A te mulilua mo te ‵talaga o te avaga e mafai o fai ei ke logo‵mae malosi a te tino e seki agasala mo tama‵liki
Pei te VITIO, ko sau‵tala ei ki te fesili tenei.
Kafai e avaga koe ki se tino sē talitonu, ne a au mea e mafai o fai ke manuia tou olaga avaga?
7. Ke fakagalue a tulaga o Ieova mō te avaga
E mafai o manakogina malosi ne se tino ke fakagalue ne ia a tulaga o Ieova mō te avaga.c Kae e fakamanuia ne Ieova a latou kolā e fai penā. Pei te VITIO.
Faitau te Epelu 13:4, ko sau‵tala ei ki fesili konei:
Se a tau faka‵tau, e mata, e ‵lei a tulaga o Ieova mō te avaga? Kaia?
E manako a Ieova ke fakamau faka‵lei ne Kelisiano olotou fakaipoipoga mo te ‵talaga o olotou avaga, e ‵tusa mo te mea e manakogina ne malo i fenua e uke. Faitau te Tito 3:1, ko sau‵tala ei ki te fesili tenei:
Kafai ko oti koe ne avaga, e mata, e mautinoa i a koe me ne avaga faka‵lei koe e ‵tusa mo te tulafono a te malo?
KĀTI KA FESILI MAI SE TINO: “Kaia e avaga ei koe? E a, e se mafai fua o ‵nofo fakatasi se tokolua?”
Se a tau tali?
MANATU AOGA
A te nofo taka mo te avaga ne meaalofa mai i a Ieova. E mafai o maua te fiafia mo te lotomalie mai i ei māfai e fakagalue aka e ‵tusa mo te loto o Ieova.
Fesili
E mafai pefea o fakaaoga faka‵lei ne se tino tena tulaga nofo taka?
Kaia e fai mai ei te Tusi Tapu ke avaga fua ki se Kelisiano?
Se a te pogai faka-te-Tusi Tapu fua e tasi ke ‵tala ei te avaga?
NISI FAKAMATALAGA
Se a te mea e fakauiga ki ei a te “avaga fua i te Aliki”?
“Fesili Mai te Kau Fai‵tau” (Te Faleleoleo Maluga, Iulai 1, 2004)
Onoono ki tamā vitio e lua kolā e mafai o fesoasoani atu ke mafai ne koe o fai a fakaikuga ‵lei e uiga ki te fai famau mo te avaga.
Onoono ki te pogai ne mafaufau ei se taina me i mea ne tuku atu ne Ieova e sili atu i te tāua i lō mea ne tiaki ne ia.
Ne Fakamoemoe Au ke Tauloto Tou Fafine ki te Munatonu (1:56)
Ne a nisi mea e ‵tau o mafaufau ki ei se tino a koi tuai o ‵tala io me mavae mo tena avaga?
“Faka‵malu a ‘Lāua Kolā ko Oti ne Fakatasi ne te Atua’” (Te Faleleoleo Maluga, Tesema, 2018)
a Onoono ki te Fakamatalaga Fakaopoopo 4 e uiga ki te ‵nofo mavae māfai e seki mulilua se tino.
b I nisi fenua, e filifili ne mātua a te tino ke avaga ki te lā tama. Kafai e penā loa, e mafau‵fau muamua a mātua a‵lofa, me e mata, e alofa te tino tenā ki a Ieova io me ikai, kae e se ki tupe io me ko tena tulaga i te olaga.
c Kafai e ‵nofo fakapouliuli koe mo se tino, a te tiaki io me ko te avaga ki ei se fakaikuga totino e ‵tau o fai ne koe.