MATAUPU 44
E Mata, e Fiafia te Atua ki Aso Fakamanatu Katoa?
E manako a Ieova ke maua ne tatou se olaga gali kae ke fakafia‵fia foki i nisi taimi. Kae e mata, e fiafia a ia ki aso fakamanatu mo aso malōlō katoa? E fakaasi atu pefea ne tatou te ‵tou a‵lofa ki a Ieova i te feitu tenei?
1. Kaia e se fiafia ei a Ieova ki aso fakamanatu e uke?
Kāti ka poi koe me i aso fakamanatu e uke e se fakavae ki te Tusi Tapu io me e māfua mai i mea fapaupau. E mafai o isi se sokoga o vaegā aso fakamanatu konā ki lotu ‵se. E mafai foki o isi se lotou sokoga ki faifaiga faivailakau io me e fakavae ki te manatu me i te solu e se mafai o mate. Nisi aso fakamanatu ne māfua mai i kilokiloga ‵se io me ko te talitonu fua ki tiketi manuia. (Isaia 65:11) Ne fakailoa atu ne Ieova ki ana tino tapuaki: “‵Vae koutou kea‵tea . . . kae sa toe puke ki mea sē ‵ma.”—2 Kolinito 6:17.a
2. E pefea a lagonaga o Ieova e uiga ki aso fakamanatu kolā e tuku atu ei a te fakaaloalo sē ‵tau ki tino?
E fakailoa mai foki ne Ieova ke fakaeteete tatou i te malei ko te “talitonu fua ki tino.” (Faitau te Ielemia 17:5.) Nisi aso malō‵lo e fakaaloalo atu ei ki tino pule io me ko sotia. A nisi aso e fakamanatu ei a te fakailoga o atufenua io me ko te ‵tu tokotasi. (1 Ioane 5:21) Kae ko nisi aso fakamanatu e fakamalosi aka ei a gasuesuega fakapolitiki io me ko mea fakafenua. E pefea a lagonaga o Ieova māfai e tuku atu ne tatou a te fakaaloalo sē ‵tau ki se tino io me se fakapotopotoga, kae maise ko mea e fakamalosi aka ei a manatu kolā e ‵kese mo Tena fuafuaga?
3. Ne a faifaiga e mafai o fai ei ke se ‵lei a aso fakamanatu?
E taku fakamasei i te Tusi Tapu a “te inu malosi, fakafiafiaga fai valevale, [mo] te fakatau inu kava.” (1 Petelu 4:3) E isi ne aso fakamanatu e fai ei a faifaiga mo amioga sonafai. Ke tumau i te fai mo taugasoa o Ieova, e ‵tau o faka‵mao tatou mai i vaegā amioga sē ‵ma penā.
KELI MALOSI IFO
‵Sala ki auala e mafai o fakafiafia ne koe a Ieova mai te faiga o fakaikuga ‵poto e uiga ki aso malō‵lo mo aso fakamanatu.
4. ‵Teke ki aso fakamanatu kolā e se fakaaloalo ki a Ieova
Faitau te Efeso 5:10, ko sau‵tala ei ki fesili konei:
Se a te mea e ‵tau o fakamautinoa ne tatou a koi tuai o filifili ke fakamanatu io me ke se fakamanatu se aso malōlō?
Ne a aso malō‵lo lauiloa i te koga e nofo koe i ei?
Se a tau faka‵tau, e mata, e fiafia a Ieova ki aso malō‵lo konā?
E pelā mo aso fanau, kai mafaufau eiloa koe me ne a lagonaga o te Atua ki ei? E seai se mea e fakaasi mai i te Tusi Tapu me ne fakamanatu ne se tino tapuaki ki a Ieova tena aso fanau, kae e fakamau i ei a aso fanau e lua kolā ne fakamanatu ne tino kolā e se tapuaki ki a Ia. Faitau te Kenese 40:20-22 mo te Mataio 14:6-10. Ka oti, ko sau‵tala ei ki fesili konei:
Ne a mea e ‵pau ei a te avā aso fanau konei?
E ‵tusa mo tala konei i te Tusi Tapu, se a tau faka‵tau, e pefea a lagonaga o Ieova e uiga ki aso fanau?
Kae kāti koi mafaufau koe: ‘E mata, e tāua eiloa ki a Ieova māfai e kau io me se kau au ki se aso fanau io me se isi aso fakamanatu telā e se fakavae ki te Tusi Tapu?’ Faitau te Esoto 32:1-8. Ka oti pei te VITIO ko sau‵tala ei ki fesili konei.
Kaia e ‵tau ei o fakamautinoa ne tatou a te mea telā e ‵lei ki a Ieova?
E fai pefea ne tatou te mea tenā?
Auala ke iloa ei me e se fiafia te Atua ki se aso fakamanatu
E mata, e māfua mai i mea kolā e se fakavae ki te Tusi Tapu? Ke iloa tonu ne koe, iloilo ki tena māfuaga.
E mata, e tuku atu ei te fakaaloalo sē ‵tau ki tino, fakapotopotoga, io me ko fakailoga o atufenua? E sili atu te ‵tou fakaaloalo ki a Ieova kae tali‵tonu tatou me ko ia fua ka faka‵lei ne ia a fakalavelave i te lalolagi.
E mata, e ‵teke atu a faifaiga masani i ei ki tulaga o te Tusi Tapu? E ‵tau o tumau tatou i te ‵ma i mea tau amioga.
5. Fesoasoani atu ki nisi tino ke āva ki ou talitonuga
E mafai o faigata ke ‵teke ki fakamalosiga mai nisi tino ke kau atu ki fakamanatuga kolā e se fiafia ki ei a Ieova. Ke fakamatala atu au fakaikuga i te kufaki mo te atamai. Onoono ki te auala ke fai ei te mea tenei, pei te VITIO.
Faitau te Mataio 7:12, ko sau‵tala ei ki fesili konei:
E ‵tusa mo te fuaiupu tenei, e mata, e ‵tau o fakailoa atu ne koe ki ou kāiga sē tali‵tonu me e se ‵tau o fakamanatu ne latou se aso malōlō?
Ne a au mea e mafai o fai ke fakamaoni atu ki ou kāiga me kafai foki loa e se ‵kau fakatasi koutou i se aso fakamanatu, e alofa kae fakatāua eiloa ne koe latou?
6. E manako a Ieova ke fia‵fia tatou
E manako a Ieova ke fia‵fia fakatasi tatou mo ‵tou kāiga mo taugasoa. Faitau te Failauga 8:15, ko sau‵tala ei ki te fesili tenei:
Se a te mea e fakaasi mai i te fuaiupu tenei me e manako a Ieova ke fia‵fia tatou?
E manako a Ieova ko ana tino ke fia‵fia kae ‵kau fakatasi. Pei te VITIO ke lavea ne tatou a te fakamaoniga o te mea tenei i ‵tou fono i atufenua.
Faitau te Kalatia 6:10, ko sau‵tala ei ki fesili konei:
E mata, e ‵tau o fakamanatu ne tatou a aso malō‵lo lauiloa ke fai ei “a mea ‵lei” ki nisi tino?
Se a te mea ka fai ei ke fiafia koe—ko te faimalo ke tuku atu i se aso malōlō io me ko te tuku atu mo te loto fiafia i so se taimi?
E fakatoka ne Molimau e tokouke a maopoopoga fakapito mō olotou tama‵liki kae tuku fakapoi atu a meaalofa. Kafai e isi ne au tama‵liki, ne a nisi mea fakapito e mafai ne koe o fai mō latou?
MEA E FAI MAI NE NISI TINO: “E se tāua malosi a te māfuaga o se aso malōlō. A te mea sili ko te ‵kau fakatasi mo kāiga mo taugasoa.”
Ne a au pati ka fai atu?
MANATU AOGA
E manako a Ieova ko tatou ke fia‵fia fakatasi mo kāiga mo taugasoa. Kae e manako foki a ia ke ‵kalo keatea tatou mai i aso fakamanatu kolā e se fiafia a ia ki ei.
Fesili
Ne a fesili e mafai o ‵sili ne tatou ke iloa aka me e fiafia io me se fiafia a Ieova ki se aso fakamanatu?
E fesoasoani atu pefea tatou ki ‵tou kāiga mo taugasoa ke malamalama i ‵tou fakaikuga ne fai e uiga ki aso malō‵lo?
E iloa pefea ne koe me e manako a Ieova ke fia‵fia tatou?
NISI FAKAMATALAGA
Mafaufau ki nisi aso malō‵lo kolā e se fakamanatu ne Kelisiano.
“Kaia e se Fakamanatu ei ne Molimau a Ieova a Nisi Aso Malō‵lo?” (Mataupu i te neti)
Faitau ki pogai e fa e tali‵tonu ei matou me e se fiafia te Atua ki aso fanau.
“Kaia e se Fakamanatu ei ne Molimau a Ieova a Aso Fanau?” (Mataupu i te neti)
Onoono ki te auala e mafai o fakafiafia ne tamaliki fo‵liki kolā e a‵lofa ki a Ieova a ia i taimi o aso malō‵lo.
Ko oti ne fakaiku aka ne te fia miliona o Kelisiano ke se fakamanatu te Kilisimasi. E pefea olotou lagonaga ki te lotou fakaikuga?
“Ne Maua ne Latou se Mea Tai ‵Lei Atu” (Te Faleleoleo Maluga, Tesema 1, 2012)
a Onoono ki te Fakamatalaga Fakaopoopo 5 ke iloa ne koe a mea e ‵tau o fai māfai ko fakamanatu ne tino se aso malōlō.