MATAUPU 56
Fakatumau te Fealofani i te Fakapotopotoga
Kafai e ‵kau fakatasi tatou mo taina tali‵tonu, e maua ne tatou a lagonaga o te Tupu ko Tavita: “Ko oko eiloa i te ‵lei kae gali mō taina ke ‵nofo fakatasi i te fealofani!” (Salamo 133:1) A te ‵tou fealofani e sē se mea ne tupu fakafuasei. E maua ne tatou katoa a te tiute ke fakatumau te fealofani.
1. Se a te mea e tu ‵kese ei a tino o te Atua?
Kafai e kau atu koe ki se fakatasiga a se fakapotopotoga i se isi fenua, kāti ka se malamalama koe i te ‵gana, kae ka se mafai eiloa o mā io me fakaalofa koe i auala e uke. Kaia? Me e ‵pau a tusi e fakaaoga ne tatou ke suke‵suke ki te Tusi Tapu i koga katoa. Kae taumafai malosi tatou ke fakatau fakaasi atu te alofa. Faitalia te koga e ‵nofo tatou i ei, a tatou katoa e “ka‵laga ki te igoa o Ieova, ke ‵kau fakatasi i te tapuaki atu ki a ia.”—Sefanaia 3:9, fml.
2. Ne a au mea e mafai o fai ke fakamalosi aka te fealofani?
“Ke fakatau a‵lofa malosi la koutou i a koutou eiloa i otou loto.” (1 Petelu 1:22) E fakagalue aka pefea ne koe a pati fakatonutonu konei? I lō te saga atu ki vāivāiga o nisi tino, ke onoono ki olotou uiga ‵lei. I lō te ‵kau fakatasi fua mo tino kolā e ‵pau a mea e fia‵fia koutou ki ei, taumafai ke fakamasani ki taina mo tuagane kolā e ‵kese mai i a koe. E mafai foki o ga‵lue malosi tatou ke tapale keatea so se uiga fakailoga tino i a tatou.—Faitau te 1 Petelu 2:17.a
3. Ne a au mea ka fai māfai e isi se mea e kinau ei koe mo se taina Kelisiano?
E fealofani tatou, kae e se ‵lei katoatoa foki. I nisi taimi e fakatau fakafanoanoa io me fakalogo‵mae ne tatou a nisi tino. Tela la, e fai mai te Muna a te Atua ki a tatou “ke fakatau . . . fakamagalo atu [faeloa] te suā tino ki te suā tino,” kae ne toe fai mai: “E pelā eiloa mo te fakamagaloga o koutou ne Ieova, e ‵tau foki mo koutou o fai penā.” (Faitau te Kolose 3:13.) Ne fakalogo‵mae ne tatou a Ieova i taimi e uke, kae ne fakamagalo ne ia tatou. Tela la, e fakamoemoe a ia ke fakamagalo ne tatou a ‵tou taina. Kafai e iloa ne koe me ne fakalogo‵mae ne koe se tino, ke gasue muamua o faka‵lei te fakalavelave.—Faitau te Mataio 5:23, 24.b
KELI MALOSI IFO
Mafaufau ki auala e mafai o fesoasoani atu koe ki te faiga ke fealofani kae filemu te fakapotopotoga.
Ne a au mea ka fai ke tausi te filemu?
4. ‵Teke atu ki te fakailoga tino
E ma‵nako tatou ke a‵lofa ki ‵tou taina katoa. Kae kāti ka faigata ki a tatou ke talia se tino telā e ‵kese mai i a tatou. Ne a mea e mafai o fesoasoani mai? Faitau te Galuega 10:34, 35, ko sau‵tala ei ki fesili konei:
E talia ne Ieova a tino valevale ke fai mo ana Molimau. E ‵tau o pokotia pefea i ei tau kilokiloga ki tino kolā e ‵kese mai i a koe?
Ne a uiga fakailoga tino masani i te koga e nofo koe i ei, kae e manako koe o ‵teke atu ki ei?
Faitau te 2 Kolinito 6:11-13, ko sau‵tala ei ki te fesili tenei:
Se a tau faka‵tau, e mafai pefea o fakapilipili atu koe ki taina mo tuagane kolā e ‵kese mai i a koe?
5. Ke loto fakamagalo faeloa kae tausi te filemu
E fakamagalo faeloa ne Ieova a tatou, faitalia me e se manakogina ke fakamagalo ne tatou a ia. Faitau te Salamo 86:5, ko sau‵tala ei ki fesili konei:
E pefea te lasi o te loto fakamagalo o Ieova?
Kaia e loto fakafetai ei koe ki tena loto fakamagalo?
Ne a tulaga e mafai o faigata ei ke maua se va filemu mo nisi tino?
E mafai pefea o fakaakoako tatou ki a Ieova kae tumau te fealofani mo taina mo tuagane? Faitau te Faataoto 19:11, ko sau‵tala ei ki te fesili tenei:
Kafai e fakafanoanoa io me fai ne se tino ke kaitaua koe, ne a au mea e mafai o fai ke fakafeoloolo aka ei te tulaga tenā?
I nisi taimi e fai ne tatou ke kaitaua a nisi tino. Kafai ko tupu te mea tenā, ne a ‵tou mea e ‵tau o fai? Pei te VITIO, ko sau‵tala ei ki te fesili tenei.
I te vitio, ne a mea ne fai ne te tuagane ke tausi te filemu?
6. Kilo ki mea ‵lei i ou taina mo tuagane
Kafai ko gasolo o masani ‵lei tatou mo taina mo tuagane, ka iloa foki ei ne tatou olotou uiga ‵lei mo olotou vāivāiga. E mafai pefea o ‵saga tonu atu tatou ki olotou uiga ‵lei? Pei te VITIO, ko sau‵tala ei ki te fesili tenei.
Ne a mea e mafai o fesoasoani atu ki a koe ke lavea ne koe a uiga ‵gali ou taina mo tuagane?
E saga tonu mai a Ieova ki ‵tou uiga ‵lei. Faitau te 2 Nofoaiga Tupu 16:9a, ko sau‵tala ei ki te fesili tenei:
Ne a ou lagonaga ke iloa atu me e saga tonu mai a Ieova ki ou uiga ‵lei?
Ke oko ki se taemani gali, e isi eiloa ne ana pona, kae koi tāua eiloa. E penā foki a ‵tou taina mo tuagane, e se ‵lei katoatoa, kae e tāua latou ki a Ieova
MEA E FAI MAI NE NISI TINO: “A koi tuai o fakamagalo ne au se tino, e ‵tau mo ia o fakatoese mai muamua.”
Kaia e ‵tau o loto fia‵fia tatou ke fakamagalo a nisi tino?
MANATU AOGA
E mafai o fesoasoani atu koe ki te fakatumau o te fealofani i te fakapotopotoga mai te loto fakamagalo mo te alofa ki ou taina mo tuagane katoa.
Fesili
E ‵teke atu pefea koe ki te fakailoga tino?
Ne a au mea ka fai māfai e kinau koe mo se taina Kelisiano?
Kaia e fia fakaakoako ei koe ki a Ieova i te fakamagalo atu o nisi tino?
NISI FAKAMATALAGA
Tauloto ki te auala e fesoasoani mai ei se tala fakatusa a Iesu ke ‵kalo keatea tatou mai te fakamasino tino.
E mata, e ‵tau o fakatoese atu māfai e mafau‵fau tatou me e seai se ‵tou mea ‵se ne fai?
“Te Fakatoese Atu—Ko te Auala e Maua ei te Va Fealofani” (Te Faleleoleo Maluga, Novema 1, 2002)
Onoono ki te auala ne tauloto ei a nisi tino ke fakaasi atu te sē fakailoga tino.
Faitau ki auala e mafai o faka‵lei aka tou va sē ‵lei mo nisi tino a koi tuai o fakamasei te filemu o te fakapotopotoga.
“Ke Fakatoka a Va sē ‵Lei i te Agaga o te Alofa” (Te Faleleoleo Maluga, Me 2016)
a Fakamatalaga Fakaopoopo 6 e fakaasi mai i ei a te auala e fakamalosi aka ne te alofa a Kelisiano ke ‵kalo keatea mai te faka‵pisi atu o masaki.
b Fakamatalaga Fakaopoopo 7 e faipati mai i ei ki te auala ke faka‵lei aka a fakalavelave i mea fakapisinisi mo mea tau te tulafono.