E se Mafai o Tuku Tiaki ne Ieova Ana Tino Fakamaoni

“E se mafai foki o tuku tiaki ne [Ieova] ona tino fakamaoni. E puipui faeloa ne ia a latou.”​​—SALAMO 37:28.

1, 2. (a) Ne a mea ne ‵tupu i te sefulu o senitenali T.L.M. telā ne tofotofo aka i ei te fakamaoni o tavini a te Atua? (e) Ne a tulaga e tolu ne tausi ei ne Ieova ana tino fakamaoni?

KO OKO nei ki te sefulu o senitenali T.L.M. kae e ‵tau o fai ne tavini a Ieova se fakaikuga. A te tukuatuga ki matakāiga o Isalaelu ki mātū, kolā ne seki mafai o fa‵ki te lotou kaitaua, a te saolotoga ke tu tokotasi, ne fakagata amate atu ei te kamataga o se tamā taua. Ne gasue fakavave te lotou tupu fou, ko Ielopoamo, o fakamalosi aka tena pulega mai te fakatūga o te lotu fou a te Fenua. Ne faimālō a ia ke faka‵logo katoatoa atu a tino mai lalo i tena pulega. Ne a mea ka fai ne tavini fakamaoni a Ieova? E mata, ka tumau latou i te fakamaoni ki te Atua telā e tapuaki latou ki ei? E lau i afe e fai penā, kae e tausi ne Ieova latou ona ko te lotou tumau i te fakamaoni.​​—1 Tupu 12:​1-​33; 2 Nofoaiga Tupu 11:​13, 14.

² Ko tofotofogina foki a te fakamaoni o tavini a te Atua i ‵tou aso nei. “Ke toka kae matapula‵pula foki koutou,” ko pati i te Tusi Tapu. “Me i te otou fili, telā ko te Tiapolo, e fanofano tele e pelā mo se leona fekai, e salasala ki te tino ke kai ne ia.” E mata, e mafai o “‵mautakitaki [tatou] i te . . . fakatuanaki kae ‵teke atu a ia”? (1 Petelu 5:​8, 9) Ke iloilo aka ne tatou a nisi mea kolā ne ‵tupu i te taimi ne fakasopo ei a te tupu ko Ielopoamo i te 997 T.L.M., kae ke onoono aka me ne a mea e mafai o tauloto ne tatou mai i ei. I taimi faiga‵ta konā, ne ‵nofo puapuagā eiloa a tavini fakamaoni a Ieova. Ne tuku faka‵sau atu foki latou ki fakamalosiga ma‵sei mai te kau aposetate, i te taimi ne fai ei ne latou olotou tofiga faiga‵ta. I tulaga kese‵kese konei, ne seki tuku tiaki eiloa ne Ieova ana tino fakamaoni i te taimi tenā, kae ka se fai foki eiloa penā i aso nei.​​—Salamo 37:28.

I te Taimi ko Fakapuapuagatia ei

3. Kaia ne seki puapuagā ei a tino mai lalo i te pulega a te tupu ko Tavita?

³ Ke iloilo aka muamua ne tatou a fakanofonofoga i te vaitaimi ne fai ei a Ielopoamo mo tupu. E fai mai te Faataoto 29:2: “A tino . . . e se fia‵fia manafai e pule a tino amio ma‵sei.” Ne fia‵fia eiloa a tino Isalaelu i aso mua mai lalo i te pulega a te tupu ko Tavita. A Tavita se tino sē ‵lei katoatoa, kae ne alofa fakamaoni eiloa a ia ki te Atua kae talitonu katoatoa foki ki a ia. Ne seki puapuagā a tino mai lalo i te pulega a Tavita. Ne fai ne Ieova se feagaiga mo Tavita, i ana pati: “A tou gafa ka ola faeloa, ka ko tou malo ka fai ne au ke tumau ki te se gata mai. A te fakasologa o tupu ka tumau eiloa i tou gafa.”​​—2 Samuelu 7:​16.

4. Se a te mea telā ne fakalagolago ki ei te mauaga o fakamanuiaga i te taimi o te pulega a Solomona?

⁴ Muamua la, ne gali kae manuia eiloa te pulega a te tama a Tavita ko Solomona telā ne fetaui eiloa ke fakaata faka‵lei mai i ei a te Pulega a Keliso Iesu i te Afe Tausaga i aso mai mua. (Salamo 72:​1, 17) E seai eiloa se pogai ke ‵teke atu, se matakāiga mai i matakāiga e 12 o Isalaelu i aso konā, ki te tupu. Kae e isi eiloa se mea ne fakalagolago ki ei a fakamanuiaga kolā ne maua ne Solomona mo ana tino. Ne fai atu Ieova ki a Solomona: “Kafai e fakalogo koe ki aku tulafono mo fakatonuga, kae ka fai ne au mo koe a te mea ne tauto ei au ki tou tamana ko Tavita. Ka ‵nofo fakatasi au mo oku tino i loto i te Faletapu tenei e faite ne koe, kae ka se toe tiakina eiloa ne au a latou.”​​—1 Tupu 6:​11-​13.

5, 6. Ne a mea ne iku mai i te sē fakamaoni o Solomona ki te Atua?

⁵ I te taimi ko matua ei, ne seki fakamaoni a Solomona ki a Ieova kae ne kamata o aofia i tapuakiga ‵se. (1 Tupu 11:​4-6) Fakamuli ifo, ne seki fakalogo a Solomona ki tulafono a Ieova kae ne gasolo eiloa o uiga fakasauā. Ne tupu eiloa te mea tenei ke oko ki te tulaga telā ne fāmeo valevale a tino, mai tua o tena matega, e uiga ki a ia ki tena tama mo tena sui ko Leopoamo, kae ne fakamolemole atu ke maua ne latou se fakatapūga. (1 Tupu 12:4) Ne saga atu pefea Ieova ki te sē fakamaoni o Solomona?

⁶ E fai mai te Tusi Tapu ki a tatou: “A te Aliki te Atua o Isalaelu ne fakaasi fakalua mai ki a Solomona o fakatonu ki ei . . . ka ko Solomona ne seki fia fakalogo eiloa . . . Tela la, ko kaitaua ei te Aliki ki a Solomona.” Ne fai atu Ieova ki a Solomona: “Au e tauto me ka ave keatea ne au te malo mai i a koe o tuku atu ki te ofisa e tokotasi mai au ofisa, me i a koe ko ofa ne koe te feagaiga . . . kae ko se tausi foki ne koe aku fakatonuga.”​​—1 Tupu 11:​9-​11.

7. E tiga eiloa ne seki toe taliagina a Solomona, ne tausi pefea ne Ieova Ana tino fakamaoni?

⁷ Tenā ne uga ei ne Ieova te pelofeta ko Aita ke faū ne ia te tino telā ka faka‵sao ne ia a tino mai te pulega a Solomona. A te tino tenā ko Ielopoamo, se tagata taulia telā ne galue i te malo o Solomona. E tiga eiloa ne tumau a Ieova i te fakamaoni ki te feagaiga o te Malo telā ne fai mo Tavita, ne talia ne Ia ke vaelua a matakāiga e 12. Ka tuku atu a matakāiga e sefulu ki a Ielopoamo; kae tumau eiloa te suā avā matakāiga mai lalo i te kāiga o Tavita, telā ko sui nei ne te tupu ko Leopoamo. (1 Tupu 11:​29-​37; 12:​16, 17, 21) Ne fai atu Ieova ki a Ielopoamo: “Kafai e fakalogo mai koe ki a au kae tausi ki aku tulafono mo fakatonuga e pelā mo taku tavini ko Tavita, kae ka fakatasi atu faeloa au ki a koe. Ka fai ne au a koe mo tupu o Isalaelu, kae fai foki a tino o tou gafa ke fai foki mo tupu i ou tua, e pelā mo te mea ne fai ne au mō Tavita.” (1 Tupu 11:38) Ne fesoasoani eiloa Ieova ki ana tino kae fakatoka ne ia se auala ke maua ne latou se fakatapūga mai puapuagā.

8. Ne a tofotofoga e puapuagā ei a tino o te Atua i aso nei?

⁸ Ko ‵fonu eiloa ‵tou aso nei i te puapuagā mo te fai mea sē tonu. “Ka ko tino kolā e ‵nofo i se tulaga malalo, e ‵nofo puapuagā i te pulega a tino ma‵luga,” ko pati i te Failauga 8:9. Ona ko pisinisi kaima‵nako mo pulega sē fakamaoni e mafai o iku atu ei ki se tulaga faigata i mea tau tupe. E tuku mai sāle ne takitaki o te malo, pisinisi, mo lotu se fakaakoakoga masei i mea tau amioga. Tela la, e pelā mo Lota telā e amiotonu, a tino fakamaoni o te Atua i aso nei e fanoa‵noa malosi ona ko “amioga fina lalolagi o tino ofa tulafono.” (2 Petelu 2:7) E se gata i ei, i te ‵tou kausaki atu ke ola e ‵tusa mo tulaga o te Atua e aunoa mo te fakalavelave atu ki nisi tino, e masani o ‵saga malosi mai a takitaki pule fakamata‵mata o fakasauā tatou.​​—2 Timoteo 3:​1-5, 12.

9. (a) Ne a mea ko oti ne fai ne Ieova ke faka‵sao ei ana tino? (e) Kaia e mafai ei o tali‵tonu tatou me ka fakamaoni faeloa Iesu ki te Atua?

⁹ E mafai eiloa o tali‵tonu tatou ki te munatonu tāua tenei: E se mafai o tuku tiaki ne Ieova ana tino fakamaoni! Ke mafaufau ki fakatokaga ko oti ne fai ne ia ke sui ei a takitaki sē fakamaoni o te lalolagi nei. Ko oti ne fakatu aka te Malo faka-Mesia a te Atua mai lalo i te takitakiga a Keliso Iesu. Toeitiiti kae kātoa te selau tausaga ne pule mai ei a Iesu Keliso i te lagi. Kae ko pili fua o fakaoko mai ne ia te fakatapūga katoatoa ki tino kolā e ma‵taku ki te igoa o te Atua. (Faitau te Fakaasiga 11:​15-​18.) Ko oti ne fakamautinoa aka ne Iesu tena fakamaoni ki te Atua ke oko ki te mate. Ka se mafai o fakafanoanoa ne ia a tino e pule atu a ia ki ei, e pelā mo te mea ne fai ne Solomona.​​—Epelu 7:​26; 1 Petelu 2:6.

10. (a) E mafai pefea o fakaasi atu me e fakatāua ne tatou te Malo o te Atua? (e) Kafai ko tofotofogina tatou, se a te mea e ‵tau o tali‵tonu tatou ki ei?

¹⁰ A te Malo o te Atua se pulega tonu telā ka fakagata aka i ei a puapuagā katoa. E ‵tau o faka‵logo katoatoa tatou ki a Ieova te Atua mo tena fakatokaga. Mai te tali‵tonu katoatoa ki te Malo, e ‵teke atu tatou ki te tulaga sē amioatua o te lalolagi kae kausaki atu mo te loto finafinau ki te faiga o galuega ‵lei. (Tito 2:​12-​14) E taumafai tatou ke mo a ma lai‵lai i faifaiga o te lalolagi tenei. (2 Petelu 3:​14) E tiga eiloa a tofotofoga e fe‵paki mo tatou, e mafai eiloa o tali‵tonu tatou me ka puipui ne Ieova tatou i te feitu faka-te-agaga. (Faitau te Salamo 97:10.) E se gata i ei, e fakamautinoa mai te Salamo 116:15 ki a tatou, penei: “Ko oko eiloa i te ‵mafa ki te Aliki, manafai ko mate se tino tokotasi telā e talitonu ki a ia.” Ona ko te tāua ki a Ieova ana tavini e se talia ne ia ke fakaseai atu latou e pelā me se potukau.

Te Taimi ko Tuku Faka‵sau Atu ei ki Fakamalosiga Aposetate

11. Ne seki fakamaoni pefea a Ielopoamo?

¹¹ Ne mafai eiloa o maua ne tino o te Atua se fakatapūga i te taimi o te pulega a te tupu ko Ielopoamo. Kae i lō te fai penā, ne tofotofogina ei te lotou fakamaoni ki te Atua ne ana faifaiga. Ona ko tena sē lotomalie ki te tauliaga ne tuku atu ki a ia, ne kamata o ‵sala atu a Ielopoamo ki auala ke faka‵mautakitaki aka ei tena tulaga. Ne fakasakosako mai a ia, “Kafai e olo atu omotou tino o ofo olotou taulaga ki te Aliki i te Faletapu i Ielusalema, e iku o toe ma‵fuli atu olotou loto o ‵kau ki te Tupu ko Leopoamo o Iuta, ko tamate ei ne latou a au.” Tela la, ne fakatu aka ne Ielopoamo se lotu fou telā e tapuaki atu ei ki pulumakau aulo e lua. “Ne tuku ne ia te pulumakau aulo e tasi i Peteli, ka ko te suā pulumakau i Tanu. Tena la, ko agasala valevale a tino me ko olo o tapuaki i Peteli pelā foki i Tanu. Ne faite foki ne Ielopoamo a koga tapuaki i ulu o koga malugaluga, kae fili ne ia a faitaulaga mai kāiga e se tau te lotou gafa ki te matakāiga o Levi.” Ne fakamoe foki eiloa ne Ielopoamo a te aso ke “fakamanatu ei te ‵kaiga fiafia telā ne fakatu ne ia mō tino Isalaelu,” kae ne “ofo tena taulaga i luga i te fatafaitaulaga.”​​—1 Tupu 12:​26-​33.

12. Ne a mea ne fai ne tino fakamaoni o te Atua i te malo ki mātū i te taimi ne fakatu aka ne Ielopoamo a te tapuakiga ki pulumakau i Isalaelu?

¹² Ne a mea ka fai nei ne tino fakamaoni o te Atua i te malo ki mātū? E pelā mo olotou tupuga fakamaoni, ne gasue‵sue fakavave a te kau Levi kolā ne ‵nofo i fa‵kai ne tuku atu ki a latou i te malo ki mātū. (Esoto 32:​26-​28; Numela 35:​6-8; Teutelonome 33:​8, 9) Ne tiaki ne latou olotou mea katoa, ne olo mo olotou kāiga ki Iuta i te feitu ki saute, te koga telā e mafai o saoloto latou ke tumau i te tapuaki atu ki a Ieova. (2 Nofoaiga Tupu 11:​13, 14) Ne filifili aka ne nisi tino Isalaelu kolā ne seki ‵nofo tumau i Iuta ke na ‵nofo tumau eiloa latou i ei. (2 Nofoaiga Tupu 10:17) Ne fai ne Ieova ke matala faeloa te auala ki te tapuakiga tonu ko te mea ke mafai ne tupulaga fakamuli ifo mai te malo ki mātū o se toe tapuaki ki pulumakau kae ke toe foki ki Iuta.​​—2 Nofoaiga Tupu 15:​9-​15.

13. I aso nei, ne tofotofo aka pefea a tino o te Atua ne fakamalosiga a aposetate?

¹³ E fakamatakutaku atu eiloa a fakamalosiga a aposetate ki tino o te Atua i aso nei. Ko oti ne taumafai a nisi takitaki o fakatu aka te lotu a te Fenua kae faimālō atu ki tino ke ‵kau ki ei. E fai mai a takitaki lotu o lotu Kelisiano ‵Se pelā foki mo nisi tino fakamata‵mata me i a latou ko faitaulaga kolā ne ‵valo mai i te Tusi Tapu. Kae e mafai fua o maua ne tatou i Kelisiano ‵tonu a tinā tino kolā ne fakaekegina, kae fakasino atu ki ei e pelā me ko “faitaulaga a te Tupu.”​​—1 Petelu 2:9; Fakaasiga 14:​1-5.

14. E ‵tau o ‵saga atu pefea tatou ki manatu o aposetate?

¹⁴ E pelā mo te kau Levi fakamaoni i te sefulu o senitenali T.L.M., e se fakaloiloigina a tino fakamaoni o te Atua i aso nei ne manatu o aposetate. E ‵teke fakavave atu a te kau fakaekegina mo olotou taugasoa Kelisiano ki manatu o aposetate. (Faitau te Loma 16:17.) E tiga eiloa e fia‵fia tatou o faka‵logo ki tulafono a takitaki pule kae sē ‵kau atu ki se feitu i kinauga a te lalolagi, e fakamaoni fua tatou ki te Malo o te Atua. (Ioane 18:36; Loma 13:​1-8) E ‵teke atu tatou ki manatu ‵se o tino kolā e fai mai me tapuaki latou ki te Atua kae sē āva ki a ia i olotou faifaiga.​​—Tito 1:16.

15. Kaia e ‵tau ei o fakamaoni tatou ki “te tavini fakamaoni kae poto”?

¹⁵ Ke mafaufau foki ki te fakatokaga ne fai ne Ieova ke mafai o olo keatea i se auala fakatusa a tino loto ‵lei mai te lalolagi masei tenei, kae ke ulu atu ki loto i te palataiso faka-te-agaga telā ko oti ne fakatoka ne ia. (2 Kolinito 12:​1-4) Ona ko te lasi o te ‵tou loto fakafetai, e fakapili‵pili atu faeloa tatou ki ‘te tavini fakamaoni kae poto telā ko oti ne fili ne tona pule ke pule i isi tavini, kae fakasoa atu foki ne ia olotou meakai i te taimi tonu.’ Ko oti ne fakasopo ne Keliso a te tavini tenei “ke pule i ana mea katoa.” (Mataio 24:​45-​47) Tela la, kafai e se maina faka‵lei se tino i a tatou i se fakatokaga a te tavini tenei, e se ‵tau o fai i ei ke ‵teke atu ki a latou io me ke toe ‵foki atu ki te lalolagi a Satani. I lō te fai penā, ka fakamalosi aka tatou ne te fakamaoni ke fakatalitali mo te loto maulalo ki a Ieova ke fakamaina mai ne ia a mea konā.

I te Faiga o ‵Tou Tofiga Mai te Atua

16. Se a te tofiga ne maua ne se pelofeta mai i Iuta?

¹⁶ Ne taku fakamasei ne Ieova a faifaiga aposetate a Ielopoamo. Ne tofi ne ia se pelofeta mai Iuta ke fano ki Peteli i te feitu ki mātū ke lavea ne ia a Ielopoamo e ofo atu ana taulaga i tena fatafaitaulaga. E ‵tau o fakaoko atu ne te pelofeta se fekau ‵mafa o te fakamasinoga ki a Ielopoamo. E mautinoa eiloa me se tofiga faigata tenei.​​—1 Tupu 13:​1-3.

17. Ne puipui pefea ne Ieova tena avefekau?

¹⁷ Ne kaitaua malosi a Ielopoamo i te lagonaga ne ia a te fakamasinoga a Ieova. Ne tusi atu tena lima ki te sui o te Atua kae pakalaga atu ki tāgata e ‵tu pili mai: “Puke mai te tagata tenā.” Kae i te taimi eiloa tenā, mai mua o gasue se tino, “ko te lima eiloa o te tupu ko se maua o fakagasue me ko ‵pili. I konā eiloa, ko te fatafaitaulaga eiloa ko maofa, mo te lefu i ei ko matofa atu ki te laukele.” Ne faimālō atu ei ki a Ielopoamo ke fakamolemole ki te pelofeta ke ‵talo ki a Ieova ke toe faka‵lei aka tena lima. Ne fai eiloa ne te pelofeta te mea tenā, kae ne ‵lei ei tena lima. Tela la, ne puipui eiloa ne Ieova tena avefekau mai fakalavelave.​​—1 Tupu 13:​4-6.

18. E puipui pefea ne Ieova tatou i te taimi e tavini atu ei tatou ki a ia e aunoa mo te ma‵taku?

¹⁸ I te taimi e talai atu ei ne tatou mo te fakamaoni a te Malo mo te faiga o soko, e fetaui tatou i nisi taimi mo tino sē fia‵fia, io me kaitaua. (Mataio 24:14; 28:​19, 20) Kae e se ‵tau lele eiloa o talia ne tatou a te mataku ki ‵tekemaiga ke fakavāivāi ei ‵tou loto finafinau mō te galuega talai. E pelā mo te pelofeta telā e seki taku mai tena igoa i aso o Ielopoamo, e maua ne tatou te tauliaga ke “tavini atu ki a [Ieova] mo te sē ma‵taku” kae fakamaoni foki.a (Luka 1:​74, 75) E tiga eiloa e se fakamoe‵moe tatou ke ‵tupu ne vavega i aso nei, e puipui kae fesoasoani mai eiloa a Ieova ki a tatou e pelā me ne ana Molimau e auala i tena agaga tapu mo ana agelu. (Faitau te Ioane 14:​15-​17; Fakaasiga 14:6.) E se mafai lele eiloa o tuku tiaki ne te Atua a tino kolā e tumau i te fai‵pati atu tena muna e aunoa mo te ma‵taku.​​—Filipi 1:​14, 28.

Ka Puipui ne Ieova Ana Tino Fakamaoni

19, 20. (a) Kaia e mafai ei o tali‵tonu tatou me e se mafai o tuku tiaki ne Ieova tatou? (e) Ne a fesili ka sau‵tala ki ei i te suā mataupu?

¹⁹ A Ieova ko te ‵tou Atua fakamaoni. (Fakaasiga 15:4; 16:5) E fakamaoni io me “amiotonu i ana mea katoa e fai.” (Salamo 145:17) Kae e fakamautinoa mai te Tusi Tapu ki a tatou, penei: “Kae tausi ne ia a tino kolā e tavini fakamaoni ki a ia.” (Faataoto 2:8) Kafai ko fe‵paki a tino fakamaoni o te Atua mo tofotofoga io me ko manatu o aposetate io me maua se tofiga faigata, e mafai eiloa o tali‵tonu katoatoa latou ki te puipuiga mo te fesoasoani o Ieova.

²⁰ Tenei te mea telā e ‵tau o mafau‵fau nei tatou ki ei: Se a te mea ka fesoasoani mai ki a au ke fakatumau ei toku fakamaoni ki a Ieova faitalia a tofotofoga io me ko fakaosoosoga kolā e fe‵paki mo au? I nisi tugāpati, e mafai pefea o fakamalosi aka ne au toku fakamaoni ki te Atua?

[Fakamatalaga mai lalo]

Ka Tali Mai Pefea ne Koe?

• Ne fakaasi mai pefea ne Ieova me e se tuku tiaki ne ia ana tino fakamaoni māfai ko fe‵paki mo puapuagā?

• E ‵tau o ‵saga atu pefea ki aposetate mo olotou manatu?

• E puipui pefea ne Ieova ana tino fakamaoni i te taimi e fai ei ne latou te galuega faka-Kelisiano?

[Fakamatalaga o te Ata i te itulau e 11]

MALO KI MĀTŪ (Ielopoamo)

Tanu

SEKEMA

Peteli

MALO KI SAUTE (Leopoamo)

IELUSALEMA

[Fakamatalaga o te Ata i te itulau e 9]

E isi se mea ne fakalagolago ki ei a fakamanuiaga kolā ne maua ne Solomona mo ana tino

[Fakamatalaga o te Ata i te itulau e 11]

Ne seki tuku tiaki ne Ieova ana tino fakamaoni i te taimi ne fakatu aka ei ne Ielopoamo te tapuakiga ki pulumakau