Ke Tumau i te Fakamaoni mo te Loto Kātoa

“Ka fakalogo au ki ei mo te fakamaoni; akoako mai ke tavini atu au ki a koe mo te loto katoatoa.”​​—SALAMO 86:11.

1, 2. (a) E ‵tusa mo te Salamo 86:​2, 11, se a te mea ka fesoasoani mai ki a tatou ke tumau i te fakamaoni ki a Ieova māfai ko fe‵paki mo tofotofoga mo fakaosoosoga? (e) Ko te taimi fea e ‵tau ei o ati aka ne tatou te loto fakamaoni tonu?

KAIA e tosina atu ei ki te fia maumea a nisi Kelisiano kolā ne tumau i te fakamaoni i se fia tausaga faitalia te lotou ‵pei ki falepuipui io me ne fe‵paki mo fakasauāga? E faka‵na eiloa te tali ki mea i ‵tou loto. E lavea atu i te Salamo 86 a te sokoga i te fakamaoni mo te loto katoatoa telā e seai se fakalotolotolua i ei. Ne ‵talo atu te faisalamo ko Tavita: “Fakasao mai au mai te mate, i a au foki e fakamaoni ki a koe; fakasao mai au, i a au ko tau tavini telā e talitonu ki a koe.” Ne ‵talo atu foki Tavita: “Te Aliki, akoako mai ki a au a mea e ‵tau mo au o fai, ka fakalogo au ki ei mo te fakamaoni; akoako mai ke tavini atu au ki a koe mo te loto katoatoa.”​​—Salamo 86:​2, 11.

² E mafai o fakavāivāi mai a nisi fakalavelave pelā foki mo ‵tou fesokotakiga mo nisi tino ki ‵tou fakamaoni ki te Atua tonu, seiloga ke tali‵tonu tatou ki a Ieova mo ‵tou loto kātoa. E fai a manakoga faka-te-foitino e pelā me ne paula kolā ne tanu i te laukele telā e sa‵sale tatou i ei. E tiga eiloa ne tumau tatou i te fakamaoni ki a Ieova mai lalo i tofotofoga faiga‵ta, e mafai eiloa o tosina atu tatou ki togafiti io me ko matāsele a Satani. Ko pefea la te tāua ke ati aka ne tatou te loto fakamaoni tonu ki a Ieova i te taimi nei, koi tuai o fe‵paki tatou mo tofotofoga mo fakaosoosoga! E fai mai te Tusi Tapu: “Kae sili i mea katoa ke puipui tou loto.” (Faataoto 4:​23, Tusi Paia, Samoa) E isi ne akoakoga tāua e mafai o tauloto ne tatou e uiga ki te mea tenei mai te mea ne tupu ki se pelofeta Iuta telā ne uga ne Ieova ki te tupu o Isalaelu ko Ielopoamo.

‘Ka Avatu ne au te Taui’

3. Ne saga atu pefea a Ielopoamo ki te fekau o te fakamasinoga ne fakaoko atu ne te pelofeta a te Atua?

³ Ke fakaataata i tou mafaufau a te mea tenei. Ne fatoā oti ne fai atu ne te tagata o te Atua te fekau o te fakamasinoga ki te tupu ko Ielopoamo, telā ne fakatu aka ne ia te tapuakiga ki pulumakau i matakāiga e sefulu i te feitu ki mātū o Isalaelu. Ko oko eiloa i te kaitaua te tupu. Ko fakatonu atu a ia ki ana tāgata ke puke te avefekau tenā. Kae ko Ieova e fakatasi atu eiloa ki tena tavini. I te taimi eiloa tenā, ne seki mafai o fakagasue te lima o te tupu telā ne tusi atu i tena kaitaua me ko ‵pili, kae mavaelua foki ei te fatafaitaulaga telā ne fakaaogā mō tapuakiga ‵se. I konā foki eiloa ne ma‵fuli a faifaiga a Ielopoamo. Ne fai atu a ia ki te tagata o te Atua: “Fakamolemole ‵talo atu ki te Aliki tou Atua ke faka‵lei aka toku lima!” Ne ‵talo atu te pelofeta, kae ne ‵lei ei te lima o te tupu.​​—1 Tupu 13:​1-6.

4. (a) Kaia ne fai te ‵kamiga a te tupu e pelā me se tofotofoga ki te fakamaoni o te pelofeta? (e) Se a te tali a te pelofeta?

⁴ Tenā ne fai atu ei a Ielopoamo ki te tagata o te Atua tonu: “Vau ke olo taua o ‵kai i toku fale. Ka taui atu ne au a te mea ‵lei a koe tenā ne fai.” (1 Tupu 13:7) Ne a mea e ‵tau o fai nei ne te pelofeta? E mata, e ‵tau o talia ne ia te uiga talimālō o te tupu mai tua o te fakaokoatuga ne ia o te fekau o te fakamasinoga ki a ia? (Salamo 119:113) Io me e ‵tau o ‵teke atu a ia ki te ‵kamiga tenā, faitalia me foliga mai me ko salamo tonu a te tupu? E maumea eiloa a Ielopoamo kae e mafai ne ia o tuku atu fua a meaalofa ki ana taugasoa. Kafai ne isi eiloa se manakoga fia maumea o te pelofeta a te Atua, kāti ne fai eiloa te ‵kamiga a te tupu tenā e pelā me se fakaosoosoga lasi ‵ki ki a ia. Kae ko oti ne fai atu ne Ieova te fakatonuga ki te pelofeta: “Ke mo a . . . e kai io me inu i so se mea, kae ke foki atu foki . . . i se auala fakaatea.” Tela la, ne tali atu ei te pelofeta mo te mautinoa, penei: “E ui eiloa e aumai ne koe a te āfa o tou maumea, ka ko au e se fanatu lele eiloa i a koe, e se manako foki eiloa au o kai io me inu fakatasi mo koe.” Ne tiakina ei ne te pelofeta a Peteli kae fanatu i se isi auala. (1 Tupu 13:​8-​10) Se a te akoakoga e uiga ki te fakamaoni mo te loto kātoa e maua ne tatou mai te fakaikuga ne fai ne te pelofeta?​​—Loma 15:4.

“Ko Lava Eiloa Tatou i ei”

5. E fai pefea te fia maumea e pelā me se tofotofoga o te fakamaoni?

⁵ Kāti e foliga mai me e seai se fakalavelave i te fia maumea ki te fakamaoni o te tino, kae e isi eiloa. E mata, e tali‵tonu tatou ki te folafolaga a Ieova me e tuku mai ne ia a mea kolā e ‵tau o maua ne tatou? (Mataio 6:​33; Epelu 13:5) I lō te kausaki malosi atu ki nisi “mea ‵gali” o te olaga, e mata, e mafai o ola tatou e aunoa mo mea konā? (Faitau te Filipi 4:​11-​13.) E mata, e tofotofogina tatou ke se talia a tauliaga i te fakapotopotoga a te Atua ko te mea ke maua a mea kolā e ma‵nako nei tatou ki ei? E mata, e fakamuamua ne tatou te tavini atu mo te fakamaoni ki a Ieova i ‵tou olaga? E fakalagolago eiloa a tali ki fesili konei ki te katoatoa io me ko te sē katoatoa o ‵tou loto i te taviniga ki te Atua. Ne tusi mai te apositolo ko Paulo: “A te lotu e fai ne ia ke maumea te tino, manafai e loto malie eiloa a ia ki ana mea e i ona lima. Se a ‵tou mea e aumai ki te lalolagi? E seai! Se a te mea e mafai ne tatou o ‵kave keatea mai te lalolagi? E seai! Tela la, kafai e maua ne o‵tou meakai mo gatu, ko lava eiloa tatou i ei.”​​—1 Timoteo 6:​6-8.

6. Ne a “taui” e mafai o maua ne tatou, kae se a te mea ka fesoasoani mai ke fakaiku aka me e mata, e ‵tau o talia ne tatou io me ikai a mea konā?

⁶ E pelā me se fakaakoakoga, kāti e ofo mai ne tou pule se tulaga tai maluga atu telā e ‵lei atu tena ‵togi kae uke foki tauliaga e maua mai i ei. Io me kāti e lavea ne tatou me e mafai o ‵lei atu tatou i mea tau tupe māfai e ga‵lue tatou i nisi fenua. Muamua la, kāti e foliga mai me i vaegā avanoaga penā ne fakamanuiaga mai i a Ieova. Kae koi tuai o gasue‵sue tatou e ‵tusa mo mea konā, e mata, e se ‵tau o iloilo ifo ne tatou ‵tou lagonaga ‵tonu e uiga ki ei? Tenei te mea muamua e ‵tau o manava‵se tatou ki ei, “Ka pokotia pefea toku fesokotakiga mo Ieova ona ko taku fakaikuga?”

7. Kaia e tāua ei ke tapale keatea a manakoga fia maumea mai ‵tou loto?

⁷ E fakamalosi aka eiloa i te olaga tenei a Satani a te fia maumea. (Faitau te 1 Ioane 2:​15, 16.) A te mea telā e kausaki ki ei te Tiapolo ko te faiga ke fakamasei ‵tou loto. Tela la, e ‵tau o matapula‵pula tatou ke iloa kae ke tapale keatea foki ne tatou so se manakoga fia maumea i loto i ‵tou loto. (Fakaasiga 3:​15-​17) Ne faigofie fua ki a Iesu ke ‵teke tonu atu ki te ofoatuga ne Satani a malo katoa o te lalolagi ki a ia. (Mataio 4:​8-​10) Ne fai atu a ia: “Ke matapula‵pula koutou, kae fakaeteete i te matakanokano, me i te olaga tonu o te tino e se fakavae i luga i te uke o ana mea!” (Luka 12:15) E fesoasoani mai a te fakamaoni ke fakalago‵lago tatou ki a Ieova i lō tatou eiloa.

Ne “Fakaloiloi” a Ia ne se Pelofeta Toeaina

8. Ne tofotofo aka pefea te fakamaoni o te pelofeta a te Atua?

⁸ E seai eiloa ne mea ne mafai o ‵tupu moi ne fano ‵tonu eiloa te pelofeta a te Atua i tena auala ki te fale. Toeitiiti ko te taimi foki eiloa tenā kae toe fepaki a ia mo te suā tofotofoga. “E isi se pelofeta toeaina e nofo i Peteli,” ko pati i te Tusi Tapu, kae “ne o‵mai ana tama tāgata o fai ki ei” a mea katoa kolā ne ‵tupu i te aso tenā. I te logoga i te tala tenā, ne fakamolemole atu te toeaina ke fakatoka se asini mo ona fano ke fetaui a ia mo te pelofeta a te Atua. E se leva, kae maua ne ia te pelofeta e manava mai lalo i se lakau lasi kae fai atu: “Vau ke olo taua o ‵kai i toku fale.” I te taimi ne seki talia ei ne te tagata o te Atua a te ‵kamiga tenā, ne tali atu te toeaina: “Au nei, se pelofeta foki penā mo koe. A te agelu ne vau ki a au o fai mai i te Aliki ne fakatonu mai ki a ia ke fai mai ki a au ke vau au ki a koe ke olo taua ki toku fale.” Kae ne fai mai te Tusi Tapu: “A te pelofeta toeaina tenā e fakaloiloi fua.”​​—1 Tupu 13:​11-​18.

9. Ne a pati a te Tusi Tapu e uiga ki tino fakaloiloi tino, kae ko oi e fakalogo‵mae ne latou?

⁹ Faitalia me ne a lagonaga o te pelofeta toeaina, ne loi eiloa a ia. E se taumate, kāti ne fai te toeaina tenā e pelā me se pelofeta fakamaoni a Ieova i aso mua. Kae i te taimi tenei, ne taumafai a ia o fakaloiloi se tino. E taku fakamasei eiloa ne te Tusi Tapu a vaegā faifaiga penā. (Faitau te Faataoto 3:​32.) A tino fakaloiloi tino penā e se fakalogo‵mae fua ne latou a latou eiloa, kae penā foki eiloa mo nisi tino.

“Ne Fanatu Eiloa” i te Toeaina

10. Ne saga atu pefea te pelofeta a te Atua ki te ‵kamiga a te toeaina, kae se a te mea ne iku mai i ei?

¹⁰ Ne ‵tau o lavea ne te pelofeta mai Iuta a te togafiti a te pelofeta toeaina. Ne ‵tau o fesili ifo a ia ki a ia eiloa, ‘Kaia e uga ei ne Ieova se agelu ki se isi tino ke fakaoko mai a fakatonuga ‵fou mō oku?’ Ne mafai fua o fakamolemole atu te pelofeta ki a Ieova ke fakamautinoa mai a mea e ‵tau o fai ne ia, kae e seai ne pati i te Tusi Tapu e fakaasi mai ei me ne fai ne ia te mea tenā. I lō te fai penā, “ne fanatu eiloa te pelofeta mai Iuta i te pelofeta toeaina ki tena fale, o ‵kai mo ia.” Ne fanoanoa eiloa a Ieova. I te taimi ne toe fanatu ei te pelofeta telā ne fakaloiloigina i tena auala ki Iuta, ne maua atu kae tamate foki a ia ne se leona. Ma‵faga o ikuga fakafanoanoa ki tena tofiga fakapelofeta!​​—1 Tupu 13:​19-​25.a

11. Se a te fakaakoakoga ‵lei ne tuku mai ne Aita?

¹¹ I te suā feitu, ne tumau eiloa i te fakamaoni ki a Ieova a te pelofeta ko Aita, telā ne uga ke faū ne ia a Ielopoamo ke fai mo tupu, ke oko ki te taimi ko toeaina ei. I te taimi ko matua ‵ki ei a Aita kae ko ‵kivi foki, ne uga ne Ielopoamo tena avaga ke fesili atu ki a ia e uiga ki te lā tamaliki tagata telā e masaki. Ne fai atu ne Aita mo te loto toa me ka mate te tamaliki tagata a Ielopoamo. (1 Tupu 14:​1-​18) E aofia i fakamanuiaga e uke ne maua ne Aita ko te tauliaga ke fesoasoani a ia ki te tusiga o te Muna fakaosofia a te Atua. E pefea la? Ne fakaaogā fakamuli ne te faitaulaga ko Esela ana tusitusiga ke fakavae ki ei tena tusi.​​—2 Nofoaiga Tupu 9:29.

12-14. (a) Se a te akoakoga e mafai o tauloto ne tatou mai te fakalavelave ne aofia i ei te pelofeta foliki? (e) Fakamatala mai te tāua o te mafaufau faka‵lei fakatasi mo te faiga o ‵talo ki fakatakitakiga a toeaina kolā e fakavae ki te Tusi Tapu.

¹² E se fai mai i te Tusi Tapu a te pogai ne seki fesokotaki muamua atu ei te pelofeta foliki ki a Ieova a koi tuai o fulitua atu a ia o ‵kai kae inu fakatasi mo te toeaina. E mata, e fai penā ona ko te mea ne fai atu ne te toeaina a pati kolā e fia fakalogologo fua a ia ki ei? Se a te akoakoga e tuku mai i ei mō tatou? E ‵tau o tali‵tonu katoatoa tatou ki te ‵tonu o tulafono a Ieova. Kae e ‵tau o fia‵fia tatou o faka‵logo ki ei faitalia so se fakalavelave e fe‵paki mo tatou.

¹³ E talia ne nisi tino a mea fua kolā e fia fakalogo‵logo latou ki ei māfai ko tuku atu ne pati fakatonutonu ki a latou. E pelā me se fakaakoakoga, e mafai o ofo atu ki se tino talai se galuega ‵togi telā e fai ei ke se uke ana taimi mo tena kāiga e pelā foki mo fakatokaga a te fakapotopotoga. E mafai o fakamolemole atu a ia ki se toeaina mō ne fakatakitakiga. Kāti e fakailoa atu muamua ne te toeaina me e se i ō ia te tiute ke fai atu ki te taina a te auala ke tausi atu ei ki tena kāiga i mea tau tupe. Kae oti e mafai ne te toeaina o sautala faka‵lei mo te taina e uiga ki fakalavelave kolā e mafai o pokotia ei a ia i te feitu faka-te-agaga māfai ko talia ne ia te galuega ‵togi tenā. E mata, ka masaua fua ne te taina a pati kolā ne fai atu ne te toeaina i te kamataga, io me e mata, ka mafaufau ‵loto a ia ki ana pati kolā ne fai fakamuli ifo? E manino eiloa me e ‵tau o fakaiku aka ne te taina a te ‵toe mea ‵lei mō ia i te feitu faka-te-agaga.

¹⁴ Ke mafaufau ki te suā fakaakoakoga. E mafai o fakamolemole atu se tuagane ki se toeaina me e mata, se mea ‵lei ke mavae laua mo tena avaga, telā se tino sē talitonu. E mautinoa eiloa me ka fai atu ne te toeaina me i te fakaikuga ke mavae io me ikai e ‵tau eiloa o fai ne tou fafine. Kae kāti ka sau‵tala fakamuli laua ki fakatakitakiga mai te Tusi Tapu e uiga ki te mea tenā. (1 Kolinito 7:​10-​16) E mata, ka mafaufau ‵loto a te tuagane ki pati a te toeaina? Io me ko oti eiloa ne fakaiku aka ne ia ke tiakina tena avaga? I te faiga o tena fakaikuga, se mea ‵lei eiloa ke mafaufau faka‵lei a ia fakatasi mo te faiga o ‵talo ki fakatakitakiga mai te Tusi Tapu.

Ke Loto Maulalo

15. Ne a mea e tauloto ne tatou mai te mea ‵se a te pelofeta a te Atua?

¹⁵ Ne a foki nisi mea e mafai o tauloto ne tatou mai i te mea ‵se ne fai ne te pelofeta mai Iuta? E fai mai te Faataoto 3:5: “Talitonu ki te Aliki mo tou loto kātoa. Sa fakalagolago lele eiloa ki tou iloa.” I lō tena tumau i te fakalagolago ki a Ieova e pelā mo taimi mua, ne talitonu eiloa a te pelofeta mai i Iuta ki tena iloa. Ne iku atu ei tena mea ‵se ne fai ki tena mate kae galo atu foki i ei mo tena igoa ‵lei i mua o te Atua. E fakaasi faka‵lei mai i tena tala a te tāua ke tavini atu ki a Ieova i te loto maulalo mo te fakamaoni!

16, 17. Ne a mea ka fesoasoani mai ke tumau tatou i te fakamaoni ki a Ieova?

¹⁶ A manakoga ma‵sei i ‵tou loto e mafai o takitaki‵segina ei tatou. ‘A te loto, ko te ‵toe mea tafasili foki eiloa i te faka‵se tino.’ (Ielemia 17:9) Ko te mea ke tumau i te fakamaoni ki a Ieova, e ‵tau o tumau tatou i te ga‵lue malosi ke tapale kea‵tea a uiga mua o tatou kolā e maua i ei te fakamatamata mo te fakalagolago ki a tatou eiloa. Kae e ‵tau o ‵pei tatou ki te uiga fou, “telā ne faite i foliga o te Atua i te amiotonu mo te ‵malu.”​​—Faitau te Efeso 4:​22-​24.

¹⁷ “E maua fua te poto i tino loto mau‵lalo,” ko pati i te Faataoto 11:​2, Tusi Paia, Samoa. A te fakalagolago ki a Ieova mo te loto maulalo e fesoasoani mai ke ‵kalo keatea tatou mai te faiga o mea ‵se kae matagā. E pelā me se fakaakoakoga, a te loto vāivāi e mafai o faka‵segofie i ei te faiga o ‵tou fakaikuga. (Faataoto 24:10) E mafai o ‵fiu tatou i nisi vaega o ‵tou taviniga kae fai i ei ke mafau‵fau tatou me ko lava eiloa ‵tou mea ne fai i te fia tausaga ko ‵teka, kae kāti ko ‵tau o tuku atu te amoga tenā ki nisi tino. Io me kāti ko fia maua ne tatou te olaga “masani” telā e maua ne nisi tino. Kae ko te ‘faiga ne tatou a te mea e mafai o fai’ kae “ga‵lue malosi . . . i te galuega a te Aliki” ka puipui i ei ‵tou loto.​​—Luka 13:24; 1 Kolinito 15:58.

18. Ne a mea e mafai o fai māfai e se iloa ne tatou te fakaikuga e ‵tau o fai?

¹⁸ I nisi taimi, kāti e ‵tau o fai ne tatou ne fakaikuga faiga‵ta, kae kāti e tai faigata eiloa ke lavea atu te mea tonu telā e ‵tau o fai. E mata, ka fakaosoosogina i ei tatou ke faka‵lei aka te fakalavelave tenā ne tatou eiloa? Kafai e oko atu tatou ki se vaegā tulaga penā, se mea poto ke fakamolemole atu ki a Ieova mō tena fesoasoani. E fai mai te Iakopo 1:5: “Kafai se tino o koutou e se maua ne ia te poto, e ‵tau mo ia o ‵talo ki te Atua, . . . me i te Atua e tuku mai fua ne ia te poto ki tino katoa i te agaga alofa mo te kaimalie.” Ka tuku mai eiloa ne ‵tou Tamana i te lagi te agaga tapu telā e manakogina ne tatou ke fai a fakaikuga ‵lei.​​—Faitau te Luka 11:​9, 13.

Ke na Fakaiku Aka ke Tumau i te Fakamaoni

19, 20. Se a te mea e ‵tau o fakaiku aka ne tatou ke fai?

¹⁹ A tausaga faiga‵ta mai tua o te taimi ne fulitua atu ei a Solomona ki te tapuakiga tonu, ne tofotofo malosi aka i ei te fakamaoni o tavini a te Atua. E tonu, ne gutugutulua a tino e tokouke i auala kese‵kese. Kae ne tumau eiloa a nisi tino i te fakamaoni ki a Ieova.

²⁰ E fe‵paki tatou i aso takitasi mo filifiliga mo fakaikuga kolā e tofotofogina i ei ‵tou fakamaoni. E mafai foki o fakaasi atu ne tatou te ‵tou fakamaoni. Ke na tumau faeloa tatou i te fakamaoni ki a Ieova mo te loto talitonu katoatoa me ka tumau i te fakamanuia ne ia ana tino fakamaoni.​​—2 Samuelu 22:26.

[Fakamatalaga mai lalo]

Ka Tali Mai Pefea ne Koe?

• Kaia e ‵tau ei o ga‵lue tatou o tapale kea‵tea a manakoga fia maumea i ‵tou loto?

• Ne a mea ka fesoasoani mai ke tumau tatou i te fakamaoni ki a Ieova?

• E fesoasoani mai pefea a te loto maulalo ke tumau tatou i te fakamaoni ki te Atua?