E Ola te Muna a Ieova Manatu Tāua Mai te Tusi ko Fakaasiga​—⁠II

NE A mea ka ‵tupu i aso mai mua nei ki tino kolā e tapuaki ki a Ieova te Atua mo latou kolā e se tapuaki ki a ia? Se a te fakamoemoega mō Satani mo ana temoni? Kae ne a fakamanuiaga ka maua ne tino faka‵logo i loto i te Afe Tausaga o te Pulega a Keliso? A tali ki fesili konei mo nisi fesili tāua aka e maua i te Fakaasiga 13:1–​22:21.a E aofia i mataupu konei a fakaasiga fakaoti e 9 mai fakaasiga e 16 kolā ne maua ne te apositolo ko Ioane i te fakaotiotiga o te senitenali muamua T.A.

Ne tusi mai a Ioane, “Amutia a te tino telā e faitau ki te tusi nei, amutia foki a latou kolā e faka‵logo ki te talaiga fakapelofeta kae e tau‵tali foki i mea e tusi i te tusi nei!” (Fakaasiga 1:3; 22:⁠7) A te fai‵tau mo te fakagalue ne tatou a ‵tou mea ne tauloto mai te tusi ko Fakaasiga e mafai o otia i ei ‵tou loto, e fakamalosi aka ei ‵tou fakatuanaki ki te Atua mo tena Tama, ko Iesu Keliso, kae tuku mai i ei se fakamoemoega gali mō tatou i aso mai mua.b​—⁠Epelu 4:​12.

KO ‵LIGI IFO A TANOA E FITU O TE KAITAUA O TE ATUA

(Fakaasiga 13:1–​16:⁠21)

“A tino pouliuli ko ‵fonu i te ita,” ko pati i te Fakaasiga 11:​18, “me i tou kaitaua [te Atua] ko oko mai, . . . ko te taimi tenā e fakamasei ei latou kolā e fakamasei ne latou te lalolagi!” Ke maina tatou i te pogai o te kaitaua o te Atua, e fakaasi mai i te valu o fakaasiga a galuega a “te manu fekai . . . e sefulu ona suki kae fitu ona ulu.”​—⁠Fakaasiga 13:⁠1.

I te iva o fakaasiga, ne lavea ne Ioane se “Tamā Mamoe . . . e tu mai i te Mauga o Siona” kae ‵tu fakatasi mai mo te “toko selau fasefulu fa afe tino.” Kae “ko oti ne fakaolagina latou mai te tokoukega o tino.” (Fakaasiga 14:​1, 4) Mai tua ifo ne fai mai ne agelu a faka‵pulaga e ono. I te suā fakaasiga, ne lavea atu ne Ioane a “agelu e tokofitu mo mala e fitu.” E mautinoa eiloa me ko Ieova ne fakatonu atu ke ‵ligi “a tanoa e fitu o te kaitaua o te Atua” ki vaega kese‵kese o te lalolagi a Satani. E aofia i tanoa konei ko faka‵pulaga e uiga ki fakamasinoga kolā ka fai ne te Atua. (Fakaasiga 15:1; 16:⁠1) E fakamatala fakalikiliki mai i fakaasiga e lua konei a nisi fakamasinoga a te Malo kolā e isi se lotou sokoga ki te tolu o mala mo te iliga o te fitu o pu.​—⁠Fakaasiga 11:​14, 15.

Tali ki Fesili Faka-te-Tusi Tapu:

13:8​—⁠Se a “te tusi o te ola a te Tamā Mamoe”? A te tusi tenei se tusi fakatusa telā e aofia fua i ei a igoa o tino kolā ka pule fakatasi mo Iesu Keliso i te Malo faka-te-lagi. E aofia foki i ei a igoa o Kelisiano fakaekegina kolā koi ola i te lalolagi nei, kae fakamoe‵moe ke ola i te lagi.

13:​11-​13​—⁠E fai pefea a te manu fekai telā e lua ana suki e pelā me se talako kae faka‵to ifo ne ia te afi mai te lagi? A te manu fekai telā e lua ana suki​—⁠ko te Malo Malosi o Amelika mo Peletania​—⁠kae faipati pelā me se talako e fakaasi mai i ei me e fakamatakutaku, e faimālō, kae fakaaoga ne ia a faifaiga fakasaua ke faimālō atu ki tino ke talia ne latou olotou vaegā pulepulega. E faka‵to ifo ne ia a te afi mai i te lagi mai tena fai mai i a ia se pelofeta tonu telā ko oti ne manumalo i malosi ma‵sei i taua e lua a te lalolagi i te 20 senitenali e pelā foki mo pulepulega faka-Kominisi.

16:17​—⁠Se a “te ea” telā ne ‵ligi atu ki ei a te fitu o tanoa? E fakasino atu a “te ea” tenā ki mafaufauga faka-Satani, “ko te agaga [mafaufauga] telā e pule ne ia a tino kolā e se faka‵logo.” A tino kolā e fai pelā me ne vaega o te lalolagi matagā tenei a Satani tenei e manava ne latou a te ea poisini fakatusa tenei.​—⁠Efeso 2:⁠2.

Akoakoga mō Tatou:

13:​1-4, 18. Ne fanake se “manu fekai” telā e fakatusa ki malo o tagata “mai te tai,” telā ko tagata faivalevale o te lalolagi. (Isaia 17:​12, 13; Tanielu 7:​2-8, 17) A te manu fekai tenei, ne fakatu aka kae ne tuku atu ne Satani ki ei te malosi, e tusi i luga i ei te napa ko te 666, telā e fakauiga ki te lasi o tena tulaga sē ‵lei katoatoa. Kafai e maina tatou i te uiga o te manu fekai ka fesoasoani mai i ei ke mo a ma tau‵tali kae tapuaki atu tatou ki ei e pelā mo te mea e fai ne te tokoukega o tagata.​—⁠Ioane 12:31; 15:⁠19.

13:​16, 17. Faitalia a mea faiga‵ta e mafai o fepaki mo tatou i ‵tou faifaiga i aso takitasi, e pelā mo te ‘fakatau mai io me ko te fakatau atu,’ e se ‵tau o talia ne tatou a fakamalosiga ke pule mai te manu fekai ki ‵tou olaga. A te talia ne tatou o te ‘fakailoga o te manu fekai i ‵tou lima io me ko ‵tou lae’ se fakaasiga me ko talia ne tatou a te manu fekai ke takitaki io me ‵fuli ne ia ‵tou faifaiga mo mafaufauga.

14:​6, 7. E akoako mai ne folafolaga a te kau agelu me e ‵tau o folafola fakavave atu ne tatou a te tala ‵lei o te Malo o te Atua telā ko oti ne fakatu aka. E ‵tau o fesoasoani atu tatou ki ‵tou akoga faka-te-Tusi Tapu ke ati aka ne latou a te mataku tonu ki te Atua kae ke avatu foki a vikiga ki a Ieova.

14:​14-​20. Kafai ko oti te ‘‵katiga o saito i te lalolagi,’ telā ko te fakamaopoopoga o tino kolā ka ‵sao, ko te taimi foki eiloa tenā ka ‵ligi ifo ei ne te agelu a “vine mai i te togavine o te lalolagi” ki loto i “te mea ‵tau sua vine a te Atua, telā ko tena fakasalaga fakamataku.” A te vine tenā​—⁠ko te fakanofonofoga matea kae faivalevale a Satani mo ana malo kolā e pule atu ki tino fakatasi mo ana “fuaga” ma‵sei​—⁠ka fakaseai atu ki te se-gata-mai. E ‵tau mo tatou o taumafai malosi ke mo a ma fakamasei tatou ne te vine o te lalolagi.

16:​13-​16. “A agaga ma‵sei” e fakaata mai i ei a tala ‵loi faka-temoni kolā e fakafoliga mai me e se mafai o pokotia a tupu o te lalolagi i te ‵ligi­ifo­ga o tanoa e fitu o te kaitaua o te Atua kae e fakamalosi aka i ei ke ‵teke atu latou ki a Ieova.​—⁠Mataio 24:​42, 44.

16:21. I te pili mai o te gataga o te lalolagi tenei, a te folafolaatuga o fakamasinoga a Ieova ki te fakanofonofoga masei tenei a Satani e mafai o aofia i ei a tugapati ‵mafa e uiga ki fakamasinoga a te Atua, kolā e mafai o fakaata mai ne vai aisa ma‵keke. Kae koi tokouke eiloa a tino e taku fakamasei ne latou a te Atua.

KO PULE MAI A TE TUPU MANUMALO

(Fakaasiga 17:1–​22:⁠21)

A ‘Papelonia te Sili,’ te fakapotopotoga o lotu ‵se i te lalolagi kātoa, se vaega matagā o te lalolagi masei a Satani. E fakaata mai tou fafine i te 11 o fakaasiga e pelā me se “fafine tali tagata takutakua”​—⁠se fafine finalalolagi​—⁠“e sagasaga i luga i te manu fekai ‵kula.” Kae ka fakaseai katoatoa atu a ia ne ‘suki e sefulu’ o te manu fekai telā e sagasaga a ia i ei. (Fakaasiga 17:​1, 3, 5, 16) Ke faka‵tusa te fafine tali tagata ki se “fa‵kai takutakua,” e fakaasi mai i te suā fakaasiga a te auala ka pakū ei tou fafine kae faka‵pula fakavave atu i ei ki tino o te Atua ke “o‵mai keatea mai i a ia!” Ne tokouke ‵ki a tino ne ‵tagi fanoa‵noa i te fakaseaiga o te fa‵kai takutakua tenei. Kae ne fiafia a te lagi, ona ko te “fakaipoipoga a te Tamā Mamoe.” (Fakaasiga 18:​4, 9, 10, 15-​19; 19:⁠7) E lavea atu i te 13 o fakaasiga a te tino telā e sopo i luga i te “solofanua ‵kena” e malaga atu o taua ki malo. Ne fakaseai atu ne ia a te lalolagi masei a Satani.​—⁠Fakaasiga 19:​11-​16.

Kae pefea la a “te gata mua eiloa, ko te Tiapolo tenā io me ko Satani”? Ko te taimi fea ka “‵pei [ei a ia] ki loto i te lase ‵ka ulaula”? A te mea tenā se mataupu e tasi i te 14 o fakaasiga. (Fakaasiga 20:​2, 10) A te avā fakaasiga fakaoti e fakaasi mai i ei a te olaga i loto i te Afe Tausaga. I te fakaotiotiga o te “fakaasiga,” ne matea ne Ioane te ‘vaitafe o te vai ola e ‵tafe mai i te kogaloto o te auala lasi,’ kae avatu foki i ei se ‵kamiga gali ki “so se tino e fia inu.”​—⁠Fakaasiga 1:1; 22:​1, 2, 17.

Tali ki Fesili Faka-te-Tusi Tapu:

17:16; 18:​9, 10​—⁠Kaia ne ‵tagi fanoa‵noa ei “a tupu o te lalolagi” i te taimi ne fakaseai ei ne latou a te fafine tali tagata tenei? E ‵tagi fanoanoa latou ona ko olotou manakoga kaima‵nako. Mai tua o te fakaseaiga o Papelonia te Sili, kae fatoa lavea atu ei ne tupu o te lalolagi a te aoga o tou fafine ki a latou. Ne talia ne tou fafine olotou faifaiga fakasaua e pelā me ne faifaiga e saoloto o fai. Ne fesoasoani atu foki a Papelonia te Sili ki a latou ke fakaaoga a talavou i taua. E se gata i ei, ne tāua ‵ki a tena tusaga i te faiga o tino ke faka‵logo.

19:12​—⁠Kaia e fai ei pelā me ko Iesu fua e iloa ne ia a tena igoa telā ne seki fakailoa mai? A te igoa tenei e pelā me fakasino atu ki te tulaga mo tauliaga kolā e fakamau i te Isaia 9:​6, kae ka maua ne Iesu i loto i te aso o te Aliki. E seai se tino e iloa ne ia te igoa tenei kae na ko ia fua ona ko te tu ‵kese o ana tauliaga kae ko ia fua tokotasi e mafai o malamalama i te tulaga maluga tenei ne maua ne ia. E ui i ei, e tuku atu foki ne Iesu a nisi tauliaga konei ki a latou kolā ka fai mo fai tena avaga fakatusa kae ka ‘tusi a tena igoa fou i a latou.’​—⁠Fakaasiga 3:​12.

19:14​—⁠Ko oi ka olo fakatasi atu mo Iesu i Amaketo? E aofia i “kautau o te lagi” kolā e ‵kau fakatasi mo Iesu i te taua a te Atua ko agelu fakatasi mo te kau fakaekegina kolā ko oti ne maua ne latou a te taui faka-te-lagi.​—⁠Mataio 25:​31, 32; Fakaasiga 2:​26, 27.

20:​11-​15​—⁠I o oi a igoa e tusi i te “tusi o te ola”? E aofia i te tusi tenei a igoa o tino katoa kolā ka maua ne latou a te ola se-gata-mai​—⁠ko Kelisiano fakaekegina, te vaitino tokouke, mo tavini fakamaoni a te Atua kolā ka aofia i ‘tino ‵lei kolā ka toe faka‵tu mai.’ (Galuega 24:15; Fakaasiga 2:​10; 7:⁠9) A ‘tino se ‵lei kolā e faka‵tu mai’ ka tusi olotou igoa i te “tusi o te ola” māfai fua e ola latou e ‵tusa mo mea kolā e fakatonutonu mai “i loto i tusi” kolā ne ‵tala i loto i te Afe Tausaga. Kae ko igoa konei e mafai fua o toe ‵solo. A igoa o te kau fakaekegina e faka‵mautakitaki fua māfai e tumau latou i te fakamaoni ke oko ki te taimi e ‵mate ei latou. (Fakaasiga 3:⁠5) Kae ko igoa o latou kolā ka ola i te lalolagi e fakamautinoa fua māfai e manumalo latou i te ‵toe tofotofoga telā ka fai i te fakaotiga o te afe tausaga.​—⁠Fakaasiga 20:​7, 8.

Akoakoga mō Tatou:

17:​3, 5, 7, 16. “Ka ko te poto mai i te lagi” ka fesoasoani mai ke malamalama tatou i te “uiga ‵funa o te fafine mo te manu fekai [lanu ‵kula] telā e ‵kave sāle ne ia.” (Iakopo 3:​17) A te manu fekai faka‵tusa tenei ne kamata aka e pelā me ko Malo ‵Kau Fakatasi kae ne toe sae fakamuli mai e pelā me ko Malo ‵Soko. E mata, e se fakamalosi aka ne te ‵tou malamalama i te uiga ‵funa o te tala tenei ke loto finafinau tatou o talai atu te tala ‵lei e uiga ki te Malo o te Atua mo te aso o te fakamasinoga a Ieova?

21:​1-6. E mafai o tali‵tonu katoatoa tatou me i fakamanuiaga kolā ne folafola mai mai i lalo i te pulega a te Malo se mea tonu. Kaia? E uiga eiloa ki mea konā, e fai mai penei: “Ko oti!” ne taunu.

22:​1, 17. “A te vaitafe o te vai ola” e fakatusa ki fakatokaga a Ieova ke faka‵lei aka ei te tulaga o tino faka‵logo mai te agasala mo te mate. E isi se tamā vaega o te vai tenei e maua nei. Ke mo a ma fia‵fia fua tatou o talia a te ‵kamiga ke olo atu tatou “o inu [ki te vai ola] me seai se ‵togi” kae ke loto finafinau foki tatou o tufa atu ki nisi tino!

[Fakamatalaga mai lalo]

[Ata i te itulau e 5]

Ko tafaga la te ‵gali o fakamanuiaga kolā ka maua ne tino faka‵logo mai lalo i te pulega a te Malo!