E Fesili Mai ‵Tou Kau Fai‵tau . . .

E mata, e fai ne Molimau a Ieova a faka‵leiga fakavavega?

▪ Ne seki faka‵lei fakavavega aka eiloa ne Molimau a Ieova a tino. E pelā mo Iesu, e tali‵tonu latou me i te lotou galuega tāua ko te talai atu o te tala ‵lei e uiga ki te Malo o te Atua. E tali‵tonu foki latou me e iloa fua a Kelisiano ‵tonu, e se auala i te faka‵leiga fakavavega o tino, kae e auala i se mea telā e sili fakafia atu tena tāua.

E tonu, a te faka‵leiga atafai o tino ma‵saki i te senitenali muamua T.A. ne Iesu Keliso e lasi ‵ki tena tāua ki a tatou katoa. Ne tuku mai i ei ne ia se fakatalitonuga me mai lalo i tena pulega e pelā me ko te Tupu i te Malo o te Atua, “ka seai eiloa se tino i luga i te ‵tou fenua e tagi i a ia e masaki.”​—⁠Isaia 33:⁠24.

Kae e a i aso nei? A tino faka‵lei fakavavega i Lotu Kelisiano ‵Se e pelā foki mo nisi lotu sē Kelisiano e fai mai me e faka‵lei fakavavega ne latou a tino. Kae ne fakailoa faka‵lei mai eiloa ne Iesu me e isi ne tino ka fai mai me e fai ne latou “a vavega” i tena igoa. Kae ka fai atu a ia ki a latou: “E se iloa ne au koutou; olo keatea mai i a au, tino amio ma‵sei!” (Mataio 7:​22, 23) Tela la, e mata, a te faiga o faka‵leiga fakavavega penā i aso nei ne tino se fakaasiga o te taliaga io me ko te fakamanuiaga a te Atua?

Mafaufau ki pati a te Tusi Tapu e uiga ki faka‵leiga fakavavega ne fai ne Iesu. Mai i te fakatusatusaga o tala i te Tusi Tapu mo faifaiga a tino faka‵lei fakavavega i aso nei, e mafai o fakaiku aka ne tatou me ko faka‵leiga fakavavega i aso nei e māfua mai i te Atua io me ikai.

Ne seki fakaaoga ne Iesu a te faka‵leiga fakavavega e pelā me se auala ke tosina mai ei a loto o soko io me ko tino e tokouke. E ‵kese mai i ei, ne seki fai ne ia a nai faka‵leiga i mua o tino. I te ukega o taimi, ne fai atu a ia ki a latou kolā ne faka‵lei ne ia ke mo a ma taku atu a te mea tenā ki nisi tino.​—⁠Luka 5:​13, 14.

Ne seki fai ne Iesu ke ‵togi tupe atu ne tino e uiga mō ana vavega. (Mataio 10:⁠8) Ne iku manuia faeloa ana vavega ne fai. A tino ma‵saki katoa kolā ne olo atu ki a ia ne faka‵lei katoatoa, kae ne seki faka‵na a te faka‵leiga o latou ki te lasi o te lotou fakatuanaki. (Luka 6:19; Ioane 5:​5-9, 13) Kae ne faka‵tu aka foki ne Iesu a tino ‵mate!​—⁠Luka 7:​11-17; 8:​40-56; Ioane 11:​38-44.

E tiga eiloa ne fai ne ia a vavega konā, a te pogai tāua o te galuega a Iesu e se ko te fakamaopoopoga o soko ‵fou e auala i te akoakoga o lagonaga e uiga ki te faiga o vavega. I lō te fai penā, a tena galuega tāua ko te folafolaatuga o te tala ‵lei o te Malo o te Atua. Ne fakatoka ne Iesu ana soko ke fai a soko, kolā ka akoako atu ne latou a nisi tino e uiga ki te fakamoemoega ki te mauaga o te ola ‵lei katoatoa mai lalo i te Malo o te Atua.​—⁠Mataio 28:​19, 20.

E tonu, ne maua ne nisi soko o Iesu i te senitenali muamua a te meaalofa ki te faka‵leiga fakavavega, kae ne ‵tau o gata atu a faifaiga konei. (1 Kolinito 12:​29, 30; 13:​8, 13) E iloa ‵lei a Kelisiano ‵tonu i aso nei, e se auala mai i faka‵leiga fakavavega, kae e auala i te lotou a‵lofa sē fakapito. (Ioane 13:35) A tino fai vavega i aso nei e seki fakamalosi aka ne latou se kāiga tonu o Kelisiano mai i telega mo fenua kese‵kese kolā e fusi fakatasi i te vaegā alofa penā.

Kae e isi se potukau o Kelisiano kolā e ‵kau fakatasi i te alofa lasi telā e ita fitifiti ei latou ma fakalogo‵mae atu ki nisi tino​—⁠io me se isi tino, ona ko te pogai tenā​—⁠ke oko foki eiloa ki toe taimi fakasaua i taua a tino. Ko oi la latou? Ko Molimau a Ieova. E fakaasi atu ne latou a te alofa faka-Keliso i te lalolagi kātoa. A te faiga ke ‵kau fakatasi a tino mai telega, fenua, tuu, mo matakāiga kese‵kese se vavega foki eiloa, kae e mafai fua o fai penā ona ko te agaga tapu o te Atua. Kaia e se kau atu ei koe ki se fakatasiga a latou kae ke lavea eiloa ne koe ki ou mata?

[Ata i te itulau e 28]

E mata, a tino faka‵lei fakavavega i aso nei (telā e fakaasi atu i te feitu fakaatamai) e ‵lago atu eiloa te Atua ki ei?