Usu Atu Ki A Ieova!

“Ka pese au ki toku Atua i aso katoa o toku olaga.”​—⁠SALAMO 146:⁠2.

1. Se a te mea ne fakamalosi atu ki te talavou ko Tavita ke ‵fatu ne ia a nisi salamo?

I TE taimi koi talavou ei a ia, ne fakamāumāu ne Tavita a itula e uke i te malae telā e pili ki Petelema ke tausi a mamoe a tena tamana. I te taimi ne leoleo ei ne ia a mamoe, ne mafai ne Tavita o kilokilo atu ki galuega fakaofoofogia a Ieova ne fai: ko fetu i te lagi, ko “manu foki o te vao,” mo “manu eva.” Ne pokotia malosi a ia i mea ne matea ne ia​—⁠telā ne gasuesue ei a ia o ‵fatu se pese ke ‵viki atu ei ki te Tino telā ne fai ne ia a mea ‵gali konei. E mafai o maua ne tatou a pese e uke a Tavita i te tusi o Salamo.a​—⁠Faitau te Salamo 8:​3, 4, 7-9.

2. (a) Ne a auala e mafai ei o pokotia se tino i pese? Ke tuku mai se fakaakoakoga. (e) Ne a mea e mafai o tauloto ne tatou e uiga ki te fesokotakiga o Tavita mo Ieova mai te Salamo 34:​7, 8 mo te Salamo 139:​2-8?

² Kāti tenei foki eiloa te vaitaimi ne apo ‵lei ei a Tavita i tena taleni e pelā me se tino ‵fatu pese. E tonu, ne apo malosi a ia i te mea tenei, telā ne ‵kami ei a ia ke tātā tena kitala i mua o te tupu ko Saulo. (Faataoto 22:29) Ne fai eiloa a pese a Tavita e pelā me se fakamafanafanaga ki te tupu masei, e pelā loa mo mea e fai ne pese ‵gali ki tino i aso nei. I so se taimi ne puke ei ne Tavita tena kitala kae tātā, ko “Saulo foki ko ‵lei mai.” (1 Samuelu 16:23) Ko oti ne fakamaoni aka i aso nei a te tāua o pese ne ‵fatu ne te tino ‵fatu pese telā e mataku ki te Atua. Mafaufau la ki ei! I tausaga e silia atu mo te 3,000 mai tua o te fanaumaiga o Tavita ke oko mai ki aso nei, e lau i miliona o tino mai i fakanofonofoga kese‵kese kae ‵nofo i koga kese‵kese o te lalolagi e fai‵tau faeloa ki salamo a Tavita ke maua ei ne latou a fakamafanafanaga mo te fakamoemoega.​—⁠2 Nofoaiga Tupu 7:6; faitau te Salamo 34:​7, 8; 139:​2-8; Amosa 6:⁠5.

Te Tulaga Fakaaloalo o Pese i te Tapuakiga Tonu

3, 4. Ne a fakatokaga ne fai mō pese tapu i aso o Tavita?

³ E isi se taleni a Tavita, kae ne fakaaoga tena taleni i te ‵toe auala ‵lei​—⁠ke ‵viki atu ei ki a Ieova. Mai tua o te faiga e pelā me ko te tupu o Isalaelu, ne fakatoka ne Tavita ke aofia a pese ‵gali i tapuakiga i te faleie tapu. E sili atu foki i te tasi-vae-sefulu o te kau Levi ne aofia i te taviniga i te faletapu​—⁠a nisi tino o latou e toko 4,000​—⁠ne filifili ke “tavae ne latou a Ieova,” fakatasi mo te toko 288 kolā ne “fakamasani ke usu pese ki a Ieova, kae e ‵poto a latou katoa.”​—⁠1 Nofoaiga Tupu 23:​3, 5; 25:​7, Tusi Paia, Samoa.

⁴ Ne ‵fatu eiloa ne Tavita a pese e uke kolā ne usu ne tino Levi. So se tino Isalaelu telā ne maua ne latou te avanoaga ke ‵nofo atu i taimi ne usu ei a salamo a Tavita, ne ‵tau o otia malosi olotou loto i mea ne lagona ne latou. Fakamuli ifo, i te taimi ne avatu ei te pusa o te feagaiga ki Ielusalema, “ne fakatonu ne Tavita a takitaki o te kau sa Levi ke usu pese kae tā‵tā a pese fia‵fia ki kitala mo sumepalo.”​—⁠1 Nofoaiga Tupu 15:⁠16.

5, 6. (a) Kaia ne lasi ei te ‵saga malosi atu o tino ki pese i taimi o te nofoaiga a Tavita? (e) Kaia e iloa ei ne tatou me e tāua ‵ki a pese i te tapuakiga i Isalaelu i aso mua?

⁵ Kaia ne ‵saga malosi atu ei a tino ki pese i aso o Tavita? Ne fai penā ona ko te tupu se tino ‵fatu pese? Ikai, e isi aka foki se pogai, telā ne fakaasi mai i senitenali fakamuli ifo i te taimi ne fakagata ei ne te tupu amiotonu ko Hesekia a te galuega i te faletapu. I te 2 Nofoaiga Tupu 29:​25, e fai‵tau tatou, penei: “Ne tautali eiloa te tupu ki fakatonuga kolā ne aumai ne te Aliki [ko Ieova] ki te Tupu ko Tavita e auala i a Kato, te pelofeta a te tupu, pelā foki i a Natano te pelofeta; ne fakatulaga ne ia a te kau sa Levi i te Faletapu mo olotou kitala mo sumepalo.”

⁶ E tonu, ne fakatonu atu a Ieova ki ana tino tapuaki e auala i ana pelofeta ke ‵viki atu ki a ia i pese. Ne fakasaoloto foki a tino usuusu pese mai te matakāiga o faitaulaga mai olotou tiute kolā ne ma‵nako ke fai ne nisi tino Levi ko te mea ke mafai o tuku atu olotou taimi ki te ‵fatuga mo te fakaakoakoga o pese.​—⁠1 Nofoaiga Tupu 9:⁠33.

7, 8. Se a te mea e tāua fakafia atu i te atamai i te usuusu?

⁷ E mafai o fai atu koe, “Kafai e manakogina ke usu faka‵lei a pese, e mautinoa eiloa me e se mafai o aofia au i tino ‵poto kolā ne usu pese i te faleie tapu!” Kae e se ko tino ‵fatu ‵pese katoa o Levi e ‵poto. E ‵tusa mo pati i te 1 Nofoaiga Tupu 25:​8, e isi foki ne “tino fatoa kamata.” Se mea tāua ke iloa atu me e isi foki ne nisi tino ‵fatu pese mo tino usuusu atamai mai i matakāiga o Isalaelu, kae ne filifili eiloa ne Ieova a te kau Levi ke tausi atu ki pese. E mautinoa eiloa i a tatou me faitalia me ne ‘tino ‵poto’ io me ne “tino fatoa kamata,” ne tuku katoatoa atu a loto o te kau Levi fakamaoni ki te lotou tofiga.

⁸ Ne fiafia malosi a Tavita ki pese kae ne atamai a ia i ei. Kae e mata, ko te taleni fua e tāua ki te Atua? I te Salamo 33:​3, ne tusi mai a Tavita, penei: ‘Fai te ‵toe mea e mafai o fai ke ‵viki atu ki a ia i te pese fou, ta faka‵lei te kitala kae ka‵laga fia‵fia.’ E manino eiloa te fekau: A te mea tāua ko te ‘fai te ‵toe mea e mafai o fai’ ke ‵viki atu ei ki a Ieova.

Te Tulaga o Pese Mai Tua Ifo i Aso o Tavita

9. Fakamatala mai me ne a mea e mafai o iloa kae lagona ne koe moi ne kau atu koe ki te fakaulufalega o te faletapu i taimi o te nofoaiga a Solomona.

⁹ I taimi o te nofoaiga a Solomona, ne fai a pese e pelā me se vaega tāua ‵ki i te tapuakiga ‵ma. I te fakaulufalega o te faletapu, ne aofia i ei se potukau usuusu, mo mea fakatagi‵tagi kolā e aofia i ei a tino ta‵ta lakau e 120. (Faitau te 2 Nofoaiga Tupu 5:12.) E fai mai te Tusi Tapu ki a tatou me i “te kau usu pese e usu a pese, ka ko te kau fakatagitagi [ne tino Levi katoa] e fakatagi a pu, sumepalo, mo nisi mea fakatagitagi, kae ko oko eiloa i te tagi gali o leo mo mea fakatagitagi. Ko te vikiga tenā a latou ki te Aliki [ko Ieova]. . . . ‘me ‵lei a ia, ka ko tena alofa e tumau.’ ” I te taimi eiloa ne oko atu ei a pese ‵gali konā ki luga, “ko te Faletapu eiloa ko ‵fonu i te kaumana e maina i te mainaga o te fakatasi mai o te Aliki,” telā e fakaasi mai i ei a te taliaga a Ieova. Ko tafaga la te gali mo te fakaofoofogia ke lagona atu a te tagi‵tagi mai o mea fakatagi‵tagi fakatasi mo te fia afe o tino usuusu kolā ko fetaui ‵lei aka eiloa!​—⁠2 Nofoaiga Tupu 5:⁠13.

10, 11. Ne a mea e fakaasi mai i ei me ne fakaaoga ne Kelisiano mua a pese i olotou tapuakiga?

¹⁰ Ne fakaaoga foki ne Kelisiano mua a pese i tapuakiga. E tonu, ne seki maopoopo a tino tapuaki i te senitenali muamua i faleie io me i faletapu, kae i fale eiloa o tino. Ona ko fakasauaga mo nisi mea aka, ne kamata o sē ‵lei a fakanofonofoga ne maopoopo sāle ei latou. Kae e ‵viki atu eiloa a Kelisiano konā ki te Atua i pese.

¹¹ Ne fakamalosi atu a te apositolo ko Paulo ki taina Kelisiano i Kolose: “Ke . . . polopoloki atu koutou ki se tino i poto valevale, ke penā foki manafai e ‵pese atu koutou i te loto fakafetai ki te Atua i salamo, mo pese mo kupu faka te agaga.” (Kolose 3:16) Mai tua o te ‵peiatuga o Paulo mo Sila ki te falepuipui, ne kamata o “‵talo kae ‵pese” atu latou ki te Atua, faitalia me e seai ne olotou tusi pese ke tau‵tali ki ei. (Galuega 16:25) Kafai e ‵pei atu koe ki te falepuipui, e pefea te uke o pese o te Malo e mafai o tauloto ne koe i tou mafaufau?

12. E fakaasi atu pefea ne tatou a te loto fakafetai ki ‵tou pese o te Malo?

¹² Ona ko te mea e fai a pese e pelā me se tulaga ‵malu i ‵tou tapuakiga, e ‵tau o fesili ifo tatou penei: ‘E mata, e fakaasi atu ne au a te loto fakafetai telā e fetaui ‵lei mō te mea tenei? E mata, e taumafai malosi au ke oko atu i te taimi tonu ki fakatasiga, fono i te fenua, mo fono i te atufenua ke ‵kau fakatasi mo taina mo tuagane i te pese muamua, kae e mata, e usu atu au mo toku loto kātoa? E mata, e fakamalosi aka ne au aku tama‵liki ke mo a ma ‵kilo atu ki te pese i te va o te Akoga mō Tino Talai mo Te Fakatasiga mō te Galuega Talai io me ko te pese i te va o te lauga mō tino katoa mo te Sukesukega ki te Faleleoleo Maluga e pelā me se taimi ke manava, se avanoaga ke tiakina olotou nofoga, kāti mō se taimi toetoe fua?’ A te usuga pese se vaega o te ‵tou tapuakiga. Ao, faitalia me i a tatou ne ‘tino ‵poto’ io me ne ‘tino fakaakoako,’ e mafai katoa ne tatou​—⁠kae ‵tau foki​—⁠o ‵kau fakatasi tatou o ‵viki atu ki a Ieova i ‵tou leo.​—⁠Fakatusa ki te 2 Kolinito 8:⁠12.

Ko Mafuli‵fuli a Taimi mo Manakoga

13, 14. Se a te mea tāua i te usu atu mo te loto kātoa i taimi o fakatasiga a te fakapotopotoga? Fakamatala mai.

¹³ Kāti e sili atu i te 100 tausaga ko ‵teka, ne fakamatala mai i te Zion’s Watch Tower a te pogai e tasi e tāua ‵ki ei a pese o te Malo. E fai mai, penei: “A te usuatuga o pese o te munatonu se auala ‵lei ke fakaoko atu ki mafaufau mo loto o tino o te Atua.” A te ukega o pati o ‵tou pese e fetaui ‵lei mo fuaiupu i te Tusi Tapu, tela la, a te tauloto ki nāi pati o nisi pese e fai pelā me ko te ‵toe auala ‵lei ke faka‵goto ifo ei a te munatonu ki ‵tou loto. E masani faeloa o otia a loto o tino e tokouke kolā e ‵kau atu ki ‵tou fakatasiga i pese kolā e usu ne te fakapotopotoga.

¹⁴ I te afiafi e tasi i te 1869, ne lagona ne S. T. Lasalo a pese mai i se Hall i tena fokiatuga ki te fale. I te taimi tenā i tena olaga, ne talitonu katoatoa a ia me ka se maua eiloa ne ia te munatonu e uiga ki te Atua. Tela la, ne fakaiku aka ne ia ke saga katoatoa atu a ia ki tena pisinisi, kae mafaufau me kafai ko isi ne ana tupe, ka mafai ne ia o fesoasoani atu ki manakoga faka-te-foitino o tino faitalia me e se mafai ne ia o fesoasoani atu ki a latou i te feitu faka-te-agaga. Ne ulu atu a te taina ko Lasalo ki fale ‵pefu kae lailai kae maua atu ne ia me e isi se lotou lotu e fai i konā. Ne sagasaga a ia ki lalo kae fakalogologo. Ne tusi fakamuli mai a ia me i mea kolā ne lagona ne ia i te po tenā “ko lava kae ‵toe, mai lalo i te takitakiga ne te Atua te tusiga o te Tusi Tapu, ke fakamalosi aka ei tena fakatuanaki telā ne vāivāi.” Mafaufau la me ko pese kolā ne fai ei ke fanatu a te taina ko Lasalo ki te fakatasiga.

15. Ne a ‵fuliga o te malamalama ne fai ei ke aoga a te fakafouga o te tusi pese?

¹⁵ I te gasologa o taimi, e isi eiloa ne ‵fuliga ki te ‵tou malamalama i te Tusi Tapu. E fai mai a te Faataoto 4:​18, penei: “A te auala tela e sa‵sale i ei a tino amio‵tonu e pelā mo te la e kamata o fanake, e gasolosolo malie eiloa o vau te mainaga ke oko eiloa ki te taimi ko ao mai ei.” A te fanakaga o te mainaga e mautinoa eiloa me e iku atu ki mafulifuliga i te auala e usu ei ne tatou a ‘pese o te munatonu.’ Mō se 25 tausaga ko ‵teka, ko oti ne fakaaoga ne Molimau a Ieova i fenua e uke a te tusi pese telā e fakaulutala penei, Usu a Vikiga ki a Ieova.b I tausaga kolā ne fai ei te ‵lomiga muamua tenā o te tusi, ne gasolo aka eiloa o lasi te mainaga i mataupu e uke, kae ko se fakaaoga nei a nisi tugapati i te tusi pese tenā. E pelā me se fakaakoakoga, ko se fai‵pati nei tatou ki te “faiga fou,” kae ko te “lalolagi fou.” Kae ko fai atu foki nei tatou me i te igoa o Ieova ka “faka‵malu,” kae ko se “taku‵leia.” E fakaasi faka‵lei mai i akoakoga faka-te-Tusi Tapu, me e manakogina ke fakafou te ‵tou tusi pese.

16. Ka fesoasoani mai pefea a te ‵tou tusi pese fou ke tau‵tali tatou i pati fakatonutonu a Paulo kolā e maua i te Efeso 5:⁠19?

¹⁶ Ona ko te pogai tenā fakatasi mo nisi pogai, ko oti ne talia ne te Potukau Pule a te lomiga o te tusi pese fou telā e fakaulutala penei, Usu Atu ki a Ieova. Ko oti ne fakamu‵tana ifo a te aofaki o pese i te ‵tou tusi pese fou ki te 135. Ona ko te mea ko mu‵tana fua a pese ke tauloto, se mea ‵tau ke masaua ne tatou a pati o nai pese i te tusi pese fou. A te mea tenei e fetaui ‵lei eiloa mo pati fakatonutonu a Paulo kolā ne tusi i te Efeso 5:19.​—⁠Faitau.

E Mafai o Fakaasi Atu Tou Loto Fakafetai

17. Ne a manatu e mafai o fesoasoani mai ki a tatou ke manumalo i te mā māfai ko usu atu a pese i te fakapotopotoga?

¹⁷ E mata, e ‵tau o talia ne tatou te lagonaga mā ke taofi aka ei tatou mai te usu atu i ‵tou fakatasiga faka-Kelisiano? Kilo atu ki ei i te feitu tenei: Mai te manava‵se ki ‵tou fai‵pati, e mata e sē se mea tonu me i a “tatou katoa e masani o fai mea ‵se”? (Iakopo 3:⁠2) Kae e se talia ne tatou a te sē ‵lei o ‵tou faipati ke taofi aka ei tatou mai te ‵viki atu ki a Ieova mai fale ki fale. Kae kaia la e se ‵tau ei o taofi tatou ne ‵tou leo kolā e se ‵lei katoatoa mai te ‵viki atu ki te Atua i pese? E fiafia eiloa a Ieova, telā “ne fai ne ia te gutu o te tagata,” ke fakalogologo i te taimi e fakaaoga ei ‵tou leo ke usu ne tatou ana vikiga.​—⁠Esoto 4:⁠11.

18. Tuku mai ne manatu e uiga ki te tauloto ki pati o pese.

¹⁸ Ko avanoa nei a CD o te tusi ko te Usu Atu ki a Ieova​—⁠i ‵gana e uke. E aofia i ei a ‵fati ‵gali o pese kolā e tātā ne se potukau mo te usuga o pese ‵fou. A fakatokaga ki pese fakatagi‵tagi ne fai ke gali te fakalogo‵logo ki ei. Ke fakalogo‵logo faeloa ki ei; i te auala tenā ka tauloto vave ei ne koe a pati o nai pese ‵fou. Ne ‵fatu a te ukega o pese i se auala telā e fai ei ke iloa ne koe o usu a te suā fuaiupu. Tela la kafai ko fakatagi ne koe te CD, kaia e se taumafai ei ke usu atu fakatasi mo te tali? Kafai ko masani ‵lei koe ki fakalagi o pese i te fale, ka mautinoa eiloa me ka mafai ne koe o usu atu mo te loto talitonu i te Kingdom Hall.

19. Ne a auala e aofia i te fakatokaga o pese fakatagi‵tagi i ‵tou pese o te Malo?

¹⁹ Se mea faigofie ke se mafaufau ‵mafa tatou ki pese fakatagi‵tagi i taimi o ‵tou fono fakapito, fono i te fenua mo fono i te atufenua. E uke a galuega ne aofia i te fakatokaga o te tusi pese. Mai tua o te filifiliga o pese fakatagi‵tagi, ne ‵tau o tusi faka‵lei ki lalo a fakatokaga mo te tātāga o pese ko te mea ke mafai o tātā ne tino e toko 64 o te Watchtower. Ne fakaaoga ne tino ‵fatu pese a itula e uke ke onoono ki pese kolā ka fakaakoako ne latou kae fakamuli loa, ko puke ei a leo i te kogā koga o tatou telā e fai ei a mea penā i Patterson, i Niu Ioki. E toko sefulu mai taina mo tuagane konei e se ‵nofo atu i te Iunaite Sitete. E ‵kilo atu latou katoa ki ei e pelā me se tauliaga ke aofia i te fakatokaga o pese ‵gali mō ‵tou fakatasiga faka-Kelisiano. E mafai o fakaasi atu a te ‵tou loto fakafetai mō olotou taumafaiga a‵lofa. Kafai ko ‵kami tatou ne te takitakifono i ‵tou fono i te fenua mo te atufenua ke fakalogo‵logo ki ei, ke na saga‵saga fakavave tatou i ‵tou nofoga kae fakalogo‵logo ki pese fakatagi‵tagi kolā ko oti ne fakatoka i se auala alofa.

20. Ne a mea ko oti ne fakaiku aka ke fai ne koe?

²⁰ E fakalogologo mai eiloa a Ieova ki ‵tou pese o tavaega. E tāua ‵ki eiloa ki a ia. E mafai o fakafiafia ne tatou tena loto mai te usu atu mo ‵tou loto kātoa i so se taimi e ‵kau fakatasi ei tatou mō tapuakiga. Ao, faitalia me i a tatou ne tino ‵poto io me koi fakaakoako, ke na ‘usu atu ki a Ieova’!​—⁠Salamo 104:⁠33.

[Fakamatalaga fakaopoopo]

Se a Tau Faka‵tau?

• Ne a fakaakoakoga i taimi o te Tusi Tapu kolā e fakaasi mai i ei a te tāua o pese i ‵tou tapuakiga?

• Se a te fesokotakiga e lavea ne koe i te va o te  fakalogo ki te fakatonuga a Iesu i te Mataio 22:37 mo te aofia mo te loto kātoa i te usuga o pese o te Malo?

• Ne a nisi auala e mafai o fakaasi atu ei ‵tou loto fakafetai mō ‵tou pese o te Malo?

[Ata i te itulau e 26]

E mata, ka taofi aka ne koe au tama‵liki mai te tiakina olotou nofoga i taimi e usu ei a pese?

[Ata i te itulau e 27]

E mata, e tauloto ne koe a pati o ‵tou pese ‵fou i te fale?