Ko oi e ‵Tau o Akoako Atu ki Tama‵liki e Uiga ki te Atua?

“E se sili atu te tamaliki akoga i tona faiakoga; kae kafai te tamaliki akoga ko palele ana akoakoga, ko ‵pau ei mo tena faiakoga.”—LUKA 6:40.

E MAFAU‵FAU a nisi mātua i a latou e se fetaui ‵lei ke akoako atu ki olotou tama‵liki a mea e uiga ki te Atua. E mafai o mafau‵fau latou me e se lava a akoakoga io me e se lasi te lotou iloa e uiga ki talitonuga ke fai ei e pelā me ne faiakoga ‵lei. Tela la, e mafai o iku atu ki te fia tuku atu ne latou o te tiute tāua tenei ki se kāiga io me se takitaki lotu.

Kae ko oi tonu eiloa te tino e fetaui ‵lei mo te tulaga tenei ke akoako atu a tama‵liki ki muna‵tonu fakalotu mo fakatakitakiga ‵lei i mea tau amioga? Ke onoono tatou ki pati a te Tusi Tapu e uiga ki te mataupu tenei, kae fakatusa ki fakamatalaga kolā ne fatoa maua ne tino sukesuke.

Se a te Tiute o te Tamana?

Mea kolā e akoako mai i te Tusi Tapu: “A koutou e tamana, sa fakaitaitagina otou tama‵liki, kae ke puti ake i te olaga ‵lei mo akoakoga faka-Kelisiano.”​​—Efeso 6:4.

Mea kolā ne maua aka ne tino sukesuke: E maua pefea ne tamana a mea aoga māfai e ati aka ne latou se loto talitonu malosi ‵ki i mea fakalotu? Ne fai mai a te mataupu ko te Fathers’ Religious Involvement and Early Childhood Behavior, telā ne ‵lomi i te 2009, penei: “A te aofia i mea faka-lotu e mafai o fesoasoani atu ki tino ke fai e pelā me ne tamana ‵lei. E fesoasoani kae fakatonutonu atu ne lotu a tino taki tokotasi kae tuku atu foki a akoakoga mo fakatakitakiga ki te auala e ‵tau o ola ei se tino.”

E faka‵mafa mai ne te Tusi Tapu a te tāua o te tiute o te tamana i te putiakaga mo te akoakoga o tama‵liki. (Faataoto 4:1; Kolose 3:​21; Epelu 12:9) Kae e mata, e aoga a te fakatakitakiga tenā i aso nei? I te 2009, ne ‵lomi ne te iunivesiti o Florida se mataupu telā ne fakamatala mai i ei a te tulaga o tamana ki olotou tama‵liki. Ne iloa aka ne tino sukesuke me i tama‵liki mo tamana kolā e aofia i te putiakaga o latou e fakatau a‵lofa kae maua foki ne latou a te kilokiloga āva e uiga ki a latou eiloa. E mafai ei o se mataola a tama‵liki tagata, kae sili atu foki te malosi ‵lei o tama‵liki fafine i feitu tau te mafaufau. E manino ‵lei i ei me koi aoga eiloa a fakatakitakiga i te Tusi Tapu.

E Pefea te Tāua o te Tiute o te Mātua?

Mea kolā e akoako mai i te Tusi Tapu: “Taku tama, saga tonu ki muna a tou tamana mo tou mātua.”​​—Faataoto 1:8.

Mea kolā ne maua aka ne tino sukesuke: Ne fai mai te Handbook of Child Psychology, penei: “E pelā mo te masani, e nofo ki te 65% ki te 80% o taimi e fakamāumāu ne mātua i lō tamana o fai‵pati kae sau‵tala mo olotou tama‵liki kae e tai ‵pau eiloa te aofaki masani tenā i nisi fenua kese‵kese e uke.” Mai te aofaki tenā o taimi e fesokotaki ei latou, e sili atu ei a te aoga o pati, faifaiga mo kilokiloga a mātua i te putiakaga o se tamaliki.

Kafai e ga‵lue fakatasi a te tamana mo te mātua ke akoako atu a te munatonu e uiga ki te Atua ki lā tama‵liki, ko tuku atu eiloa ne lāua a meaalofa tāua e lua. Muamua la, ko maua ne tama‵liki a te avanoaga ke fai taugasoa mo te lotou Tamana faka-te-lagi, se va fakataugasoa telā e mafai o aoga ki a latou i te lotou olaga kātoa. A te lua, e tauloto a tama‵liki mai fakaakoakoga e uiga ki te auala e ‵tau ei o ga‵lue fakatasi a te avaga tagata mo tena avaga ke fakataunu ei a fakamoemoega tāua. (Kolose 3:​18-​20) E tiga eiloa e mafai o fesoasoani atu a nisi tino ki se tamana mo se mātua, i o mātua eiloa te tiute ke akoako olotou tama‵liki e uiga ki te Atua mo te auala e manako ki ei te Atua ke fakateletele faka‵lei aka ei se kāiga.

Kae e ‵tau o akoako atu pefea ne mātua olotou tama‵liki? Ne a toe auala ‵lei ke fai ei penā?