Tauloto Mai Te Muna A Te Atua

Kaia e Isi ei se Fakapotopotoga a te Atua?

E faka‵sae aka i te mataupu tenei a fesili kolā kāti ne fesili sale ne koe kae e fakaasi atu i ei a te koga telā e mafai o faitau ne koe a tali i loto i tau Tusi Tapu. E fia‵fia eiloa a Molimau a Ieova o sau‵tala fakatasi mo koe ki tali konei.

1. Kaia ne fakatoka ei ne te Atua a te kau Isalaelu?

Ne fakatoka ne te Atua a fanau a te toeaina ko Apelaamo ke fai mo fai se fenua kae tuku atu ki a latou a tulafono. Ne fakaigoa ne ia te fenua ki a Isalaelu kae ne fai mo tino tausi o te tapuakiga tonu mo tena Muna ko te Tusi Tapu. (Salamo 147:19, 20) Tela la, ko maua ne tino mai fenua katoa a mea aoga.—Faitau te Kenese 22:18.

Ne filifili ne te Atua a tino Isalaelu ke fai mo ana molimau. I te taimi ne faka‵logo ei latou, ne maua eiloa ne latou a mea aoga mai tulafono a te Atua. (Teutelonome 4:6) Mai te sukesuke ki te tala fakasolopito o te kau Isalaelu, e mafai ei o iloa ne tatou a mea e uke atu e uiga ki te Atua tonu.—Faitau te Isaia 43:10, 12.

2. Kaia ne fakatoka ei a Kelisiano ‵tonu?

I se taimi fakamuli ifo, ne galo atu i te kau Isalaelu a te taliaga a te Atua, kae ne sui ne Ieova a te fenua tenā ki te fakapotopotoga Kelisiano. (Mataio 21:43; 23:37, 38) Muamua loa, a tino Isalaelu ko molimau a te Atua. Kae nei, ko tavini atu a Kelisiano ‵tonu e pelā me ne molimau a Ieova.—Faitau te Galuega 15:14, 17.

Ne fakatoka ne Iesu ana soko ke molimau atu e uiga ki a Ieova kae ke fai a soko i atufenua katoa. (Mataio 10:7, 11; 24:14; 28:19, 20) Ko oko atu a te galuega tenei ki tena fakaotiga. E tenei te taimi muamua ne fakamaopoopo mai ei ne Ieova a te fia miliona o tino mai atufenua katoa ki loto i te tapuakiga tonu. (Fakaasiga 7:9, 10) Ne fakatoka foki a Kelisiano ‵tonu ko te mea ke mafai ne latou o fakatau fakamalosi kae fakatau fesoasoani atu te suā tino ki te suā tino. I te lalolagi kātoa, e ‵pau eiloa a polokalame o fakatakitakiga mai te Tusi Tapu e maua ne latou i olotou fakatasiga.—Faitau te Epelu 10:24, 25.

3. I taimi nei, ne kamata pefea a Molimau a Ieova?

Ne kamata te fakapotopotoga a Molimau a Ieova i aso nei i te vaitaimi o te 1870. Ne kamata o toe maua ne se potukau foliki o tino a‵koga ki te Tusi Tapu a muna‵tonu mai te Tusi Tapu kolā ko leva ne ‵galo. Ne iloa ne latou me ne fakatoka ne Iesu a te fakapotopotoga Kelisiano ke olo o talai. Tenā, fai ei ne latou se taumafaiga fakapito ke talai atu te Malo i te lalolagi kātoa. I te 1931 ne talia ei ne latou a te igoa ko Molimau a Ieova.—Faitau te Galuega 1:8; 2:1, 4; 5:42.

4. E fakatoka pefea a Molimau a Ieova i aso nei?

I te senitenali muamua, ne maua ne fakapotopotoga Kelisiano i fenua e uke a mea aoga mai te potukau pule telā e ‵kilo atu ki a Iesu e pelā me ko te Ulu o te fakapotopotoga. (Galuega 16:4, 5) E ‵pau eiloa mo aso nei, e ‵kilo atu Molimau a Ieova ki a Iesu e pelā me ko te lotou Takitaki. (Mataio 23:9, 10) E maua foki ne latou a mea aoga mai i te takitakiga a te Potukau Pule o toeaina apo kolā e tuku mai a fakamalosiga mo fakatonutonuga faka-te-Tusi Tapu ki fakapotopotoga e sili atu i te 100,000. I loto i fakapotopotoga takitasi, e isi ne tāgata kolā ko fetaui ‵lei ke tavini atu e pelā me ne toeaina, io me ne ovasia. E tausi atu mo te a‵lofa a tāgata konei ki te lafu a te Atua.—Faitau te 1 Petelu 5:2, 3.

Ne fakatoka eiloa a Molimau a Ieova ke talai atu te ‵tala ‵lei kae ke fai a soko. Ko te mea ke fesoasoani atu ki tino i koga katoa, e ‵fuli, e ‵lomi, kae tufatufa atu ne latou a mataupu faka-te-Tusi Tapu kolā e mafai o suke‵suke ki ei i ‵gana e sili atu i te 500. E pelā eiloa mo te kau apositolo, e talai atu latou mai fale ki fale. (Galuega 20:20) E toka latou o suke‵suke fakatasi ki te Tusi Tapu mo tino kolā e fia‵fia ki te munatonu. Ona la ko tino o Ieova e ‵saga tonu eiloa ki te fakafiafiaga o te Atua kae fesoasoani atu ki nisi tino, e fai latou mo fai se fakapotopotoga o tino fia‵fia.—Faitau te Salamo 33:12; Galuega 20:35.

Mō fakamatalaga e uke atu, onoono ki te mataupu e 19 o te tusi tenei, telā ne ‵lomi ne Molimau a Ieova. Ne a Mea e Akoako ‵Tonu Mai i te Tusi Tapu?