E Mata, a “Kelisiano” Katoa ne Kelisiano?

E TOKOFIA te aofaki o Kelisiano? E ‵tusa mo te Atlas of Global Christianity, toeitiiti kae kātoa te 2.3 piliona i te lalolagi kātoa i te 2010. Kae fai mai foki i ei me i Kelisiano konā e ‵kau atu ki potukau fakalotu e sili atu i te 41,000—e tofu eiloa te potukau mo ana akoakoga mo tulafono i mea tau amioga. I te fakafesagai atu ki te lasi o te ‵numi o lotu “Kelisiano,” e malamalama ‵lei me ko gasolo o ‵numi kae se fia‵fia a nisi tino maimoa. Kāti ka fai aka latou, ‘E mata, a tino katoa kolā e fai mai me ne Kelisiano ne Kelisiano ‵tonu eiloa?’

Ke ‵kilo aka tatou ki te mea tenei mai te suā kiloga. A te tino faimalaga e masani o fakaasi atu a tena nofo tumau e pelā me se tino tonu o te fenua ki se tino e tausi ne ia a tuakoi o fenua. E ‵tau foki o fakatalitonu atu ne ia a ia eiloa mai te tuku atu o se pepa fakamaoni, kāti se pasipoti. I se auala tai ‵pau, e manakogina ke fai ne se Kelisiano tonu a mea e uke atu i lō te fai atu fua me e fakatuanaki a ia ki a Keliso. E ‵tau o isi ne fakamaoniga fakaopoopo e fai ne ia. Ne a la mea konā?

A te pati “Kelisiano” ne fakaaoga muamua eiloa i se taimi mai tua ifo o te 44 T.A. E li‵poti mai te tino tusitala i te Tusi Tapu ko Luka: “Ne kamata i Anitioka o fakaigoa a soko ki Kelisiano, e ‵tusa eiloa mo te loto o te Atua.” (Galuega 11:26) Onoono aka la me i a latou kolā e fakaigoa ki Kelisiano ko soko o Keliso. Se a te mea e fai ei se tino mo fai se soko o Iesu Keliso? E fakamatala mai The New International Dictionary of New Testament Theology: “A te uiga o te tautali atu i a Iesu e pelā me se soko ko te tuku kātoatoa atu o te ola o se tino . . . i tena olaga kātoa.” Tela la, a te Kelisiano tonu, ko te tino telā e tautali kātoatoa i so se mea e uiga ki akoakoga mo tulafono a Iesu.

E mata, e mafai o maua a vaegā tino penā i va o tino e tokouke kolā e fai mai i a latou ne Kelisiano i aso nei? Ne a mea ne fai mai ne Iesu e iloa ei ana soko ‵tonu? E ‵kami ne matou a koe ke mafaufau ki te auala e tali aka ei ne te Tusi Tapu a fesili konei. I mataupu kolā e ‵soko mai, ka suke‵suke tatou ki faipatiga e lima ne fai ne Iesu kolā ka fesoasoani mai ke iloa aka i ei ana soko ‵tonu. Ka mafau‵fau tatou me ne fakaasi faka‵lei mai pefea ne Kelisiano i te senitenali muamua me ne maua ne latou a uiga konei. Kae ka taumafai tatou o onoono aka me ko oi la i aso nei e maua i ei a uiga konei mai i tino e tokouke kolā e fai mai i a latou ne Kelisiano.