Fakapilipili Atu Ki Te Atua

“Fakamolemole, Talia Mai ke Toe ‵Foki Atu Matou”

E mata, ko oti ne tavini atu koe ki a Ieova i se taimi? E mata, ko oti koe ne mafaufau ke toe tavini atu ki a ia kae manatu aka me ka toe talia ne ia koe? Fakamolemole, ke faitau faka‵lei ki te mataupu tenei mo te mataupu telā ka ‵soko mai. Ne fakatoka eiloa te avā mataupu konei mo te mafaufau e uiga ki a koe.

“A U NE ‵talo ki a Ieova o fakamolemole ke talia mai ke toe foki atu au kae ke fakamagalo mai au mō te faka‵maega o ia.” Ko muna a se fafine e tokotasi telā ne ‵kese ‵ki eiloa a te olaga ne ola ei a ia mo tena putiakaga faka-Kelisiano. E mata, e alofa koe ki tou fafine? E mata, e mafaufau aka koe penei: ‘E pefea a lagonaga o te Atua e uiga ki a latou kolā ko oti ne tavini mua ki a ia? E mata, e masaua ne ia latou? E mata, e manako a ia ke toe “‵foki mai latou”?’ Ke tali aka a fesili konā, ke suke‵suke tatou ki pati kolā ne tusi ne Ielemia. E seai se fakalotolotolua me ka fakamafanafana atu a tali konā ki tou loto.—Faitau te Ielemia 31:18-20, NW.

Mafaufau ki te ‵kanotonu o pati a Ielemia. I te 740 T.L.M., i se fia sefulu tausaga mai mua o te taimi o Ielemia, ne talia ne Ieova ke ave fakapagota a te malo o matakāiga e sefulu o Isalaelu ne te kau Asulia.a Ne talia ne te Atua a te fakalavelave tenei e pelā me se polopolokiga me ko oti ne kamata o agasala ana tino i auala matagā ‵ki, i te ‵teke atu ki faka‵pulaga kolā e fai sāle atu ne ana pelofeta. (2 Tupu 17:5-18) E mata, ne ‵fuli a faifaiga a tino ona ko tulaga faiga‵ta ne fe‵paki mo latou i te lotou avega fakapagota, i te taimi ne ‵vae ei latou mo te lotou Atua kae e ‵mao ‵ki mai te lotou fenua? E mata, ne puli i a Ieova a mea katoa e uiga ki a latou? E mata, ka talia eiloa ne ia latou ke toe ‵foki mai?

“Ne Lagona ne Au te Salamō”

Ne ala aka a mafaufau o tino i te lotou avēga fakapagotā kae ne sala‵mo eiloa latou. Ne lavea ne Ieova a te loto sala‵mo tonu o latou. Ke fakalogologo ki fakamatalaga a Ieova e uiga ki faifaiga mo lagonāga o te kau Isalaelu kolā ne ave fakapagotā, telā e faipatigina foki me ko Efalaima.

“Ne lagona eiloa ne au a Efalaima e tagi fanoanoa,” muna a Ieova. (Fuaiupu e 18) Ne lagona ne tou tagata a te ‵tagi fanoa‵noa o te kau Isalaelu ona ko ikuga o olotou agasala. E fai latou e pelā me se tamaliki tagata agasala telā e lūlū tena ulu ona ko te lasi o te fanoanoa māfai e toe mafaufau ki tulaga faiga‵ta ne oko a ia ki ei kae ko oko eiloa i te manako ki tena olaga mua i te fale. (Luka 15:11-17) Ne a la muna a tino?

“Ne akoako ne koe au . . . e pelā me se tamā pulumakau e seki akoakogina.” (Fuaiupu e 18) Ne fakailoa mai ne tino me e ‵tau eiloa o polopoloki latou. Me i a latou ne fai pelā me se tamā pulumakau telā e seki akoakogina. Kāti ne fakauiga loa a te faka‵tusaga tenei pelā me ne fai latou e pelā me se tamā pulumakau telā ne seki ‵tau lele eiloa o “lagona a te masuki o te lakau e fakatonutonu ki ei a pulumakau moi fai ne seki ‵teke muamua atu a ia ki te lakau telā e ‵sai ki ei,” ko pati i se fakamatalaga e tasi.

“Fai ke toe foki atu au, kae ka toka au o toe foki, me i a koe ko Ieova toku Atua.” (Fuaiupu e 18) Ne loto ma‵lalo a tino, ka‵laga atu ei latou ki te Atua. Ne ola latou i se olaga fai agasala, kae nei, ne fakamolemole atu latou mō se fesoasoani ke maua se auala e toe ‵foki atu ei latou ki tena taliaga. E fai mai te ‵fuliga e tasi: “A koe ko te motou Atua—fakamolemole, talia mai ke toe ‵foki atu matou.”—Contemporary English Version.

“Ne lagona ne au te salamō. . . . Ne oko mai ki au a te mā, kae ne lagona foki ne au a te māsiasi.” (Fuaiupu e 19) Ne lagona ne tino a te salamō me i a latou ne agasala. Ne talia ne latou ke ‵losi atu kae ne fakaasi ‵tonu mai ne latou a te lotou ‵se. Ne fanoa‵noa foki latou kae faka‵siga ki lalo, e pelā eiloa me tuki olotou fatafata.—Luka 15:18, 19, 21.

Ne sala‵mo eiloa te kau Isalaelu. Ne ‵fonu eiloa latou i te fanoa‵noa, fakaasi atu olotou agasala ki te Atua, kae toe ‵fuli mai kea‵tea mai i olotou auala ma‵sei. E mata, ne fakamāmā aka ne te lotou sala‵mo a te loto o te Atua? E mata, ka talia ne ia latou ke toe ‵foki mai?

“E ‵Tau Eiloa o Alofa Malosi Au ki a Ia”

Ne isi eiloa se sokoga fakapito o Ieova ki te kau Isalaelu. Ana muna: “Ne fai au mo Tamana ki Isalaelu; kae ko Efalaima, ko taku ulumatua.” (Ielemia 31:9, NW.) E mafai pefea o sē talia ne se tamana alofa ke toe foki mai se tamaliki tagata telā ko ‵fonu tena loto i te salamō tonu? Onoono la ki te auala e fakaasi atu ei ne Ieova ana lagonaga faka-Tamana ki luga i ana tino.

“E mata, a Efalaima se tamaliki tagata e fagasele ki a au, io me se tamaliki e tausi fakapelepele? Me ko te lasi o toku faipati e uiga ki a ia ko te masaua faeloa ne au a ia.” (Fuaiupu e 20) Ko oko eiloa i te atafai o pati konā! E pelā me se mātua telā e makeke kae alofa, ko oti ne faipati atu te Atua “e uiga” ki ana tama‵liki, o fakailoa faeloa ki a latou e uiga ki olotou auala agasala. Ona ko te loto ma‵keke kae sē faka‵logo, ne talia ei ne ia ke ave fakapagotā latou—ne iku atu ei ki te tiaki ne latou te fale. Kae tigā eiloa e ‵tau o fakasala ne ia latou, ne seki puli i a ia a latou. E se mafai lele o fai ne ia te mea tenā. E se mafai o puli i se tamana alofa ana tamaliki. Ne pefea la a lagonaga o Ieova i te laveaga ne ia a te salamō ‵tonu o ana tamaliki?

“Ne tagi toku loto ona ko ia. E ‵tau eiloa o alofa malosi au ki a ia.” (Fuaiupu e 20) Ne manako malosi a Ieova ki ana tamaliki. Ne lagona ne ia a te salamō ‵tonu o latou, kae ko oko eiloa i te manako malosi o tou tagata ke toe ‵foki atu latou ki a ia. E pelā mo te tamana i te tala fakatusa a Iesu e uiga ki te tamaliki fakamāumāu mea, a Ieova e “fonu . . . i te alofa” kae loto fiafia o fakatali ana tamaliki kolā e toe ‵foki mai.—Luka 15:20.

“Ieova Talia Mai ke Toe Foki Atu Au!”

A pati i te Ielemia 31:18-20 e tuku mai i ei ki a tatou se mainaga e uiga ki te alofa atafai mo te alofa fakamagalo o Ieova. E se puli i te Atua a latou kolā ne tavini muamua atu ki a ia. E a māfai e ma‵nako a tino penā o toe ‵foki mai ki a ia? A te Atua e toka o “fakamagalo.” (Salamo 86:5) Ka sē afuli lele ne ia kea‵tea a latou kolā e o‵mai ki a ia mo te loto salamō. (Salamo 51:17) Kae tagailā, e fiafia eiloa tou tagata ke toe ‵foki mai latou.—Luka 15:22-24.

A te fafine telā ne taku mai i te kamataga ne mua o gasuesue ke toe foki mai ki a Ieova kae ne āsi atu ki se fakapotopotoga o Molimau a Ieova i te koga tenā. A te mea muamua, e ‵tau mo tou fafine o manumalo i ana lagonaga ‵se. “Au ko oko eiloa i te sē aogā,” e masaua ne ia. Kae ne fesoasoani atu a toeaina o te fakapotopotoga kae tuku atu a fakamalosiga ki tou fafine ko te mea ke toe maua ne ia te malosi faka-te-agaga. E fai mai tou fafine mo te loto ko ‵fonu i te fakafetai, “Ko oko eiloa i te fakaofoofogia me e talia ne Ieova ke toe foki mai au!”

Kafai koe ne tavini muamua ki a Ieova kae ko mafaufau ke toe tavini atu ki a ia, e ‵kami ne matou a koe ke āsi atu ki se fakapotopotoga a Molimau a Ieova i te koga tenā e nofo koe i ei. Masaua me ka tali atu eiloa a Ieova i te alofa mo te atafai māfai e ka‵laga atu a tino loto sala‵mo ki a ia, “Fakamolemole, talia mai ke toe ‵foki atu matou.”

[Fakamatalaga fakaopoopo]