‘E Manako Te Tama O Fakaasi Mai Te Tamana’

“E seai se tino e iloa ne ia te Tamana kae na ko te Tama mo tino ei kolā e manako te Tama o fakaasi atu ki a latou.”—LUKA 10:22.

SE A TAU TALI?

Kaia ne mafai fua ei ne Iesu o fakaasi mai a tena Tamana?

Ne fakaasi atu pefea ne Iesu a tena Tamana ki nisi tino?

I auala fea e mafai ei ne koe o fakaakoako atu ki a Iesu i te fakaasiatuga o te Tamana ki nisi tino?

1, 2. Se a te fesili e faigata ke tali aka ne tino e tokouke, kae kaia?

‘KO OI te Atua?’ E ‵numi a tino e tokouke i te fesili tenei. E pelā me se fakaakoakoga, e tiga eiloa e tali‵tonu a te tokoukega o Kelisiano me i te Atua se Tolutasi, e taku tonu mai ne tino e tokouke me i te akoakoga tenei e faigata ke malamalama i ei. Ne tusi mai a te tino tusitala e tokotasi mo te faifeau: “A te akoakoga tenei e silia atu i tapulā o te mafaufau o te tagata. Ko seke ‵ki eiloa mo fakamasakoga masani io me ko manatu o tino.” I te suā feitu la, a tino e tokouke kolā e talia ne latou a te akoakoga o te evolusione e tali‵tonu me e seai se Atua. E fai mai latou me i mea fakaofoofogia katoa kolā ne faite ne māfua aka loa i a latou. E penā foki loa, i lō te fakafiti me e seai se Atua, ne fai mai a Charles Darwin: “E foliga mai ki a au me i te mataupu kātoa e silia atu i mea e iloa ne te tagata.”

² E isi ne fesili a tino e tokouke e uiga ki te Atua, faitalia me ne a mea e tali‵tonu latou ki ei. Kae e tokouke a tino ko fakagata te lotou salasala ki te Atua ona ko te sē ma‵lie ki tali kolā ne maua ne latou. Ko oti ne ‘fakapouli a mafaufau o tino sē tali‵tonu’ ne Satani. (2 Kolinito 4:4) Tela la, e sē se mea fakapoi me i te tokoukega o tino e ‵numi kae e se iloa ne latou a te munatonu e uiga ki te Atua, te Tamana mo te Māfuaga o te lagi mo te lalolagi!—Isaia 45:18.

3. (a) Ko oi ne fakaasi mai ne ia te Tamana ki a tatou? (e) Ne a fesili ka tali aka ne tatou?

³ E tāua ‵ki eiloa ko tino ke tauloto ki te munatonu e uiga ki te Atua. Kaia? Me ko latou fua kolā e ka‵laga “ki te igoa o Ieova” ka ‵sao. (Loma 10:13) Ko te mea ke ka‵laga atu tatou ki te igoa o te Atua, e ‵tau o iloa ne tatou me ko oi a te Atua kae ko ia se vaegā Tino pefea. Ne akoako ne Iesu Keliso a muna‵tonu tāua konei ki ana soko. Ne fakaasi atu ne ia te Tamana ki a latou. (Faitau te Luka 10:22.) Ka tuku mai ne te mataupu tenei a tali ki fesili konei: Kaia ne mafai ei ne Iesu o fakaasi mai a te Tamana i se auala telā e se mafai ne se isi tino aka o fai? Ne fai pefea ne Iesu a te mea tenā? Kae e mafai pefea o fakaakoako atu tatou ki a Iesu mai te fakaasiatuga, io me fai‵pati atu ki nisi tino e uiga ki te Tamana? Ke mafau‵fau tatou ki fesili konei.

NE MAFAI NE IESU KELISO O FAKAASI MAI TE TAMANA I SE AUALA FAKAPITO

4, 5. Kaia ne mafai ei ne Iesu o fakaasi atu tena Tamana i se auala fakapito?

⁴ A Iesu ko te ‵toe tino ‵lei eiloa ke fesoasoani atu ki nisi tino ke iloa ne latou tena Tamana. Kaia? Me koituai o faite a nisi mea ola katoa, ko leva eiloa ne nofo a Iesu i te lagi e pelā me se tino faka-te-agaga. A iako te “Tama fagasele e tokotasi a te Atua.” (Ioane 1:14; 3:18) Ko Iesu fua ne nofo atu i konā fakatasi mo tena Tamana a koituai o kamata o faite a nisi mea katoa, kae ne mafai ne tena Tamana o saga katoatoa atu ki a ia. I te fesokotaki atu o te suā tino ki te suā tino i te fia afe mo afe o tausaga, ne tauloto eiloa a Iesu e uiga ki tena Tamana mo ana uiga. I te gasolo aka o malosi ‵ki te lā fesokotakiga, ne gasolo aka eiloa o ‵poko a te alofa mo te atafai o te suā tino ki te suā tino. (Ioane 5:20; 14:31) Mafaufau la ki te uke o mea ne tauloto ne Iesu e uiga ki uiga totino o tena Tamana!—Faitau te Kolose 1:15-17.

⁵ Ne fili ne te Tamana a te Tama ke faipati atu mō Ia e pelā me ko “Te Muna a te Atua.” (Fakaasiga 19:13) Tela la, ko Iesu fua ne tuku atu ki ei se tofiga fakapito ke fakaasi atu ne ia te Tamana ki nisi tino. Ona ko te pogai tenei ne tusi mai ei a Ioane me i a Iesu, “Te Muna” e “nofo i te fatafata o te Tamana.” (Ioane 1:1, 18) Kāti ne mafaufau a Ioane ki se tū telā ne masani o fai i taimi ‵kai. E takato pili atu se tino e tokotasi mai mua o te suā tino ko te mea ke faigofie o fai se sautalaga a lāua. I se auala tai ‵pau, ne nofo atu eiloa te Tama “i te fatafata” o te Tamana kae ne mafai o fai se sautalaga ‵loto mo ia.

6, 7. Ne gasolo aka pefea o malosi atu a te fesokotakiga i te va o Tamana mo te Tama?

⁶ Ne gasolo aka faeloa o ‵lei a te fesokotakiga i te va o te Tamana mo Tama. A te Tama ‘ko te pogai o te fiafia o te [Atua] i aso takitasi.’ (Faitau te Faataoto 8:22, 23, 30, 31.) Ne tumau eiloa te gasolo aka o malosi atu a te fesokotakiga i te va o te Tamana mo te Tama. Ne ga‵lue fakatasi lāua, kae ne fakaakoako atu a Iesu ki uiga o tena Tamana. I te taimi ne faite ei a nisi mea ola aka, ne lavea ne Iesu a faifaiga a Ieova ki a latou taki tokotasi, kae ne gasolo aka i ei o ‵poko atu a tena alofa mo te āva ki tena Tamana.

⁷ I te taimi foki ne ‵teke atu ei Satani ki te pulega a Ieova, ne mafai ne te Tama o tauloto ki te auala ne fakaasi atu ei ne Ieova a te alofa, te fai mea tonu, te poto, mo te malosi i se tulaga faigata. Ne fesoasoani atu te mea tenei ki a Iesu ke mafai ne ia o fakafesagai atu ki mea faiga‵ta kolā ka fepaki mo ia i tena galuega talai i te lalolagi.—Ioane 5:19.

8. Kaia e fesoasoani mai a tala fakamalosi loto e uiga ki a Iesu ke tauloto tatou ki uiga o te Tamana?

⁸ Ona ko te pili o tena fesokotakiga ki a Ieova, ne mafai ei ne Iesu o fakaasi mai a te Tamana i se auala telā e manino ‵lei atu i lō so se mea e mafai ne se isi tino aka o fai. A te ‵toe auala ‵lei ke tauloto tatou e uiga ki te Tamana ko te tauloto ki mea ko oti ne akoako mai kae fai ne tena Tama fagasele e tokotasi. E pelā me se fakaakoakoga, e mata, ka malamalama katoatoa tatou i te uiga o te pati “alofa” māfai e faitau fua ne tatou se fakamatalaga mai i se tikisionale? Ka faigata eiloa te mea tenā. Kae kafai e mafau‵fau tatou ki tala i loto i te Tusi Tapu kolā e fakamatala mai i ei a te galuega talai a Iesu, e lavea ne tatou i ei a te atafai o tou tagata ki nisi tino kae e mafai foki o malama‵lama tatou me se a te uiga o te tugāpati me i te “Atua ko te alofa eiloa a ia.” (1 Ioane 4:8, 16) A te alofa e se ko te uiga fua e tasi ne fakaasi atu ne Iesu ki ana soko. Ne fakaasi atu foki ne ia ki a latou a nisi uiga o te Atua i tena nofoga i te lalolagi.

TE AUALA NE FAKAASI MAI EI NE IESU A TENA TAMANA

9. (a) Ne a auala e lua ne fakaasi mai ei ne Iesu a tena Tamana ki ana soko? (e) Taku mai se tala fakatusa ne fakaaoga ne Iesu ke fakaasi mai i ei a tena Tamana.

⁹ Ne fakaasi atu pefea ne Iesu a te Tamana ki ana soko mo latou kolā ne fai fakamuli mo fai ana soko? E lua auala ne fai ei ne ia a te mea tenei: e auala i ana akoakoga mo ana amioga. A te mea muamua, ka tauloto tatou e uiga ki akoakoga a Iesu. A mea kolā ne akoako atu ne Iesu ki ana soko e akoako mai ki a tatou e uiga ki auala, mafaufauga, mo lagonaga o tena Tamana. E pelā me se fakaakoakoga, ne fakatusa ne Iesu a tena Tamana ki se tagata e isi sena lafu mamoe. E tasi te mamoe ko galo. Ona ko tena alofa ki mamoe takitasi, ne tiakina ei ne ia te lafu kae fano o ‵sala a te mamoe e tasi ne galo. Muna a Iesu, i te taimi ne maua ei ne te tagata a te mamoe ne galo, “e sili atu tena fiafia ki te mamoe tenā i lō nisi mamoe e iva sefulu iva kolā ne seki takase‵se keatea.” Kaia ne fakaaoga ei ne Iesu a te tala fakatusa tenei? Ne fakamatala mai tou tagata: “A toku Tamana i te lagi, e se manako ke mate se tokotasi o tino fatauva konei.” (Mataio 18:12-14) Ne a mea e mafai o tauloto ne koe e uiga ki a Ieova mai te tala fakatusa tenei? I nisi taimi kāti ko oko atu ki a koe se lagonaga me i a koe ko sē aoga kae ko fakapuli atu. Kae masaua, me i tou Tamana faka-te-lagi e fiafia ki a koe kae tausi atu ki a koe. E mafaufau a ia e uiga ki a koe e pelā mo “tino fatauva konei.”

10. Ne fakaasi mai pefea ne Iesu a tena Tamana e auala i ana uiga totino?

¹⁰ A te lua o auala ne fakaasi mai ei ne Iesu a te Tamana ki ana soko ko ana amioga. Tela la, i te taimi ne fesili atu ei a te apositolo ko Filipo ki a Iesu: “Fakaasi mai ki a matou te Tamana,” ne mafai ne Iesu o fai atu: “A te tino telā ko kilo mai ki a au ko kilo foki ki te Tamana.” (Ioane 14:8, 9) Konei la a nisi fakaakoakoga o te auala ne fakaasi mai ei ne Iesu a uiga o tena Tamana. I te taimi ne fakamolemole atu ei se tino lepela ki a Iesu ke faka‵lei aka a ia, ne fakapatele atu a Iesu ki te tagata telā ko “‵fonu eiloa i te lepela” kae fai atu ki tou tagata: “Au e manako ke ‵ma koe.” I te otiga ne faka‵lei tou tagata, ne iloa ne te lepela me ne tuku atu ne Ieova a te malosi ki a Iesu ke faka‵lei a ia. (Luka 5:12, 13) I te taimi foki ne mate ei a Lasalo, e se taumate ne lagona ne te kau apositolo a te alofa faka-Tamana i te taimi “ne mafatia kae otia malosi tena loto” kae “tagi ei a Iesu.” E tiga eiloa ne iloa ne Iesu me ka toe fakatu aka ne ia a Lasalo, e ‵pau eiloa te ‵mae o ana lagonaga mo lagonaga o kāiga mo taugasoa o Lasalo. (Ioane 11:32-35, 40-43) Kāti e isi eiloa ne tala faka-te-Tusi Tapu e fiafia koe ki ei e uiga ki a Iesu kolā e fesoasoani atu ke lavea ne koe a te alofa fakamagalo e fakaasi mai ne te Tamana.

11. (a) I te taimi ne ‵fulu faka‵ma ei ne Iesu a te faletapu, se a te mea ne fakaasi mai i ei ne tou tagata e uiga ki tena Tamana? (e) Kaia e fakamafanafana mai ei a te mea tenei ki a tatou?

¹¹ Kafai e faitau koe i te tala ki te ‵fulu faka‵maga ne Iesu a te faletapu, ne a mea e tauloto ne koe? Fakaataata i tou mafaufau a mea ne ‵tupu: Ne fai ne Iesu se kini e faite ki lopu kae faimālō a tino kolā e fakatau a pulumakau mo mamoe ke olo ki tua mo te faletapu. I konā ne fanatu tou tagata ki tino ‵fuli tupe, ‵ligi ki lalo a tupe siliva, kae ‵tule olotou taipola ki lalo. (Ioane 2:13-17) Ne fai ne te faifaiga malosi tenā ke masaua ne soko a te valoaga telā ne tusi ne te tupu ko Tavita, penei: “A toku fia tapuaki i tou fale ko ‵ka i toku loto.” (Salamo 69:9) A mea kolā ne fai ne Iesu ki tāgata ma‵sei konei e fakaasi mai i ei me e manako tonu eiloa tou tagata o puipui a te tapuakiga tonu. E mata, e lavea ne koe a uiga totino o Ieova i a Iesu māfai e faitau koe ki te tala tenei? E fakamasaua mai ki a tatou me e se maua fua ne te Atua a te malosi telā e seai se tapulā ke tapale kea‵tea a amioga ma‵sei mai te lalolagi kae e manako tonu eiloa a ia ke tapale kea‵tea a mea konā. Mafaufau la me ne a lagonaga o Ieova i te kilo atu ki amioga ma‵sei i te lalolagi i aso nei! A lagonaga o Ieova mo Iesu e uiga ki te tulaga tenei e tuku mai i ei ki a tatou se fakamafanafanaga lasi ‵ki māfai e logo‵mae tatou ona ko te sē fai mea tonu.

12, 13. Ne a mea e mafai o tauloto ne koe e uiga ki a Ieova mai i faifaiga a Iesu ki ana soko?

¹² Ke mafaufau tatou ki te suā fakaakoakoga—te auala ne fesoasoani atu ei a Iesu ki ana soko. Ne tumau eiloa latou i te kinau me ko oi te tino e sili. (Maleko 9:33-35; 10:43; Luka 9:46) Ona ko te leva o te taimi ne ‵nofo fakatasi ei a Iesu mo tena Tamana, e iloa ne ia a lagonaga o Ieova e uiga ki te fakamatamata. (2 Samuelu 22:28; Salamo 138:6) Ko oti foki ne lavea ne Iesu a uiga fakamatamata o Satani te Tiapolo. A Satani se tino kaiū telā e saga atu fua ki tena ‵lei. Tela la, ko oko eiloa te fanoanoa o Iesu i te kilo atu ki ana soko kolā ko oti ne akoako ne ia e tumau eiloa i te fakaasi mai o se uiga fakamatamata. Ne ‵saga atu fua latou ki te lotou ‵lei eiloa! Ne lavea foki ne ia a te uiga tenei i a latou kolā ne filifili ne ia e pelā me ne apositolo! Ne fakaasi mai ne latou a te uiga fakamatamata tenei ke oko eiloa ki te ‵toe aso o te olaga o Iesu i te lalolagi. (Luka 22:24-27) Kae ne tumau eiloa a Iesu i te fakatonutonu atu o latou mo te loto alofa. Ne talitonu tou tagata me ka fakaasi mai foki ne latou a te uiga loto maulalo telā ne maua ne ia i se aso.—Filipi 2:5-8.

¹³ E mata, e lavea ne koe a uiga totino o Ieova i te auala ne fakaakoako atu ei a Iesu ki tena Tamana kae fakatonutonu atu mo te kufaki a uiga sē ‵tonu o ana soko? E mata, e tauloto ne koe a mea e uiga ki te Tamana mai i pati mo mea kolā ne fai ne Iesu? E se tiakina ne tena Tamana ana tino faitalia me fai faeloa ne latou a mea ‵se. A te iloaga o uiga o te Atua e fakamalosi mai ki a tatou ke salamo kae ‵talo atu mō tena fakamagaloga māfai e fai ne tatou a mea ‵se.

NE MANAKO TE TAMA O FAKAASI MAI TENA TAMANA

14. Ne fakaasi mai pefea ne Iesu me ne manako a ia o fakaasi atu tena Tamana ki nisi tino?

¹⁴ E taumafai a tino pule e tokouke ke pule atu latou ki tino mai te faiga ke sē malamalama latou, ke sē tuku atu ki a latou a te iloaga telā e manakogina ne latou. A ko Iesu ne seki fai penā. Ne manako a Iesu o fesoasoani atu ki nisi tino ke tauloto e uiga ki tena Tamana, tenā ne fakaasi atu ei ne Iesu a mea katoa e manakogina ke iloa ne latou a Ieova. (Faitau te Mataio 11:27.) Ne tuku atu foki ne Iesu ki ana soko a “te poto ko te mea ke iloa ne tatou te tino telā e tonu,” ko Ieova te Atua. (1 Ioane 5:20) Se a te uiga o te mea tenā? Ne fesoasoani atu a Iesu ki ana soko ke malamalama i mea kolā ne akoako ne ia e uiga ki tena Tamana. Ne seki ‵funa aka ne ia a tena Tamana i se akoakoga fakaa‵tea telā e se mafai o malamalama i ei se tino, e pelā mo te akoakoga o te Tolutasi.

15. Kaia ne seki fai atu ei ne Iesu ki ana soko a mea katoa e iloa ne ia e uiga ki tena Tamana?

¹⁵ E mata, ne fakaasi mai ne Iesu a mea katoa ne iloa ne ia e uiga ki tena Tamana? Ikai, ne fakaasi mai ne ia a te poto me ne seki fai atu ne ia ki ana soko a mea katoa. (Faitau te Ioane 16:12.) Kaia? Me i ana soko ne “se mafai o malamalama” i mea katoa i te taimi tenā. Kae ne fakamatala mai ne Iesu me koi uke atu a mea kolā ka fakaasi atu ki a latou māfai ko oko mai a “te fesoasoani.” A te fesoasoani tenei ko te agaga tapu, ka takitaki ne ia latou “ki mea ‵tonu katoa.” (Ioane 16:7, 13) Kāti ka sē fai atu ne mātua ‵poto a mea katoa ki olotou tamaliki ke oko eiloa ki te taimi ko ma‵tua ‵lei ei a tamaliki kae ko mafai o malamalama. Tela la, e pelā me se mātua poto, ne faka‵tali eiloa a Iesu ke oko ki te taimi ko toka ei ana soko ke malamalama i mea e uke atu e uiga ki te Tamana. Ne aga‵lei a Iesu, kae ne masaua ne ia me e isi ne tapulā o mea e fai ne ana soko.

FAKAAKOAKO KI A IESU KAE FESOASOANI ATU KI NISI TINO KE ILOA NE LATOU A IEOVA

16, 17. Kaia e mafai ei ne koe o fakaasi atu a te Tamana ki nisi tino?

¹⁶ Kafai e iloa ‵lei ne koe se tino kae iloa aka me e ‵gali ana uiga totino, e mata, ka se manako koe o faipati atu ki nisi tino e uiga ki a ia? I te taimi ne nofo ei a ia i te lalolagi nei, ne faipati a Iesu e uiga ki tena Tamana. (Ioane 17:25, 26) E mata, e mafai ne tatou o fai foki penā kae fakaasi atu a Ieova ki nisi tino?

¹⁷ E pelā mo te mea ko oti ne tauloto ne tatou, e lasi fakafia atu a te iloa o Iesu e uiga ki tena Tamana i lō so se tino aka. Kae ne manako a ia o akoako a nisi mea ne iloa ne ia, kae ne fesoasoani atu foki a ia ki ana soko ke malamalama i mea ‵loto e uiga ki tena Tamana. Ko oti ne fesoasoani mai a Iesu ke iloa ne tatou a ‵tou Tamana i se auala telā e se iloa ne te tokoukega o tino i aso nei. Ko oko eiloa i te loto fakafetai o tatou me ne manako a Iesu o fakaasi mai a tena Tamana ki a tatou e auala i ana akoakoga mo amioga! E fakamata‵mata eiloa tatou ke iloa atu a te Tamana. (Ielemia 9:24; 1 Kolinito 1:31) Ko oti ne ga‵lue malosi tatou ke maua se fesokotakiga ‵pili mo Ieova, kae ko gasolo o pili mai nei a ia ki a tatou. (Iakopo 4:8) Tela la, ko mafai nei ne tatou o akoako atu ki nisi tino a mea kolā e iloa ne tatou e uiga ki a Ieova. E mafai pefea o fai ne tatou a te mea tenā?

18, 19. I auala fea e mafai ei ne koe o fakaasi atu te Tamana ki nisi tino? Ke fakamatala mai.

¹⁸ Kafai e fakaakoako atu tatou ki a Iesu mai i ‵tou pati mo mea e fai ne tatou, ko fakaasi atu ne tatou a te Tamana ki nisi tino. Ke masaua me i te tokoukega kolā e fetaui mo tatou i ‵tou galuega talai e se iloa ne latou te Atua. Kāti e ‵se olotou manatu e uiga ki te Atua me ko oti ne akoako latou ki akoakoga ‵se. E mafai ne tatou o akoako atu ki a latou a te igoa o te Atua, tena fuafuaga mō te tagata, mo ana uiga totino mai te Tusi Tapu. E fesoasoani mai foki ki a tatou a nisi tala i te Tusi Tapu ke ‵kilo atu tatou ki uiga o te Atua i se kiloga fou telā e seki malamalama muamua tatou i ei. E mafai o fai‵pati tatou mo nisi tino i loto i te fakapotopotoga ki mea ko oti ne tauloto ne tatou, kae e mafai foki o fakamalosi atu ki a latou.

¹⁹ E ‵tau o fakaakoako atu tatou ki a Iesu kae fakaasi atu te Tamana e auala i ‵tou amioga. Kafai e lavea ne tino a te alofa o Keliso i mea e fai ne tatou, kāti ka ma‵nako foki latou ke maua se fesokotakiga mo Iesu mo tena Tamana. (Efeso 5:1, 2) Ne fai mai te apositolo ko Paulo ki a tatou: “Ke fakaakoako mai ki a au e pelā mo au e fakaakoako ki a Keliso.” (1 Kolinito 11:1) Ko oko eiloa i te taulia o tatou ke fesoasoani atu ki nisi tino ke lavea ne latou a Ieova e auala i ‵tou amioga! E tonu, e ‵tau mo tatou katoa o tumau i te fakaakoako atu ki a Iesu i te fakaasiatuga o te Tamana ki nisi tino.