Iesu—Te ki ki se Olaga Aoga

E MATA, ne aoga tonu eiloa te olaga o Iesu? E manino ‵lei me ne tupu aka a ia i se kogā koga e se maumea, kae ne nāi kope fua o te lalolagi tenei ne maua ne ia. Ne “seai sena fale mo ana nofo.” (Luka 9:57, 58) E se gata i ei, ne takalialia, fakamasei, kae oti aka loa tamate ei a ia ne ana fili.

Kāti ka fai mai koe, ‘E se tenā te vaegā olaga ne mafaufau au me e aoga!’ Kae e uke atu a mea e uiga ki te olaga o Iesu kolā e ‵tau o mafaufau faka‵lei tatou ki ei. Ke suke‵suke aka tatou ki vaega e fa o tena olaga.

1. NE ISI SE FUAFUAGA A IESU I TENA OLAGA ​—KE FAI TE LOTO O TE ATUA.

“A taku meakai ko te faiga o te loto o ia telā ne uga mai ne ia au.”​—Ioane 4:34.

E auala i ana pati mo ana faifaiga, ne manako a Iesu ke fakataunu a te loto o tena Tamana faka-te-lagi, ko Ieova.a Ne fiafia ‵ki eiloa a Iesu i te faiga o te loto o te Atua. Ne faka‵tusa ne ia a te faiga tenā ki mea‵kai, e pelā mo te tusi siki telā ne fatoa siki mai. Mafaufau ki fakanofonofoga kolā ne fai ei ne ia a te faka‵tusaga tenā.

Ne fai ne Iesu a pati konei i te fakaafiafi. (Ioane 4:6) Ne sasale atu a ia i te fenua maugā o Samalia i te taeao kātoa, tela la, e mautinoa ‵lei me ko fia kai a ia. A te tonuga loa, ne fakamalosi atu ana soko ki a ia: “Te Faiakoga, na kai.” (Ioane 4:31) Mai i tena tali, ne fakaasi mai ne Iesu me ne makona ‵lei kae fakamalosi aka a ia ne te faiga o te galuega a te Atua. E mata, e se tenā te vaegā tagata telā ne aoga tonu a tena olaga?

2. NE ALOFA MALOSI A IESU KI TENA TAMANA.

“Au e alofa ki te Tamana.”​—Ioane 14:31.

Ne pili ‵ki eiloa te fesokotakiga o Iesu mo tena Tamana i te lagi. Ne fakamalosi aka a Iesu ne te ‵poko o tena alofa ki te Atua ke fakailoa atu ne ia a mea e uiga ki tena Tamana​—Tena igoa, ana fuafuaga, mo ana uiga. E auala i ana pati, faifaiga, mo kilokiloga, ne fakaata faka‵lei mai ne Iesu a tena Tamana​—ke oko ki te tulaga telā e lavea tonu ne tatou i a Iesu a tena Tamana. Tela la, i te taimi ne fakamolemole atu ei a Filipo ki a Iesu: “Fakaasi mai ki a matou te Tamana,” ne tali atu a Iesu: “A te tino telā ko kilo mai ki a au ko kilo foki ki te Tamana.”​—Ioane 14:8, 9.

Ne alofa malosi a Iesu ki tena Tamana kae ne loto fiafia o fakalogo ki a ia ke oko eiloa ki te mate. (Filipi 2:7, 8; 1 Ioane 5:3) Ne faka‵fonu ne te alofa ki te Atua a te olaga o Iesu ki mea aoga.

3. NE ALOFA A IESU KI TINO.

“E seai se tino e sili atu tena alofa i lō te mea tenei, ko te tuku atu ne se tino a tena ola mō ana taugasoa.”​—Ioane 15:13.

E mautinoa ‵lei a ikuga matagā o ‵tou olaga i aso mai mua e pelā me ne tino sē ‵lei katoatoa. E fakamatala mai te Tusi Tapu: “Ne oko mai ei te agasala ki te lalolagi e auala i te tagata e tokotasi, a ko te mate e auala i te agasala, kae ne faka‵solo atu a te mate ki tino katoa me ko agasala a latou katoa.” (Loma 5:12) E se mafai ne tatou o ‵sao mai i te ikuga o te agasala, telā ko te mate.​—Loma 6:23.

Kae fakafetai tatou me ne tuku mai ne Ieova se faka‵leiga ki tulaga o tino. Ne talia ne ia a tena Tama ‵lei katoatoa kae seai se agasala, ko Iesu, ke logo‵mae kae mate ko te mea ke tuku mai a te togiola telā e manakogina ke fakasaoloto a tino mai te ‵nofo pologa ki te agasala mo te mate. Ona ko tena alofa ki tena Tamana mo tino, ne loto fiafia a Iesu o fakalogo kae tuku mai tena ola ‵lei katoatoa mō tatou. (Loma 5:6-8) Ne fai ne te alofa sē kaiū penā ke aoga a tena olaga.b

4. NE ILOA NE IESU ME NE MAUA NE IA A TE ALOFA MO TE TALIAGA A TENA TAMANA.

“Tenei eiloa taku Tama, ko taku fagasele telā ko oti ne talia ne au.”​—Mataio 3:17.

Ne fai mai ne Ieova a pati konā mai te lagi i te taimi ne papatiso ei a Iesu. Ne fakaasi faka‵lei mai ne Ieova i konā a tena alofa mo te taliaga o tena Tama, ko Iesu. E se tioa eiloa o fai mai a Iesu mo te loto talitonu: “E alofa mai . . . te Tamana ki a au”! (Ioane 10:17) Ne fakafesagai atu a Iesu ki ‵tekemaiga mo fakatauemuga mo te loto talitonu i tena Tamana e alofa kae talia ne ia a ia. Ne fesoasoani atu foki a te alofa mo te taliaga tenei ke fakafesagai atu a Iesu ki te mate. (Ioane 10:18) E seai se fakalotolotolua me ne aoga malosi atu te olaga o Iesu mai te mafaufau ki te alofa mo te taliaga a tena Tamana.

Ne maua tonu eiloa ne Iesu se olaga aoga. E manino ‵lei, me e mafai o tauloto ne tatou a mea e uke mai i a ia e uiga ki te auala e mafai ei o maua ne tatou se olaga telā e aoga tonu. Ka faipati a te suā mataupu ki nisi fakatakitakiga kolā ne fai atu ne Iesu ki ana soko e uiga ki te auala e ‵tau o ola latou i ei.