E Puipui Tatou Ne Ieova Mō Te Fakaolataga

“Koutou kolā e puipuigina ne te ‵mana o te Atua e auala i te fakatuanaki mō te fakaolataga telā ka fakaasi mai i te taimi o te gataga.”​—1 PETELU 1:4, 5.

KA TALI AKA PEFEA NE KOE?

Ne ‵futi mai pefea tatou ne Ieova ki te tapuakiga tonu?

E mafai pefea o talia ne tatou a Ieova ke takitaki ne ia tatou ki ana polopolokiga?

E tuku mai pefea ne Ieova a fakamalosiga ki a tatou?

1, 2. (a) Kaia e tali‵tonu ei tatou me ka fesoasoani mai te Atua ke tumau tatou i te fakamaoni ke oko eiloa ki te gataga? (e) E pefea te iloa ‵lei ne Ieova a tatou taki tokotasi?

“KO TE tino telā e lotomau ke oko ki te gataga ka sao eiloa a ia.” (Mataio 24:13) E taku manino mai i pati konā a Iesu me kafai e ma‵nako tatou ke ‵sao atu i te fakaseaiga o te lalolagi a Satani, e ‵tau o fakamaoni tatou ki a Ieova ke oko eiloa ki te gataga. E se fakauiga i ei me e fakamoemoe a Ieova ke kufaki tatou e auala i te tali‵tonu ki ‵tou poto io me ko ‵tou malosi totino. E tauto mai te Tusi Tapu: “Kae ko te Atua e fakamaoni, e se mafai o talia ne ia ke tofotofogina koutou ke silia atu i te mea telā e mafai o fa‵ki ne koutou, kae kafai ko oko mai a tofotofoga, e tuku mai foki ne ia a te auala e ‵sao ei koutou, ko te mea ke mafai ne koutou o kufaki i ei.” (1 Kolinito 10:13) Se a te mea e tauloto ne tatou mai pati konā?

² E fakamautinoa aka ne Ieova ke mo ā e fakaosoosogina tatou ke silia atu i te mea e mafai ne tatou o fa‵ki. E mafai ne Ieova o fai a te mea tenei me iloa ne ia a mea katoa e uiga ki a tatou, e aofia i ei a ‵tou fakalavelave, ‵tou uiga totino, mo te lasi o te kufaki o tatou. E mata, e iloa tonu tatou ne te Atua? Ao. E fai mai te Tusi Tapu me e iloa ne Ieova a mea katoa e uiga ki a tatou taki tokotasi. E iloa ne ia ‵tou faifaiga masani mo ‵tou mea e fai i aso takitasi. E iloa foki ne ia a mea i ‵tou mafaufau mo ‵tou loto.—Faitau te Salamo 139:1-6.

3, 4. (a) E fakatalitonu mai pefea ne te fiafia telā ne fakaasi atu ki a Tavita me e saga mai a Ieova ki a tatou taki tokotasi? (e) Se a te galuega fakaofoofogia e fakataunu ne Ieova i aso nei?

³ E mata, e maua tonu ne te Atua Malosi Katoatoa a te vaegā fiafia tenei ki tino fatauvā? Ne mafaufau a te faisalamo ko Tavita e uiga ki te mea tenei. Ana muna ki a Ieova: “Ka onoono au ki te lagi, telā ne faite ne koe, te masina mo fetu, kolā ne fakatu ne koe i olotou tulaga; se a te aoga o te tagata e manatu mai ei koe ki a ia?” (Salamo 8:3, 4) Kāti ne fakafesili ne Tavita a te fesili tenei ona ko te fiafia telā ne fakaasi atu ne Ieova ki a ia. I te taimi koi fai ei a Tavita, te toe tamaliki foliki eiloa a Iese, mo fai se tausi mamoe, ne mafaufau a Ieova ki tou tagata e pelā me “se tino e manako a ia ki ei” kae ne fili a ia ke fai mo takitaki o Isalaelu. (1 Samuelu 13:14; 2 Samuelu 7:8) Ne iloa ne te Mafuaga o te lagi mo te lalolagi kātoa a mafaufauga mo lagonaga totino o Tavita e ui eiloa koi fai fua a Tavita mo fai se tausi mamoe. Mafaufau la me e pefea a lagonaga o Tavita i te iloaga ne ia a te mea tenā!

⁴ E fakaofoofogia foki a te fiafia telā e fakaasi mai ne Ieova ki a tatou i aso nei. E fakamaopoopo ne ia a tino “o atufenua katoa” kolā e “tāua” ki a ia ke fai mo ana tino tapuaki. (Hakai 2:7) E fesoasoani atu foki tou tagata ki a latou kolā e tavini atu ki a ia ke tumau i te fakamaoni. E fai pefea ne Ieova a te mea tenei? A koituai o mafau‵fau tatou ki te tali o te fesili tenā, ke fai‵pati muamua tatou ki te auala ne ‵futi mai ei ne Ieova a tino ki te tapuakiga tonu i te taimi muamua.

E TALIA TATOU NE TE ATUA

5. E ‵futi atu pefea ne Ieova a tino ki tena Tama? Tuku mai se fakaakoakoga.

⁵ Muna a Iesu: “E seai se tino e vau ki a au seiloga ke talia a ia ne te Tamana, telā ne uga mai ne ia au.” (Ioane 6:44) E fakaasi mai i pati konā me e ‵tau o maua ne tatou te fesoasoani o te Atua ko te mea ke fai tatou mo soko o Keliso. E manakogina ke ‵futi atu tatou ne te Atua ki tena Tama. E fai pefea ne ia a te mea tenā? E fakaaoga ne ia a te galuega talai mo tena agaga tapu. Pelā me se fakaakoakoga, i te taimi ne ‵nofo atu ei a Paulo mo tena taugasoa misionale i Filipi, ne fetaui lāua mo se fafine e igoa ki a Litia. E fai mai te Tusi Tapu me i te taimi ne kamata ei lāua o talai atu a te tala ‵lei ki tou fafine, “ne ‵tala ne Ieova a tena loto ko te mea ke saga tonu atu ki mea kolā e faipati mai ne Paulo.” Ne fakaaoga ne te Atua a tena agaga ke fesoasoani atu ki tou fafine ke malamalama kae ke talia foki a te fekau. Ka ko te ikuga, ne papatiso a Litia mo tena kāiga.—Galuega 16:13-15.

6. Ne ‵futi atu pefea ne te Atua a tatou katoa ki loto i te tapuakiga tonu?

⁶ E mata, ne tupu fua a te mea tenei ki a Litia? Ikai. Kafai koe se Kelisiano tukugina atu, a koe foki ne ‵futi mai ne te Atua ki te tapuakiga tonu. E pelā mo te lavea ne te ‵tou Tamana faka-te-lagi se mea tāua i te loto o Litia, ne lavea foki ne ia se mea ‵lei i loto i a koe. I te taimi ne kamata ei koe o fakalogologo ki te tala ‵lei, ne fakaaoga ne Ieova a tena agaga tapu ke fesoasoani atu ke malamalama koe kae ke talia a te fekau. (1 Kolinito 2:11, 12) I te taimi ne taumafai ei koe o fakagalue aka i tou olaga a mea kolā ne tauloto ne koe mai te Tusi Tapu, ne fakamanuia ne tou tagata au taumafaiga. I te taimi ne tuku atu ei koe ki a ia, ne fiafia tena loto. A te tonuga loa, ne fesoasoani atu a Ieova ki a koe i te taimi muamua ne tavini atu ei koe ki a ia kae koi tumau eiloa te fesoasoani atu ki a koe.

7. E iloa pefea ne tatou me ka fesoasoani mai te Atua ke tumau tatou i te fakamaoni?

⁷ Ne fesoasoani mai a Ieova ki a tatou ke kamata o tavini atu ki a ia, tela la e mautinoa eiloa me ka tumau te fesoasoani mai o ia ki a tatou ke tumau i te fakamaoni. E pelā mo te iloa ne ia me ne seki o‵mai tatou ki loto i te munatonu i a tatou eiloa, ka sē mafai foki o ‵nofo atu tatou i loto i te munatonu i a tatou eiloa. Ne tusi atu a te apositolo ko Petelu ki Kelisiano fakaekegina me i a latou e “puipuigina ne te ‵mana o te Atua,” ko te mea ke tumau latou i te fakamaoni ki a ia. (1 Petelu 1:4, 5) A muna a Petelu kolā ne fai e mafai eiloa o fakauiga ki Kelisiano katoa kae se mea fakafiafia foki ki a tatou taki tokotasi i aso nei. Kaia? Me e ma‵nako a tatou katoa ki te fesoasoani o te Atua ko te mea ke tumau tatou i te fakamaoni ki a ia.

NE TAOFI AKA MAI TE FAIGA O SE MEA ‵SE

8. Kaia e manakogina ei ke fakaeteete tatou i te faiga o se mea ‵se?

⁸ E mafai ne fakalavelave o te olaga mo ‵tou tulaga sē ‵lei katoatoa o taofi aka tatou mai te ‵kilo atu ki mea i te auala telā e kilo atu a Ieova ki ei. Kae e mafai eiloa o fai ne tatou se mea ‵se e aunoa mo te iloa ne tatou. (Faitau te Kalatia 6:1.) E tenei eiloa te mea telā ne tupu ki a Tavita.

9, 10. Ne taofi aka pefea ne Ieova a Tavita mai te faiga o se agasala matagā, kae se a te mea e fai ne Ia mō tatou i aso nei?

⁹ Ne fakaasi mai ne Tavita a te lasi o te loto pulea i te taimi ne salasala ei a ia ne te tupu ko Saulo ke ta. Ne seki taumafai a Tavita o toe taui atu ki a Saulo faitalia me ne maua ne ia se avanoaga ke fai penā. (1 Samuelu 24:2-7) Kae mai tua fua o te mea tenā, ne galo i a Tavita a tena loto pulea. Ne manako tou tagata ki ne meakai mo vai ma ana tāgata, tenā ne fakamolemole atu ei a ia mo te āva ki te fesoasoani o te suā tino Isalaelu e igoa ki a Napalu. Ne pati ‵toko ne Napalu a Tavita kae ita ma fesoasoani atu ki tou tagata. Ko oko eiloa i te kaitaua o Tavita telā ne fakaiku aka ei ne tou tagata ke toe taui atu ki a Napalu mo tāgata katoa i tena fale. Ne seki nofo a Tavita o mafaufau me ka fakamasino a ia ne te Atua i te tamatega o tino e seai ne olotou mea ‵se ne fai. Kae ko te avaga a Napalu ko Apikaila, ne taofi ne ia a Tavita mai te faiga o te mea ‵se kae matagā tenei. Ne iloa aka i ei ne Tavita me ne fakaaoga ne Ieova a Apikaila ke puipui a ia, tenā ne fai atu ei a ia ki tou fafine: “Ke vikia te Aliki, te Atua o Isalaelu, telā ne uga mai ne ia koe i te aso nei! Au e fakafetai ki te Atua e ‵tusa mo tou alofa mai, e pelā foki mo te mea ne fai ne koe i te aso nei o taofi ne koe a au mai te fai o te agasala ko te tatino mo te taui atu foki toku puapuagā.”—1 Samuelu 25:9-13, 21, 22, 32, 33.

¹⁰ Se a te akoakoga e mafai o tauloto ne tatou mai te tala tenei? E mafai ne Ieova o taofi aka tatou mai te faiga o se mea ‵se kae matagā. E tonu, e se ‵tau o fakamoe‵moe tatou me ka uga mai ne Ieova se tino ke taofi aka tatou i taimi katoa e mafau‵fau ei tatou o fai se agasala matagā. Ka sē mafai foki o iloa tonu ne tatou a te auala ka gasuesue ei a Ieova i tulaga penā io me ne a mea ka talia ne ia ke ‵tupu ke fakataunu i ei ana fuafuaga. (Failauga 11:5) Kae e mafai o tali‵tonu tatou me e iloa faeloa ne Ieova a ‵tou tulaga kae ka fesoasoani mai ki a tatou ke tumau i te fakamaoni atu ki a ia. E tauto mai a ia: “Ka akoako atu ne au ki a koe te auala e ‵tau o fano koe i ei; ka fakatonutonu kae akoako ne au a koe.” (Salamo 32:8) E tuku mai pefea ne Ieova a manatu fakatonutonu? E aoga pefea ki a tatou? Kae kaia e mafai ei o talitonu tatou me i a Ieova e takitaki ne ia ana tino i aso nei? Onoono ki te auala e tali aka ei a fesili konā i te tusi ko Fakaasiga.

E PUIPUI TATOU NE POLOPOLOKIGA

11. E iloa ‵lei pefea ne Ieova a mea kolā e ‵tupu i loto i fakapotopotoga o ana tino?

¹¹ I te fakaasiga telā ne tusi i te Fakaasiga mataupu e 2 mo te 3, e lavea ne te Tupu ko Iesu Keliso a te mea ko tupu i fakapotopotoga e fitu i Asia Foliki. E lavea ne Keliso a mea e uke atu ko ‵tupu i loto i fakapotopotoga konei i lō mea masani. I loto i te fakaasiga, e faipati eiloa tou tagata ki mea fakapito kolā ne ‵tupu e penā foki loa mo tino taki tokotasi. Ne tuku atu foki ne ia ki fakapotopotoga a pati fakamālō io me ko polopolokiga kolā e manakogina ne latou. Se a te uiga o te fakaasiga tenei mō tatou? E sui ne fakapotopotoga e fitu a Kelisiano fakaekegina mai tua o te 1914. Kae e tiga eiloa ne fakasino tonu atu a te polopolokiga a Keliso ki te kau fakaekegina, e maua ne fakapotopotoga katoa o tino o te Atua i te lalolagi i aso nei a mea aoga mai i ei. Tela la, e mafai ne tatou o fai atu me e fakaaoga ne Ieova a tena Tama ke takitaki ne ia ana tino i aso nei. E mafai pefea o maua ne tatou a mea aoga mai te takitakiga tenā?

12. E mafai pefea o talia ne tatou a Ieova ke ‵taki ne ia tatou?

¹² E tasi te auala e talia ei ne tatou a Ieova ke takitaki ne ia tatou ko te faiga o sukesuke totino. E tuku mai ne Ieova ki a tatou a polopolokiga e uke e auala i lōmiga a te tavini fakamaoni kae poto. (Mataio 24:45) Kae kafai e ma‵nako tatou ke maua a mea aoga mai te polopolokiga tenei, e ‵tau o fakaavanoa ne tatou a taimi e lava ke suke‵suke ki ei kae fakaaoga a mea e tauloto ne tatou i ‵tou olaga. Kafai e fai a ‵tou sukesukega totino, e talia ne tatou a Ieova ke puipui ne ia tatou mai te faiga o se mea ‵se. (Iuta 24) Kai sukesuke aka loa koe ki se mea i loto i ‵tou lōmiga kae mafaufau aka penei, ‘A te mea tenei ne tusi fua mō oku’? E ‵tau o talia ne koe a te mea tenei e pelā me se fakatonutonuga mai i a Ieova. E pelā me se taugasoa e fakapatele mai ki ‵tou tuauma ke ‵saga atu tatou, e mafai foki o fakaaoga ne Ieova a tena agaga ke fesoasoani mai ke iloa ne tatou me isi se mea i ‵tou amioga io me ko uiga totino e manakogina ke tai faka‵lei aka ne tatou. Kafai e talia ne tatou a te takitakiga a te agaga tapu, e talia ne tatou a Ieova ke ‵taki ne ia tatou. (Faitau te Salamo 139:23, 24.) Ke fai‵pati aka la tatou ki te uke o taimi mo taumafaiga e fakaaoga ne tatou ki ‵tou sukesukega.

13. Kaia e fai ei me se mea poto ke mafau‵fau ki te uke o taimi mo taumafaiga e fakaaoga ne tatou ki ‵tou sukesukega totino?

¹³ Kafai e tō uke a taimi e fakamāumāu ne tatou ki fakafiafiaga, ka sē lava taimi e maua ne tatou ke fai a sukesukega totino. Ne fai mai se taina e tokotasi me e faigofie ‵ki ke tupu se mea penei. Kaia? Ne fakamatala mai tou tagata: “Ko maua gofie atu nei a fakafiafiaga i lō taimi mua, kae ‵togi māmā atu i lō taimi mua. E maua i loto i televise, i loto i komipiuta, mo telefoni. Ko sikomia tatou ne mea konā.” Kafai e se fakaeteete tatou, e mafai o fakaaoga faeloa ne tatou a taimi e uke ki fakafiafiaga, ko seai ei se taimi e ‵toe ke fai au sukesukega ‵loto. (Efeso 5:15-17) E ‵tau mo tatou taki tokotasi o fesili ifo penei: “E pefea te uke o taimi e fakamāumāu sāle ne au ke sukesuke ki mea ‵loto e uiga ki te Muna a te Atua? E mata, e fai fua penā māfai e isi soku vaega i te fakatasiga io me se lāuga e fakatoka ki ei? E se taumate e mafai o fakaaoga faka‵lei ne tatou a taimi e fai ei ‵tou sukesukega totino e penā foki mo ‵tou Tapuakiga a Kāiga i afiafi ke sukesuke ‵loto ki te Tusi Tapu ke maua te poto o Ieova, e pelā eiloa me salasala tatou ki koloa. E mafai ne te poto tenei o puipui tatou kae fesoasoani mai ke tumau tatou i te fakamaoni ke oko eiloa ki te gataga.—Faataoto 2:1-5.

E FESOASOANI MAI A FAKAMALOSIGA KE FA‵KI TATOU

14. E fakaasi mai pefea ne te Tusi Tapu me i a Ieova e saga mai ki ‵tou lagonaga?

¹⁴ Ne logo‵mae a Tavita i tulaga fakafanoa‵noa kae fakafi‵ta e uke i tena olaga. (1 Samuelu 30:3-6) E fai mai te Tusi Tapu me ne iloa ne Ieova a lagonaga o Tavita. (Faitau te Salamo 34:18; 56:8.) E iloa foki ne te Atua a ‵tou lagonaga. Kafai e “loto vāivāi” tatou io me e “seai se fakamoemoega,” e fakapilipili mai a ia ki a tatou. Ne fakamafanafana atu a te manatu tonu tenei ki a Tavita, telā ne usu mai penei: “Au e fiafia kae ‵lifu i tou alofa tumau. E iloa ne koe oku puapuaga; e lavea foki ne koe oku fakalavelave.” (Salamo 31:7) Kae uke atu a mea e fai ne Ieova i lō te lavea fua ne ia a ‵tou puapuaga. E fesoasoani mai a ia ki a tatou ke fa‵ki e auala i te tukumaiga o fakamafanafanaga mo fakamalosiga. E tasi te auala e fai ei ne ia a te mea tenei, ko fakatasiga faka-Kelisiano.

15. Se a te akoakoga e mafai o tauloto ne tatou mai te mea ne tupu ki a Asafo?

¹⁵ E fesoasoani mai a te mea ne tupu ki a Asafo ke malamalama tatou i te pogai e tasi e aoga ei a te kau ki fakatasiga. Ne mafaufau faeloa a Asafo me kaia e logo‵mae ei a tino amio‵tonu kae ko tino amio ma‵sei e manuia, kae ne fakavāivāi atu a te mea tenā ki a ia. Ne kamata o mafaufau tou tagata me e seai se aoga o te taviniga ki a Ieova. Ne fakamatala mai ne tou tagata ana lagonaga i te auala tenei: “Ne fi‵ta toku mafaufau kae ‵mae toku loto.” Ka ko te ikuga, toeitiiti kae fakagata ne ia a tena taviniga ki a Ieova. Se a te mea ne fesoasoani atu ki a Asafo ke fakatonu aka a tena mafaufau? Ana muna: “I taku fanoga ki loto i tou Faletapu.” Ne mafai ne ia o faka‵tonu aka ana faifaiga mai te ‵kau fakatasi mo nisi tino kolā e tapuaki atu ki a Ieova. Ne iloa aka ne Asafo me i te manuia o tino amio ma‵sei e se tumau, kae kafai eiloa ne Ieova a te fakamasinoga tonu. (Salamo 73:2, 13-22) Kāti e ‵pau ‵tou lagonaga mo Asafo i nisi taimi. A te sē fai o te mea tonu telā e lavea ne tatou i te lalolagi a Satani e mafai o fai i ei tatou ke māfatia kae loto vāivāi. Kae kafai e ‵kau fakatasi tatou mo ‵tou taina mo tuagane, e maua ne tatou a te malosi mo te fesoasoani telā e manakogina ko te mea ke tumau tatou i te tavini atu ki a Ieova mo te fiafia.

16. E mafai pefea o fesoasoani mai a te fakaakoakoga a Hana ki a tatou?

¹⁶ Kae e a māfai e isi se fakanofonofoga i loto i te fakapotopotoga e fai ne ia ke faigata tou kau atu ki fakatasiga? Kāti se tauliaga i loto i te fakapotopotoga telā e ‵tau o tiaki ne koe kae ko mā koe i ei, io me se mea telā e se lotomalie koe ki se taina io me se tuagane. Kafai e penā loa, e se taumate ka fesoasoani atu ki a koe a te fakaakoakoga a Hana. (Faitau te 1 Samuelu 1:4-8.) A te suā avaga a te avaga tagata a Hana ko Penina, e fakaitaita faeloa ne ia a Hana. Ne gasolo aka eiloa o faigata malosi ki a Hana a te mea tenei i tausaga katoa e olo ei te kāiga o ofo a taulaga ki a Ieova i Sailo. Ne māfatia ‵ki tou fafine telā “ko tagi sale . . . kae ko ita foki ma kai.” Kae ne seki fakagata eiloa te fano o Hana ki te koga telā e mafai ei o tapuaki atu a ia ki a Ieova. Ne fakatāua ne Ieova a tena fakamaoni kae fakamanuia atu ki a ia.—1 Samuelu 1:11, 20.

17, 18. (a) I auala fea e maua ei ne tatou a fakamalosiga i fakatasiga? (e) E pefea ou lagonaga ki te alofa atafai telā e tuku atu ne Ieova ki a koe?

¹⁷ E ‵tau o tau‵tali a Kelisiano i aso nei i te fakaakoakoga a Hana. E manakogina ke ‵kau faeloa tatou mo te fakamaoni ki fakatasiga. E tuku mai i ‵tou fakatasiga a fakamalosiga kolā e manakogina ne tatou. Ko oti ne maua ne tatou katoa a fakamalosiga mai i ei. (Epelu 10:24, 25) I loto i fakatasiga, e lagona ne tatou a te a‵lofa o taina mo tuagane, kae fakamafanafana mai a te mea tenā ki a tatou. Pelā me se fakaakoakoga, kāti e lagona ne tatou se mea i te lāuga io me i se tali telā e otia ei ‵tou loto. I sautalaga e fai ne tatou, kāti e fakalogologo faka‵lei mai se taina io me se tuagane io me fai mai ne pati fakamafanafana loto ki a tatou. (Faataoto 15:23; 17:17) Kae kafai e ‵kau atu tatou i te usuga o pese ki a Ieova, e toe fakamalosi aka kae fia‵fia foki tatou. E manakogina eiloa ne tatou a fakamalosiga kolā e maua i fakatasiga māfai e isi ne mafaufauga o tatou e fakalavelave mai. E maua i fakatasiga a ‘fakamafanafanaga totino’ a Ieova kolā e fesoasoani mai ki a tatou ke kufaki kae tumau i te fakamaoni. —Salamo 94:18, 19.

¹⁸ E fai ne te alofa atafai o Ieova ke tokagamalie tatou e pelā mo te lagonaga o te fai-salamo ko Asafo i te taimi ne usu atu ei a ia ki a Ieova: “Ne taofi ‵mau ne koe toku lima kae takitaki atu au ne koe ki tau fakatonuga.” (Salamo 73:23, 24) Ko oko eiloa te lasi o ‵tou loto fakafetai ki a Ieova mō te puipuiga mo te fesoasoani e tuku mai ne ia ke kufaki tatou ke oko eiloa ki te gataga!

[Ata i te itulau e 29]

A koutou foki ne ‵futi mai ne te Atua ki te tapuakiga tonu

[Ata i te itulau e 30]

E puipuigina tatou māfai e talia ne tatou a polopolokiga a te Atua ke takitaki ei tatou

[Ata i te itulau e 31]

E fesoasoani mai a fakamalosiga ke kufaki tatou