NE ILOA NE KOE?

E mata, ne toe fakatu aka a te faletapu o Ielusalema mai tua o te 70 T.A.?

MUNA a Iesu me e seai eiloa se fatu o te faletapu o Ieova e moe i luga i te suā fatu​—se valoaga telā ne fakataunu i te taimi ne fakamaofa ei a Ielusalema ne te kautau a Loma mai lalo i te takitaki kautau ko Tito i te 70 T.A. (Mata. 24:2) Fakamuli ifo, ne palani a te emupela ko Julian ke toe faite a te faletapu.

Ne taku a Julian ko te emupela fapaupau fakaoti o Loma. Ne maua ne te tuatina tenei o Constantine te Sili se mea telā e taku me se akoakoga faka-Kelisiano. Kae mai tua o tena faiga mo fai te emupela i te 361 T.A., ne ‵teke katoatoa atu tou tagata ki akoakoga konā mo faifaiga sē fakamaoni a lotu Kelisiano i ana aso kae talia a mea fapaupau. Ne fakasino atu a tusi o tala fakasolopito ki tou tagata e pelā me ko “te Aposetate.”

Ne takalialia a Julian ki Kelisiano. Kāti e tasi te pogai me i te taimi koi ono ei ana tausaga, ne matea ne ia a sui o te kau Kelisiano ne tamate ne latou a tena tamana mo nisi kāiga. E ‵tusa mo tino tusitala i mea fakalotu, ne fakamalosi atu a Julian ki te kau Iutaia ke toe faite te lotou faletapu, mo te talitonu me fakatalitonu mai i te mea tenei me i a Iesu se pelofeta loi.a

E seai se fakalotolotolua me ne manako eiloa a Julian o toe faite a te faletapu. Ne sau‵tala a tino tusitala me ne kamata tonu eiloa a te galuega mo te pogai ne taofi aka ei a te galuega, māfai ne fai ne tou tagata. E tasi fua te mea e mautinoa ‵lei. Ne tamate a Julian i te tausaga tupu mai tua o tena faiga mo fai te emupela, kae ne seki toe faite a te faletapu.