Fakalavelave o te Natula—Se Fakamaoniga i te Atua e Sauā?

PATI A NISI TINO: “E pule te Atua ki te lalolagi, tela la, e māfua mai i a ia a fakalavelave o te natula; ko tena uiga, a ia e sauā.”

PATI A TE TUSI TAPU: “Te lalolagi kātoa ko nofo mai lalo i te pule a te tino masei.” (1 Ioane 5:19) Ko oi la “te tino masei”? E fakaasi mai i te Tusi Tapu me i a ia ko Satani. (Mataio 13:19; Maleko 4:15) E se tonu a te mea tenā? Mafaufau ki te mea tenei: Kafai e isi se malosi o Satani ki luga i te lalolagi, e fakamalosi ne ia a tino ke kaiū, kaima‵nako, kae sē mafau‵fau faka‵lei pelā mo ia. E mata, e se fesoasoani mai te mea tenā ke fakamatala atu te pogai e se mafai ei o tausi faka‵lei atu te tagata ki tena koga nofo tonu i te lalolagi? E faka‵pula mai ne tino ‵poto e tokouke me i te sē tausi faka‵lei ki te koga ‵nofo e mafai o isi sena tusaga i fakalavelave o te natula, kāti mai te fakamāfuaga o latou, fakama‵losiga o latou, io me ko te faiga o tino ke faigo‵fie o pokotia i ei.

Kaia la ne talia ei ne te Atua ke uke a fakamalosiga e fai ne Satani i te kamataga? E maua te tali māfai e toe ‵foki tatou ki te kamataga o te tala fakasolopito o tino, i te taimi ne ‵teke ei a ‵tou mātua muamua ki te Atua e pelā me ko te Pule. Ne tau‵tali a te tokoukega o tino i te auala tenā talu mai i te taimi tenā. A te fakaikuga tenā​—ke ‵teke atu ki te pulega a te Atua​—ne tuku atu i ei a te lalolagi o tino ki lima o te fili o te Atua, ko Satani. Ne taku ne Iesu a Satani ko te “Pule o te lalolagi.” (Ioane 14:30) E mata, ka pule a Satani ki te se-gata-mai? Ikai!

E se fai pelā me e se fia saga mai a Ieovaa ki te logo‵mae telā ne fakamāfua mai ne Satani. A te tonuga loa, e otia malosi te loto o te Atua ona ko te logo‵mae o tino. E pelā me se fakaakoakoga, e fai mai a te Tusi Tapu e uiga ki tulaga faiga‵ta kolā ne oko ki te fenua o Isalaelu: “Ne lagona eiloa ne te Aliki [Ieova] te lotou ka‵laga atu, kae lavea mai foki ne ia te lotou puapuaga.” (Salamo 106:44) Ona ko te alofa fakamagalo, ko oti ne fai ne te Atua se fakatokaga ke fakaseai a te pulega sauā a Satani i se taimi pili mai mua nei! Ko oti ne filifili aka ne ia a tena Tama, ko Iesu Keliso, ke fai mo fai se Tupu amiotonu kae fai mea tonu ke oko ki te se-gata-mai.

TE AUALA E AOFIA KOE I EI: E ui eiloa ne fakatamala a te pulega a Satani o puipui a tino mai i fakalavelave o te natula, ka fai eiloa ne te pulega a Iesu a te mea tenā. E tasi te taimi ne puipui ei ne Iesu ana soko mai i se kaumatagi malosi. E fai mai te tala i te Tusi Tapu: “Ne . . . ‵liko ne ia te matagi kae fai atu ki te tai: ‘Malū! Filemu!’ Ne mate te matagi kae malū palapala te tai.” Muna a te kau soko: “Ko oi la te tino tenei? E faka‵logo foki te matagi mo te tai ki a ia?” (Maleko 4:37-41) E tuku mai ne te mea tenā ne tupu se loto talitonu me ka puipui ne Iesu a tino faka‵logo katoa i te taimi o tena pulega e pelā me se Tupu.​—Tanielu 7:​13, 14.