Kaia e Fai Mai ei a Tino i te Atua e Sauā?

E MATA, e fakapoi atu ki a koe a te fesili i te ‵kava o te mekesini tenei? E fakapoi atu ki nisi tino, kae ko te tokoukega o tino i aso nei e mafau‵fau me ko te Atua e sauā​—io me tukutaumate latou i a ia e fai penā. Kaia?

E fesili mai a nisi tino kolā ne ‵sao i fakalavelave o te natula: “Kaia e talia ei ne te Atua ke ‵tupu a mea konei? E mata, a ia e se fia saga mai? Io me ko ia e sauā?”

E pokotia foki penā a nisi tino māfai e fai‵tau ki te Tusi Tapu. Ne oko te lotou faitauga ki tala e pelā mo te tala e uiga ki a Noa mo te Lolo, kae mafaufau aka latou, ‘Kaia ne tamate ei ne se Atua alofa a tino katoa konā? E mata, a ia e sauā?’

E fesili ifo ne koe ki a koe eiloa a fesili penā i nisi taimi? Io me manatu aka koe me e se mafai ne koe o tuku atu se tali ki a latou kolā e mafau‵fau me i te Atua e sauā? Ona ko mea konā, ke mafaufau ki se fesili fakaa‵tea telā e mafai o fesoasoani mai.

KAIA E TAKALIA‵LIA EI TATOU KI UIGA FAKASAUĀ?

E takalia‵lia tatou ki uiga fakasauā me e iloa ne tatou a te mea tonu mo te mea ‵se. E ‵kese ‵ki tatou mo manu i te feitu tenā. Ne faite tatou ne te ‵tou Mafuaga “ke foliga ki a ia.” (Kenese 1:27) Se a te mea e fakauiga ki ei? Ne tuku mai ne ia te malosi ke fakaata atu i a tatou ana uiga mo amioga ‵lei, te iloa ne ia o te mea tonu mo te mea ‵se. Mafaufau ki te mea tenei: Kafai ne maua ne tatou mai i te Atua a te iloa o te mea tonu mo te mea ‵se kae masani o takalia‵lia tatou ki amioga fakasauā, e mata, e se fakatalitonu mai i te mea tenā me i te Atua e takalialia foki ki ei?

E fakapa‵tonu ne te Tusi Tapu a te ‵tonu o te mea tenā, me e fakatalitonu mai te Atua ki a tatou i loto i te Tusi Tapu: “[E] ma‵luga . . . oku auala mo mafaufauga i lō otou auala mo mafaufauga.” (Isaia 55:9) Kafai ne fakaiku ne tatou me i te Atua e sauā, e mata, e se fai atu ne tatou se mea telā e ‵kese mo pati a te Tusi Tapu​—e pelā me ko fai atu tatou i ‵tou auala e ma‵luga atu i ana auala? Se mea poto ke maua a fakamatalaga ‵tonu e uke atu a koi tuai o fakaiku aka se mea. E se taumate e ‵tau o fakafesili ne tatou a te pogai e foliga mai ei i nisi faifaiga a ia e pelā me e sauā, kae e se fakafesili ne tatou me ko te Atua e sauā. Ke fesoasoani mai ki a tatou, mafaufau me se a te uiga tonu o te “sauā.”

Kafai e taku ne tatou se tino me e sauā, ko fakamasino ne tatou ana manakoga. A te tino sauā ko te tino telā e fiafia o kilokilo ki nisi tino e logo‵mae io me e se fia saga ki olotou fakalavelave. Tela la, a te tamana telā e polopoloki a tena tama tagata me e fia faka‵mae atu ki lagonaga o tena tama e sauā. Kae ko te tamana telā e polopoloki a tena tama tagata o fakatonu io me puipui a ia e ‵lei. E faigofie o sē malamalama tatou i pogai e fai ei ne nisi tino a mea, e pelā mo te iloa ‵lei ne koe o se tino ne ‵se a tena kilokiloga e uiga ki a koe.

Ke mafau‵fau aka tatou ki pogai e lua e mafau‵fau ei a nisi tino i te Atua e sauā​—ko fakalavelave o te natula kolā e lavea ne tatou i aso nei mo fakamasinoga a te Atua kolā e fai‵tau ne tatou i loto i te Tusi Tapu. E mata, e fakaasi tonu mai i mea ‵tonu konei me i te Atua e sauā?