E Mata, ka Talitonu Fakamaoni Koe ki te Atua?

MAFAUFAU me e isi sou taugasoa telā e tavae malosi ne koe, kae e se malamalama koe i se mea ne fai ne ia. Ko taku fakamasei ne nisi tino ana faifaiga kae fakamasino ne latou ana lagonaga, kae fai aka olotou pati i tou taugasoa e sauā. E mata, ka lotomalie fakavave koe ki olotou pati, io me faka‵tali koe ke lagona ne koe a fakamatalaga mai i tou taugasoa? Kafai e se nofo atu a ia i konā o fakamatala a mea ne fai ne ia, e mata, ka kufaki koe kae sē fakamasino fakavave aka ne koe a ia?

A koi tuai o tali aka ne koe, e ‵tau o iloa ne koe a mea e uke atu. E mafai o fesili ifo koe penei, ‘E pefea te iloa ‵lei ne au a te taugasoa tenei, kae se a te pogai e tavae ei ne au a ia?’ E ‵lei te mea tenā. Kae mafaufau la: E mata, e se mafai foki ne tatou o fakaaoga a te fakatakitakiga fakavae tenā ki te fesili tenei me ko te Atua e sauā?

E mafai o faigata ke malamalama koe i nisi mea kolā ne fai ne te Atua, io me ‵numi i mea kolā ne talia ne ia ke ‵tupu. E tokouke a tino ka fai atu ki a koe me i te Atua e sauā kae ka fakamalosi atu ki a koe ke fakamasino ana fuafuaga e pelā mo latou. E mata, ka fakalotolotolua koe e uiga ki a ia ke oko ki te taimi e iloa ei ne koe a mea e uke atu? Kāti e fakalagolago a te tali ki te iloa ‵lei ne koe a te Atua. Fesili ifo ki a koe eiloa, ‘Ne a mea ‵lei ko oti ne fai ne te Atua mō oku e pelā me se taugasoa?’

Kafai ne faigata tou olaga, e mafai o fakaosoosogina koe ke fai mai me ne seki fai aka eiloa te Atua mo fai se taugasoa. Kae mafaufau malie aka mō se taimi toetoe. E mata, ne fai ne te Atua a mea faiga‵ta i tou olaga io me ko mea ‵lei? E pelā mo te mea ne lavea ne tatou, a Satani ko “te pule o te lalolagi tenei,” kae e se ko Ieova. (Ioane 12:31) Tela la, a Satani ko te māfuaga o fanoanoaga mo faifaiga sē ‵tonu e uke o te lalolagi tenei. E mata, e se lotomalie koe me e māfua mai a ‵tou fakalavelave i ‵tou tulaga sē ‵lei katoatoa mo te mafuli‵fuli o fakanofonofoga?

I te suā feitu, se a te mea ne panaki tonu mo te Atua? Mafaufau ki pati a te Tusi Tapu: me i te Atua “ne faite ne ia te lagi mo te lalolagi”; kae aofia i ana galuega “fakaofoofogia kae gali” a te faitega o ‵tou foitino; kae ko Ieova “e pule i otou ola mo mea katoa e fai ne koutou.” (Salamo 124:8; 139:14; Tanielu 5:23) Se a te uiga o mea katoa konā?

E fakauiga i ei me e ‵tau mo tatou o tuku katoatoa atu a ‵tou ola, ‵tou mea katoa ki te ‵tou Mafuaga. (Galuega 17:28) E fakauiga i ei me i te meaalofa ko te ola, te gali o te lalolagi i ‵tou tafa, te gali o te alofa mo te faitaugasoa, te fiafia ki te tami, patele, lagona, mo te ‵sogi​—a mea katoa konei ne meaalofa mai i te Atua. (Iakopo 1:17) E mata, e se lotomalie koe me i fakamanuiaga konā e fai ei a ia mo fai se Taugasoa telā e ‵tau o tavae kae tali‵tonu tatou ki ei?

E tonu, e mafai o faigata ke talitonu koe ki te Atua. E se taumate e manatu aka koe me e seki iloa ‵lei ne koe a ia ke talitonu ei koe ki a ia. E malamalama tatou i te mea tenā. I mataupu toetoe konei, e se mafai o fai‵pati tatou ki pogai katoa e fakamasino ei ne nisi tino a te Atua e pelā me e sauā. Kae mata, e se aoga a te taumafai ke iloa ‵lei ne tatou a te Atua?a E tali‵tonu matou me kafai e fai koe penā, ka iloa ‵lei ne koe a te munatonu e uiga ki te Atua. E mata, a ia e sauā? E ‵kese ‵ki eiloa a te mea tenā: “Te Atua ko te alofa eiloa a ia.”​—1 Ioane 4:8.